Sipyiire tʼa tiyɛ pinnɛ Sisɛmu kulo ni
(2 Caŋa Ɲɛhɛɛ Jomɔ 10:1-15)
12
Ayiwa, a Oroboomu di gari Sisɛmu kulo ni, bani Izirayɛli nagoo pu bɛɛri pu bi puyɛ pinnɛ wà, na pʼi wu pye saan. 2 Ba pʼa shɛ yee jo Nebati ja Zheroboomu ɲii na Misira fiige ki ni wɛ, a wu diin wà, bani lee bi wu ta sanha Misira fiige ki ni. Wʼa bi paa shɛ diin wà, kɔnhɔ wu shɔ saannaa Solomani na. 3 A pʼi pii yaha shɛ wu fɛni. Wee tuun wu ni a Zheroboomu ni Izirayɛli nagoo pu pinnɛgɛ ki bɛɛri di ba jo ni Oroboomu ni na: 4 «Mu to wʼa bi tuguro nigbɔɔrɔ taha wèe ɲuŋɔ ni. Ga mu bu sɔɔ nimɛ, na tee bulooro ti fanha cɛrɛŋɛ, temu ma to wʼa taha wù ɲuŋɔ ni ge, tuguro nigbɔɔrɔ temu wʼa taha wù ɲuŋɔ ni ge, ma bu sɔɔ na tee fanha cɛrɛŋɛ, wù na guu ma mu.» 5 A wu pu ɲɔ shɔ na: «Yʼa se, yʼi ba ba ɲigabudoro.» A sipyiire ti bɛɛri di guri kari. 6 Nɔhɔlɛɛ piimu pu bi xakili kaan Oroboomu to Solomani mu wu ɲiifɛɛrɛ ti ni ge, a wu shɛ pee mu, na shɛ pee yege na: «Yi funŋɔ wa di ɲɔshɔɔrɔ tekɛ kan pii sipyii pii mu wɛ?» 7 A pu wu ɲɔ shɔ na: «Ma ba labye pyi ni pii sipyii pii ni niɲaa, na ganha na pu ɲɛrɛgɛ jomɔ pu nuri, na jomɔ nijemɛ yu ni pu ni, pu na bye ma wo kapyebyii tuun bɛɛri ni.» 8 Ga Oroboomu ya ta sɔɔ na nɔhɔlɛɛ pu wo yɛrɛ li logo wɛ. Wu ni wu kaafɛɛ naɲilee piimu pʼa pinnɛ lɛ, pee di ɲɛ wu kapyebyii ge, a wu shɛ pee mu, 9 na shɛ pee pye: «Yee di wa yekɛ yu wɛ? Dii nɛ dʼa yaa na pii sipyii pii ɲɔ shɔ wɛ? Pʼa nɛ pye na: ‹Ma to wʼa bi tuguro nigbɔɔrɔ temu taha wù ɲuŋɔ ni ge, tee fanha cɛrɛŋɛ.› » 10 Naɲilee pu pʼa pinnɛ lɛ ni wu ni ge, a pee di wu ɲɔ shɔ na: «Sipyii piimu pʼa ye jo ni ma ni ge, na: ‹Ma to wʼa bi tuguro nigbɔɔrɔ taha wèe ɲuŋɔ ni. Tee tuguro ti fanha cɛrɛŋɛ wù mu!› Shɛ yi jo pu mu na: ‹Nɛ kabezaana ya pɛlɛ na to wu sɛrɛɛ na. 11 Yee ya jo na nɛ to wʼa tuguro taha yee ɲuŋɔ ni temu tʼa dugo ge, ga nɛ na ba temu taha yee ɲuŋɔ ni ge, tee na ba dugo nɛ to wu wuuro ti na. Nɛ to wu bi yee kpɔɔn ni susɔlɔɔ ni, nɛ na ba yee kpɔɔn ni nàmaa ni.› »12 Caŋa taanri wogo ki na, a Zheroboomu di sipyii pu ɲaha co na shɛ Oroboomu yíri na saha ni saan wu wo nijoyo yi ni, na pu kuri pa cabyaa taanri nidorogo na. 13 Ga a saan wu shɛ sipyiire ti ɲɔ shɔ ni kafugo ni na nɔhɔlɛɛ pu wo nijoyo yi fiin yaha kabanugo, 14 na pu ɲɔ shɔ na saha ni naɲilee pu wo fungɔngɔ ki ni na: «Ta tuguro nigbɔɔrɔ bɛ nɛ to wʼa taha yee ɲuŋɔ ni wɛ? Nʼa da ba la fara sanha tee tuguro nigbɔɔrɔ ti na! Ta kashɛngɛɛ ni bɛ nɛ to wu bi yee kpɔɔn wɛ? Nàmaa ni nʼa da ba yee kpɔɔn!» 15 Ayiwa, sipyii pʼa yemu jo ge, saan wu ya yee ɲuŋɔ lɔ wɛ. Kii keree kii bɛɛri ya bi foro Tɛhɛnɛ Baa Kilɛ ni, kɔnhɔ yemu wʼa bi jo Silo kulo li wo Kilɛ tudunmɔ Ayiya ɲɔ na Nebati ja Zheroboomu shizhaa na ge, yee ɲɔ di fa.
Izirayɛli fiige ki saanra tʼa taa
(2 Caŋa Ɲɛhɛɛ Jomɔ 10:16-19)
16 Ba Izirayɛli shɛɛn pʼa li ɲa na saan wu ya ta pee jomɔ pu ɲuŋɔ lɔ wɛ, a pʼi wu ɲɔ shɔ na: «Dawuda wo fanha kaa lekɛ lʼi wa wèe na sanha wɛ? Cɛn wa nige wèe ni Zhese wo ja wu tɛ ni wɛ. Wʼà se puga Izirayɛli nagoo. Dawuda, mayɛ pyaa kʼa ma puga ki keree shɔɔnri.»
Lee kadugo na, a Izirayɛli nagoo pu bɛɛri di gari pu piyɛyɛ ni. 17 Izirayɛli shɛɛn piimu pu bye tiinnɛ na Zhuda wo kulogoo ki ni ge, a Oroboomu di bye pee wo saan.
18 Ayiwa, Adoramu wemu wu bi bye waajibi kapyeŋɛɛ ki wo kaɲahashɔnrimɔ wu ge, a saannaa Oroboomu di wee tun kari Izirayɛli shɛɛn pu mu. Ga a Izirayɛli shɛɛn pu bɛɛri di wu wá ni kagereye ni, na wu gbo. A Oroboomu di tajege ta kashɛn wotori wa ni, na baa kari Zheruzalɛmu ni. 19 Lee shegana li na Izirayɛli shɛɛn pʼa nʼa she le puyɛ ni na wá Dawuda wo puga ki na, fo na pa nɔ niɲaa na.
20 Ba Izirayɛli nagoo pʼa yi logo na Zheroboomu ya kuri pa na yìri Misira ni wɛ, a pʼi wu yiri, na ba binnɛ na wu teŋɛ na pye Izirayɛli wo saan. A Zhuda wo gbawege ki yɛ nigin di daha Dawuda wo puga ki fɛni.
(2 Caŋa Ɲɛhɛɛ Jomɔ 11:1-4)
21 Ayiwa, ba Oroboomu ya nɔ Zheruzalɛmu ni wɛ, na Zhuda wo puga ki bɛɛri yiri pinnɛ ni Bɛnzhamɛ wo gbawege ke, kashɛnŋmuu kabesinŋɛɛ fɛɛ kabɔfoŋɔɔ xhuu nigin ni kɛlɛɛ gbarataanri (180.000), kɔnhɔ pʼi shɛ kashɛn kɔn Izirayɛli wo saanra ti na, pʼi pu karamu le Solomani ja Oroboomu wo fanha ki nɔhɔ ni. 22 Ga a Kilɛ wo jomɔ pʼi nɔ Shemaya na, Kilɛ wo ná we na: 23 «Yi jo Solomani ja Oroboomu mu, Zhuda koomɔ pu wo saan we, ni Zhuda wo puga ki bɛɛri, ni Bɛnzhamɛ wo gbawege ki bɛɛri, ni sipyiire tisara bɛɛri mu na, 24 yemu Tɛhɛnɛ Baa Kilɛ ya jo ge, yee yi wa mɛ: ‹Yi ganha bu foro kashɛn kaa na wɛ, yi ganha bu kashɛn kɔn yi cebooloo Izirayɛli nagoo pu na wɛ! Wa bɛɛri wu kuri wʼa se wu puga, bani nɛ yíri kii keree kii bɛɛri wa yìri.› » A pʼi Tɛhɛnɛ Baa Kilɛ wo jomɔ pu logo, na ŋmahana kuri na saha ni Tɛhɛnɛ Baa Kilɛ wo jomɔ pu ni.
Zheroboomu wo jurumu we
25 Ayiwa, a Zheroboomu di kasɔrɔgɔ taha Sisɛmu kulo li maha, Efirayimu wo faaboboyo koomɔ pu ni, na diin wà. Lee kadugo na, a wu ba foro wà, na shɛ kasɔrɔgɔ taga Penuwɛli kulo li bɛ maha.
26 Ayiwa, a Zheroboomu di li kɔn wuyɛ funŋɔ ni na: «Saanra ti na ba guri ba sanha Dawuda wo puga ki ni caŋa ka, 27 bani pu bu gori yaha na se na saraya wo Tɛhɛnɛ Baa Kilɛ wo puga ki ni Zheruzalɛmu ni sanha, pu zɔlɔɔ pu na ba guri ba sanha pu kafɔɔ Oroboomu mu, Zhuda koomɔ pu wo saan we. Wee tuun wu ni pʼa ba nɛ gbo, na shɛ guu Oroboomu mu.» 28 Wee tuun wu ni a saan wu pʼi yege yege wii, na da sanni nupepinyɛ shuun yàa, na sipyiire ti pye: «Le Zheruzalɛmu shɛɛ le bɛ lʼa sanri! Ayiwa, Izirayɛli, yi kilɛlɛɛ pu piiri, pee piimu pʼa yi yeege Misira fiige ki ni ge.» 29 A wu pu pye pʼa nupige ka sin Bɛtɛli kulo li ni, na kisaŋa sin Dan kulo li ni. 30 A wee di bye jurumu nigbɔ, bani sipyiire ti bi se fo Dan kulo li ni, na kee nupige ki jaa pu pɛlɛ. 31 A Zheroboomu di pɛɛŋɛ puga ka yereŋɛ gan tapyeye ya ni. Wu bu sipya bɛɛri ta, wʼa weefɔɔ pye saraya ɲaha shɔɔnrivɔɔ, ali wufɔɔ mɛhɛ bye wu ɲɛ bɛ Levi wo tirige shɛn wɛ.
32 A Zheroboomu di kalenɛ la teŋɛ yeŋɛ gbarataanri wogo ki wo cabyaa kɛ ni kaguro wu na, ma na jo ba pu bi Zhuda wo kalenɛ li pyi wɛ. A wuyɛ pyaa di saraya yi wolo saraya yi tawologo ki na. Lee ninunɔ wu bi byi Bɛtɛli ni, nupepinyɛ yemu wo jaalaa wu bi yàa wà ge, na saraya wo yee mu. gan tapyeye yemu wʼa bi yàa ge, a wu saraya ɲaha shɔɔnrivɛɛ pu teŋɛ yee na Bɛtɛli ni. 33 Saraya tawologo kemu wu bi yàa Bɛtɛli ni ge, ba yeŋɛ gbarataanri wogo ki wo cabyaa kɛ ni kaguro wʼa nɔ wɛ, a wu gari wà. Wuyɛ pyaa ki bi kee caŋa ki shɔɔnri lɔ wuyɛ ɲidaan na. A wu shɛ kalenɛ pye wà Izirayɛli nagoo pu mu, a wuyɛ pyaa di dugi saraya yi tawologo ki na, na nudanga yawurire ti sorogo.