Dawuda wo kafilasama
23
Dawuda wo kafilasama wu ɲɛ we:«Zhese ja Dawuda wo ɲɔ jomɔ pu ɲɛ pe,
Kilɛ ya ná wemu ɲuŋɔ yirige ge, wee wo jomɔ pu ɲɛ pe.
Ná wemu wʼa Yakuba wo Kilɛ wu wo sindirimɛ pu ta ge,
wee wo jomɔ.
Ná wemu wo mɛgɛ Izirayɛli shɛɛn pʼa jee ciire ge,
wee wo jomɔ pu ɲɛ pe.»
2 Kilɛ Munaa lʼa yu nɛ wo ɲɔ ki na,
wu jomɔ pu wa nɛ ɲile li na.
3 Izirayɛli wo Kilɛ wʼa jo,
Izirayɛli wo faaga kʼa nɛ pye:
‹Wemu wʼa sipyiire ti mara ni tiimɛ ni ge,
wemu wʼa wu wo fanha ki pyi ni Kilɛ ɲìi fyaara ni ge,
4 weefɔɔ ɲɛ ba ɲimuguɲɔ ɲɛ wɛ,
ba caŋa ma foro mɛ ɲisɔɔgɔ ka tàan, ɲahaya baa wɛ.
Ki kpɛɛngɛ ki baraga ni, ba zanha ya to wɛ,
ɲà ki na fin na foro ɲiŋɛ ki ni.›
5 Pee saama pe tuugo Kilɛ ya byi nɛ wo puga ki mu.
Bani wʼa kariɲɛɛgɛ ɲɔmɛɛ nixhɔbaana lɔ ni nɛ ni.
Wʼa kodorogoo wolo li na, kee kiimu ya li mara na ɲɔ ge.
Wu na ba na pye se tavɔɔ keree bɛɛri ni,
na nɛ wo ɲidaan keree ki bɛɛri ɲɔ fani nɛ mu.»
6 Ga laɲɔbaalaa pu bɛɛri ɲɛ ba xhuyo ɲɛ wɛ,
yemu yʼa wá ge, sipya ya yi luu ni keŋɛ ni wɛ.
7 Sipya wemu bu jo wu gbɔn yi na,
wʼa yaa na tɔɔrɔ yagboŋɔ lɔ, kelee canmu katinnɛ,
na yi bɛɛri sorogo taapile ni.»
Dawuda wo kashɛn naŋmaya ye
(1 Caŋa Ɲɛhɛɛ Jomɔ 11:10-47)
8 Ayiwa, Dawuda wo kashɛn naŋmaya yi mɛyɛ yi wa ye: Yoshɛbu-Bashebɛti, wee bye Takemɔni shɛn. Wee wu bye kashɛnŋmuu kabesinŋɛɛ wuu taanri wu wo ɲuŋɔfɔɔ. Wee wʼa to namaa xhuu gbarataanri (800) na, na pu su su na furi taapile ni.
9 Wee bu laha wà, lʼa nɔ Dodo ja Eleyazari na. Dodo bi bye Awoyi wo ja. Naŋmaya taanri wemu wʼa fara Dawuda na, na Filisiti shɛɛn pu ɲuŋɔ círi, pu pinnɛduun wu ni kashɛn ki kaa na ge, Eleyazari ya pye wee shɛn nigin wa. Lee bi Izirayɛli shɛɛn pu ta pu na fe na gbee na xɔ. 10 Wee wʼa yere kashɛn ki na, na Filisiti shɛɛn pu gbo, fo na shɛ wu keŋɛ ki pye kʼa waha gbara wu ŋmɔpara li na. A Tɛhɛnɛ Baa Kilɛ di Izirayɛli shɛɛn pu pye pʼa sii se ta fo can can ni kee caŋa ke. A kashɛnŋmuu pusamaa di guri pa yɛ, na ba sipyixuyo yi wo naafuu wu kuu.
11 Wee bu laha wà, lʼa nɔ Arari shɛɛn Shama na, Age wo ja we. Caŋa ka Filisiti shɛɛn pʼa pa binnɛ Lexhi ni. Lee bi tɛgɛ ka ta wà, ki bɛɛri na ɲɛ caa, a sipyiire tʼi ganha na fe kɔnhɔ pʼi shɔ Filisiti shɛɛn pu na. 12 A Shama di yere caa tɛgɛ ki niŋɛ ki ni, na Filisiti shɛɛn pu niinɛ, na caa tɛgɛ ki ɲuŋɔ wolo. A Tɛhɛnɛ Baa Kilɛ di Izirayɛli shɛɛn pu pye pʼa sii se ta fo can can ni.
13 Yalɔɔrɔ ta wo lɔduun wa ni, a ɲuŋɔfɛɛ taanri wa di ba foro ɲuŋɔfɛɛ kɛlɛɛ taanri (30) wu ni caŋa ka, na digi na kari Dawuda yíri Adulamu faaga wege ki ni. Lee bi Filisiti shɛɛn pu wo kashɛn keŋɛ ka ta kʼa sin Arafa shi shɛɛn pu wo faaya yi tɛ fawii li ni. 14 Lee bi Dawuda bɛ ta wu wo talaraga nizaaŋa ki ni, Filisiti shɛɛn pu wo kashɛnŋmuu pii dʼa Bɛtilɛhɛmu co.
15 A waga di ba sii shɔ Dawuda ni, a wu jo: «Keeŋɛ ke ki wa Bɛtilɛhɛmu tajege ki ɲɔ ki na ge, jɔgɔ wʼa da na kan kee wo lɔhɔ di gba wɛ?» 16 Wee tuun wu ni a yee naŋmaya taanri wu yìri, na jé Filisiti shɛɛn pu wo kashɛn keŋɛ ki ni fanha bɛ na, na shɛ lɔhɔ ka yeege Bɛtilɛhɛmu kulo li tajege ki wo keeŋɛ ki ni, na ba ni ki ni, na pa gan Dawuda mu. Ga a saan wu li she wu da lɔhɔ ki gba wɛ. A wu ki pye saraga niwoŋɔ, na ki wo ɲiŋɛ na Tɛhɛnɛ Baa Kilɛ mu. 17 A wu jo: «Bada! Nɛ da ga lee pye wɛ Tɛhɛnɛ Baa Kilɛ! Namaa piimu pʼa pu munahaa pɛrɛ fɔ ki tashaga ni ge, ta pee wo shishan bɛ wɛ?» A wu bye wu ya ta sɔɔ na ki gba wɛ. Yee kashɛn naŋmaya taanri wu wo nibyii lʼa pye lere.
18 Abishayi, wee bye naŋmaya taanri wu wo ɲuŋɔfɔɔ. Wee bye Seruya ja Jowabu wo ceborona. Wee wʼa namaa xhuu taanri (300) gbo caŋa ka ni wu canmi wu ni, a lee di wu mɛgɛ yeege pu taanri wu tɛ ni. 19 Wee wʼa mɛgbɔhɔ ta pu taanri wu bɛɛri ni. Wee wʼa pye pu ɲuŋɔfɔɔ. Ga wu ya piipu shɛnshiilee taanri wu xɔ wɛ.
20 Zhoyada ja Benaya, wee bɛ bye kashɛn naŋmaga ka, wu bɛ ya kagbɔhɔɔ niɲɛhɛŋɛɛ pye. Kabisɛli shɛn wu bye wii. Wee wʼa Mowabu shɛɛn pu kashɛnŋmuu pu bɛɛri wo naŋmaya shuun wu gbo. Wee ninumɔ wʼa tigi jé keeŋɛ ka funŋɔ ni cɛnri fɛni caŋa ka wiire ti sɛɛ sɛɛ wuuro ti tuun wa ni, na wu gbo. 21 Wee wʼa Misira shɛn ná baraga wo wu gbo. Canmi wu bye Misira shɛ wu keŋɛ ni. A Benaya di wu ɲuŋɔ círi ni kagaanga ni, na wuyɛ pyaa wo canmi wu shɔ wu na, na wee taga wu gbo. 22 Lee Zhoyada ja Benaya ya pye, a wu mɛgɛ lɔ lee funŋɔ ni, pu naŋmaya taanri wu tɛ ni. 23 Wee wʼa mɛgɛ ta xuuni na ye pusamaa na pu kɛlɛɛ taanri (30) wu ni. Ga wu ya piipu shɛnshiilee taanri wu xɔ wɛ. Kashɛnŋmuu piimu pʼa Dawuda ɲuŋɔ sigee ge, a Dawuda di wu pye pee wo ɲuŋɔfɔɔ.
24 Zhowabu ceborona Azayɛli, wee bɛ wu bye kɛlɛɛ (30) wu ni,
na fara Bɛtilɛhɛmu shɛɛn Dodo ja Elana na,
25 ni Arodi shɛɛn Shama,
ni Arodi shɛɛn Elika,
26 ni Bɛti-Palɛti shɛɛn Elɛsi,
ni Tekowa shɛɛn Ikɛshi ja Ira,
27 ni Anatoti shɛɛn Abyezɛri,
ni Usha shɛɛn Mebunayi,
28 ni Awoyi shi shɛɛn Tisalimɔ,
ni Netofa shɛɛn Maxharayi,
29 ni Netofa shɛɛn Baana ja Xhelɛbu,
ni Gibeya shɛɛn Iribayi ja Itayi, na foro Bɛnzhamɛ wo jalaa pu ni,
30 ni Piratɔn shɛɛn Benaya,
ni Naxhale-Gashi shɛɛn Idayi,
31 ni Bɛti-Araba shɛɛn Abi-Alibɔn,
ni Baruxhumu shɛɛn Azimavɛti,
32 ni Shalibɔn shɛɛn Eliyaba,
ni Bene-Yashɛn, ni Zhonatan,
33 ni Xharari shɛɛn Shama,
ni Arari shɛɛn Sharari ja Ayamu,
34 ni Maaka shɛn wu ja Asibayi wo ja Elifelɛti,
ni Gilo shɛɛn Atofɛli ja Eliyamu,
35 ni Karimɛli shɛɛn Xhɛsirayi,
ni Aravu shɛɛn Parayi,
36 ni Zoba shɛɛn Natan ja Yigali,
ni Gadi shɛɛn Baani,
37 ni Amɔ shi shɛɛn Selɛki,
ni Berɔti shɛɛn Narayi, wee wu bi Seruya ja Zhowabu wo kashɛn yagboyo yi luu,
38 ni Yetɛri shi shɛɛn Ira,
ni Yetɛri shi shɛɛn Garebu,
39 ni Xɛti shɛɛn Uri.
Pu bɛɛri ya pye namaa kɛlɛɛ taanri ni gbarashuun (37).