Siba ya pa yaligee kan Dawuda ni wu sipyii pu mu
16
Ayiwa, ba Dawuda ya faaboboŋɔ ki ɲidii li toro yɛ wɛ, a Mefibosɛti wo kapyebye Siba di ba jiri wu na, ni kafaya shuun ni, ma yi kemɛ tugo. Yaŋmuyɔ yemu wu bi taga kafaya yi tugo ge, yee ɲɛ buuri ɲuyɔ xhuu shuun (200) ni ɛrɛzɛn waara ɲilee xhuu nigin (100) ni tige yasɛyɛ xhuu nigin (100) ni duvɛnforogo nigin. 2 A saan wu Siba pye: «Ɲaha ma di da ba bye ni ye ni wɛ?» A Siba di wu pye: «Saan wu puga ki na ba duri kafaya yi na, buuri we ni tige yasɛyɛ yi ba bye lɛvɛɛ pu wo yaligee, piimu ba ganha siwaga ki ni, duvɛn wu na bye pee wo logbaga.» 3 A saan wu jo: «Mii ma kafɔɔ wu ja wu di ɲɛ wɛ?» A Siba di saan wu pye: «Wʼa kori Zheruzalɛmu ni, bani wʼa jo na: ‹Izirayɛli puga ki na ba nɛ to wu saanra ti kuruŋɔ gan nɛ mu niɲaa.› » 4 A saan wu Ziba pye: «Yaŋmuyɔ yemu bɛɛri yi bi bye Mefibosɛti woyo ge, yee bɛɛri ya ɲɛri pye mu woyo.» A Siba di jo: «Nʼa nuguro sin ma fɛɛ ni! Na kafɔɔ saan we, nɛ kaa ya taan ma mu.»Shimeyi ya Dawuda laŋi
5 Ayiwa, ba saannaa Dawuda ya shɛ nɔ fo Bawurimu kulo li ni wɛ, a ná wa di foro lee kulo li ni na Shimeyi. Wee bye Gera wo ja, kpɔnnunɔ shɛɛn pu bye wu ni Sɔli ni. A wee di ganha na ma Dawuda mu, na laŋi pyi na ma. 6 A wu ganha na kagereye waa Dawuda ni wu sipyii pu bɛɛri na, lee di sipyiire ti bɛɛri ni kashɛnŋmuu pu bɛɛri ta Dawuda kanige cɛ ni wu kamɛnɛ cɛ. 7 A Shimeyi di ganha na laŋi wu pyi na yu: «Shɛ wà! Shɛ wà! Sipyii gbovɔɔ, kakuubye! 8 Tɛhɛnɛ Baa Kilɛ ya Sɔli puga ki wo shishan pu bɛɛri foo yege mu na, wee wemu mu ya faa, na diin saanra ti na ge. Tɛhɛnɛ Baa Kilɛ ya saanra ti le ma ja Abusalɔn keŋɛ ni. Mu we nimɛ kanhama ni, bani sipyii gbovɔɔ mu ɲɛ!» 9 Ba lee ya pye wɛ, a Seruya ja Abishayi di saan wu pye: «Ɲaha fɛni ke poxhugo ke di mu laŋani wɛ, na kafɔɔ saan we? Nʼa ma ɲɛɛri, na yaha di shɛ wu ɲuŋɔ kɔn!» 10 Ga a saan wu jo: «Yee Seruya jalaa, ɲaha fɛni yee di yiyɛ leni nɛ keree ni wɛ? Ma bu wu ɲa wu na laŋi pyi, ta Tɛhɛnɛ Baa Kilɛ bɛ wʼa jo na wu Dawuda laŋi wɛ? Jɔgɔ wu da já Tɛhɛnɛ Baa Kilɛ yege na ɲaha na wʼa lee pyi-i wɛ?» 11 A Dawuda di Abishayi ni wu sipyii pu bɛɛri pye: «Nɛyɛ pyaa pyaa ja, wee wemu wʼa foro nɛ ni ge, wee ya nɛ munaa shaa di wolo, pu da jo we Bɛnzhamɛ wo tirige shɛn we! Yi wu yaha wu da wu laŋi wu pyi, bani yere Tɛhɛnɛ Baa Kilɛ ya jo wu mu. 12 La wa la ni Tɛhɛnɛ Baa Kilɛ na ba nɛ wo kanhama pu ɲa. Laŋi we wʼa byi mɛ niɲaa ge, la wa la ni Tɛhɛnɛ Baa Kilɛ na ba saama pye na mu wee laŋi wu tɛgɛ.»
13 A Dawuda ni wu sipyii pʼi doro na gaaŋi pu tashɛgɛ ni. A Shimeyi di ganha na se faaboboŋɔ ki kabanugo ki ni Dawuda tàan, na ɲaari, na wu laŋi wu pyi, na kagereye waa Dawuda na, na kafunnuŋɔ yirige na waa wu na. 14 A Dawuda ni wu sipyii pu bɛɛri di shɛ nɔ Zhurudɛn gba wu ɲɔ ki na, pu bɛɛri na kanha. A pʼi ŋmɔ wee xuu wu ni.
Ushayi ya nɔ Abusalɔn na
15 Ayiwa lee bi Abusalɔn ni Izirayɛli wo kashɛnŋmuu pu bɛɛri ta pʼa jé Zheruzalɛmu kulo li ni, Atofɛli di ɲɛ ni wu ni. 16 Ba Dawuda wo naɲii Arika shɛɛn Ushayi ya nɔ Abusalɔn na wɛ, na wu pye: «Kilɛ wu saan wu yaha shikaraga! Kilɛ wu saan wu pye shi fɔɔ!» 17 A Abusalɔn di Ushayi pye: «Ɲɔmɛɛ fɛɛrɛ temu mu ya zhɛɛ ma naɲii wu na ge, ti bɛɛri ti wa te ya? A ɲaha di mu pye mu ya ta pinnɛ ni ma naɲii wu ni-i wɛ?» 18 A Ushayi di Abusalɔn pye: «Ahayi dɛ! Tɛhɛnɛ Baa Kilɛ, ni pii sipyii pii bɛɛri, ni Izirayɛli wo kashɛnŋmuu pu bɛɛri ya sipya wemu shɔɔnri lɔ ge, weefɔɔ wo nɛ da bye. Weefɔɔ mu nʼa da gori. 19 Na fara lee na, jɔgɔ mu nʼa da da kapyeŋɛɛ pyi wɛ? Ta saan wu ja bɛ wɛ? Nɛ pye ma to wu wo kapyebye pyegana lemu na ge dɛ, lee pyegana li na nʼa da bye mu bɛ wo kapyebye.»
Abusalɔn ya jé wu to Dawuda wo furu pɔbaa cèe pu mu
20 Ayiwa, a Abusalɔn di Atofɛli pye: «Yi shɛ yiyɛ ɲa, lemu wʼà yaa na pye ge, yʼi lee ɲaha sha.» 21 A Atofɛli di Abusalɔn pye: «Ma to wʼa wu furu pɔbaa cèe piimu yaha saanra puga ki ɲuŋɔ tàan ge, shɛ jé pee mu. Izirayɛli shɛɛn pu bɛɛri na li cɛ lee funŋɔ ni na mʼa mayɛ la wolo ma to wu na, piimu bɛɛri pu ɲɛ ni ma ni ge, lee ma lowaa le pee ni.» 22 A pʼi fàya puga ka yereŋɛ kataŋa ki na Abusalɔn mu. A Abusalɔn di jé wu to wu furu pɔbaa cèe pu mu Izirayɛli shɛɛn pu bɛɛri ɲii na. 23 Lee caŋa ɲii le ni jomɔ bɛɛri Atofɛli ya jo ge, li ɲɛ kanna Kilɛ wʼa pu jo. Kee fanha ke ki bye Atofɛli wo jomɔ pu ni Dawuda mu, ni Abusalɔn bɛ mu.