1 Saannaa 15

Zhuda koomɔ pu saannaa Abiyamu wo caŋa ɲii li keree

(2 Caŋa Ɲɛhɛɛ Jomɔ 13:1-3)

Ayiwa, Nebati ja Zheroboomu wo saanra ti yee kɛ ni gbarataanri wuu le Izirayɛli ni, lee yee le Abiyamu ya pye Zhuda koomɔ pu wo saan. 2 A wu yee taanri pye saanra ti ni Zheruzalɛmu ni. Wu nu wu mɛgɛ ki bye Maaka, Abishalomu wo poro pushɔ wu bye wii. 3 Wu to wʼa jurumu wemu bɛɛri pye toro ge, a wu wee ninumɔ pye: Wu bi ta wu zɔ wu bɛɛri kan Tɛhɛnɛ Baa Kilɛ, wu Kilɛ wu mu, ba wu sefɛlɛ Dawuda ya li pye wɛ. 4 Ga a Tɛhɛnɛ Baa Kilɛ, wu Kilɛ wu di wu tirige shɛn wa yaha Zheruzalɛmu ni Dawuda wuu na. A wu ja kan Abiyamu mu, wemu na ba Zheruzalɛmu fɛɛrɛ pye ge, na wee teŋɛ saanra koro li na. 5 Bani Dawuda bi Tɛhɛnɛ Baa Kilɛ ɲidaan pyi. Wu shi wu caŋa ɲɛhɛɛ ki bɛɛri ni, ɲɔmɛjogoo kiimu bɛɛri ki bi kan wu mu ge, wu ya ta fiin foro lee la shishiin tàan wɛ, fo Xhɛti shi shɛɛn Uri wo keree ki yɛ. 6 Kashɛn ki bye Oroboomu ni Zheroboomu tɛ ni wu shi wu caŋa ɲɛhɛɛ ki bɛɛri ni.

(2 Caŋa Ɲɛhɛɛ Jomɔ 13:22-23)

7 Ayiwa, Abiyamu wo keree kisaŋaa, lemu bɛɛri wʼa pye ge, lee bɛɛri ya ka Zhuda koomɔ pu wo saannaa pu wo caŋa ɲɛhɛɛ jomɔ pu wo sɛmɛ wu ni. Kashɛn ki bye wu bɛ ni Zheroboomu tɛ ni. 8 Lee kadugo na, a Abiyamu di shɛ binnɛ ni wu tii pu ni yaŋa kanha na. A pʼi wu ɲuŋɔ ŋmɔhɔ Dawuda wo kulo li ni. A wu ja Aza di diin saanra koro li na wu tɛgɛ.

Aza ya pye Zhuda koomɔ pu wo saan we

(2 Caŋa ɲɛhɛɛ Jomɔ 14:1-2)

9 Ayiwa, Izirayɛli saan Zheroboomu wo saanra ti yee kɛlɛɛ shuun (20) wuu li na, Aza ya pye Zhuda koomɔ pu wo saan we. 10 A wu yee kɛlɛɛ shishɛɛrɛ ni nigin (41) pye saanra ti ni Zheruzalɛmu ni. Wu nu wu mɛgɛ ki bye Maaka, Abishalomu wo poro pushɔ wu bye wii.

Zhuda koomɔ pu saannaa Aza wo caŋa ɲii li keree

11 Ayiwa, a Aza di kasaaŋaa pye Tɛhɛnɛ Baa Kilɛ ɲaha tàan, ba wu to Dawuda ya li pye wɛ. 12 Navarashaa, ni namaa dɔdɔɔ piimu wo dɔdɔɔrɔ ti bye kalɛɛ ge, a wu pee ɲuŋɔ tugo na laha fiige ki ni. Yapɛrɛɛ kiimu bɛɛri wu tii pʼa bi yàa ge, a wu kee bɛɛri ɲuŋɔ tugo.

(2 Caŋa Ɲɛhɛɛ Jomɔ 15:16-18)

13 Ayiwa, wu nu Maaka wu wi ge, a wu saanzhagara ti shɔ wee na, bani wʼa bi yapɛrɛ la yàa Ashera mu. A Aza di wu yapɛrɛ li kpɔn shan, na li sorogo Sedɔrɔn dugo ki ɲɔ na. 14 Ga gan tapyeye yi ɲuŋɔ ya ta tugo wɛ, ali ma li ta bɛ Aza zɔ wu bɛɛri bye ni Tɛhɛnɛ Baa Kilɛ ni, wu shi wu caŋa ɲɛhɛɛ ki bɛɛri ni. 15 Wu to wu bi lemu yaha Tɛhɛnɛ Baa Kilɛ yahama ni ge, ni wuyɛ pyaa ki bɛ bi lemu yaha Tɛhɛnɛ Baa Kilɛ yahama ni ge, a wu ba ni lee ni Tɛhɛnɛ Baa Kilɛ wo puga ki ni: warifyɛn, ni sanni, ni yaŋmuyɔ yatii bɛ.

(2 Caŋa Ɲɛhɛɛ Jomɔ 16:1-6)

16 A kashɛn di bye yaha Aza ni Izirayɛli saan Basha tɛ ni, pu shi wu caŋa ɲɛhɛɛ ki bɛɛri ni. 17 Caŋa ka Izirayɛli wo saan Basha ya shɛ do Zhuda na. A wu kashɛn ɲaha kɔn kɔn kasɔrɔgɔ yereŋɛ na taga Arama kulo li maha, kɔnhɔ wu Zhuda saannaa Aza wo sipyii pu ɲaha kɔn, pu ganha bu já da jin, pʼi da fòro wɛ. 18 Wari wemu ni sanni wemu wu bi kori Tɛhɛnɛ Baa Kilɛ wo naafuu wu tayahaŋa ke, ni saan wu wo puga ki wo naafuu wu tayahaŋa ki ni ge, a Aza di yee bɛɛri lɔ, na yi kaa le wu wo kaaŋa ki wo sipyii pu keŋɛ ni. Lee kadugo na, a wu pu tun na kari Tabirimɔ ja, ni Xheziyɔn ɲabige Bɛni-Adadi mu. Wee bye Aramu wo saan, na ɲɛ Damasi ni. A wu pu tun na pu shɛ wu pye: 19 «Wù kariɲɛɛgɛ leŋɛ nɛ ni ma ni, ba ma to we ni nɛ wo to wu bye mɛ kariɲɛɛgɛ ni wɛ! Nʼa ma kan warifyɛn ni sanni. Shɛ mʼa shɛ ma ni Basha wo kariɲɛɛgɛ ɲɔmɛɛ li kyɛɛgi, Izirayɛli wo saan we, kɔnhɔ wu laraga kɔn na na.» 20 A Bɛni-Adadi di saannaa Aza woyo yi logo, na wu kashɛn ɲuŋɔfɛɛ pu tun kari Izirayɛli wo kulogoo ki fɛni. A pʼi shɛ Iyɔn kulo li co, ni Dan kulo le, ni Abɛli-Bɛti-Maka kulo le, ni Kinerɛti wo koomɔ pu bɛɛri, na fara Nɛfitali wo fiige ki bɛɛri na. 21 Ba Basha ya yee logo wɛ, a wu Arama kulo li wo yàa wu ɲɔ yereŋɛ, na guri shɛ diin Tirisa kulo li ni. 22 Ayiwa, a saannaa Aza di Zhuda shɛɛn pu bɛɛri yiri, wu ya shɛn nigin bɛ ye wɛ, Basha bi tiin ni faakagereye yemu taga na Arama kulo li yari ge, kɔnhɔ pʼi shɛ yee lɔ. A saannaa Aza di shɛ yee taga Bɛnzhamɛ wo Geba kulo le, ni Misipa kulo li yàa.

(2 Caŋa Ɲɛhɛɛ Jomɔ 16:11—17:1)

23 Ayiwa, Aza wo kapyegee kisaŋaa bɛɛri, wu na pye naŋmaga, ni keree kiimu bɛɛri wʼa pye ge, ni kulogoo kiimu wʼa yàa ge, yee ya ka Zhuda koomɔ pu saannaa pu wo caŋa ɲɛhɛɛ jomɔ pu wo sɛmɛ wu ni. Ga tuun wemu ni wʼa pa lɛ ge, a tɔɔyɔ yama pa di wu co. 24 A Aza di shɛ binnɛ ni wu tii pu ni yaŋa kanha na, a pʼi wu ɲuŋɔ ŋmɔhɔ ni wu tii pu ni, wu to Dawuda wo kulo li ni. A wu ja Zhozafati di diin saanra ti na wu tɛgɛ.

Nadabu ya pye Izirayɛli koomɔ pu wo saan

25 Ayiwa, Zhuda wo saan Aza wo saanra ti yee shuun wuu li na Zheroboomu ja Nadabu ya pye Izirayɛli koomɔ pu wo saan we. A wu yee shuun pye Izirayɛli ɲuŋɔ ni. 26 Lemu lʼa kolo Tɛhɛnɛ Baa Kilɛ mu ge, a wu lee pye. Wu to wʼa jurumu wemu pye, na Izirayɛli bɛ pye wʼa jurumu wemu pye ge, a wu daha wee fɛni. 27 Ayiya ja Basha, na foro Isakari wo puga ki ni, a wee di ba woni pye wu kaa na. Filisiti shɛɛn kulo lemu li ɲɛ na Gibetɔn ge, tuun wemu ni Nadabu ni Izirayɛli bɛɛri ya shɛ lee kulo li kuuri kashɛn kaa na ge, a Basha di shɛ wu gbo Gibetɔn ni. 28 A Basha di wu gbo Zhuda saannaa Aza wo saanra ti yee taanri wuu li na, na diin saanra ti na wu tɛgɛ Izirayɛli ɲuŋɔ ni. 29 Ba wʼa tiin saanra ti na wɛ, na Zheroboomu wo puga ki bɛɛri ɲuŋɔ tugo. Wu ya shɛn nigin bɛ yaha wʼa kori Zheroboomu mu wɛ. A wu wu ɲuŋɔ tugo na saha ni Tɛhɛnɛ Baa Kilɛ wo jomɔ pu ni, pee pemu wʼa jo wu kapyebye Silo shɛɛn Ayiya ɲɔ na ge. 30 Lee ya pye Zheroboomu wo jurumu wu wuu na, ni wʼa Izirayɛli pye wʼa jurumu wemu pye ge, ni wee bɛ wuu na. Wu jurumu wu wʼa bi Tɛhɛnɛ Baa Kilɛ, Izirayɛli wo Kilɛ wu luu li yirige.

31 Ayiwa, Nadabu wo kapyegee kisaŋaa, lemu bɛɛri wʼa pye ge, lee bɛɛri ya ka Izirayɛli koomɔ pu wo saannaa pu wo caŋa ɲɛhɛɛ jomɔ pu wo sɛmɛ wu ni. 32 Kashɛn ki bye Aza ni Basha tɛ ni pu wo shi wu caŋa ɲɛhɛɛ ki bɛɛri ni.

Basha ya pye Izirayɛli koomɔ pu wo saan we

33 Zhuda saannaa Aza wo saanra ti yee taanri wuu li na, Ayiya ja Basha ya pye Izirayɛli wo koomɔn pu bɛɛri wo saan Tirisa kulo li ni. A wu yee kɛlɛɛ shuun ni shishɛɛrɛ (24) pye saanra ti ni. 34 Lemu lʼa kolo Tɛhɛnɛ Baa Kilɛ mu ge, a wu lee pye. Zheroboomu ya koo lemu ɲaari, na Izirayɛli pye wʼa jurumu wemu pye ge, a wu daha yee fɛni.