Solomani wo saanra ti wo sipyigbɔɔ pee
4
Ayiwa, Solomani wu bi bye Izirayɛli shɛɛn pu bɛɛri wo saan. 2 Wu fanha ki sipyii pu mɛyɛ yi wa ye: Saraya ɲaha shɔɔnrivɛɛ Sadɔki ɲabige Azariya, 3 ni Shisha jalaa Elorɛfu ni Ayiya, pee bye wu kama kavɛɛ ; Ayiludi ja Zhozafati, wee bye kalɛgɛɛ ki wo maravɔɔ ; 4 Zhoyada ja Benaya, wee bye kashɛn keŋɛ ki ɲuŋɔfɔɔ; Sadɔki ni Abiyatari, pee bye saraya ɲaha shɔɔnrivɛɛ; 5 Natan ja Azariya, wee bye gbafɛnɛɛrɛɛ pu wo ɲahagbaa fɔɔ; Natan ja Zabudi, wee bye saraya ɲaha shɔɔnrivɔɔ, na ɲɛ saan wuyɛ mɛgɛ yɛrɛ kanvɔɔ ; 6 Ayishari, wee bye puga ki kaɲahashɔnrimɔ; Abida ja Adoniramu, wee bye waajibi kapyeŋɛɛ ki wo kaɲahashɔnrimɔ.7 Gbafɛnɛɛrɛɛ kɛ ni shuun wu bye Solomani mu Izirayɛli fiige ki bɛɛri ɲuŋɔ ni. Pee pu bi saan wu ni wu puga ki sipyii pu bɛɛri wo yaligee ki keree ɲaha shɔɔnri. Wa bɛɛri bi ma yeŋɛ nigin pye wee labye we ni yee li funŋɔ ni.
8 Pu mɛyɛ yi wa ye: Xhuri wo ja we, wee wu bye Efirayimu wo faaboboyo yi wo koomɔ pu ɲuŋɔ ni. 9 Dekɛri wo ja we, wee di ɲɛ Makasi kulo le, ni Shaalibimu kulo le, ni Bɛti-Shemɛshi kulo le, ni Elɔ-Bɛti-Ana kulo li ɲuŋɔ ni. 10 Esɛdi ja we, wee bye Aruboti wo koomɔ pu ɲuŋɔ ni. Wee wu bye ni Soko kulo le, ni Xhefɛri wo koomɔ pu bɛɛri ni. 11 Abinadabu ja we, wee bye ni Dɔri wo koomɔ pu bɛɛri ni. Solomani poro pushɔ Tafati wu bi bye wu shɔ. 12 Ayiludi ja Baana, wee bye ni Taanaki kulo le, ni Megido kulo le, ni Bɛti-Sheyan kulo li bɛɛri ni, Zaritan tàan wu ni, Jizirɛli nɔhɔdaan wu ni, na lɔ Bɛti-Sheyan na, fo na shɛ nɔ Abɛli-Mexhola na, na gari fo Yokimamu kulo li fugba wu ni. 13 Gebɛri wo ja we, wee bye ni Aramoti kulo li ni, Galadi wo koomɔ pu ni, ni Manase ja Yayiri wo kulogoo kee, Galadi wo koomɔ pu ni. Wee wu bye ni Aragobu wo koomɔ pu bɛ, ni pu kugbɔhɔɔ kɛlɛɛ gbaara (60) wu ni, Bashan wo koomɔ pu ni. Kashɛn ɲaha kɔn kɔn kasɔrɔyɔ yi bi taga kee kulogoo ki kuuri, na daɲaa tɔɔrɔ gburaya le ki na. 14 Ido ja Ayinadabu, wee bye Maxhanayimu wo koomɔ pu ɲuŋɔ ni. 15 Ayimasi, wee bye Nɛfitali wo koomɔ pu ɲuŋɔ ni. Solomani poro pushɔ Basimati wu bi bye wu shɔ. 16 Ushayi ja Baana, wee bye Azɛri wo koomɔ pe ni Baloti kulo li ɲuŋɔ ni. 17 Paruwa ja Zhoshafati, wee bye Isakari wo koomɔ pu ɲuŋɔ ni. 18 Ela ja Shimeyi, wee bye Bɛnzhamɛ wo koomɔ pu ɲuŋɔ ni. 19 Uri ja Gebɛri, wee bye Galadi wo koomɔ pu ɲuŋɔ ni. Wee wu bye ni saanaa Sixhɔn wo fiige ki ni, Amɔri shi shɛɛn pu wo saan we; ni Bashan koomɔ pu wo saan Ɔgi wo koomɔ pe. Gbafɛnɛɛri nigin pe wu bye fiige ki ni.
20 Wee tuun we ni Zhuda shɛɛn ni Izirayɛli shɛɛn pu bi sii ɲɛhɛ ba suumɔ lɔhɔ ɲɔ gbazhɛnhɛ ɲɛ wɛ. Pu bi li, na gbuu, na fundanga pyi.