2 Samuwɛli 15

Abusalɔn ya ɲuŋɔ nari saan wu na

Ayiwa, ba kee keree kʼa toro wɛ, a Abusalɔn di ba kashɛn wotori wa sha, ni shɔnyɔ, ni gɛdii kɛlɛɛ kaguro (50), pee piimu bi fe wu ɲahagbaa na ge. 2 Wʼa ba sɔɔ yìri, na shɛ diin koo li ɲɔ na, kulo li tajege ki ɲɔ ki na. Sipya bɛɛri ba doroo na se saan wu yíri ni kaa la ni wu shɛ kiiri kɔn li na ge, Abusalɔn na wufɔɔ yiri, na wu pye: «Kulo lekɛ ni mu dʼa yìri wɛ?» Wufɔɔ bu wu pye na: «Ke gbawege ke shɛn nɛ ɲɛ Izirayɛli shɛɛn pu ni,» 3 Abusalɔn na wu pye: «Kaa lemu na mʼa se ge, lʼa ɲɔ, na dii bɛ. Ga sipya bɛ wa da zhɛ ma jomɔ pu logo saan wu kaban ki ni wɛ.» 4 Lee kadugo na, wʼa jo sanha na: «Ee, nɛ da bi deŋɛ na pye ke fiige ke wo kiiri kɔnvɔɔ, sipya bɛɛri wʼa pa nɛ mu ni kaa la ni, kelee pu na baha wufɔɔ na ge, nɛ bi da kaɲii kan wufɔɔ mu!» 5 Sipya wa bu ba nuguro sin Abusalɔn fɛɛ ni kɔnhɔ wu baraga taha wu na, wʼa keŋɛ yeege weefɔɔ mu, na wu co, na ɲɔsɔɔnrɔ fò kan wu mu. 6 Izirayɛli shɛɛn piimu bɛɛri pu bi se saan wu yíri ni keree kii ni di zhɛ ki kiiri kɔn ge, le Abusalɔn bi byi pu na. Lee funŋɔ ni a wu Izirayɛli shɛɛn pu fungɔnyɔ ŋmahana ɲɛri wuyɛ yíri.

7 Ba yee shishɛɛrɛ ya toro wɛ, a Abusalɔn di saan wu pye: «Nʼa ma ɲɛɛri, na yaha di shɛ Eburɔn kulo li ni, kɔnhɔ di shɛ na ɲɔfaaga ki wolo Tɛhɛnɛ Baa Kilɛ mu. 8 Nɛ wemu wu ɲɛ ma kapyebye wu ge, ɲɔfaaga nɛ faa, ma na yaha Geshuri kulo li ni Aramu fiige ki ni. Nɛ jo: ‹Tɛhɛnɛ Baa Kilɛ bu nɛ kuruŋɔ na pa Zheruzalɛmu kulo li ni, nɛ na saraga wolo wu mu.› » 9 A saan wu wu pye: «Shɛ ɲaɲiŋɛ na!» A Abusalɔn di gari Eburɔn kulo li ni. 10 Lee kadugo na a Abusalɔn di tudunmɔɔ peele tun Izirayɛli gbaweye yi bɛɛri mu, na pu pye: «Yi ba maga ki mɛɛ li logo tuun wemu ni, yi da yu: ‹Abusalɔn ya ɲɛri saan Eburɔn kulo li ni.› » 11 Sipyii xhuu shuun (200) Abusalɔn bi yiri na foro Zheruzalɛmu kulo li ni, na taha wuyɛ fɛni na kari. Pee funvige wuu pu bi taha wu fɛni, na ta pu ya wu fungɔngɔ cɛ wɛ. 12 Na Abusalɔn yaha wu na saraya yi wo, a wu tuduro tun pʼa shɛ Dawuda wo yɛrɛ kanvɔɔ Atofɛli yiri wuyɛ pyaa wo kulo li ni, lee lemu li ɲɛ Gilo ge. Ba lee ya pye wɛ, a Abusalɔn wo woni wʼi fanha ta, a sipyii niɲɛhɛmɛɛ di ganha na ma na faraa wu na.

Dawuda ya paa foro Zheruzalɛmu ni

13 Ayiwa, a sipya wa di ba yi jo Dawuda mu na: «Izirayɛli shɛɛn pu bɛɛri zɔlɔɔ ya ɲɛri Abusalɔn yíri.» 14 Dawuda wo fanha ki sipyigbɔɔ piimu bɛɛri pu bye ni wu ni Zheruzalɛmu ni ge, a wu pee pye: «Wù paa gbee, lee bɛ wɛ, wʼa da zhɔ Abusalɔn na wɛ. Yʼa se tɔvuyo na, lee bɛ wɛ, wu na ba wù ta joo taapile ni, na bɔɔngɔ nɔ wù na, na kulo li sipyii pu gbo.» 15 A saan wu kapyebyii pʼi wu pye: «Saan we, ma bu yemu bɛɛri jo, wèe wa ma yahama ni!» 16 A saan wu foro, a wu puga shɛɛn pu bɛɛri di daha wu fɛni. A wu wu furu pɔbaa cèe kɛ yaha wà kɔnhɔ pee di da saanra puga ki kasɛɛgɛ pyi.

17 A saan wu foro, a sipyiire ti bɛɛri di daha wu fɛni. A pʼi shɛ nɔ kulo li pusaŋa ki na, na yere wà. 18 A wu sipyii pu bɛɛri di doro wu ɲaha na, na fara Keretilee pu bɛɛri, ni Peletilee pu bɛɛri na, ni Gati shɛɛn pu bɛɛri, pee bye namaa xhuu gbaara (600) na yìri Gati kulo li ni, na pa fara Dawuda na, a pu bɛɛri di doro wu ɲahagbaa na.

19 Itayi wemu wu bye Gati shɛɛn wo ɲuŋɔfɔɔ wu ge, a saan wu wee pye: «Ɲaha fɛni mu bɛ di wa da daha wèe fɛni wɛ? Kuri, mʼa shɛ bye ni saan nivomɔ wu ni, bani nabun mu ɲɛ, pu dʼa nɔhɔ mu kɔri sanha bɛ ma wo fiige ki ni. 20 Mu ma pa li sanha mɔ wɛ, nɛ ma mu pye mu ya foro na ɲaari na yeree ni wèe ni, na ta di wa sanha na tashɛgɛ bɛ cɛ-ɛ ya? Kuri, ma da se ni ma cebooloo pu bɛ ni. Kilɛ wu saama ni ɲɔmɛɛ fɛɛrɛ pye ma mu.» 21 A Itayi di saan wu pye: «Tɛhɛnɛ Baa Kilɛ ɲìi wo wu mɛgɛ na, na mu bɛ yaha ɲìi na, na kafɔɔ saan we, xuu bɛɛri ni mʼa se ge, lʼa pye xu la, lʼa pye ɲìi fɛɛrɛ la, wà nɛ bɛ wʼa se, ma kapyebye we.» 22 Wee tuun wu ni a Dawuda di Itayi pye: «Pa doro!» A Gati shi shɛɛn Itayi di doro, sipyii piimu bɛɛri pu bye ni wu ni ge, a pee bɛ di doro ni pu kpɔnhɔɔ ki ni.

23 Fiige ki shɛɛn pu bɛɛri bi sipyaa waa, sipyiire ti toroduun wu ni. A saan wu Sedɔrɔn dugo ki kɔn ɲɛri ni sipyiire ti bɛɛri ni, na siwaga ki koo li lɔ. 24 Sadɔki bɛ wu bye, wu ni Levi wo tirige shɛɛn pu bɛɛri, pee piimu pʼa bi Kilɛ wo Kariɲɛɛgɛ Ɲɔmɛɛ li Keshi wu lɔ ge. A pʼi Kilɛ wo Kariɲɛɛgɛ Ɲɔmɛɛ li Keshi wu tirige, a Abiyatari di ganha na saraya wo, fo na shɛ sipyiire ti bɛɛri pye tʼa foro xɔ kulo li ni. 25 A saan wu Sadɔki pye: «Kilɛ wo Kariɲɛɛgɛ Ɲɔmɛɛ li Keshi wu kuruŋɔ shɛ yaha kulo li ni. Nɛ bu kaa bu da lʼa taan Tɛhɛnɛ Baa Kilɛ mu, wu na ba nɛ kuruŋɔ na pa, na ba nɛ pye nɛ wu keshi we ni wu tatɛɛngɛ ki ɲa. 26 Ga wu bu jo: ‹Nɛ wa nige mu fɛni wɛ!›, wee tuun wu ni, lemu lʼa wu tàan ge, wu lee pye na na.» 27 A saan wu saraya ɲaha shɔɔnrivɛɛ Sadɔki pye sanha na: «Mu bɛ wu kuri mʼa se kulo li ni, ma ni ma ja Ayimazi, ni Abiyatari ja Zhonatan. Yi kuri yʼa se ni yi jalaa pu bɛ ni. 28 Li wii, nʼa da zhɛ diin siwaga ki wo fadaaŋa ki na, fo di ba shɛ fiin ta na yìri yee yíri.» 29 A lee di bye mu, a Sadɔki ni Abiyatari di guri ni Kariɲɛɛgɛ Ɲɔmɛɛ li Keshi wu ni Zheruzalɛmu ni, na shɛ diin wà.

Dawuda ya Ushayi peele tun wu shɛ Abusalɔn sɛɛri

30 Ayiwa, a Dawuda di ganha na Oliviye tiye yi wo faaboboŋɔ ki duri na se. Wu bi ɲuŋɔ ke tɔ, na mɛɛ suu, na se ɲidamyɛ na. Piimu bɛɛri pu bye ni wu ni ge, pee bɛ bi pu ɲuyɔ yi tɔ tɔ, na faaboboŋɔ ki duri na se, na mɛhɛɛ suu. 31 A pʼi ba Dawuda pye: «Atofɛli ya shɛ binnɛ ni Abusalɔn ni wu woni wu na.» A Dawuda di jo: «Tɛhɛnɛ Baa Kilɛ, nʼa ma ɲɛɛri, Atofɛli wo yɛri yɛri jomɔ pu bɛɛri ɲɛri pye fungɔngɔ baara jomɔ!»

32 Xuu wemu ni pʼa nuguro sinni Kilɛ ɲaha tàan faaboboŋɔ ki ɲidii li ni ge, ba Dawuda ya shɛ nɔ wa wɛ, a Arika shɛɛn Ushayi di ba jiri wu na, ni fadeshɛngɛyɛ ni, puuro di ɲɛ ɲuŋɔ ke ni. 33 A Dawuda di wu pye: «Mu bu daha nɛ fɛni, mu da ɲɛri nɛ mu tuguro. 34 Ga mu bu guri kari kulo li ni, na shɛ Abusalɔn pye: ‹Ɛɛ saan we, mu wo kapyebye nɛ ɲɛ, taashiinɛ li ni nɛ bi bye ma to wu wo kapyebye, ga nimɛ mu wo kapyebye nɛ ɲɛ.› Lee funŋɔ ni ma da zhɛ já da Atofɛli wo fungɔnyɔ yi kyɛɛgi, na nɛ tɛri. 35 Saraya ɲaha shɔɔnrivɛɛ Sadɔki ni Abiyatari na zhɛ bye wà ni ma ni. Ma ba yemu bɛɛri ɲaha ta cɛ saan nivomɔ wu puga ki ɲuŋɔ tàan ma na yee jo Sadɔki ni Abiyatari mu. 36 Pu jalaa shuun wu bɛ wa wà ni pu ni, Ayimasi ni Zhonatan. Yi ba yemu bɛɛri logo, yi na yi jo pee mu pʼa pa jo na mu.» 37 A Dawuda naɲii Ushayi di guri mu lee kurigana li na na kari kulo li ni. A lee di shɛ bɛ ni Abusalɔn bɛ wo jeduun ni Zheruzalɛmu kulo li ni.