Dawuda ya pu pye pʼa Izirayɛli shɛɛn pu tɔrɔ
24
Ayiwa, a Tɛhɛnɛ Baa Kilɛ luu di ba yìri sanha Izirayɛli shɛɛn pu tàan, a wu Dawuda yirige pu fɛni, na wu pye na: «Shɛ Izirayɛli shɛɛn pee ni Zhuda shɛɛn pu tɔrɔ».2 Ayiwa, lee bi saan wu kashɛn keŋɛ ki ɲuŋɔfɔɔ Zhowabu ta wu tàan, a saan wu wee pye: «Nʼa ma ɲɛɛri, Izirayɛli gbaweye yi bɛɛri ɲaari, na co Dan kulo li na fo na shɛ nɔ Bɛɛrisheba kulo li na, yʼi sipyiire ti tɔrɔ. Lee na bye kaɲuŋɔ di pu ɲɔ cɛ.» 3 A Zhowabu di saan wu pye: «Saan we, Tɛhɛnɛ Baa Kilɛ wu ma sipyii pu ɲɛhɛ fo di zhɛ nɔ pu tɛhɛɛ xhuu nigin (100) na. Nɛ funŋɔ ki wa mʼa lee ɲa ma ɲii li na. Ga saan we, ɲaha na ma di lee shaa di bye wɛ?» 4 Ga lee bɛ na, a saan wu yere wu ɲɔmɛɛ li na Zhowabu ni wu kashɛn keye yi ɲuŋɔfɛɛ pu mu. Wee tuun wu ni a Zhowabu ni kashɛn keye yi ɲuŋɔfɛɛ pʼi foro di zhɛ Izirayɛli shɛɛn pu tɔrɔ. 5 A pʼi Zhurudɛn Gba wu kɔn ɲɛri, na li ɲɔ kɔn Aroyɛri na, ni fadaaŋa ki wo kulo le, na gaaŋi Gadi yíri, Yazɛri ɲahatiimɛ pu ni. 6 A pʼi gari Galadi wo koomɔ pe ni Tatimu-Odisi wo koomɔ pu ni. A pʼi gari Dan-Yan kulo le, ni Sidɔn wo mahama kulogoo ki ni. 7 A pʼi yíri wà, na gari Tiri wo kashɛn ɲuŋɔ círi círi kulo le, ni Xhɛvi shi shɛɛn pu wo kulogoo ki bɛɛri, ni Kana shɛɛn pu wo kulogoo ki bɛɛri. A pʼi ba li ɲɔ gbo Zhuda wo woroo kulo kacɛ ki na, Bɛɛrisheba kulo li ni. 8 A pʼi fiige ki bɛɛri ɲaari mu lee ɲaarigana li na. Yebyaa gbarashɛɛrɛ ni cabyaa kɛlɛɛ shuun (20) funŋɔ ni, a pʼi guri pa Zheruzalɛmu ni. 9 A Zhowabu di sipyiire ti ɲɔ ki kan saan wu mu. Namaa kabɔfoŋɔɔ xhuu gbarataanri (800.000) wu bye Izirayɛli ni, piimu pu ɲɛ naŋmaya na ŋmɔparaa ɲaha cɛ ge. Zhuda wuu pu bye namaa kabɔfoŋɔɔ xhuu kaguro (500.000).
Kilɛ ya jaagi kanhama shan Dawuda ɲuŋɔ ni wu nahama pu na
(1 Caŋa Ɲɛhɛɛ Jomɔ 21:7-17)
10 Ba Dawuda ya sipyiire ti tɔrɔ mu lee tɔrɔgana li na wɛ, a wu zɔ wu ɲɔ kɔn na guuni. A Dawuda di Tɛhɛnɛ Baa Kilɛ pye: «Jurumu nigbɔ nɛ pye ni le kaa le wo bye ni! Nimɛ, na Kafɔɔ, nʼa ma ɲɛɛri jo ma na jurumu wu yafa na mu, ma kapyebye we, bani fungɔngɔ baara kaa nɛ sii tii pye.»
11 Ba Dawuda ya pa yìri ɲisɔɔgɔ ki tàan wɛ, lee bi Tɛhɛnɛ Baa Kilɛ ta wʼa wu jomɔ pu jo wu tudunmɔ Gadi mu, Dawuda wo yɛrɛ kanvɔɔ we na: 12 «Shɛ yi jo Dawuda mu na yemu Tɛhɛnɛ Baa Kilɛ ya jo ge na yee yi wa mɛ: ‹Kapegee taanri nʼa da zhɛɛ ma na, lemu lʼa ma tàan ge, mʼa lee lɔ, di lee pye sipyiire ti na.› » 13 A Gadi di nɔ Dawuda na, na wu pye: «Lekɛ lʼa yaa na pye wɛ? Yee gbarashuun xuugo ma fiige ki ni laa, kelee yi pɛɛn pu da se taa yi na, pu da yi niinɛ fo yebyaa taanri, kelee cabyaa taanri kafɛɛgɛ yama ma fiige ki ni? Ayiwa, ma funŋɔ ki kɔn nimɛ, mʼa ya jo na mu di zhɛ jo na tunvɔɔ wu mu.» 14 A Dawuda di Gadi pye: «Nɛ cɔnrɔmɔ wo wu wa fo xuuni! Nʼa ma ɲɛɛri, wù yaha wù jé Tɛhɛnɛ Baa Kilɛ keŋɛ ni, bani wu ɲiɲaara tʼa pɛlɛ, ga di ganha bu jé sipyii keye ni wɛ!»
15 Ayiwa, a Tɛhɛnɛ Baa Kilɛ di kafɛɛgɛ yama yaha shan Izirayɛli ɲuŋɔ ni, na co kee caŋa ki ɲisɔɔgɔ ki na, fo na shɛ tɛɛ li fa, lee lemu tɛhɛnɛ wʼa bi kɔn shɛ ge. A sipyii kabɔfoŋɔɔ kɛlɛɛ gbarashuun (70.000) di xhu sipyiire ti ni, na co Dan kulo li na fo na pa nɔ Bɛɛrisheba kulo li na. 16 Na mɛlɛkɛ wu yaha wʼa wu keŋɛ ki sanha Zheruzalɛmu fɛni di wu kyɛɛgi, a kee bɔɔngɔ ki wo daajeŋɛ di jé Tɛhɛnɛ Baa Kilɛ ni. Tudunmɔ we wu bi kakara ti pyi ge, a wu wee pye: «Lʼa yaa mɛ! Yere mɛ!» Lee bi Tɛhɛnɛ Baa Kilɛ wo mɛlɛkɛ wu ta Zhebusi shɛɛn Aravuna wo shuu li tàan.
17 Ayiwa, ba Dawuda ya tudunmɔ wu ɲa wu na sipyiire ti sani wɛ, a wu Tɛhɛnɛ Baa Kilɛ pye: «Nɛ wʼa jurumu wu pye! Nɛ wʼa nahana, ga ke yatɔɔgbaha ke, lekɛ ki dʼa pye wɛ? Nʼa ma ɲɛɛri, ma keŋɛ ki digi nɛ ni na puga ki na!»
Dawuda ya saraya tawologo ka yereŋɛ Tɛhɛnɛ Baa Kilɛ mu
18 Ayiwa, kee caŋa kiyɛ pyaa a Gadi di nɔ Dawuda na, na wu pye: «Dugi, mʼa shɛ saraya tawologo ka yàa Tɛhɛnɛ Baa Kilɛ mu Zhebusi shɛɛn Aravuna wo shuu li na.» 19 A Dawuda di dugi kari na saha ni Gadi wu ɲɔ jomɔ pu ni, ma na jo ba Tɛhɛnɛ Baa Kilɛ ya yi jo wu mu jogana lemu na wɛ. 20 A Aravuna di ba wu ɲuŋɔ yirige, na saan we ni wu puga ki sipyii pu ɲa pu na ma wu mu, wee tuun wu ni, a Aravuna di yìri foro, na shɛ nuguro sin saan wu fɛɛ ni, na ɲaha ke buri ɲiŋɛ ke na. 21 A Aravuna di jo: «Ɛɛ saan we, ɲaha tapyege ni ma di ma nɛ mu wɛ, ma kapyebye we?» A Dawuda di wu ɲɔ shɔ na: «Nʼa ma di ba shuu li shɔ ma mu, kɔnhɔ di saraya tawologo ka yereŋɛ Tɛhɛnɛ Baa Kilɛ mu, kafɛɛgɛ yama pemu pʼa sipyiire ti xuli ge, kɔnhɔ pee di yere.» 22 A Aravuna di jo: «Na Kafɔɔ Saan we, li lɔ, yaaga kemu kʼa ma taan ge mʼa kee pye saraga nizogoŋɔ ke. Li wii, niiyɛ yi na ba bye saraga nizogoŋɔ ke, shɔngɔ wotori we, ni niiyɛ tuuyo yi wo zhuloo pu na ba bye kajiiye ye. 23 Saan we, nɛ yi bɛɛri kan ma mu!» A Aravuna di nugo saan wu pye sanha na: «Tɛhɛnɛ Baa Kilɛ, ma Kilɛ wu ma saraga ki co!» 24 Ga a saan wu wu pye: «Ahayi dɛ! Nʼa da li shɔ ma mu li pɛrɛmɛ na. Nɛ ya bɔɔngɔ pye saraga nizogoŋɔ kemu ɲuŋɔ tàan wɛ, nɛ da já kee wolo Tɛhɛnɛ Baa Kilɛ, na Kilɛ wu mu wɛ!» A Dawuda di shuu le ni niiyɛ yi shɔ warifyɛn tuuŋɔɔ kɛlɛɛ kaguro (50) na. 25 A Dawuda di saraya tawologo ka yereŋɛ wà Tɛhɛnɛ Baa Kilɛ mu, na saraya nizogoyo ni ɲaɲiŋɛ saraya wolo wà. Wee tuun wu ni a Tɛhɛnɛ Baa Kilɛ di pu ɲɛrɛgɛ ki logo. Kafɛɛgɛ yama pe pu bi Izirayɛli fiige ki kyɛɛgi ge, a pee di yere.