2 Samuwɛli 20

Seba ya ɲuŋɔ nari Dawuda na

Ayiwa, lee bi ná wetɔnɔ baa wo wa ta, wu mɛgɛ di ɲɛ na Seba, wee bye Bikiri wo ja wa, Bɛnzhamɛ wo tirige shɛn wa. A wee di maga wi na jo: «Wèe yafiin la wa Dawuda ni wɛ! Kaa la shishiin wa wèe ni Zhese ja wu tɛ ni wɛ! Yʼa se Izirayɛli shɛɛn, wa bɛɛri wʼa se wu puga!» 2 A Izirayɛli shɛɛn pu bɛɛri di Dawuda yaha wà, na daha Bikiri ja Seba fɛni. Ga a Zhuda wo sipyii pʼi fiin pu saan wu na, na wu torogo, na lɔ Zhurudɛn gba wu ɲɔ ki na, fo na shɛ nɔ Zheruzalɛmu ni.

3 A Dawuda di gari wu kaban Zheruzalɛmu ni. Wu furu pɔbaa cèe kɛ wemu wʼa bi yaha pʼa wu puga ki kasɛɛgɛ pyi ge, a wu pu lɔ, na pu yaha puga ka ni kasɛɛgɛ pyevɛɛ ɲɛ kemu na ge. A wu ganha na pu ɲuŋɔ keree ki bɛɛri yari, ga wu ya jé nige wa mu pu ni wɛ. A wu pu bɛɛri tɔ yaha fo na shɛ nɔ pu caxhuyo na, a pʼi bye ba naxhugo shaa ɲɛ wɛ.

Zhowabu ya Amasa gbo

4 Ayiwa, lee kadugo na a saan wu ba Amasa pye: «Zhuda wo kashɛnŋmuu pu yiri cabyaa taanri funŋɔ ni, ma ni pu ni yʼi ba binnɛ naha.» 5 A Amasa di gari Zhuda wo kashɛnŋmuu pu tayirige ni, ga saan wʼa tuun wemu shɛ wu na ge, a wee di doro wu yaha wà. 6 Wee tuun wu ni a saan wu Abishayi pye: «Biriki ja Seba na ba kakuunɔ pye nimɛ wèe na na toro Abusalɔn tàan. Na wo kashɛnŋmuu pu lɔ, mʼa daha wu fɛni, kɔnhɔ wu ganha bu shɛ jé kashɛn ɲaha kɔn kɔn kasɔrɔgɔ wo kulo la ni, wu biin wù na wɛ.» 7 A Abishayi di gari ni Zhowabu wo kashɛn keŋɛ ki ni na fara Kerecɛɛn pee ni Pelecɛɛn, ni kashɛn naŋmaya yi bɛɛri na. A pʼi foro Zheruzalɛmu ni, na ganha na Seba ja Bikiri nɔhɔ niinɛ.

8 Faatabaaga ke ki wa Gabawɔn kulo li ni ge, ba pʼa shɛ nɔ wà wɛ, na Amasa nibawo ɲa pu ɲahagbaa na. Zhowabu bi fàya yemu le ge, kirige wu bi taga yee pɔ, na ŋmɔpara le kee kirige ki na. Lee ŋmɔpara le bye li forogo ni na pɔ wu mɛnugumɔ pe ni. A ŋmɔpara lʼi wolo to na Zhowabu yaha wu na gaaŋi. 9 A Zhowabu di Amasa pye: «Mʼa cuuŋɔ ya na ceborona?» A wu wu kanige keŋɛ ke taga Amasa ɲahazhɔ wu co kɔnhɔ wu ɲɔsɔɔnrɔ fo kan wu mu. 10 Ŋmɔpara le li bye Zhowabu kamɛnɛ keŋɛ ki ni ge, Amasa ya ta kasɛɛgɛ yaha lee na wɛ. A Zhowabu di ŋmɔpara li taga wu su yacɛrɛ le ni, a wu laara tʼi wo ɲiŋɛ ki na, wu ya ta wu taha bɛ wɛ, a Amasa di xhu.

Seba wo nʼa she wʼa nɔ wu tadaŋa ni

Lee kadugo na a Zhowabu ni wu ceborona Abishayi di ganha na Bikiri ja Seba nɔhɔ niinɛ. 11 Zhowabu wo kapyebye nigin wa bi yere Amasa nixhugo ki tàan na yu: «Piimu pu wa Zhowabu fɛni, ni piimu pu wa Dawuda fɛni ge, pee pu taha Zhowabu fɛni!» 12 Lee bi Amasa ta wʼa gologolo wu shishan pu ni koo li niŋɛ ki ni. Ba wee kapyebye wʼa li ɲa na sipyiire ti bɛɛri tʼa ma na yeree wɛ, a wu Amasa nixhugo ki fuulo laha koo li ni, na wu yaha tɛgɛ ka ni, na fàŋa ka tɔ wu na. Bani wʼa li ɲa na wa bɛɛri bu nɔ wu na wufɔɔ na yere. 13 Ba pʼa wu laha koo li ni wɛ, a sipyiire ti bɛɛri di daha Zhowabu fɛni na Bikiri ja Seba nɔhɔ niinɛ.

14 A Zhowabu di Izirayɛli gbaweye yi bɛɛri ja toro fo na shɛ nɔ Abɛli-Bɛti-Maka kulo li ni, fo na shɛ nɔ Beri shɛɛn pu wo koomɔ pu ni. A Beri wo kashɛn naŋmaya yi bɛɛri di binnɛ na daha wu fɛni. 15 A pʼi gari na shɛ kashɛn keŋɛ ki sin na Abɛli-Bɛti-Maka kulo li maha Seba fɛni. A pʼi taduguŋɔ ka yàa tiiŋɛ kulo li maha maha kasɔrɔgɔ ki na ni puuro ni. Sipyiire temu bɛɛri ti bye ni Zhowabu ni ge, a pʼi ganha na kasɔrɔgɔ ki nɔhɔ wo kɔnhɔ kʼi do. 16 A cee fungɔngɔ fɔɔ wa di ganha na mujuu waa kulo li ni na yu: «Yi ɲuwegee shan! Yi ɲuwegee shan! Nʼa yi ɲɛɛri, yi shɛ yi jo Zhowabu mu na: ‹Fulo naha, nʼa giin di yɔgɔ ni ma ni!› » 17 A Zhowabu di fulo cee wu na, a cee wu jo: «Ta mu wu wa Zhowabu we?» A wu jo: «Uun nɛ wu ɲɛ wii.» A cee wu jo: «Logo na ɲɔ na.» A Zhowabu di jo: «Uun nʼa nuri ma ɲɔ na.» 18 A cee wu jo: «Taashiinɛ li ni pu bi ma dee na yi yu na: ‹Wù shɛ Abɛli kulo li shɛɛn yege wii!› Lee funŋɔ ni lee kaa li ɲaha na shɔɔnri. 19 Wèe wo kulo li ɲɛ kulo, ɲaɲiŋɛ ni sɛɛ wa lemu ni Izirayɛli fiige ki ni ge. A mu di ganha na zhaa di lee kulo li kyɛɛgi, lee lemu li ɲɛ kulo baraga wuu Izirayɛli fiige ki ni ge. Ɲaha na mu di Tɛhɛnɛ Baa Kilɛ wo cɛn wu shaa da gyɛɛgi wɛ?» 20 A Zhowabu di jo: «Bada! Nɛ da ga li kyɛɛgi bada wɛ! Nɛ da ga li ɲuŋɔ tugo bada wɛ! 21 Kee fungɔngɔ ke bɛ wɛ, ga Efirayimu wo faaboboyo koomɔ pu wo sipya wa, wu mɛgɛ ki ɲɛ na Seba, Bikiri wo ja wu ɲɛ wii, wee wʼa yìri saan wu kaa na, Dawuda kaa na. Yi wee yɛ nigin le wù keŋɛ ni, nɛ na kulo li yaha wà.» A cee wu Zhowabu pye: «Payi! Wʼà da wu ɲuŋɔ ki wá ma mu kasɔrɔgɔ ki ɲuɲɔ wu na.» 22 A cee wu shɛ jo ni sipyiire ti bɛɛri ni, ni fungɔngɔ fɛɛrɛ ni. A pʼi Bikiri ja Seba ɲuŋɔ kɔn, na ki wá Zhowabu mu. Wee tuun wu ni a Zhowabu di maga ki wi, a pʼi laha kulo li ɲɔ na, na gari. A wa bɛɛri di gari wu puga. Lee kadugo na a Zhowabu di guri pa Zheruzalɛmu ni saan wu tàan.

Dawuda wo fanha ki ɲahagbaa fɛɛ pu mɛyɛ

23 Ayiwa, Zhowabu wu bi bye kashɛn keŋɛ ki bɛɛri wo ɲuŋɔfɔɔ, Zhoyada ja Benaya di ɲɛ Kerecɛɛn pee ni Pelecɛɛn pu wo ɲuŋɔfɔɔ. 24 Adoramu di ɲɛ kapyewagaa ki pyevɛɛ pu wo ɲuŋɔfɔɔ, Ayiludi ja Zhozafati di ɲɛ sɛmɛɛ pu maravɔɔ. 25 Sheva di ɲɛ fɛkama we, Sadɔki ni Abiyatari di ɲɛ saraya ɲaha shɔɔnrivɛɛ. 26 Yayiri shɛɛn Ira bɛ wu bi bye Dawuda wo saraya ɲaha shɔɔnrivɔɔ wa.