Dawuda ya yogo kemu cee ge
(Zaburuu 18)
22
Tuun wemu ni Tɛhɛnɛ Baa Kilɛ ya Dawuda wolo wu pɛɛn pu bɛɛri keŋɛ ni, na wu wolo Sɔli bɛ keŋɛ ni ge, a wu ke yogo ke cee na:2 «Tɛhɛnɛ Baa Kilɛ wu ɲɛ nɛ wo faaga ke,
nɛ wo kashɛn ɲuŋɔ círi círi kasɔrɔgɔ, ni na shɔvɔɔ.
3 Kilɛ wu ɲɛ nɛ wo faaga ke, kemu nɔhɔ ni nɛ laraa ge.
Wee wu ɲɛ nɛ wo ŋmasigiŋɛ ke, nɛ wo setaara ti wo yagboŋɔ ke.
Wee wu ɲɛ nɛ wo taŋmɔhɔŋɔ ke, nɛ wo talaraga ke.
Nɛ wo shɔvɔɔ wʼa nɛ shuu kafugo fɛɛ pu na.
4 Nɛ ma mujuu wá na jo: ‹Tɛhɛnɛ Baa Kilɛ wʼa sɔni!›
Bani wʼa nɛ shɔ na pɛɛn pu na.
5 Xu wo lokuruyo yi bi na ɲɔ tɔ na xɔ.
Lofomɔ pemu pʼa kakara ti pyi ge, pee bi fyaara leŋɛ nɛ ni fo xuuni.
6 Pu bi yaŋa kanha wo pɔɔrɔ ti durogo na xɔ nɛ na.
Xu wo jɔ wu bi pɛri nɛ ɲahagbaa na.»
7 Nɛ cɔnrɔmɔ wo wʼa Tɛhɛnɛ Baa Kilɛ ɲɛɛri,
nɛ mɛyire wá na Kilɛ wu mu.
Wʼa nɛ mujuu li logo na wu yaha wu pɛɛŋɛ puga ki ni.
Na mɛyire lʼa jé wu ɲuwii li ni.
8 A ɲiŋɛ kʼi jolo, na jɛlɛ.
A fugba wu nɔhɔshanma pʼi jɛlɛ.
Yʼa cɛlɛ bani wu luu li bi yìri.
9 Wurege ki bi fòro wu munahaa ki ni na duri.
Na ki bi fòro wu ɲɔ ki ni, na sori.
Naganɲigaa ki bi fòro ki ni.
10 Wʼa fugba wu tirige,
na digi ni ɲahaŋa niwɔhɔŋɔ tabaaga ka ni wu tɔɔyɔ yi ni.
11 Serubɛn† na wu bi dugi na yìri,
Kafɛɛgɛ ki wo kapaya yi na wʼa pa.
12 Wʼa nibiige taga wuyɛ maha,
na ɲahaya niwɔhɔyɔ zanha woyo taga wuyɛ tɔ.
13 Kpɛɛngɛ ke ki bi ɲí wu ɲahagbaa na ge,
naganhaa ki bi fòro kee ni.
14 Tɛhɛnɛ Baa Kilɛ ya tin fugba wu ni,
Kilɛ-gbɔtabaaga ya wu mujuu li yeege.
15 Wʼa ŋmaya ŋmɔ, na pɛɛn pu caaga.
Wʼa Kilɛ-ɲinɛ taga pu niinɛ.
16 Kafɔɔ ya pu niinɛ ni wu kafɛɛgɛ ki ni,
ni wu munahaa kafɛɛgɛ ki ni,
a lee di suumɔ lɔhɔ ki waha,
na ɲiŋɛ ki nɔhɔshanma pu yeege.»
17 Na wu yaha fugba wu ni, wʼa keŋɛ yeege, na nɛ co.
Wʼa nɛ kile yeege logbɔhɔyɔ yi ni.
18 Wʼa nɛ shɔ na pɛɛn pu wo sɛfɛɛrɛ ti na.
Piimu pʼa nɛ kɔ, se bɛ di ɲɛ pu ni na ye nɛ na ge,
wʼa nɛ shɔ pee na.
19 Caŋa kemu cɔnrɔmɔ ya nɛ ta ge, kee caŋa pʼa to nɛ na.
Ga Tɛhɛnɛ Baa Kilɛ wʼa nɛ tɛgɛ.
20 Wʼa nɛ shɔ, na tifahama kan nɛ mu.
Wʼa na ɲuŋɔ wolo, bani na kaa lʼa taan wu mu.»
21 Tɛhɛnɛ Baa Kilɛ ya nɛ co na saha ni na wo tiimɛ pu ni.
Wʼa nɛ keye yi ta fɛɛfɛɛ, na lee wo saraa kan nɛ mu.
22 Bani nɛ Tɛhɛnɛ Baa Kilɛ wo korogoo ki mara.
Nɛ ta she na Kilɛ wu ni, na jé kakuuŋɔɔ ni na byi wɛ.
23 Wu kodorogoo ki bɛɛri ki wa nɛ ɲaha tàan.
Nɛ ta laraga kɔn wu ɲɔmɛjogoo ki na wɛ.
24 Nɛ pye jaagi baa fɔɔ wu ɲaha tàan.
Nɛ nayɛ co katiibaa ki bɛɛri tàan.
25 Lee na Kafɔɔ bɛ ya nɛ wo tiimɛ pu saraa kan nɛ mu,
bani wu ɲii lʼa nɛ wo tifire ti ɲa.»
26 Kafɔɔ, wemu bu bye ɲɔmɛɛ fɔɔ,
mu bɛ na ma wo ɲɔmɛɛ fɛɛrɛ ti shɛ weefɔɔ na.
Wemu bu bye jaagi baa fɔɔ,
mu bɛ na mayɛ shɛ jaagi baa fɔɔ weefɔɔ na.
27 Wemu bu bye tifire pyevɔɔ,
mu bɛ na ma wo tifire ti shɛ weefɔɔ na.
Ga wemu bu bye kanahaya pyevɔɔ,
mu bɛ na weefɔ saraa na bɛ ni wu kanaya yi ni.
28 Pʼa piimu cɛrɛŋɛ ge, mu ya pee ɲuŋɔ wo.
Mu wo ɲɛwiinɛ li ma tabaara fɛɛ pu tirige.
29 Tɛhɛnɛ Baa Kilɛ, mu wu ɲɛ nɛ wo kpɛɛngɛ ke!
Tɛhɛnɛ Baa Kilɛ wʼa kpɛɛngɛ yeege nɛ mu nibiige ki ni.
30 Nɛ ma gburogi to kashɛn keŋɛ na ni mu ni,
nɛ ma kashɛn ɲaha kɔn kɔn kasɔrɔgɔ kɔn ye ni na Kilɛ wu ni.
31 Kilɛ wo korogoo kʼa tii.
Nakaara wa Tɛhɛnɛ Baa Kilɛ wo nijoyo yi ni wɛ.
Piimu bɛɛri pʼa wu pye pu talaraga ge,
wu ɲɛ pee bɛɛri wo ŋmasigiŋɛ.»
32 Wee tuun wu ni jɔgɔ di ɲɛ Kilɛ mu Tɛhɛnɛ Baa Kilɛ kadugo na wɛ?
Jɔgɔ wu ɲɛ faaga ke wèe wo Kilɛ wu kadugo na wɛ?
33 Kilɛ wu ɲɛ nɛ wo taŋmɔhɔŋɔ see see wogo ke.
Wee wʼa nɛ wo korogoo ki deele na yari.
34 Wʼa na tɔɔyɔ yi wɛrɛŋɛ ba sɔ woyo yi ɲɛ wɛ.
Wʼa na yereŋɛ faaboboyo yi na.
35 Wʼa na keye yi taanni kashɛn ni.
Wʼa na keye yi tɛri na daɲaa wo sindaa ki ŋmuu.
36 Mʼa ma ŋmasigiŋɛ ki kan na mu, na na shɔ,
a ma saama pʼi na pye sipyigbɔ.
37 Mʼa na kozhɛɛ li pɛlɛ,
a na tɔɔyɔ yʼi bye yi ya guruŋɔ wɛ.
38 Nɛ ma na pɛɛn pu nɔhɔ niinɛ, na pu ɲuŋɔ tugo.
Nɛ da ga guri na ta nɛ ya pu shi tɔ wɛ.
39 Nɛ ma pu ɲuŋɔ tugo, na pu kɛgi kɛgi.
Pu da ga já yìri bada wɛ.
Pʼa to to nɛ tɔɔyɔ yi ni.
40 Mʼa fanha le nɛ ni kashɛn ki kaa na.
Mʼa na pɛɛn pu pye pʼa nuguro sin na fɛɛ ni.
41 Mʼa na pɛɛn pu pye pʼa paa na ɲaha na.
Piimu pʼa nɛ kɔ ge, nɛ na ba pee ɲuŋɔ tugo.
42 Pu wa na wii puyɛ tàan, ga sipya bɛ wa wu pa pu tɛgɛ wɛ!
Pʼa mɛyire wá Kafɔɔ mu, ga wu ya pu ɲɔ shɔ wɛ!
43 Nɛ pu ja ja ba ɲiŋɛ puuro ɲɛ wɛ.
Nɛ pu tɔnhɔnɔ, na pu tɔnhɔ ba kakuugo funŋɔ ɲɔrɔyɔ ɲɛ wɛ.»
44 Mʼa na shɔ na shi shɛɛn pu wo yogo ki na,
na na teŋɛ fiiye yatii shɛɛn ɲuŋɔ ni.
Shi wemu wu ɲɛ nɛ wu cɛ-ɛ ge, a wee di guu nɛ mu.
45 Nabuun pʼa ma na nɛ naari.
Nɛ bu ɲɔ mugi yɛ, ye nɛ jo ge, pʼa yee koo ɲaari.
46 Nabuun pu wo tadaŋa kʼa kyɛɛgi.
Pu wa na jɛlɛ na ma,
na yìri pu kashɛn ɲaha kɔn kɔn kulogoo baraga wogoo ki ni.»
47 Tɛhɛnɛ Baa Kilɛ wa ɲìi na!
Masɔŋɔ ki ɲɛ nɛ maravɔɔ wu wogo!
Kilɛ wʼa sɔni,
wee ɲɛ faaga, kemu kʼa nɛ ɲuŋɔ wo ge.
48 Kilɛ wʼa nɛ wo foo li tɔni na pɛɛn pu mu,
na fiiye yatii shɛɛn kuuni na gaan nɛ mu.
49 Wee wʼa nɛ shuu na pɛɛn pu na!
Wʼa na yirige na pɛɛn pu ɲuɲɔ na,
na na shɔ sipyigagaŋa ki na.»
50 «Lee wuu na nʼa da ba ma sɔ
fiiye yatii shɛɛn niŋɛ ni na Kafɔɔ,
di ma masɔŋɔ yoyo cee, di ma pɛlɛ.
51 Saan wemu wʼa shɔɔnri lɔ ge,
wʼa kagbɔhɔɔ pye na wee ɲuŋɔ wolo.
Wu sindirimɛ pʼa taga ná wemu tire ge,
wʼa wu saama pu shɛɛ wee na,
wʼa pu shɛɛ Dawuda ni wu tirige shɛɛn pu na fo gbee.»