<<    <     1 Saannaa     16     >    >> 
16
Ayiwa, a Tɛhɛnɛ Baa Kilɛ wo jomɔ pʼi nɔ Anani ja Zhewu na, Basha keree na na: 2 «Ɲiŋɛ puuro ni nɛ mu lɔ yeegea, na mu teŋɛ na pye ɲuŋɔfɔɔ Izirayɛli ɲuŋɔ ni, na sipyii pee. Ga a mu di daha Zheroboomu wo koo li fɛni, na Izirayɛli pye wʼa jurumu pye, nɛ wo sipyii pee, a pʼi nɛ luu yirige ni pu wo jurumu wu ni. 3 Lee wuu na nʼa da ba Basha ni wu puga ki ɲuŋɔ tugo. Nɛ na ba ma puga ki pye ba Nebati ja Zheroboomu wogo kʼa pye wɛ. 4 Basha wo kpuun shɛn wemu ba xhu kanha funŋɔ ni, puun pu da wee xa. Wu kpuun shɛn wemu ba xhu sige ni, fugba shazhɛɛrɛ ti na wee jɔ.»
5 Ayiwa, Basha wo kapyegee kisaŋaa, wu na pye naŋmaga, ni lemu bɛri wʼa pye ge, yee bɛɛri ya ka Izirayɛli koomɔ pu wo saannaa pu wo caŋa ɲɛhɛɛ jomɔ pu wo sɛmɛ wu ni. 6 A Basha di shɛ binnɛ ni wu tii pu ni yaŋa kanha na, a pʼi wu ɲuŋɔ ŋmɔhɔ Tirisa kulo li ni. A wu ja Ela di diin saanra ti na wu tɛgɛ. 7 Keree shuun ɲuŋɔ tàan Tɛhɛnɛ Baa Kilɛ wo jomɔ pu bi nɔ Basha ni wu puga ki na Kilɛ tudunmɔɔ Zhewu ɲɔ na, Anani wo ja we. Li nizhiinɛ, keree kiimu kʼa pɛn Tɛhɛnɛ Baa Kilɛ mu ge, kee Basha bi byi. A wu Tɛhɛnɛ Baa Kilɛ luu yirige ni wu kapyegee niguuŋɔɔ ki ni, na ɲɛri pye ba Zheroboomu wo puga kʼa pye wɛ. Li shuun wuu, wʼa Zheroboomu wo puga ki ɲuŋɔ tugo.
Ela ya pye Izirayɛli koomɔ pu wo saan we
8 Ayiwa, Zhuda saan Aza wo saanra ti yee kɛlɛɛ shuun ni gbaara (26) wuu li na Basha ja Ela ya pye Izirayɛli koomɔ pu wo saan we Tirisa kulo li ni. A wu yee shuun pye saanra ti ni. 9 Wu kashɛnŋmɔ wa mɛgɛ ki bye na Zimiri, wee bye wu kashɛn wotoriyo yi taaga ki wo ɲuŋɔfɔɔ, a wee di woni pye wu kaa na. Caŋa ka, na Ela yaha Tirisa kulo li ni, wʼa gba fo na ɲawɔhɔ wɔ wuyɛ na, wu puga ki kaɲaha shɔɔnrimɔ Arisa kaban Tirisa ni, 10 a Zimiri di nɔ jé, na wu gbo. Lee ya pye Zhuda saannaa Aza wo saanra ti yee kɛlɛɛ shuun ni gbarashuun (27) wuu li na, a wu diin saanra ti na wu tɛgɛ. 11 Ba wʼa ɲɛri saan, na diin saanra koro li na wɛ, a wu Basha wo puga ki bɛɛri ɲuŋɔ tugo, wu ya ná nigin bɛ yaha wu mu wɛ, wu ceborona nigin bɛ, kelee wu naɲii nigin bɛ wɛ. 12 A Zimiri di Basha wo puga ki bɛɛri ɲuŋɔ tugo, na saha ni Tɛhɛnɛ Baa Kilɛ wo jomɔ pu ni, pee pemu wʼa bi jo Kilɛ tudunmɔɔ Zhewu ɲɔ na, na wá Basha na ge. 13 Lee ya pye Basha ni wu ja Ela wo jurumu wu bɛɛri wuu na, ni pʼa Izirayɛli pye wʼa jurumu wemu pye ge, ni wee bɛ wuu na. A pu jurumu wu di Tɛhɛnɛ Baa Kilɛ, Izirayɛli wo Kilɛ wu luu yirige.
14 Ayiwa, Ela wo kapyegee kisaŋaa, lemu bɛɛri wʼa pye ge, kee ya ka Izirayɛli wo saannaa pu wo caŋa ɲɛhɛɛ jomɔ pu wo sɛmɛ wu ni.
Zimiri ya pye Izirayɛli koomɔ pu wo saan we
15 Ayiwa, Zhuda saannaa Aza wo saanra ti yee kɛlɛɛ shuun ni gbarashuun (27) wuu li na Zimiri ya pye Izirayɛli koomɔ pu wo saan we. A wu cabyaa gbarashuun pye saanra ti ni Tirisa kulo li ni. Lee bi sipyiire ti ta tʼa shɛ kashɛn sin na Gibetɔn kulo li maha, Filisiti shɛɛn pu wo kulo le. 16 Sipyiire temu ti bi kashɛn ki sin na kulo li maha ge, a pee di ganha na yi nuri na: «Zimiri ya woni pye, wʼa saan wu gbo!» Kee caŋa ke, a Izirayɛli nagoo pu bɛɛri di kashɛn keŋɛ ki ɲuŋɔfɔɔ Omuri teŋɛ na pye saan Izirayɛli ɲuŋɔ ni, kashɛn keŋɛ ki ɲahagbaa na. 17 A Omuri ni Izirayɛli bɛɛri di yìri Gibetɔn ni, na shɛ kashɛn sin na Tirisa kulo li maha. 18 Ba Zimiri ya pa li ɲa na kulo lʼa co wɛ, a wu gari saanra puga ki ni, na shɛ na le puga ki na, na xhu wà. 19 Lee ya pye wu jurumu wu wuu na. Lemu lʼa kolo Tɛhɛnɛ Baa Kilɛ mu ge, lee wu bi pye. Zheroboomu ya jurumu wemu pye, na Izirayɛli bɛ pye wʼa jurumu wemu pye ge, a Zimiri bɛ di lee koo le ɲaari.
20 Ayiwa, Zimiri wo kapyegee kisaŋaa, ni woni wemu wʼa pye ge, yee ya ka Izirayɛli koomɔ pu wo saannaa pu wo caŋa ɲɛhɛɛ jomɔ pu wo sɛmɛ wu ni.
21 A Izirayɛli nagoo pʼi daa wee tuun wu ni na pye kabaya shuun. A sipyiire ti taaga ka di daha Ginati ja Tibini fɛni, na wee teŋɛ na pye saan. A taaga kisaŋa di daha Omuri fɛni. 22 Piimu pʼa bi taha Omuri fɛni ge, fanha bye pee ni na toro Ginati ja Tibini wuu pu tàan. A Tibini di xhu, a Omuri di bye saan we.
Omuri ya pye Izirayɛli koomɔ pu wo saan we
23 Ayiwa, Zhuda saannaa Aza wo saanra ti yee kɛlɛɛ taanri ni nigin (31) wuu li na, Omuri ya pye Izirayɛli wo koomɔ pu wo saan we. A wu yee kɛ ni shuun pye saanra ti ni. Tuun wemu ni wʼa yee gbaara pye saanra ti ni Tirisa kulo li ni ge, 24 a wu Samari wo faaboboŋɔ ki shɔ Shemɛri mu warifyɛn tuuŋɔɔ kabɔfoŋɔɔ gbaara (6.000) na. A wu kulo la yereŋɛ faaboboŋɔ ki ɲuŋɔ ni, na lee mɛgɛ le na Samari, na saha ni faaboboŋɔ ki kafɔɔ Shemɛri wo mɛgɛ ki ni.
25 Lemu lʼa kolo Tɛhɛnɛ Baa Kilɛ mu ge, a Omuri di lee pye. A wu kapyeguuŋɔɔ pye na ye wu ɲahagbaa fɛɛ pu bɛɛri na. 26 Nebati ja Zheroboomu ya jurumu wemu pye, ni wʼa Izirayɛli pye wʼa jurumu wemu bɛ pye ge, a Omuri di lee koo li ɲaari fo li tɛhɛnɛ. A pu jurumu wu di Tɛhɛnɛ Baa Kilɛ, Izirayɛli wo Kilɛ wu luu yirige.
27 Ayiwa, Omuri wo kapyegee kisaŋaa, le wʼa pye ge, ni nara keree kiimu wʼa pye ge, yee ya ka Izirayɛli koomɔ pu wo saannaa pu wo caŋa ɲɛhɛɛ jomɔ pu wo sɛmɛ wu ni. 28 A Omuri di shɛ binnɛ ni wu tii pu ni yaŋa kanha na, a pʼi wu ɲuŋɔ ŋmɔhɔ Samari ni. A wu ja Akabu di diin saanra ti na wu tɛgɛ.
Akabu ya pye Izirayɛli koomɔ pu wo saan we
29 Zhuda saannaa Aza wo saanra ti yee kɛlɛɛ taanri ni gbarataanri (38) wuu le, Omuri ja Akabu wʼa teŋɛ na pye Izirayɛli wo koomɔ pu wo saan we Samari fiige ki ni. A wu yee kɛlɛɛ shuun ni shuun (22) pye saanra ti ni. 30 A Omuri ja Akabu di kakuuŋɔɔ pye Tɛhɛnɛ Baa Kilɛ na na toro wu ɲahagbaa shɛɛn pu bɛɛri tàan. 31 Nebati ja Zheroboomu ya jurumu wemu bɛɛri pye ge, wee bi cɛ́rɛ wu ɲii ni. Lee funŋɔ ni a wu Sidɔn saannaa Etibaali poro Zhezabɛli leŋɛ, na Bamɔti-Baali wo pɛɛŋɛ ki ɲɔ kɔn, na ganha na nuguro sinni wee fɛɛ ni. 32 A wu Bamɔti-Baali wo puga ka yereŋɛ Samari kulo li ni, na saraya tawologo ka yàa kee ni. 33 A Akabu di pɛɛŋɛ tinnɛ bɛ sin yapɛrɛɛ Ashera mɛgɛ na. Wʼa keree niɲɛhɛŋɛɛ kiitiigee bɛ pye na Tɛhɛnɛ Baa Kilɛ, Izirayɛli wo Kilɛ wu luu yirige na toro saannaa pusamaa bɛɛri tàan piimu pʼa toro wu ɲaha na ge.
34 Ayiwa, wee tuun we ninumɔ ni Bɛtɛli shɛɛn Iyɛli ya Zheriko kulo li sinvonɔ sin. Ba wʼa li nɔhɔshanma pu sin wɛ, a wu jashiimɛ Abiramu munaa di jé li ni. Ba wʼa gburaya yi bɛ le wɛ, a wu kurogo ja Segubu wo munaa di jé li ni, na saha ni Tɛhɛnɛ Baa Kilɛ wo jomɔ pu ni Nuni ja Zhozuwe ɲɔ na.