Yee taanri wo xuugbɔhɔ ke
21
Ayiwa, Dawuda wo saanra ti caŋa ɲii li ni, xuugo ka ya pa jé fiige ki ni na yee taanri pye na taha kiyɛ na. A Dawuda di Tɛhɛnɛ Baa Kilɛ yege, a wu jo: «Sɔli ni wu puga kʼa shishan wo. Pʼa Gabawɔn shɛɛn pu gbo, lee wuu na ke xuugo ke ya pa.» 2 A saan wu Gabawɔn shɛɛn pu yiri, na ba jo ni pu ni. Gabawɔn shɛɛn pu bi ta pye Izirayɛli shɛɛn pu ni wɛ, ga Amɔ shi shɛɛn piimu pʼa kori ge, pee pʼa pu ɲɛ pii. Izirayɛli shɛɛn pʼa bi ɲɔmɛɛ lɔ pu mu ni kaaga ni na pee da ga pu gbo wɛ, ga lee bɛ na Sɔli bi li yereŋɛ fo na pu shi tɔ, ma li kaɲuŋɔ pye Izirayɛli ni Zhuda wo keree kʼa bi wu zɔ wu ɲi.a3 A Dawuda di Gabawɔn shɛɛn pu pye: «Lekɛ nɛ da já bye yee mu wɛ? Yaagana lekɛ na nɛ di da ke yaaŋa ke pye kɔnhɔ yee di duba pye Tɛhɛnɛ Baa Kilɛ wo sipyii pu wu mu wɛ?» 4 A Gabawɔn shɛɛn pʼi wu pye na: «Wari kelee sanni keree wa wèe ni Sɔli ni wu puga ki tɛ ni wɛ, lʼi wa wèe mu wèe pu sipya bɛ gbo Izirayɛli fiige ki ni wɛ.» A saan wu jo: «Yi bu yemu jo, lee nʼa da bye yi mu.» 5 A pʼi saan wu pye: «Ma na jo ba we ná wʼa bi li yereŋɛ fo na wèe shi tɔ wɛ, ma na jo ba wʼa bi li yereŋɛ wu wèe ɲuŋɔ tugo, wèe di juri laha Izirayɛli ɲiŋɛ ki na wɛ, 6 wee tuun wu ni, yi namaa gbarashuun ɲɔ yaha wù mu wu jalaa pu ni, wù pee pɔ gbo tiye na pʼa figi Tɛhɛnɛ Baa Kilɛ ɲaha tàan Sɔli wo Gibeya wu ni, wee Sɔli wemu Tɛhɛnɛ Baa Kilɛ bi shɔɔnri lɔ ge.» A saan wu jo: «Nɛ na pu le yi keŋɛ ni.» 7 Ga a saan wu doro Sɔli ɲabige Mefiboshɛti ɲuŋɔ ni, Zhonatan wo ja we, ma li kaɲuŋɔ pye wu ni Sɔli ja Zhonatan bi kaaga ka kaa na kan puyɛ mu Tɛhɛnɛ Baa Kilɛ ɲaha tàan. Kee kaaga ki wuu na wʼa toro Mifiboshɛti ɲuŋɔ ni.b 8 Aya poro pushɔ Irisipa bi jalaa shuun wemu se Sɔli mu ge, Arimɔni ni Mefibosɛti, a saan wu pee co. Sɔli poro pushɔ Mikali bi jalaa kaguro wemu se Mewola shɛɛn Adiriyɛli mu ge, Barizilayi wo ja we, a saan wu pee bɛ co, 9 na shɛ pee kan Gabawɔn shɛɛn pu mu, a pee di pu pɔ gbo tiye na pu na figi faaboboŋɔ ki na, Tɛhɛnɛ Baa Kilɛ ɲaha tàan. A pu gbarashuun wu bɛɛri di xhu shiizhan. Ɔrijɛ† yalɔɔrɔ ti ɲɔkɔɔnri ti na pʼa pu gbo, yalɔɔrɔ ti piishiiye yi na.
10 A Aya poro pushɔ Irisipa di bɔrɔgɔ ka lɔ, na shɛ kee pii faaga ka na, na diin kee wo ɲimɛ pu ni na co yalɔɔrɔ ti ɲɔkɔɔnrɔ ti na, fo na shɛ zanhaya pye yi na dun xuu pu na. Wu bi shazhɛɛrɛ ti ɲaha kɔɔn caŋa ni xuu pu na, na sige xaara ti ɲaha kɔɔn piige ni. 11 Irisipa ya lemu pye ge, a pʼi shɛ yee jo Dawuda mu. Irisipa bi bye Aya wo poro pushɔ, Aya di ɲɛ Sɔli wo furu pɔbaa shɔ. 12 Wee tuun wu ni a Dawuda di shɛ Sɔli ni wu ja Zhonatan kaciiye yi ɲɛɛri Yabɛshi shɛɛn mu Galadi wo koomɔ pu ni. Caŋa kemu Filisiti shɛɛn pʼa se ta Sɔli na Gilibowa kulo li ni ge, a pʼi Sɔli ni Zhonatan pɔ gbo tiye na pu na figi Bɛtishan wo kpɛɛngɛ ki na, a Yabɛshi shɛɛn di shɛ pu nixhuyo yi peele sanha na pa. 13 A Dawuda di ba ni Sɔli ni wu ja Zhonatan kaciiye yi ni. Shɛɛn gbarashuun wemu bɛ pʼa bi kori ge, a pʼi pee bɛ wo kaciiye yi wá yiyɛ na. 14 A pʼi Sɔli ni wu ja Zhonatan wo kaciiye yi le Bɛnzhamɛ wo ɲiŋɛ ki ni, Sela kulo li ni, Sɔli to Kishi wo faŋa ki ni. Saan wʼa yemu bɛɛri jo ge, a pʼi lee bɛɛri pye. Lee kadugo na a Tɛhɛnɛ Baa Kilɛ di pu ɲɛrɛgɛ ki shɔ, na saama pye fiige ki mu.
Filisiti shɛɛn pu wo kashɛn ke
(1 Caŋa Ɲɛhɛɛ Jomɔ 20:4-8)
15 Ayiwa, a Filisiti shɛɛn pʼi ba guri kashɛn yirige sanha Izirayɛli shɛɛn pu fɛni. A Dawuda ni wu kashɛnŋmuu pʼi digi kari kashɛn ki na Filisiti shɛɛn pu fɛni. A Dawuda di ba wuyɛ ta wʼa kanha. 16 Daɲaa canmi wa bye Arafa wo tirige shɛn Yishibi-Benɔbu mu. Wee canmi wu tidugumɔ pu bi ɲɛhɛ kiloo taanri na, ŋmɔpara nivonɔ bɛ di ɲɛ wu mɛnugumɔ pu ni. Wu bi yu na ma Dawuda gbo. 17 A Seruya ja Abishayi di ba keŋɛ kan Dawuda mu, na Filisiti shɛn wu gbo. Ba lee ya pye wɛ, a Dawuda wo kashɛnŋmuu pʼi gaa wu mu, na wu pye: «Mu wa da ga shɛ nige ni wèe ni kashɛn ni wɛ. Ma ganha bu ba Izirayɛli wo sokinna wu pye wu fugi wɛc.»
18 Lee kadugo na, a kashɛn kʼi ba nugo yìri sanha Gɔbu kulo li ni ni Filisiti shɛɛn pu ni. A Usha tirige shɛn Sibekayi di Safu gbo, wee bye Arafa wo tirige shɛn wa.
19 A kashɛn kʼi ba guri yìri sanha ni Filisiti shɛɛn pu ni Gɔbu kulo li ni. Yare ja Elana, na yìri Bɛtilɛhɛmu ni, a wee di Gati shɛɛn Goliyatid gbo. Canmi we wu bye wee Goliyati wu mu ge, tinnɛ lemu na pu ma gbee fakuugo ki migile ge, wu katinnɛ li bi lee tinnɛ li xɔ.
20 A kashɛn kʼi nugo pa yìri sanha Gati kulo li ni. Filisiti shɛn wa bye wà, wu bi tɔnnɔ, wu keŋɛ ka bɛɛri ɲɛ ni kabɛhɛɛ gbaara ni, wu tɔɔgɔ ka bɛɛri ɲɛ ni nibɛhɛɛ gbaara ni. Kabɛhɛɛ kee ni nibɛhɛɛ ki bɛɛri ɲɛ kɛlɛɛ shuun ni shishɛɛrɛ (24). Wee bɛ bye Arafa wo tirige shɛn wa. 21 A wee ná wu Izirayɛli shɛɛn pu fanha. A Dawuda ceborona Shimeya wo ja Zhonatan, a wee di wee ná wu gbo. 22 Pii namaa shishɛɛrɛ we bɛɛri bi foro Arafa wo shi wu ni, Gati kulo li ni. A pu bɛɛri di do Dawuda ni wu kashɛnŋmuu pu keŋɛ kurogo.