Abusalɔn ya kuri pa Zheruzalɛmu ni
14
Ayiwa, a Seruya ja Zhowabu di ba li ɲa na saan wu fungɔngɔ kʼa ɲɛri Abusalɔn keree na. 2 A wu tuduro tun Tekowa kulo li ni pʼa shɛ cee fungɔngɔ fɔɔ wa yiri, na ba wu pye: «Mayɛ yaha kanna ma sipya wʼa xu, mʼa kpɔn fàya le mayɛ na, ma ganha bu nudanga sìnmɛ fara mayɛ na wɛ, mʼa mayɛ pye cee, wemu ya wu puga shɛn gbo wa wo foŋɔ keree pyi lʼa mɔ ge. 3 Na ma yaha pee yahama pu ni, mʼa shɛ saan wu mu, mʼa shɛ ye ni ye jo wu mu.» Yemu cee wʼa yaa na shɛ jo saan wu mu ge, a Zhowabu di yee le wu ɲɔ ni.4 A Tekowa shɛn cee wu gari, na shɛ jo ni saan wu ni. Ba wʼa nɔ wɛ, na nuguro sin, na ɲaha ke buri ɲiŋɛ ki na, na jo: «Ee saan we, na shɔ kaa na!» 5 A saan wu wu pye: «Ɲaha kʼi ɲɛ ma na wɛ?» A wu jo: «Ee, naxhugo shɔ nɛ ɲɛ, nɛ poo wʼa xu! 6 Jalaa shuun wu bye nɛ mu, a pu shuun wu ba dun caŋa ka sige ki ni, sipya bɛ di bye wà wu pu laha puyɛ na wɛ. A wa di wa gbo. 7 Ba lee ya pye wɛ, a kpuun li bɛɛri di yìri nɛ fɛni, na yu: ‹Wemu wʼa wu ceborona wu gbo ge, wu le wù keŋɛ ni! Wèe wa da wu gbo wu ceboro wu wo munaa li tɛgɛ, wee wemu wʼa gbo ge! Wee wemu wu ɲɛ cɛn lɔvɔɔ wu ge, wee wʼà da wu gbo!› Lee di bu bye, pu na na wo kajiɲunɔ lisana fugi, lee funŋɔ ni, mɛgɛ da bye nige na poo wu mu wɛ, sama bɛ da bye nige wu mu ke ɲiŋɛ ke na wɛ.» 8 A saan wu cee wu pye: «Ta se puga, nʼa da ba fiin jo ma keree na.» 9 A Tekowa shɛn cee wu saan wu pye: «Saan we, nɛ ni na to puga ki ni, wèe pu wa jaagi! Jaagi wa saan we ni wu saanra koro li na wɛ.» 10 A saan wu jo: «Sipya bɛɛri wʼa yogo jo ni ma ni ge, pa ni wufɔɔ ni na mu, wufɔɔ wʼa da yi shi jo ni ma ni nige wɛ.» 11 A cee wu jo: «Saan we, nʼa ma ɲɛɛri, ma funŋɔ yaha nidogo Tɛhɛnɛ Baa Kilɛ, ma Kilɛ wu na, kɔnhɔ shishan pu foo li tɔvɔɔ wu ganha bu na ja wu gbo, wu na wo bɔɔngɔ kisaŋa pɛlɛ wɛ!» A saan wu jo: «Tɛhɛnɛ Baa Kilɛ ɲìi wo wu mɛgɛ na, ma ja wu ɲuzhige nigin we wa bɛ wʼa da do wɛ!»
12 A cee wu jo: «Saan we, nʼa ma ɲɛɛri na yaha di ɲɔɲii nigin jo ma mu.» A saan wu jo: «Ta yu!» 13 A cee wu jo: «Ayiwa, ɲaha na mu dʼa le kaa le tuugo pye Kilɛ wo sipyii pu na wɛ? Bani na saha ni mayɛ pyaa ki ɲɔjomɔ pu ni nimɛ, ma bile lʼa li ɲa na mʼa nahana, bani ma ja wemu wʼa paa ge, mʼa li she ma da wee kuruŋɔ di ba puga wɛ. 14 Wèe bɛɛri na ba xhu caŋa ka, na bye ba lɔhɔ ɲɛ wɛ, ki bu wo xɔ, ki ya já kuu nige wɛ. Kilɛ ya munaa wo wɛ, ga gbegemɛ wʼa pye kɔnhɔ wemu wʼa kɔri wá ge, wee sanha ganha bu lii di yaha wu na wɛ. 15 Ayiwa, ma bu na ɲa nʼa pa ye jo saan wu mu, sipyiire ti tʼa na fya. Wee tuun wu ni, a nɛ jo nayɛ funŋɔ ni jo nɛ na ba jo ni saan wu ni, jo la wa la ni, saan wu na ba na jomɔ pu logo, nɛ wemu wu ɲɛ wu kapyebyezhɔ ge. 16 Uun, saan wu na ba na jomɔ pu logo, ná wemu wʼa giin wu na ɲuŋɔ tugo ni na ja wu ni wu foro Kilɛ wo sipyii pu ni ge, wu na ba na shɔ wee na. 17 A nɛ li kɔn nayɛ funŋɔ ni jo nɛ kafɔɔ saan wu jomɔ pu na ba wèe funyɔ ɲiŋɛ! Bani nɛ kafɔɔ saan wu ɲɛ ba Kilɛ wo mɛlɛkɛ wa ɲɛ wɛ, na kasaaŋaa ni kakuuŋɔɔ cɛ na shɔɔnri kiyɛ ni. Tɛhɛnɛ Baa Kilɛ, ma Kilɛ wu pye ni ma ni!»
18 A saan wu cee wu pye: «Nʼa da ma yege kaa la na, ma ganha bu ŋmɔhɔ na na wɛ!» A cee wu jo: «Nʼa ma ɲɛɛri na kafɔɔ saan we, ta yu!» 19 A saan wu jo: «Zhowabu tɔɔgɔ wa ki keree ki bɛɛri ni-i ya?» A cee wu jo: «Na ma yaha ɲìi na saan we, sipya da já ma le piinŋɛ ni wɛ. Can wi, ma kapyebye Zhowabu wʼa tatoroyo shɛ nɛ na, na pe jomɔ pe bɛɛri le nɛ ɲɔ ni. 20 Wu funŋɔ ki wa wu ɲɛri le keree ki ni, lee na wʼa le pye. Ga mu wi ge, na kafɔɔ we, ma fungɔngɔ kʼa pɛlɛ ba Kilɛ wo mɛlɛkɛ wa ɲɛ wɛ. Keree bɛɛri kʼa byi ɲiŋɛ ke na ge, mu ya ki cɛ.»
21 Lee kadugo na a saan wu Zhowabu pye: «Ye mʼa jo ge, nʼa da li pye lee pyegana li na. Shɛ, mʼa shɛ ba ni lɛvɔɔ wu ni, Abusalɔn ge.» 22 A Zhowabu di nuguro sin, na ɲaha ke buri ɲiŋɛ ke na, na baraga taha saan wu na. Lee kadugo na a wu jo: «Na Kafɔɔ saan we, nɛ li cɛ niɲaa jo nɛ kaa ya dan ma ni, bani mʼa na jomɔ pu koo ɲaari.» 23 A Zhowabu di gari Geshuri ni, na shɛ ba ni Abusalɔn ni Zheruzalɛmu kulo li ni. 24 Ga a saan wu jo: «Wu shɛ diin wu kaban, wu ganha ga yere na ɲaha tàan wɛ.» Wee tuun wu ni a Abusalɔn di shɛ diin wu kaban, wu ya shɛ yere saan wu ɲaha tàan wɛ.
Dawuda ni Abusalɔn ya bɛ
25 Ayiwa, lee bi li ta Izirayɛli shɛɛn pu bɛɛri ni, sipya bye wemu ya Abusalɔn xɔ saana ni wɛ. Na lɔ wu tɔɔyɔ ye na, fo wu ɲuŋɔ ke, tapege ka shishiin bye wu na wɛ. 26 Yee bɛɛri wu bi wu ɲuŋɔ ki xuri, bani ɲuzhiire ti bi ma dɔnnɔ na dugo. Wu bu ɲuŋɔ ki xuu, ɲuzhiire ti tidugumɔ pu ma ɲɛhɛ kiloo shuun na na saha ni saan wu wo tidugumɔ yataanga ki ni. 27 Jalaa taanri ni poro pushɔ nigin Abusalɔn bi ta. Wu poro pushɔ wu mɛgɛ ki bye na Tamari, wee bi sii ɲɔ.
28 A Abusalɔn di yee shuun pye Zheruzalɛmu ni wu da já zhɛ yere saan wu ɲaha tàan wɛ. 29 Caŋa ka, a wu ba Zhowabu yiri, na wu ba wu tun saan wu mu, ga Zhowabu ya ta sɔɔ na shɛ wu yire li logo wɛ. A wu wu yiri sanha wu tɔɔɲii shuun wuu ni, ga Zhowabu ya ta sɔɔ na shɛ lee bɛ na wɛ. 30 A Abusalɔn di wu kapyebyii pu pye: «Yi wii, Zhowabu tɛgɛ ki wa nɛ wogo ki tàan, ɔrijɛa wu wa ki ni, yi shɛ na le ɔrijɛ wu na!» A Abusalɔn wo kapyebyii pʼi shɛ na le tɛgɛ ki na. 31 A Zhowabu di gari Abusalɔn fɛni wu kaban, na shɛ wu pye: «Ɲaha na ma kapyebyii pu dʼa shɛ na le nɛ tɛgɛ ki na wɛ?» 32 A Abusalɔn di Zhowabu pye: «Nɛ bi tuduro tun mu mu, jo mu wu pa di ba ma tun saan wu mu, mʼa shɛ wu pye na: ‹Lekɛ na nɛ dʼa yìri Geshuri ni na pa wɛ? Li bi mɛhɛ pɔrɔ nɛ mu na tiin wà.› Nɛ funŋɔ ki wa di shɛ yere saan wu ɲaha tàan nimɛ. Nahama pa bu shɛ da na na, wu pye pu na gbo.» 33 A Zhowabu di gari saan wu kaban, na shɛ yee bɛɛri ɲaha jo wu mu. Wee tuun wu ni a saan wu Abusalɔn yiri. A Abusalɔn di ba, na ba nuguro sin, na ɲaha ke buri ɲiŋɛ na. A saan wu ɲɔsɔɔnrɔ fo kan Abusalɔn mu.