Zheroboomu wo saanra ti taxɔgɔ
14
Ayiwa, a yama pa di ba Zheroboomu ja Abiya ta wee tuun we ninumɔ ni. 2 A Zheroboomu di wu shɔ wu pye: «Mayɛ ɲɛri sipya wa tuugo, kɔnhɔ pu ganha bu li cɛ na Zheroboomu shɔ ma ɲɛ wɛ. Mʼa shɛ Silo kulo li ni. Kilɛ tudunmɔɔ Ayiya wa wà, wee wʼa yi jo nɛ mu na nɛ wu da ba bye Izirayɛli wo saan we. 3 Mʼa buuri ɲuyɔ kɛ wa lɔ, ni gato wa, ni sɛrɛ cɛrɛ la, mʼa shɛ wu yíri. Lemu na ba pya wu ta ge, wu na zhɛ lee jo ma mu.» 4 A Zheroboomu shɔ wu li pye mu. A wu gari Silo kulo li ni, na shɛ jé Ayiya kaban. Ayiya bi ɲaa nige wɛ, bani lɛgɛ ki bi wu ɲɛɲaa li xɔ. 5 Ga lee bi Tɛhɛnɛ Baa Kilɛ ta wʼa yi jo Ayiya mu na: «Zheroboomu shɔ wʼa ma di ba ma yege wu ja wu keree na, bani wʼa yá. Ma na ba ye ni ye jo wu mu. Wu ba nɔ ma na, wu na ba wuyɛ ɲɛri sipya watii.» 6 Ba Ayiya ya pa wu tɔɔyɔ yi tunmɔ pu logo wɛ, tuun wemu ni wʼa nɔ kuɲɔgɔ ki ni ge, a Ayiya di jo: «Jé Zheroboomu shɔ! Ɲaha na ma dʼa mayɛ ɲɛri sipya watii wɛ? Tuduro temu ni pʼa na tun ma mu ge, tʼa waha. 7 Shɛ yi jo Zheroboomu mu na yemu Tɛhɛnɛ Baa Kilɛ, Izirayɛli wo Kilɛ wʼa jo ge, yee yi wa mɛ: ‹Nɛ mu yirige sipyiire ti tɛ ni, nɛ mu pye Izirayɛli, na sipyii pu ɲuŋɔfɔɔ, 8 na saanra ti shɔ Dawuda wo puga ki na, na ti kan mu mu. Ga mu ya ta pye ba nɛ wo kapyebye Dawuda ya pye wɛ. Wee bi nɛ wo ɲɔmɛjogoo ki koo ɲaari, na daha nɛ fɛni ni wu zɔ wu bɛɛri ni, na nɛ wo ɲidaan wu pyi. 9 Piimu bɛɛri pʼa pye ma ɲaha na ge, ma torogana lʼa kolo na ye pee wuu li na, mu ya nɛ luu li yirige, na shɛ tɔɔrɔ ɲa na taga kilɛlɛɛ piitiilee ni yapɛrɛɛ kii yàa mayɛ mu, na nɛ wá ma kadugo yíri! 10 Lee wuu na nʼa da bɔɔngɔ shan Zheroboomu puga ki ɲuŋɔ ni. Nɛ na ba namaa pu bɛɛri ɲuŋɔ tugo na foro Zheroboomu puga ki ni, bulo fara sipyitiimɛ na, Izirayɛli ni. Nɛ na ba Zheroboomu puga ki pɔ ba pʼa gara puu mɛ wɛ, fo na shɛ ki ɲuŋɔ tugo fɛɛfɛɛ. 11 Zheroboomu wo kpuun shɛn wemu ba xhu kanha funŋɔ ni, poŋɔɔ ki da wee xa, wemu ba xhu sige ni, fugba shazhɛɛrɛ na wee jo. Tɛhɛnɛ Baa Kilɛ wʼa yi jo.› 12 Mu wi ge, mu wu kuri mʼa se puga. Ma ba shɛ tɔɔ shan kulo li ni, pya wu na xhuu. 13 Izirayɛli bɛɛri na ba wu kpɔn pu pye, na wu ɲuŋɔ ŋmɔhɔ. Wee yɛ nigin pe wu da ba faŋa ta Zheroboomu kpuun li sipyii pu bɛɛri ni, bani Zheroboomu kpuun li sipyii pu bɛɛri ni, wee yɛ nigin pe wu ni Tɛhɛnɛ Baa Kilɛ, Izirayɛli wo Kilɛ wʼa kaa nizaana ɲa. 14 Kadugo tàan Tɛhɛnɛ Baa Kilɛ na ba saan wa yirige wuyɛ mu Izirayɛli ni, wee na ba Zheroboomu wo puga ki ɲuŋɔ tugo. Kee caŋa ki wa ma! Kʼa nɔ xɔ bɛ yɛrɛ! 15 Tɛhɛnɛ Baa Kilɛ na ba Izirayɛli kpɔn, wʼa bye ba wahagaan ɲɛ mɛ lɔhɔ niŋɛ ni wɛ. Wu na ba Izirayɛli kɔɔngi na laha ke ɲijeŋɛ ke na, kee kemu wʼa kan pu tii pu mu ge. Wu na ba pu caaga na kari Efirate Gba wu kogii wu na, bani pʼa Tɛhɛnɛ Baa Kilɛ luu yirige, na benɛɛ yereŋɛ puyɛ mu na bɛlɛ (pee ɲɛ pu Ashera). 16 Zheroboomu ya jurumu wemu pye, na Izirayɛli bɛ pye wʼa jurumu wemu pye ge, Tɛhɛnɛ Baa Kilɛ na ba Izirayɛli le keŋɛ ni wee jurumu wu wuu na.»17 A Zheroboomu shɔ wu yìri, na gaaŋi Tirisa ni. Ba wʼa shɛ nɔ wu puga ki kuɲɔwege ki ni wɛ, a pya wu xhu. 18 A pʼi wu le, a Izirayɛli bɛɛri di wu kpɔn pu pye, na saha ni Tɛhɛnɛ Baa Kilɛ wo jomɔ pu ni, pee pemu wʼa bi jo Kilɛ tudunmɔɔ Ayiya ɲɔ na ge.
19 Zheroboomu wo kapyegee kisaŋaa, ŋmɔgana lemu na wu bi kashɛn ki ŋmuu ge, ni pyegana lemu na wu bi saanra ti pyi ge, yee ya ka Izirayɛli koomɔ pu wo saannaa pu wo caŋa ɲɛhɛɛ jomɔ pu wo sɛmɛ wu ni. 20 Zheroboomu wo saanra ti tɛhɛnɛ lʼa pye yee kɛlɛɛ shuun ni shuun (22). A wu shɛ binnɛ ni wu tii pu ni yaŋa kanha na, a wu ja Nadabu di diin saanra ti na wu tɛgɛ.
Oroboomu wo saanra ti keree sanha, Zhuda koomɔ wo saan we
(2 Caŋa Ɲɛhɛɛ Jomɔ 12:13-14)
21 Ayiwa, Solomani ja Oroboomu ya tiin saanra ti na Zhuda koomɔ pu ɲuŋɔ ni na wu shi wu ta yee kɛlɛɛ shishɛɛrɛ ni nigin (41) na. A wu kɛ ni gbarashuun pye saanra ti ni Zheruzalɛmu kulo li ni, lee lemu Tɛhɛnɛ Baa Kilɛ ya shɔɔnri lɔ Izirayɛli gbaweye yi bɛɛri tɛ ni, na wu mɛgɛ ki taha li na ge. Wu nu wu mɛgɛ ki bye Naama, Amɔ shi shɛɛn wu bye wii.
22 A Zhuda shɛɛn pʼi kakuunɔ pye Tɛhɛnɛ Baa Kilɛ na. Pu wo jurumu wʼa Tɛhɛnɛ Baa Kilɛ wo naŋmege ki yirige na toro pu tii pu wo jurumu wu tàan. 23 Pee bɛ ya pɛɛŋɛ benɛɛ pii yàa na pye gan tapyeye, na tiin kii sin sin na pye gan tapyeye (Ashera mɛgɛ na) yaŋabobotɔɔnyɔ yi bɛɛri, ni titɔyɔ yi bɛɛri nɔhɔ ni. 24 Ali navarashaa ni namaa dɔdɔɔ bɛ bye pu ni, piimu wo dɔdɔɔrɔ ti bye kalɛɛ ge. Tɛhɛnɛ Baa Kilɛ bi fiiye yatii shɛɛn piimu bɛɛri kɔri laha Izirayɛli nagoo pu ɲaha na ge, tanhaŋa keree kiimu pee bi byi ge, pu bi kee tanhaŋa keree ki bɛɛri pyi.
(2 Caŋa Ɲɛhɛɛ Jomɔ 12:1-12)
25 Ayiwa, Oroboomu wo saanra ti yee kaguro wuu li na, a Misira saan Shishaki di ba do Zheruzalɛmu na. 26 A wu Tɛhɛnɛ Baa Kilɛ wo puga ki wo naafuu wu lɔ, na saan wu wo puga ki wo naafuu wu bɛ lɔ, a wu yaŋmuyɔ yi bɛɛri lɔ. Solomani bi sanni wo ŋmasigiye yemu yàa ge, a wu yee bɛɛri lɔ. 27 A saannaa Oroboomu di daɲaa wo ŋmasigiye yàa na pye yi faara. Kashɛnŋmuu piimu pu bi saan wu wo puga ki tajege ki ɲɔ ki sigee ge, a wu yi kaa le pee wo ɲuŋɔfɛɛ pu keŋɛ ni. 28 Saan wu ba se tuun bɛɛri ni Tɛhɛnɛ Baa Kilɛ wo puga ki ni, kashɛnŋmuu pu na yee le, lee bu doro laha wà, pʼa guri pa yi yaha tajege ki ɲɔ ki sigevɛɛ pu wo puga ki ni.
(2 Caŋa Ɲɛhɛɛ Jomɔ 12:15-16)
29 Ayiwa, Oroboomu wo kapyegee kisaŋaa, lemu bɛɛri wʼa pye ge, lee ya ka Zhuda koomɔ pu wo saannaa pu wo caŋa ɲɛhɛɛ jomɔ pu wo sɛmɛ wu ni.
30 Kashɛn ki bi bye tuun bɛɛri ni Oroboomu ni Zheroboomu tɛ ni.
31 A Oroboomu di shɛ binnɛ ni wu tii pu ni yaŋa kanha na, a pʼi wu ɲuŋɔ ŋmɔhɔ Dawuda wo kulo li ni. Wu nu wu mɛgɛ ki bye Naama, Amɔ shi shɛn wu bye wii. A wu ja Abiyamu di diin wu tɛgɛ saanra ti na.