Solomani ya Farawɔn wo poro wa leŋɛ
3
Ayiwa, a Solomani di ba Misira saannaa Farawɔn poro pushɔ wa leŋɛ, lee funŋɔ ni a wu kariɲɛɛgɛ leŋɛ ni Misira saan wu ni. A wu shɛ wee cee wu yaha Dawuda wo kulo li ni Zheruzalɛmu ni, fo na shɛ wu pye wʼa wuyɛ pyaa wo piyɛyɛ ye, ni Tɛhɛnɛ Baa Kilɛ wo puga ke, ni Zheruzalɛmu maha maha kasɔrɔgɔ ki yàa xɔ.2 Wee tuun wu ni sipyiire ti bi se na saraya yi wo gan tapyeye yi ni, bani fo na pa nɔ wee tuun wu na, puga bi sanha yereŋɛ Tɛhɛnɛ Baa Kilɛ mɛgɛ na wɛ. 3 Tɛhɛnɛ Baa Kilɛ bi dan Solomani ni, a wu ganha na wu to Dawuda wo ɲɔmɛjogoo ki koo ɲaari. Ga lee bɛ na, wu bɛ bi saraya wo, na nudanga yawurire sorogo gan tapyeye yi ni.
Solomani ya fungɔngɔ fɛɛrɛ ɲɛɛri Kilɛ mu wu saanra ti pyegazaana wuu na
(2 Caŋa Ɲɛhɛɛ Jomɔ 1:3-13)
4 Ayiwa, caŋa ka Solomani ya pa shɛ saraga ka wolo Gabawɔn kulo li ni, bani wee xuu wu wo gan tapyege ki baraga kʼa bi pɛlɛ na ye gan tapyeye yi bɛɛri na. A Solomani di shɛ saraya nizogoyo kabɔfonɔ nigin (1.000) wolo kee saraya tawologo ki na. 5 Na wu yaha Gabawɔn kulo li ni, a Tɛhɛnɛ Baa Kilɛ di ba ba wu mu piige ka ni ŋmunɔgɔ ni. A Kilɛ di wu pye: «Yaaga kemu kaa li ɲɛ ma na ge, ki ɲɛɛri na mu di ki kan ma mu!» 6 A Solomani di jo: «Mu ya saama nigbɔ pye ma kapyebye Dawuda mu, nɛ to we, bani wʼa ɲaari ma ɲaha tàan ni ɲɔmɛɛ fɛɛrɛ ni tiimɛ ni funvige ni ma shizhaa na. Mʼa ma saama nigbɔ pu shɛ wu na, na ja kan wu mu, wee wemu wʼa tiin saanra ti na niɲaa ge. 7 Nimɛ Tɛhɛnɛ Baa Kilɛ, na Kilɛ we, mu wʼa nɛ pye saan, ma kapyebye we, na nɛ teŋɛ na to Dawuda faara. Nɔhɔcɛɛtiire nɛ ɲɛ. Nɛ jani yaaga bɛ na wɛ. 8 Nɛ wa ma sipyii pu niŋɛ ni, sipyii piimu mʼa shɔɔnri lɔ ge, pʼa ɲɛhɛ, sipya da já pu ɲɔ jo, kelee na pu tɔrɔ, pu ɲɛhɛŋɛ ki keŋɛ ni wɛ. 9 Lee na do, fungɔngɔ fɛɛrɛ kan ma kapyebye wu mu, kɔnhɔ wu da ma sipyii pu keree ki shɔɔnri ki shɔɔnrigana na, wʼi kasaaŋaa ni kakuuŋɔɔ cɛ shɔɔnri kiyɛ ni. Lee bɛ wɛ, jɔgɔ wu da já ma sipyii pu mara wɛ, le sipyiɲɛhɛnɛ le?»
10 Ayiwa, a kee ɲɛrɛgɛ ke kaa di daan Kafɔɔ ni. 11 Lee na, a Kilɛ di wu pye: «Ni kee wa pye mu wo yaɲɛrɛgɛ, ma ya ta shi niɲɛhɛmɛ wo ɲɛrɛgɛ pye mayɛ kaa na wɛ, ma ya ta naafuu ɲɛrɛgɛ pye wɛ, ma di ya ta ɲɛrɛgɛ pye na ma pɛɛn pu xu wɛ, ga fungɔngɔ fɛɛrɛ mʼa ɲɛɛri kɔnhɔ ma da sipyiire ti keree shɔɔnri ni tiimɛ ni, 12 lee na nʼa da ba ma fungaa li pye. Nɛ na ba ma pye fungɔngɔ fɔɔ ni kaa cɛvɔɔ. Ma ɲɔhɔ fungɔngɔ fɛɛrɛ fɔɔ ni kaa cɛvɔɔ wa shishiin da ba da wʼa pye toro ma ɲaha na wɛ, wu di wa da da ma kadugo bɛ na wɛ. 13 Na fara lee na, lemu bɛ li ɲɛ ma ya lee ɲɛɛri wɛ ge, nɛ na ba lee bɛ kan ma mu. Nɛ na ba naafuu kan ma mu, na nɔɔrɔ bɛ taha ma na. Ma wo caŋa ɲii li bɛɛri funŋɔ ni, saan wa shishiin wa da ba da wemu ya ma xɔ wɛ. 14 Ma bu nɔhɔ taha nɛ wo korogoo ki fɛni, na nɛ wo saliya we, ni nɛ wo ɲɔmɛjogoo ki koo ɲaari ba ma to Dawuda wʼa li pye wɛ, nɛ na ba la fara ma shi wu na.»
15 A Solomani di ɲɛ ŋmunumɔ pu na, na li cɛ na ŋmunɔgɔ wee ya ŋmunɔ. A wu guri kari Zheruzalɛmu ni, na shɛ yere Kafɔɔ wo Kariɲɛɛgɛ Ɲɔmɛɛ li Keshi wu tàan. A wu saraya nizogoyo, ni ɲaɲiŋɛ saraya wolo, na xhɔ na ligbɔhɔ ka gbegele wu kapyebyii pu bɛɛri mu.
Saannaa Solomani ya cèe shuun wa kiiri kɔn
16 Ayiwa, caŋa ka dɔdɔ navarashaa shuun wa ya shɛ yere saan wu ɲaha tàan. 17 A wee cee wu wa di jo: «Na kafɔɔ, kafari mʼa logo na ɲɔ na. Nɛ ni we cee we bɛɛri wu ɲɛ punuŋɔ ni. A nɛ digi yacɛrɛ na wee cee wu tàan. 18 Nɛ cadigiŋɛ caŋa taanri wogo ki na, a wu bɛ di digi. Wèe shuun wuyɛ wu ɲɛ puga ki ni, sipya watii wa nige ni wèe ni puga ki ni wɛ. 19 A we cee we wo ja wu xhu piige ki ni, bani wʼa sinnɛ wu ɲuŋɔ ni. 20 A wu yìri nibiige ki ni, na nɛ yaha ŋmunumɔ na, ma bulozhɔ we, na nɛ wo ja wu lɔ na tàan, na wu wo ja nixhugo ki sinniŋɛ nɛ tàan. 21 Ɲimuguɲɔ wu na a nɛ yìri jo di jirea kan na pya wu mu, na wu nixhugo ta. Ba ɲiga kʼa pa mugi wɛ, a nɛ pya wu deele wii, na wu ta jo pya we nɛ se ge, jo wu ɲɛ were wɛ.»
22 Ga a wewu cee wu jo: «Kafinɛyɛ, ɲìi wo we wu ɲɛ nɛ wo we, nixhugo ke di ɲɛ mu wo we.» A cee nizhiimɛ wʼi jo: «We wa xu ge, wee wu ɲɛ mu ja we, ɲìi wo wu ɲɛ nɛ wo we.» A cèe pʼi ganha na yee kilee puyɛ tɛ ni saan wu ɲaha tàan. 23 Wee tuun wu ni a saan wʼi jo: «Wa wʼa yu na: ‹Nɛ wo pya wu ɲɛ ɲìi wo we, mu wo wu ɲɛ nixhugo ke.› Wa bɛ di yu: ‹Ahayi dɛ, we wʼa xu ge, wee wu ɲɛ mu wo we, ɲìi wo wu di ɲɛ nɛ wo we.› » 24 Ayiwa, a saan wu jo: «Yi ŋmɔpara la lɔ na kan.» Wee tuun wu ni a pʼi ba ni ŋmɔpara la ni na pa gan saan wu mu. 25 A wu jo: «Yi pya ɲìi wo wu kɔn taaya shuun, yʼi taaga ka kan wa mu, yʼi taaga kisaŋa kan wewu mu.» 26 Ga a pya ɲìi wo wu nu wu saan wu pye: «Na kafɔɔ, wù pya ɲìi wo wu kan wu mu, wù ganha bu wu gbo wɛ.» Bani pya wu ɲiɲaara ya bi bye wu nu wu ni. Ga a wewu cee wu jo: «Wu kɔn, kɔnhɔ wu ganha bye wa shishiin wo wɛ.»
27 Wee tuun wu ni a saan wu jo: «Yi pya wu kan ceshiimɛ wu mu. Wu ganha gbo wɛ. Wee wu ɲɛ pya wu nu we.»
28 Saan wʼa kiiri wu kɔn kɔngana lemu na ge, Izirayɛli shɛɛn pu bɛɛri ya yee logo. A pu bɛɛri di fya saan wu na, bani pʼa li cɛ kiiri wu kɔngana li na na Kilɛ ni wu fungɔngɔ fɛɛrɛ tʼa foro.