Kilɛ ya wu tudunmɔ wa tun kari Bɛtɛli ni
13
Ayiwa, a Kilɛ wo ná wa di yìri Zhuda ni, na kari Bɛtɛli ni Tɛhɛnɛ Baa Kilɛ wo ɲɔjomɔ na, lee bi Zheroboomu niyerege ta saraya yi tawologo ki ɲahagbaa na, na nudanga yawurire ti sorogo. 2 A wu Tɛhɛnɛ Baa Kilɛ wo jomɔ pa jo na wá saraya tawologo ki na na: «Saraya tawologo! Saraya tawologo! Yemu Tɛhɛnɛ Baa Kilɛ wa yu ge, yee yi wa mɛ: ‹Ja wa na ba se Dawuda wo puga ki ni, wu mɛgɛ na ba bye na Zhoziyasi. Gan tapyeye yi wo saraya ɲaha shɔɔnrivɛɛ piimu pʼa nudanga yawurire ti sorogo ge, wu na ba pee wolo saraya ma na, pu na ba sipyii kaciiye sorogo ma na!› » 3 Kee caŋa kiyɛ pyaa a wu shɛmɛ pa shɛ, na jo: «Pe shɛmɛ pe pʼa li shɛɛ na Tɛhɛnɛ Baa Kilɛ wʼa yu: ‹Saraya yi tawologo ki na ba ja, shɔɔnrɔ temu ti wa ki na ge, tee ma jaaga.› »4 Kilɛ wo ná wʼa yemu jo na wá Bɛtɛli wo saraya yi tawologo ki na ge, ba saannaa Zheroboomu ya yee logo wɛ, a wu keŋɛ sanha saraya tawologo ki ɲuɲɔ wu na, na jo: «Yi wu co!» Ga keŋɛ kemu Zheroboomu ya sanha Kilɛ wo ná wu fɛni ge, a kee di waha, wu ya já ki kuruŋɔ nige wɛ. 5 A saraya tawologo kʼi ja, shɔɔnrɔ temu ti bye ki na ge, a tee di jaaga, na saha ni Kilɛ wo ná wu wo shɛmɛ pu ni, pee pemu Tɛhɛnɛ Baa Kilɛ wo jomɔ pʼa shɛ ge. 6 Ba lee ya pye wɛ, a saan wu Kilɛ wo ná wu pye: «Nʼa ma ɲɛɛri, na Tɛhɛnɛ Baa Kilɛ, ma Kilɛ wu luu gbo na tàan, mʼa ɲɛrɛgɛ pye na mu, kɔnhɔ na keŋɛ kʼi guri pa.» A Kilɛ wo ná wu Tɛhɛnɛ Baa Kilɛ ɲɛɛri, a saan wu keŋɛ kʼi guri pa, a kʼi bye ki siimɛ na ba ki bi sii pye wɛ. 7 A saan wu Kilɛ wo ná wu pye: «Jé ni na ni na kaban ki ni, mʼa shɛ li, di ma yakanya ya kan ma mu.» 8 A Kilɛ wo ná wu saan wu pye: «Ali mu ɲɛhɛ ma puga ki taaga ke bɛ kan nɛ mu, nʼa da jé ma puga wɛ. Nʼa da yaaga bɛ li wɛ, nʼa da yaaga bɛ gba we xuu we ni wɛ, 9 bani le ɲɔmɛɛ le Tɛhɛnɛ Baa Kilɛ ya jo nɛ mu na: ‹Ma ganha bu shɛ yaaga li wɛ, ma ganha bu shɛ yaaga gba wɛ, koo lemu ni mʼa kari ge, ma ganha bu shɛ guri lee ni wɛ.› » 10 A wu gari koo latii ni, koo lemu ni wʼa kari Bɛtɛli ni ge, wu ya kuri lee ninunɔ ni wɛ.
Kilɛ wo ná wʼa Kilɛ ɲɔmɛɛ yaha
11 Ayiwa, lee bi Kilɛ tudunmɔɔ nabelɛgɛ ka ta Bɛtɛli ni. Kilɛ wo ná wʼa keree kiimu bɛɛri pye kee caŋa Bɛtɛli ni ge, a jafɔɔ wa di ba kee paari nabelɛgɛ ki mu, jomɔ pemu wʼa jo saan wu mu ge, a pʼi shɛ yee paari pu to wu mu. 12 A pu to wu pu pye: «Koo lekɛ ni wu dʼa kari wɛ?» Kilɛ wo ná wu wʼa bi yìri Zhuda ni na pa ge, koo lemu ni wʼa bi kuri na gaaŋi ge, jalaa pu bi le cɛ. 13 Wee tuun wu ni a wu wu jalaa pu pye: «Yi na kafaŋa ki pɔ.» A pʼi wu kafaŋa ki pɔ, a wu dugi ki na. 14 A wu Kilɛ wo ná wu nɔhɔ niinɛ, na shɛ wu nidɛɛngɛ ta terebɛnti tige ka nɔhɔ ni, na wu pye: «Kilɛ wo ná wemu wʼa yìri Zhuda ni na pa ge, ta mu wu wa?» A ná wu jo: «Uun, nɛ wu wa!» 15 Wee tuun wu ni a wu ná wu pye: «Pa, mʼa ba li ni na ni na kaban.» 16 Ga, a ná wu wu pye: «Nʼa da já guri ni ma ni wɛ, nʼa da já jé ma puga wɛ. Nʼa da yaaga li wɛ, nʼa da yaaga gba ni ma ni we xuu we ni wɛ, 17 bani Tɛhɛnɛ Baa Kilɛ wo jomɔ pʼa nɔ nɛ na na: ‹Ma ganha bu shɛ yaaga bɛ li wee xuu wu ni wɛ, ma ganha bu shɛ yaaga bɛ gba wɛ, koo lemu ni mʼa kari ge, ma ganha bu shɛ guri lee ni wɛ.› » 18 Ga, a nɔhɔlɛ wu wu pye: «Nɛ bɛ wu ɲɛ Kilɛ tudunmɔ wa ba mu ɲɛ wɛ. Tudunmɔ wa wʼa yi jo nɛ mu na yìri Tɛhɛnɛ Baa Kilɛ yíri na: ‹Wu kuruŋɔ pa ma puga, wu ba li, wu gba.› » Ma li ta bɛ kafinɛyɛ kee nabelɛgɛ kʼa jo. 19 A Kilɛ wo ná wu guri pa ni wu ni, na ba li, na gba.
Kilɛ wo ná wʼa xu
20 Ayiwa, na pu yaha pu na li, Kilɛ tudunmɔɔ nabelɛgɛ kemu kʼa wu kuruŋɔ ge, a Tɛhɛnɛ Baa Kilɛ wo jomɔ pʼi nɔ kee na, 21 Kilɛ wo ná wemu wʼa bi yìri Zhuda ni na pa ge, a wu mujugbɔɔ wá wee mu na: «Yemu Tɛhɛnɛ Baa Kilɛ ya jo ge, yee yi wa mɛ: ‹Mu ya nʼa she le mayɛ ni na wá Tɛhɛnɛ Baa Kilɛ wo ɲɔmɛɛ li na, Tɛhɛnɛ Baa Kilɛ, ma Kilɛ wʼa ɲɔmɛɛ lemu jo ma mu ge, mu ya ta lee koo ɲaari wɛ, 22 bani mu ya kuri pa, na ba li, na gba we xuu we ni, ma li ta bɛ wʼa mu pye na: “Ma ganha bu shɛ yaaga ka shishiin li wà wɛ, ma ganha bu shɛ yaaga ka shishiin gba wà wɛ.” Na taha lee na, Ma nixhugo ki wa da le ma tii pu wo faŋa ki ni wɛ.› »
23 Ayiwa, ba Kilɛ wo ná wʼa li xɔ, na gba wɛ, a tudunmɔɔ nabelɛgɛ kʼi Kilɛ wo ná wu wo kafaŋa ki pɔ na kan wu mu, wee ná wemu wʼa bi kuruŋɔ na pa ge. 24 A ná wu ganha na gaaŋi, a wu shɛ jíri cɛnri wa na, a wee di wu gbo. A wu nixhugo kʼi zhan wá koo li na. A kafaŋa kʼi yere wu tàan, cɛnri wu bɛ dʼa yere wu nixhugo ki tàan. 25 A kodoroloo pʼi wu nixhugo ki ɲa koo li ni, cɛnri wu bɛ dʼa yere wu nixhugo ki tàan. Tudunmɔɔ nabelɛgɛ ki ɲɛ kulo lemu ni ge, ba pʼa shɛ nɔ lee kulo li ni wɛ, na yi ɲaha jo lee kulo li ni. 26 Kilɛ tudunmɔɔ nabelɛgɛ kemu kʼa bi wu kuruŋɔ koo li na ge, ba wee ya yi logo wɛ, na jo: «Kilɛ wo ná wemu wʼa nʼa she le wuyɛ ni na wá Tɛhɛnɛ Baa Kilɛ wo ɲɔmɛɛ li na ge, wee wu wa. Tɛhɛnɛ Baa Kilɛ ya wu le cɛnri keŋɛ ni, a wee di wu gbo, na wu kaciiye yi ja ja, na saha ni Tɛhɛnɛ Baa Kilɛ wo nijoyo yi ni wu mu.» 27 Lee kadugo na, a wu wu jalaa pu pye: «Yi na kafaŋa ki pɔ.» A pʼi ki pɔ. 28 A wu gari, na shɛ gbo wu ta shan koo li ni, kafaŋa ke, ni cɛnri wu ɲɛ wu nixhugo ki tàan. Cɛnri wu ya ta wu nixhugo ki xa wɛ, wu di ya kafaŋa ki bɛ co wɛ. 29 A tudunmɔɔ nabelɛgɛ kʼi Kilɛ wo ná wu nixhugo ki lɔ, na wu taha kafaŋa ki na, na ba ni wu ni. A tudunmɔɔ nabelɛgɛ kʼi jé kanha ki ni, na wu kpɔn pu pye, na wu ɲuŋɔ ŋmɔhɔ. 30 A wu gbo wu le wu wo faŋa ki ni. Lee kadugo na, a pʼi tataara mɛhɛɛ su na jo: «Xhuun na ceborona!» 31 Ba wʼa wu le xɔ wɛ, na wu jalaa pu pye: «Di ga ba xhu, yʼi na le Kilɛ wo ná wu wo faŋa ki ni, yʼi na kaciiye yi yaha wu woyo yi tàan. 32 Bani Tɛhɛnɛ Baa Kilɛ wo jomɔ pemu wʼa jo na wá Bɛtɛli wo saraya yi tawologo ke, ni piyɛyɛ yemu bɛɛri yi wa gan tapyeye yi ni, Samari ni ge, pee ɲɔ na ba fa.»
33 Lee bɛɛri kadugo na, Zheroboomu ya ta sɔɔ na kuri kadugo, na wu koo niguunɔ li yaha wɛ. A wu ganha na gan tapyeye yi wo saraya ɲaha shɔɔnrivɛɛ pu luu, wu bu wa bɛɛri ta. Sipya wemu bɛɛri funŋɔ bu bye mʼa bye saraya ɲaha shɔɔnrivɔɔ, wʼa ma lɔ na pye gan tapyeye yi wo saraya ɲaha shɔɔnrivɔɔ. 34 Wee wʼa pye Zheroboomu puga ki wo jurumu we, lee wuu na wu puga kʼa ja, na ki ɲuŋɔ tugo na laha ɲiŋɛ ki na.