Dawuda ya wu ja wu mɛɛ suu
19
Ba saan wʼa pee jomɔ pu logo wɛ, na shɔ na jɛlɛ, a wu dugi kari puga ki ni zangaso wu ni, kulo li tajege ki ɲɔ ki fugba wu ni, na shɛ ganha na mɛɛ suu wà. A wu ganha na ɲaari ɲaari, na yu: «Na ja Abusalɔn! Na ja! Na ja Abusalɔn! Aa, nɛ da bi xhu mu tɛgɛ! Abusalɔn, na ja, na ja!»2 A pʼi shɛ yi jo Zhowabu mu na: «Saan wʼa mɛɛ suu, na tataara pyi Abusalɔn keree na.» 3 A kee caŋa ki wo setaara tʼi ɲɛri kpɔn kadaan sipyiire ti bɛɛri mu, bani sipyiire ti bi yi nuri kee caŋa ke na: «Saan wu zɔ wʼa tanha wu ja wu keree na.» 4 Kee caŋa ke, a kashɛnŋmuu pʼi beele jé kulo li ni, ma na jo kashɛnŋmuu piimu pʼa paa kashɛn sige ni, a pu shiige wuu di nɔ na jin ge. 5 A saan wu wu ɲaha ki tɔ, na ganha na xhuulo ni mujugbɔɔ ni na: «Na ja Abusalɔn! Abusalɔn, na ja, na ja!»
6 A Zhowabu di gari saan wu fɛni na shɛ wu pye: «Mu ya shiige wá ma kashɛnŋmuu pu bɛɛri na niɲaa, pee piimu pʼa mu ɲuŋɔ wolo niɲaa ge, mu ni ma jalaa pee ni ma poro pushaa pee, ni ma cèe pee ni ma furu pɔbaa cèe pee. 7 Pii pʼa mu kɔ ge, pee pʼa dan mu ni, mu ya dan piimu ni ge, a mu di pee kɔ. Mu ya li shɛ niɲaa na ma kashɛn ɲuŋɔfɛɛ pee ni ma kashɛnŋmuu pu ɲɛ yaaga bɛ ma mu wɛ. Niɲaa nɛ li cɛ jo Abusalɔn da bi bye ɲìi na, a wèe bɛɛri di xhu niɲaa, lee li bi da daan mu ni. 8 Ayiwa, ma da voro nimɛ, na shɛ lowaa le ma kashɛnŋmuu pu ni! Ma bye di ya foro wɛ, nɛ kaa Tɛhɛnɛ Baa Kilɛ na, jo kashɛnŋmɔ nigin bɛ wa da gori naha ni ma ni ke yakoŋɔ ke ni wɛ. Lee bu bye, kawagaa kiimu bɛɛri kʼa ma ta ma lɔ ma lɛvɛɛrɛ ti na, fo na pa nɔ nimɛ na ge, le na ba golo na ye kee bɛɛri na.»a
9 Ayiwa, a saan wu yìri, na shɛ diin kulo li tajege ki ni. A pʼi shɛ yi jo kashɛnŋmuu pu bɛɛri mu na: «Saan wʼa pa diin kulo li tajege ki ni.» A kashɛnŋmuu pu bɛɛri di ba binnɛ saan wu tàan.
Dawuda ya kari Zheruzalɛmu ni
Izirayɛli wo kashɛnŋmuu piimu pu bye ni Abusalɔn ni ge, lee bi peesamaa ta pʼa paa, a wa bɛɛri di gari wu puga. 10 Sipyiire ti bɛɛri bi baari Izirayɛli gbaweye yi bɛɛri ni na yu na: «Saan wʼa wèe wolo wù pɛɛn pu keŋɛ ni. Wee wʼa wèe wolo Filisiti shɛɛn pu keŋɛ ni, ga nimɛ wʼa paa foro fiige ki ni Abusalɔn ɲaha na. 11 Ma li ta, wee Abusalɔn wemu wèe tìre na pye wù saan ge, wee ya kori kashɛn ki ni. Ayiwa, wù dʼa tiin na ɲaha sigee sanha, wù na saan wu kuruŋɔ pa deŋɛ wɛ?» 12 A Dawuda bɛ di tuduro yaha shɛ jo saraya ɲaha shɔɔnrivɛɛ Sadɔki ni Abiyatari mu na: «Yi yi jo Zhuda wo nɔhɔlɛɛ pu mu na: ‹Na saan wu kuruŋɔ pa wu puga, yi ganha bu gori lee kadugo yíri wɛ, bani yemu Izirayɛli sipyii pu bɛɛri wʼa yu ge, yee ya nɔ saan wu na wu puga. 13 Nɛ cebooloo pu ɲɛ yere, nɛ kaciiye ni nɛ ceexaara yee ɲɛ. Na saan wu kuruŋɔ pa wu puga, yee ma ja kori lee kadugo yíri korigana lekɛ na wɛ?› 14 Yʼi yi jo Amasa bɛ mu na: ‹Ta mu wa mɛ nɛ kaciiye ni nɛ ceexaara wɛ? Nɛ bye nɛ di ya ma teŋɛ na yaha fo gbee nayɛ ɲaha tàan, na pye na kashɛn keŋɛ ki ɲuŋɔfɔɔ Zhowabu faara wɛ, Kilɛ wu bɔɔngɔ shan na ɲuŋɔ ni, wu da la faraa ki na!› » 15 Mu na Dawuda ya pye na Zhuda wo namaa pu bɛɛri fungɔnyɔ ɲɛri wuyɛ yíri ba ná nigin ɲɛ wɛ. A pʼi te tuduro te tun saan wu mu na: «Kuri mʼa ma, ma ni ma sipyii pu bɛɛri.»
Dawuda ya ɲuŋɔ ɲaari Shimeyi na
16 Ayiwa, a saan wu guri na ma, na ba nɔ fo Zhurudɛn gba wu na. A Zhuda shɛɛn di gari Giligali kulo li ni di zhɛ saan wu ɲuŋɔ círi, pʼi Zhurudɛn gba wu kɔn ni wu ni.b 17 Bɛnzhamɛ wo tirige shɛn Gera ja Shimeyi wemu wu bye Bawurimu kulo li ni ge, a wee bɛ di gari tɔvuyo na ni Zhuda shɛɛn pu ni di zhɛ saan wu ɲuŋɔ círi. 18 Wu ni Bɛnzhamɛ wo tirige shɛɛn kabɔfonɔ nigin (1.000) wu bi bye, na fara Siba na, wee bye Sɔli wo puga ki wo kapyebye wa. Siba bi bye ni wu jalaa kɛ ni kaguro ni, ni wu kapyebyii kɛlɛɛ shuun (20). A pʼi shɛ nɔ Zhurudɛn gba wu na saan wu ɲaha na. 19 Piimu na ba sipyiire ti kɔn ge, a pee di gba wu kɔn ɲɛri, kɔnhɔ pʼi ba saan wu ni wu puga ki kɔn ɲɛri, pu wo ɲidaan wu fa. Ba saan wʼa gba wu kɔn ɲɛri wɛ, a Gera ja Shimeyi di ba do saan wu fɛɛ ni, 20 na wu pye: «Na kafɔɔ, ma ganha bu na nahama pu wii wɛ. Ee saan we, caŋa kemu mu bi fòro Zheruzalɛmu kulo li ni ge, katiibaana lemu ma kapyebye wʼa pye ma na, nɛ ge, ma ganha bu ma fungɔngɔ yaha lee katiibaana li na wɛ. Ma ganha bu ma kasɛɛgɛ yaha li na wɛ! 21 Nɛyɛ pyaa kʼa li cɛ jo jurumu nɛ pye. Ee saan we, nɛ wʼa pye Yusufu wo puga ki bɛɛri wo shɛnshiimɛ niɲaa, na pa jíri mu na.» 22 A Seruya ja Abishayi di jo: «Ta Shimeyi ya yaa na xu wu laŋi wu wuu na wɛ? Bani Tɛhɛnɛ Baa Kilɛ ya wemu tìre ge, wʼa wee laŋi.» 23 Ga a Dawuda di jo: «Yee Seruya jalaa, ɲaha na yee di yiyɛ leni nɛ keree ni wɛ? Ɲaha na yee dʼa yìri nɛ fɛni niɲaa ba yi pɛn ɲɛ-ɛ wɛ? Ta Izirayɛli wo sipya wa ɲɛ pu wu gbo niɲaa ya? Ta nɛ li cɛ jo nɛ wu ɲɛ niɲaa Izirayɛli fiige ki wo saan wɛ?» 24 A saan wu Shimeyi pye: «Ma da xhuu wɛ!» A saan wu gaa wu mu.c
Dawuda ya taan ni Mefiboshɛti ni
25 Ayiwa, a Sɔli ɲabige Mefiboshɛti bɛ di gari di zhɛ saan wu ɲuŋɔ círi. Na co caŋa kemu na saan wʼa kari ge, fo na shɛ wu pye wʼa kuri na pa saama na, Mefiboshɛti bi sanha wu tɔɔyɔ je wɛ, wu bi sanha wu ɲaha ki yàa wɛ, wu di bi sanha wu fàya je wɛ. 26 Ba wʼa pa saan wu ɲuŋɔ círi Zheruzalɛmu ni wɛ, a saan wu wu pye: «Mefiboshɛti, ɲaha na mu di ya ta pinnɛ kari ni nɛ ni-i wɛ?» 27 A Mefiboshɛti di jo: «Ee saan we, nɛ kapyebye wʼa na faanna. Li cɛ na nɛ bi jo: ‹Nʼa da na kafaŋa ki pɔ di dugi ki na da se ni saan wu ni, bani faan nɛ ɲɛ.› 28 Ga a wu shɛ nɛ mɛgɛ kyɛɛgi mu mu, ma li ta bɛ mu di ɲɛ ba Kilɛ wo mɛlɛkɛ wa ɲɛ wɛ. Lemu lʼa ma taan ge, lee pye. 29 Bani nɛ to wu puga ki bɛɛri kʼa yaa ni xu ni mu ɲaha tàan. Ga lee bɛ na, piimu pʼa binnɛɛ na li ni ma ni ge, mu ya nɛ bɛ le pee ni. Nɛ ma já ɲaha yaaga ɲɛɛri mu mu sanha wɛ?» 30 A saan wu wu pye: «Ɲaha fɛni ma di baari sanha wɛ? Nɛ lemu wo bye funŋɔ yaha nayɛ mu ge, lee li wa mɛ jo mu ni Siba wu ɲiŋɛ ki taa yiyɛ na.» 31 A Mefiboshɛti di saan wu pye: «Ee na kafɔɔ saan we, wu na já yi bɛɛri lɔ, bani ma nijemɛ wo ya pa jé ma kaban!»d
Dawuda ya fundanga yaaga kan Barizilayi mu
32 Ayiwa Galadi shɛɛn Barizilayi bi yìri Orogelimu kulo li ni, na digi kari Zhurudɛn gba wu ɲɔ ki na, kɔnhɔ wu shɛ gba wu kɔn ni saan wu ni, wu wu yaha wà. 33 Barizilayi bi sii lɛ fo xuuni. Wu shi wu bye yee kɛlɛɛ gbarataanri (80). Wʼa bi saan wu keree ki bɛɛri yari, na saan wu yaha Maxhanayimu kulo li ni, bani naafuu fɔɔ wu bye Barizilayi. 34 A saan wu Barizilayi pye: «Pinnɛ mʼa se ni na ni Zheruzalɛmu ni, nɛ na zhɛ yere ni ma keree ki bɛɛri ni wà na kaban.» 35 Ga a Barizilayi di saan wu pye: «Yee juu nɛ di wa da bye sanha fo nɛ wu na pinnɛ da se ni saan wu ni Zheruzalɛmu ni wɛ? 36 Nɛ niɲaa wo wa yee kɛlɛɛ gbarataanri (80). Ta nɛ na já kasaana cɛ di zhɔɔnri kakuunɔ ni ya? Nɛ wi ge, ma kapyebye we, ta nɛ na já na yalige ni na yagbaga daan cɛ ya? Ta nɛ na já yoceelee pu sɔ sanha pu mɛɛtaan li wuu na ya? Ayiwa, nɛ ma shɛ bye mu ɲuŋɔ ni tuguro ɲaha na wɛ na kafɔɔ saan we? 37 Nɛ na ba Zhurudɛn gba wu kɔn ni ma ni, na fulo wà ni ma ni jɛɛrɛ funŋɔ ni. Ɲaha na mu di ke pɛɛŋɛ ke tɛri nɛ na wɛ? 38 Nʼa ma ɲɛɛri, na yaha di guri da se na wo kulo li ni, di shɛ xhu wà na to we ni na nu wu wo faŋa ki tàan. Ga na ja Kimamu we, ma kapyebye we, na kafɔɔ saan wu na já da se ni wee ni, lemu lʼa wu taan ge, wu na zhɛ lee pye wu mu.» 39 A saan wu jo: «Kimamu na já binnɛ da se ni na ni, nɛ na zhɛ ma ɲidaan pye wu mu. Lemu bɛɛri mʼa zhaa na mu ge, nɛ na lee pye ma mu.» 40 Ba sipyiire ti bɛɛri ya gba wu kɔn, a saan wu bɛ di wu kɔn wɛ, a saan wu ɲɔsɔɔnrɔ fo kan Barizilayi mu na duba pye wu mu. Lee kadugo na a Barizilayi di gari wu puga. 41 Lee kadugo na a saan wu Giligali kulo li koo li lɔ na se, a Kimamu bɛ di gari ni wu ni.
Zhuda ni Izirayɛli ya bɛ kanha
Ayiwa, Zhuda wo sipyii pu bɛɛri ni suumɔ kulo kacɛ ki wo Izirayɛli shɛɛn pu taaga ki bi saan wu tɛgɛ wʼa Zhurudɛn gba wu kɔn ɲɛri. 42 Ga a suumɔ kulo kacɛ ki wo Izirayɛli shɛɛn di gari saan wu yíri na shɛ wu pye: «Ɲaha na wèe cebooloo Zhuda wo sipyii pu yɛ da mu lɔ na Zhurudɛn gba wu kɔn ni ma ni, ni ma puga shɛɛn na fara ma sipyii pu bɛɛri na wɛ?» 43 A Zhuda wo sipyii pu bɛɛri di Izirayɛli shɛɛn pu pye: «Lee ya li shɛɛ kanna saan wʼa wèe tɛɛŋɛ. Ta lee ya nɔ yee pu yi logoo yirige ya? Ta saan wu wʼa bi yere ni wèe keree ni? Ta fundanga yaaga ka wʼa kan wèe mu?» 44 A Izirayɛli shɛɛn pʼi Zhuda wo sipyii pu pye: «Saan wu ɲɛ wèe wo fo tɔɔɲii kɛ, Dawuda yɛpyaa ɲɛ wèe wo na ye yee na. Ɲaha na yi dʼa wù cɛrɛŋɛ wɛ? Ta wèe bɛ pʼa pye shɛnshiilee na wù saan wu guruŋɔ wu jo wɛ?» Ga a Zhuda wo sipyii pʼi kafila jo wemu ya waha fo xuuni ge, na toro Izirayɛli shɛɛn pu wo wu tàan.