Dawuda ya wu fiin jo Solomani mu
2
Ba Dawuda taaxulo ya pa dɛɛŋɛ wɛ, a wu te tuduro te jo wu ja Solomani mu na: 2 «Nʼa da zhɛ ɲiŋɛ ki sipyii pu bɛɛri wo tashɛgɛ ki ni. Ma luu li waha, mʼa bye ná. 3 Ma da ma Kafɔɔ Kilɛ wu pɛlɛ, mʼa Kilɛ ɲɔmɛɛ co ni ɲɔmɛɛ fɛɛrɛ ni, ma da ɲaari wu korogoo ki ni, mʼa wu saliya we ni wu tuduro ti co, ma da wu kaɲɔwuugoo kee ni wu kalaa wu koo ɲaari, yee yemu yʼa ka Musa wo saliya wu ni ge. Lee na ma kapyegee ki na ba ɲɔ ma bu shɛ xuu bɛɛri ni. 4 Tɛhɛnɛ Baa Kilɛ ya jomɔ pemu jo nɛ shizhaa na ge, wu na ba lee pye na li ɲɔ fa. Wʼa nɛ pye na, nɛ jalaa ba puyɛ kasɛri na ɲaarigana cɛ, pu ba ɲaari wee ɲaha tàan ni ɲɔmɛɛ fɛɛrɛ, ni pu zɔlɔɔ pu bɛɛri, ni pu munahaa ki bɛɛri ni, na nɛ nagoo na ba diin Izirayɛli shɛɛn pu wo saanra koro li na tuun bɛɛri ni.5 « Ayiwa, Seruya ja Zhowabu ya lemu pye nɛ na ge, mʼa lee cɛ, lemu wʼa pye Izirayɛli wo kashɛn ɲuŋɔfɛɛ shuun wu na ge, Nɛri ja Abunɛri, ni Yetɛri ja Amasa. Wʼa pu gbo, wʼa shishan wo kanna kashɛn na wu bye, na ta li dʼa pye ɲaɲiŋɛ tuun ni. Lee funŋɔ ni, kirige ke wu bi taga wuyɛ pɔ ge, a wu kashɛn shishan wo kee na, na pu wo wu tanhaya yi bɛ naa. 6 Wu keree shɔɔnri ni ma wo fungɔngɔ fɛɛrɛ ti ni, ma ganha bu wu ɲuzhifiire wo wu yaha wu tigi shɛ yaŋa kanha na ɲaɲiŋɛ na, na ta ma ya wu gbo wɛ. 7 Ma Galadi shɛɛn Barizilayi wo jalaa pu keree shɔɔnri ni ɲɔmɛɛ fɛɛrɛ ni. Piimu na ba li ma tabali wu na ge, pu bɛ di bye pee ni, bani pʼa nɛ ɲuŋɔ wolo, tuun wemu ni pʼa pa fara nɛ na, nɛ paaduun wu ni ma ɲahafɔɔ Abusalɔn ɲaha na ge. 8 Gera ja Shimeyi, na foro Bɛnzhamɛ wo tirige shɛɛn pu ni, Baxhurimu kulo li ni, wee wa ni ma ni. Caŋa kemu nɛ bi se Maxhanayimu kulo li ni ge, wʼa laŋi jomɔ niguumɔ jo wá nɛ na kee caŋa ke. Ga wʼa pa shɛ nɛ ɲuŋɔ círi Zhurudɛn Gba wu ɲɔ ki na, a nɛ ke kaaga ke kàa Tɛhɛnɛ Baa Kilɛ na wu mu jo nʼa da ŋmɔpara taga wo gbo wɛ. 9 Nimɛ, ma ganha bu lee fɔɔ le yaha tɔbaa wɛ, bani fungɔngɔ fɔɔ ma wa. Mʼa yaa na lemu pye wu na ge, mʼa lee cɛ. Mʼa yaa na ŋmɔpara taga wu ɲuzhifiire wo wu tirige yaŋa kanha na.»
Dawuda ya xu, a Solomani di wu faa
(1 Caŋa Ɲɛhɛɛ Jomɔ 29:26-30)
10 Ayiwa, a Dawuda di xhu. A pʼi wu le wuyɛ pyaa wo kulob li ni. 11 Yee kɛlɛɛ shishɛɛrɛ (40) Dawuda ya pye saanra ti na Izirayɛli shɛɛn pu ɲuŋɔ ni. Wʼa yee gbarashuun pye Eburɔn ni, na yee kɛlɛɛ taanri ni taanri (33) pye Zheruzalɛmu ni. 12 Lee kadugo na, a Solomani di diin wu to Dawuda wo saanra koro li na. A saanra ti baraga ta wu mu fo xuuni.
Solomani ya Adonizha ɲuŋɔ tugo
13 Ayiwa, caŋa ka Agiti ja Adonizha ya pa shɛ Solomani nu Batisheba yíri. A Batisheba di wu yege na: «Li nidaan na mʼa ma ya?» A Adonizha di jo na Uun! 14 Lee kadugo na, a wu jo: «Jomɔ pa pu wa nɛ mu na yu ma mu.» A Batisheba di wu pye: «Pu jo!» 15 A wu jo: «Mʼa li cɛ na nɛ wu bi yaa na pye saan we. Nɛ ɲaha Izirayɛli shɛɛn pu bɛɛri bi wii, na nɛ wu da ba bye saan we. Ga a saanra tʼi ba ɲɛri kan nɛ ceborona wu mu, bani wee mɛgɛ na Tɛhɛnɛ Baa Kilɛ bi ti yaha. 16 Ayiwa, nimɛ kaa nigin nʼa da ba sha ma mu, ma ganha bu na kun lee ni wɛ!» A Batisheba di jo: «Li jo!» 17 A wu jo: «Nʼa ma ɲɛɛri jo ma yi jo saannaa Solomani mu na wu Shunɛmu shɛɛn Abishagi kan na mu di bye na shɔ, bani wʼa da ma ɲɛrɛgɛ she wɛ.» 18 A Batisheba di jo: «Yʼa ɲɔ! Nɛyɛ pyaa na zhɛ jo ma keree na saan wu mu.»
19 Ayiwa, a Batisheba di gari saan wu yíri di zhɛ Adonizha keree jo wu mu. A saan wu yìri na ba wu ɲuŋɔ círi, na nuguro sin wu fɛɛ ni, na da shɛ diin wu saanra koro li na. A wu pu pye pʼa yatɛɛngɛ ka sin wu nu wu mu, a nufɔɔ wu diin wu kanige cɛ. 20 Lee kadugo na, a nufɔɔ wu saan wu pye: «Kiire nifɛnhɛfɛnhɛnɛ nigin wa wu wa nɛ mu na zhaa ma mu, ma ganha bu na kun lee ni wɛ!» A saan wu jo: «Maa, le li wa ma mu ge, li jo, nʼa da ma ɲɛrɛgɛ she wɛ.» 21 A nufɔɔ wu jo: «Shunɛmu shɛɛn Abishagi kan ma ɲahafɔɔ Adonizha mu wu pye wu shɔ!» 22 A saannaa Solomani di wu nu wu pye: «Ɲaha na mu di yu na ma Shunɛmu shɛɛn Abishagi kan Adonizha mu na pye wu shɔ wɛ? Mɛhɛ saanra ti ɲɛɛri ma kaan wu mu, bani nɛ ɲahafɔɔ wu ɲɛ wii! Ti ɲɛɛri kan wu ni wu wɔɲii pu mu, saraya ɲaha shɔɔnrivɛɛ Abiyatari ni Seruya ja Zhowabu!»
23 Ba lee ya pye wɛ, a saannaa Solomani di ke kaaga ke kàa Tɛhɛnɛ Baa Kilɛ na na: «Nɛ bye nɛ di ya Adonizha gbo pe jomɔ pe wuu na wɛ, wee tuun wu ni Kilɛ wu bɔɔngɔ shan na ɲuŋɔ ni, wu da la faraa ki na!» 24 A saan wu jo sanha na: «Ayiwa nimɛ, Tɛhɛnɛ Baa Kilɛ ɲìi wo wu mɛgɛ na, wee wemu wʼa baraga le nɛ ni, na nɛ teŋɛ na to Dawuda wo koro li na, na saanra ti ɲɔmɛɛ lɔ nɛ ni na kadugo shi wu mu ge, niɲaa yɛ pyaa Adonizha wa da gbo.» 25 Wee tuun wu ni a saan wu jo na Zhoyada ja Benaya wu shɛ wu gbo. A Benaya di shɛ wu gbo.
Solomani ya Abiyatari kɔri yeege Zheruzalɛmu ni
26 Ayiwa lee kadugo na, a saan wu saraya ɲaha shɔɔnrivɛɛ Abiyatari pye: «Ta se Anatoti kulo li ni ma wo ɲiŋɛ ki na, bani mu ni xu wʼa yaa. Ga nʼa da ma gbo niɲaa wɛ, bani mʼa Kafɔɔ Kilɛ wo Kariɲɛɛgɛ Ɲɔmɛɛ li Keshi wu tugo nɛ to Dawuda ɲahagbaa na taɲaa, na gori yaha ni wu ni wu kanhama pu tuun wu bɛɛri ni.» 27 Lee kɔrigana li na Solomani ya Abiyatari kɔri laha Tɛhɛnɛ Baa Kilɛ wo saraya ɲaha shɔɔnrivɛɛrɛ ti na. Lee funŋɔ ni, Tɛhɛnɛ Baa Kilɛ bi jomɔ pemu jo wá Eli wo puga ki na Silo kulo li ni ge, a pee ɲɔ di fa.
Solomani ya Zhowabu ɲuŋɔ tugo
28 Ayiwa, Zhowabu wemu wu bi fara Adonizha na ge, a kii keree kii bɛɛri di shɛ nɔ wu na. A Zhowabu di baa kari Tɛhɛnɛ Baa Kilɛ wo Ɲuŋɔ Tacirige Fàya Puga ki ni, na shɛ saraya tawologo ki yeŋɛɛ ki co. Wu kunni bi ta fara Abusalɔn na wɛ. 29 A pʼi shɛ yi jo Solomani mu na Zhowabu ya paa kari Tɛhɛnɛ Baa Kilɛ wo Ɲuŋɔ Tacirige Fàya Puga ki ni, na wu wa saraya tawologo ki tàan. Wee tuun wu ni a Solomani di Zhoyada ja Benaya yaha kari na wu shɛ wu gbo. 30 A Benaya di shɛ nɔ Tɛhɛnɛ Baa Kilɛ wo Ɲuŋɔ Tacirige Fàya Puga ki na, na Zhowabu pye: Yemu saan wʼa jo ge, yee yi wa mɛ: «Foro naha!» Ga a Zhowabu di jo: «Ahayi! Naha nʼa da xhuu!» A Benaya di shɛ yee jo saan wu mu, na wu pye na: «Ye ni ye Zhowabu ya jo.» 31 A saan wu jo: «Li pye ba wʼa yi jo wɛ, wu gbo, lee kadugo na, mʼa wu le. Lee funŋɔ ni shishan pemu Zhowabu ya wo kaɲuŋɔ baa ge, ma na pee sanha liige nɛ ni na puga ki na. 32 Tɛhɛnɛ Baa Kilɛ na ba wu shishan pu pye pʼa to wuyɛ pyaa ki ɲuŋɔ ni, bani wʼa namaa shuun gbo, piimu ya ye wu na, na dii bɛ wu na ge. Pee ɲɛ Nɛri ja Abunɛri, wee ɲɛ Izirayɛli wo kashɛn keŋɛ ki ɲuŋɔfɔɔ we, ni Yetɛri ja Amasa, wee ɲɛ Zhuda wo kashɛn keŋɛ ki ɲuŋɔfɔɔ we. Wʼa pu gbo ni ŋmɔpara ni na ta nɛ to Dawuda ya li cɛ wɛ. 33 Pu shishan pu na ba do Zhowabu ni wu kadugo shi wu ɲuŋɔ ni fo gbee. Ga Tɛhɛnɛ Baa Kilɛ baraga ni, keree ki bɛɛri na ba ɲɔgi tuun bɛɛri ni Dawuda, ni wu kadugo shi we, ni wu puga ke, ni wu saanra ti mu.» 34 Ayiwa, a Zhoyada ja Benaya di gari Zhowabu fɛni, na shɛ wu gbo. A pʼi wu le wuyɛ pyaa wo xuu wu ni siwaga ki ni. 35 A saan wu Zhoyada ja Benaya teŋɛ na pye wu faara kashɛn keŋɛ ki ɲuŋɔ ni. A wu saraya ɲaha shɔɔnrivɛɛ Sadɔki teŋɛ na pye Abiyatari wo faara.
Solomani ya Shimeyi ɲuŋɔ tugo
36 Ayiwa lee kadugo na, a saan wu pu pye pʼa Shimeyi yiri pa, na ba wu pye: «Puga ka yereŋɛ Zheruzalɛmu ni, mʼa diin yaha kee ni. Ma ganha ga foro ki ni di zhɛ xuu wa shishiin ni wɛ. 37 Mʼa li cɛ na caŋa caŋa mʼa foro, na Sedɔrɔn dugo ki kɔn ɲɛri ge, mʼa xu. Ma shishan pu na ba do ma ɲuŋɔ ni.» 38 A Shimeyi di saan wu pye: «Yʼa bɛ! Na kafɔɔ saan wʼa yemu jo ge, nɛ na lee pye.» A Shimeyi di gori yaha Zheruzalɛmu ni.
39 Ga ba yee taanri ya toro wɛ, a Shimeyi wo kapyebyii shuun wa di ba baa kari Maaka ja Akishi yíri, Gati kulo li saan we. A pʼi shɛ yee jo Shimeyi mu na wu kapyebyii pu wa Gati kulo li ni. 40 A Shimeyi di wu kafaŋa co na shɔnkoro taha ki na, na gari Gati ni Akishi yíri wu kapyebyii pu fɛni. A Shimeyi di gari, na shɛ ba ni pu ni na yìri Gati kulo li ni.
41 A pʼi shɛ yi jo Solomani mu na Shimeyi bi yìri Zheruzalɛmu ni na kari Gati kulo li ni, na wu dʼa kuri pa. 42 A saan wu pu pye pʼa shɛ Shimeyi yiri, na ba wu pye: «Go nɛ mu pye mu ya kàa Tɛhɛnɛ Baa Kilɛ na, na ma ɲuŋɔ taha jo ma ga foro shɛ xuu wa ni caŋa caŋa jo mʼa xu. A mu di nɛ pye na yʼa bɛ, na mʼa yi logo. 43 Kaaga ke mʼa kàa Tɛhɛnɛ Baa Kilɛ ɲaha tàan ge, ɲaha na ma di ya ta kee ɲɔ fa-ɛ wɛ? Nɛ ma ɲuŋɔ taha lemu na ge, ɲaha na ma di ya lee ɲɔ fa-ɛ wɛ?» 44 A saan wu Shimeyi pye: «Kakuuŋɔɔ kiimu bɛɛri mʼa pye nɛ to Dawuda na ge, ki wa ma funŋɔ ki ni, mʼa ki bɛɛri cɛ. Tɛhɛnɛ Baa Kilɛ na ba kee kakuuŋɔɔ ki bɛɛri shan ma ɲuŋɔ ni. 45 Ga Tɛhɛnɛ Baa Kilɛ na ba baraga le nɛ ni, na fanha le Dawuda wo saanra koro li ni fo gbee.» 46 A saan wu Zhoyada ja Benaya yirige, a wee di foro na shɛ wu gbo. A wu xhu mu lee xugana li na. Lee funŋɔ ni a saanra tʼi fanha ta Solomani keŋɛ ni.