Solomani wo saanra ti fiige kʼa pɛlɛ
5
Ayiwa, na co Efirate Gba wu na, na gari fo Filisiti shɛɛn pu wo fiige ke, na gari fo Misira fiige ki tɛhɛnɛ le, tee saanra te bɛɛri wo saannaa pu bi bye Solomani wo fanha ki nɔhɔ ni. Pee bi munaa pɛrɛmɛ kaan Solomani mu. A pʼi guu Solomani mu wu shi wu caŋa ɲɛhɛɛ ki bɛɛri ni.2 Solomani ni wu puga ki sipyii pu wo caŋa caŋa ɲɔlige ki bye myɛviinmɛ kiloo kabɔfoŋɔɔ gbarashɛɛrɛ (9.000), ni myɛdiimɛ kiloo kabɔfoŋɔɔ kɛ ni gbarataanri (18.000), 3 ni nupɔrɔyɔ kɛ, yi sìnmɛ woyo, ni niiyɛ kɛlɛɛ shuun (20) wa bɛ, ni yapɔrɔbya wu xhuu nigin (100), lee niŋɛ ɲɛ sɔlɔɔa, ni kaafaa ni sige ɲɔhɔyɔ, ni kanha shazhipɔrɔyɔ sìnmɛ woyo yi ni wɛ.
4 Ayiwa, Solomani wo fanha ki bi shɛ nɔ fo Efirate Gba wu kadugo yíri, na lɔ Tifisa kulo li na, fo na shɛ nɔ Gaza kulo li na, pee saannaa pu bɛɛri bi kuu wu mu. Fiiye yemu bɛɛri yʼa wu maha ge, ɲaɲiŋɛ bye wu ni yee bɛɛri tɛ ni. 5 Na co Dan kulo li na, fo na shɛ nɔ Bɛɛrisheba kulo li na, Zhuda shɛɛn ni Izirayɛli shɛɛn pu bɛɛri bye ɲaɲiŋɛ na. Wa bɛɛri bye wu ɛrɛzɛn kɛrɛyɛ ni wu nitoroŋɔ kɛrɛyɛ yi ni, Solomani wo shi wu caŋa ɲɛhɛɛ ki bɛɛri ni.
6 Shɔnyɔ tamaraya kabɔfoŋɔɔ kɛlɛɛ shishɛɛrɛ (40.000) wu bye Solomani mu, wu kashɛn wotoriyo yi wo shɔnyɔ yi mɛgɛ na, ni shɔnyɔ kabɔfoŋɔɔ kɛ ni shuun (12.000). 7 Gbafɛnɛɛrɛɛ pu bi saannaa Solomani ni wu puga ki lilii pu bɛɛri wo lige keree ki bɛɛri ɲaha shɔɔnri. Gbafɛnɛɛri bɛɛri, wʼa yere ni kee lige ke wo keree ni, fo na shɛ da yeŋɛ nigin. Pu bi kasɛɛgɛ yaha lee na, kɔnhɔ yaaga ka shishiin ganha bu guuŋɔ wɛ. 8 Pu bi ma ni shinma, ni ɲà bɛ ni saan wu mu, wu wotoriyo yi wo shɔnyɔ ye, ni shɔnyɔ yisaya wo yaligee. Pu bu yemu jo gbafɛnɛɛri wemu mu lee wo shizhaa na, wʼa lee koo ɲaari.
Solomani wo fungɔngɔ fɛɛrɛ tʼa toro sipyiire ti bɛɛri wuuro ti tàan
9 Ayiwa, a Kilɛ di fungɔngɔ fɛɛrɛ ni lajɛ nigbɔ kan saannaa Solomani mu. A wu fungɔngɔ kʼi sii pɛlɛ ba suumɔ lɔhɔ ɲɔ gbazhɛnhɛpya ɲɛ wɛ. 10 Solomani wo fungɔngɔ fɛɛrɛ ti bi pɛlɛ na ye Kilɛ-nɔhɔ fiiye yi wo fungɔnyɔ fɛɛ pee, ni Misira fiige ki wo fungɔnyɔ fɛɛ pu wo fungɔngɔ fɛɛrɛ ti bɛɛri na. 11 Solomani bi bye fungɔngɔ fɔɔ na ye sipyiire ti bɛɛri na. Wu fungɔngɔ fɛɛrɛ ti bi pɛlɛ na ye Zera shi shɛɛn Etan wuuro ti na, na bɛlɛ na ye Maxholi jalaa Xhema, ni Kalikoli, ni Darida yɛ wo fungɔngɔ fɛɛrɛ ti na. Wu mɛgɛ ki bi foro fo na nɔ kabanugo fiiye yi bɛɛri ni. 12 Taleŋɛɛ kabɔfoŋɔɔ taanri (3.000) wʼa shan, na yoceeye kabɔfonɔ nigin di kaguro (1.005) yeege. 13 Wʼa tiye niɲɛhɛyɛ keree jo, na co Liban sɛdiri tige ki na, fo na shɛ nɔ izopu tige na, kee kemu kʼa fin kasɔrɔgɔ na ge. Wʼa jo yatɔɔyɔ yi bɛ shizhaa na, ni shazhɛɛrɛ te, ni ɲiŋɛ yakokaara te, ni fyaa pee. 14 Ɲiŋɛ ki saannaa piimu bɛɛri ya wu fungɔngɔ fɛɛrɛ ti kaa logo ge, pee ya shi wu bɛɛri wo sipyii tun na pa wu mu, kɔnhɔ pʼi ba wu fungɔngɔ fɛɛrɛ ti jomɔ pu logo.
Solomani ya Kilɛ-pɛɛŋɛ pugbɔhɔ ki yaa wu keree gbegele
(2 Caŋa Ɲɛhɛɛ Jomɔ 2:2-15)
15 Ayiwa, Tiiri kulo li saan Iramu wu bi bye Dawuda wo kariɲii. Ba wʼa pa logo na Solomani pʼa tìre, na wu teŋɛ na pye saan Dawuda faara wɛ, a wu wu puga ki sipyii pʼi tun pʼa shɛ Solomani shaari.
16 A Solomani bɛ di tuduro ta tun pu shɛ jo Iramu mu na: 17 «Mʼa li cɛ na nɛ to Dawuda ya já puga yereŋɛ Tɛhɛnɛ Baa Kilɛ, wu Kilɛ wu mɛgɛ na wɛ. Bani wu pɛɛn pu bi kashɛn kɔɔn wu na kabaya yi bɛɛri na. Ga a Kafɔɔ di ba se kan wu mu, na wu pɛɛn pu le wu tɔɔyɔ yi nɔhɔ ni. 18 Ayiwa nimɛ, Tɛhɛnɛ Baa Kilɛ, nɛ Kilɛ wʼa ɲaɲiŋɛ kan nɛ mu kabaya yi bɛɛri na, pɛn wa nige na mu wɛ, bɔɔngɔ kaa la shishiin bɛ di wa na funŋɔ pɛn wɛ. 19 Na funŋɔ ki wa di puga ka yereŋɛ Tɛhɛnɛ Baa Kilɛ, na Kilɛ wu mɛgɛ na, ba Tɛhɛnɛ Baa Kilɛ bi yi jo nɛ to Dawuda mu wɛ na: ‹Ma ja, wee wemu nʼa da ba deŋɛ saanra ti na ma faara ge, wee wʼa da ba puga yereŋɛ nɛ mɛgɛ na.› 20 Lee na do, pii yaha pʼi Liban sɛdiri tiye ya kɔn na mu. Nɛ wo sipyii pii na ba fara ma wuu pii na. Lemu bɛɛri fɛni ma wa na pye pu saraa ge, nɛ na ba lee kan ma mu. Mʼa li cɛ na sipya wa naha wèe ni wemu ya tiire kɔngana cɛ ba Sidɔn shɛɛn pu ɲɛ-ɛ wɛ.»
21 Ayiwa, ba Iramu ya Solomani jomɔ pu logo wɛ, a wu funŋɔ di daan fo xuuni, a wu jo: «Baraga ki taha Tɛhɛnɛ Baa Kilɛ na niɲaa, wee wemu wʼa ja fungɔngɔ fɔɔ kan Dawuda mu, wu le sipyiɲɛhɛnɛ le mara ge!» 22 A Iramu di Solomani ɲɔ shɔ na: «Nɛ ma tuduro ti logo, nʼa da ba ma funŋɔ ɲiŋɛ sɛdiri tiye ye, ni sipɛrɛ tiye yi shizhaa na. 23 Nɛ wo sipyii pu na ba tiire ti tirige na yìri Liban faaboboŋɔ ki na, na pa le suumɔ lɔhɔ ki ni. Pu na ba ti pinnɛ, na ti pɔ pɔ, na gari ni ti ni suumɔ lɔhɔ ki na fo ma ɲidaan xuu. Pu ba shɛ nɔ wà, pu na tiire ti sanha sanha, na ti kan ma mu. Ga nɛ bɛ funŋɔ wa ma na tɛgɛ lemu na ge, lee li wa mɛ jo ma yere ni na puga ki sipyii pu wo ɲɔlige ni.»
24 Ayiwa, Solomani mago wa sɛdiri tiire ni sipɛrɛ tiire temu bɛɛri na ge, a Iramu di tee bɛɛri kan wu mu. 25 Solomani bɛ wi ge, yee bɛɛri wʼa alikama tonɔɔ kabɔfoŋɔɔ gbaara (6.000) ni olivu sinmɛ nijemɛ litirilee kabɔfoŋɔɔ gbarataanri (8.000) kan Iramu mu na pye wu puga ki wo ɲɔlige. Lemu Solomani bi gaan Iramu mu yee bɛɛri ge, lee li wa le.
26 Tɛhɛnɛ Baa Kilɛ bi fungɔngɔ fɛɛrɛ kan Solomani mu, ma na jo ba wʼa bi yi jo wu mu wɛ. A ɲaɲiŋɛ di bye Iramu ni Solomani tɛ ni, a pu shuun wu bɛɛri di kariɲɛɛgɛ ɲɔmɛɛ lɔ puyɛ mu.
Solomani ya waajibi kapyeŋɛɛ ni ki wo gbegemɛ pu pye
(2 Caŋa Ɲɛhɛɛ Jomɔ 2:1, 16-17)
27 Ayiwa, a saannaa Solomani di sipyii kabɔfoŋɔɔ kɛlɛɛ taanri (30.000) ɲaha bulo na foro Izirayɛli fiige ki bɛɛri ni, na pee le waajibi kapyeŋɛɛ ni. 28 A wu ganha na pu yɛri na se Liban faaboboŋɔ ki na sipyii kabɔfoŋɔɔ kɛ kɛ (10.000). Kabɔfoŋɔɔ kɛ (10.000) wa bu shɛ yeŋɛ nigin pye Liban ni, wʼa ba yeye shuun pye puga. Adoniramu wu bi waajibi kapyeŋɛɛ ki wo keree ki ɲaha shɔɔnri. 29 Sipyii kabɔfoŋɔɔ kɛlɛɛ gbarashuun (70.000) wa bɛ wu bye Solomani mu na tuguro luu, kabɔfoŋɔɔ kɛlɛɛ gbarataanri (80.000) di ɲɛ wu mu na faaya yi tɛni faaboboyo yi na. 30 Kapyebyii pu wo ɲahagbaa fɛɛ pu bye sipyii kabɔfoŋɔɔ taanri di xhuu taanri (3.300). Solomani bi pee teŋɛ kapyebyii pu ɲuŋɔ ni pu na kapyebyii pu kasɛɛgɛ pyi. 31 A saan wu jo na pu faakagereye nagaya nizaaya ya shɔɔnri, pʼi yee tɛ, yee di ba bye puga ki nɔhɔshanma pu wo faakagereye ye. 32 Solomani wo kapyebyii pu fara Iramu wuu pu na, a Gebali kulo li wo kaɲahacɛmɛɛ pʼi ba pee tɛgɛ, a pʼi faaya yi tɛ, a pʼi tiire te ni faaya yi gbegele puga ki yereŋɛ wu kaa na.