Kulogoo kiimu kʼa kan Levi wo tirige shɛɛn pu mu ge
35
Na Izirayɛli nagoo pu yaha Mowabu fadaaŋa ki na, Zhurudɛn Gba wu ɲɔ na, Zheriko ɲahatii wu ni, a Tɛhɛnɛ Baa Kilɛ di jo ni Musa ni na wu pye: 2 «Yi jo Izirayɛli nagoo pu mu na fiige kemu pʼa da ba da na pye pu cɛn ge, na pu kulogoo kii wolo wolo kee fiige ki ni pu kan Levi wo tirige shɛɛn pu mu pʼi diin diin kee ni. Pʼi kee kulogoo ki sizaya yi bɛ kan pu mu. 3 Pu na ba diin diin kee kulogoo ki ni, ki sizaya yi ma bye pu niiyɛ ni pu yapɔrɔyɔ yisaya tamaraga. 4 Ɲiŋɛ kemu yi da ba gan Levi wo tirige shɛɛn pu mu na kulogoo ki puuro ti maha círi ge, kee di bye mɛtɛrɛlɛɛ xhuu kaguro (500), na co kulogoo ki puuro ti na na se kpɛɛngɛ ki mu. 5 Yʼi mɛtɛrɛlɛɛ kabɔfonɔ nigin (1.000) taanna kanha ki kadugo Kilɛ-nɔhɔ kacɛ ki na, yʼi kabɔfonɔ nigin (1.000) wa taanna woroo kulo kacɛ ki na, yʼi kabɔfonɔ nigin (1.000) wa taanna caŋatomɔ kacɛ ki na, yʼi kabɔfonɔ nigin (1.000) wa taanna suumɔ kulo kacɛ ki bɛ na, kulo lʼi bye nizhoo li ni. Kee ɲiŋɛ ki na ba bye pu wo kulogoo ki ɲiŋɛ ki wo mahama pe. 6 Kulogoo kiimu yi da ba gan Levi wo tirige shɛɛn pu mu ge, yi na ba kanfɛmɛɛ pu wo kalifa kulogoo gbaara wu le kee ni. Wʼa ba gbuuro pye na ta wu ya li ɲɔ wolo li kaa na wɛ, wufɔɔ di fɛ shɛ wuyɛ kalifa lee kulo la na. Yi na ba kulogoo kɛlɛɛ shishɛɛrɛ ni shuun (42) kan pu mu na fara kalifa kulogoo gbaara wu na. 7 Yi na ba kulogoo kiimu kan Levi wo tirige shɛɛn pu mu ge, ki bɛɛri ɲɔ na ba bye kulogoo kɛlɛɛ shishɛɛrɛ ni gbarataanri (48), ki bɛɛri ni ki mahama ɲiŋɛ. 8 Yʼi ba kii kulogoo kii wolo wolo na saha ni Izirayɛli gbaweye yi bɛɛri wo kulogoo nidagaa ɲuŋɔkana ni. Gbaweye yemu wo kulogoo nidagaa kʼa ɲɛhɛ ge, yʼi ba niɲɛhɛŋɛɛ lɔ pee mu. Gbaweye yemu wo kulogoo kʼa cɛrɛ ge, yʼi nifɛnhɛŋɛɛ lɔ pee mu. Gbawege ka bɛɛri na ba ki wo kulogoo kan na saha ni ki wo kulogoo nidagaa ɲuŋɔkana ni.»Kanfɛmɛɛ pu wo kalifa kulogoo kee
9 Ayiwa, a Tɛhɛnɛ Baa Kilɛ di Musa pye sanha na 10 wu yi jo Izirayɛli nagoo pu mu na: «Yi ba Zhurudɛn Gba wu kɔn ɲɛri tuun wemu ni, na jé Kana fiige ki ni, 11 yʼi kulogoo kʼi ɲaha bulo, yʼi kee pye kanfɛmɛɛ wo kalifa kulogoo. Wʼa ba gbuuro pye na ta wu ya li ɲɔ wolo li kaa na wɛ, weefɔɔ di baa shɛ wuyɛ kalifa lee kulo la na. 12 Kee kulogoo ki na ba bye kanfɛmɛɛ pu wo kalifa kulogoo. Gbuuro ti pyevɔɔ wu na ba shɛ lara lee kulo la ni gbo wu wo shishan pu fɔɔ li yegevɔɔ wu ɲaha na, kɔnhɔ wee ganha bu wu gbo na ta wu sanha doro sipyiire ti ɲaha tàan, wu kiiri di gɔn wɛ. 13 Yi na ba kulogoo gbaara shɛ, kee di ba bye kanfɛmɛɛ pu wo kalifa kulogoo. 14 Kulogoo taanri na ba bye Zhurudɛn Gba wu kɔn-ma-ɲɛrɛmɛ pu ni, taanri wa ma bye Kana fiige ki ni. Kee kulogoo ki kʼa da ba bye kalifa kulogoo kee. 15 Kee kulogoo gbaara wu na ba bye Izirayɛli nagoo pee, ni nadadiinmɛɛ, ni nabuun pu wo taŋmɔhɔŋɔ. Wa bɛɛri ba sipya gbo na ta wu ya li ɲɔ wolo li kaa na wɛ, wufɔɔ di baa shɛ wuyɛ kalifa lee kulo la na.
16 «Sipya wa bu wu sipyiɲii kpɔn ni tɔɔrɔ yagboŋɔ ni, a lee di bye kaɲuŋɔ na wu gbo, wu kpɔnvɔɔ wʼa pye gbuuro gbovɔɔ. Wee gbuuro gbovɔɔ wu bɛ ya yaa na wu gbo. 17 Kagereŋɛ kemu na já sipya gbo ge, wu bu kee ka taga wu wá, a lee di bye kaɲuŋɔ na xu nɔ wu na, kagereŋɛ ki wavɔɔ wʼa pye gbuuro gbovɔɔ. Wee gbuuro gbovɔɔ wu bɛ ya yaa na wu gbo. 18 Tinnɛ lemu na já sipya gbo ge, wu bu lee la taga wu kpɔn, a wu xhu, wu kpɔnvɔɔ wʼa pye gbuuro gbovɔɔ. Wee gbuuro gbovɔɔ wu bɛ ya yaa na wu gbo. 19 Wemu wʼa yaa na gbo wu wo shishan pu foo li yege ge, wee wu da wu gbo. Wu ga wu ta caŋa bɛɛri wu wu gbo. 20 Sipya wa bu wu sipyiɲii ŋmunuŋɔ ni makɔŋɔ ni, kelee na wu pɛri, na ba yaaga ka taga wu wá, wufɔɔ bu xhu, 21 kelee na funguuŋɔ taga wu kpɔn ni kaguruyo ni, a wu xhu, wu kpɔnvɔɔ wʼa pye sipyigbo, wu bɛ ya yaa na wu gbo. Gbo wu wo shishan pu foo li yegevɔɔ wu ga wu ta co, wu wu gbo.
22 «Ga sipya wa bu gburogi, na wu sipyiɲii ŋmunuŋɔ, na ta wu funguuŋɔ ɲɛ wu mu wɛ, kelee wu bu yaa ka wà, a kee di nɔ wu na, na ta wu ya li ɲɔ wolo li kaa na wɛ, 23 kelee wu bu kagereŋɛ pye kʼa to wu ɲuŋɔ ni, na ta wu ya fɛnhɛ wu ɲa, na na ki yaha shan wu ɲuŋɔ ni wɛ. Wu makɔŋɔ bɛ bye kʼi ya pye wu ni wɛ, wu bu xhu, 24 wee tuun wu ni sipyiire tʼa yaa na kiiri wu kɔn shishan pu foo li yegevɔɔ we ni gbuuro ti pyevɔɔ wu tɛ ni, na saha ni wee saliya we ni. 25 Sipyiire ti ma tee gbuuro ti wo pyevɔɔ wu shɔ shishan pu foo li yegevɔɔ wu na, kalifa kulo lemu na wu bi shɛ wuyɛ kalifa ge, na wu kuruŋɔ shɛ yaha lee kulo li ni. Wʼa diin wà lee kulo li ni fo na shɛ saraya ɲaha shɔɔnrivɛɛ wo ɲuŋɔfɔgbɔ wu pye wʼa xu, wee wemu pʼa tìre ni fɛfɛɛrɛ sìnmɛ pu ni ge. 26 Ga sipyigbo wʼa shɛ wuyɛ kalifa kalifa kulo lemu na ge, wu ga foro lee ni, 27 a gbo wu wo shishan pu foo li yegevɔɔ wu saha ni wu ni wʼa foro kalifa kulo li mahama pu ni, na wu gbo, wu da jaagi tee gbuuro ti wuu na wɛ. 28 Bani sipyigbo wʼa yaa na tiin kalifa kulo li ni, fo na shɛ saraya ɲaha shɔɔnrivɛɛ wo ɲuŋɔfɔgbɔ wu pye wʼa xu. Saraya ɲaha shɔɔnrivɛɛ wo ɲuŋɔfɔgbɔ wu ga xhu, sipyigbo wu ma guri kari wu wo kulo li ni.
29 «Ayiwa, xuu bɛɛri ni yʼa shɛ diin ge, we na ba bye saliya yi ni yi kadugo shi nibama wu bɛɛri mu. 30 Sipya wa bu wu sipyiɲii gbo, a sipyii pii di da na bye tee gbuuro ti wo sɛɛrɛɛ, wee gbuuro gbovɔɔ wʼa yaa na wu gbo. Ga yi ganha ga sipya wa shishiin gbo shɛn nigin yɛ wo sɛɛri keree na wɛ. 31 Gbuuro gbovɔɔ wemu ya yaa na wu gbo ge, yi ganha ga yaaga ka shishiin shɔ wee wa mu wu munaa li faara wɛ, ga wʼa yaa na wu gbo. 32 Gbuuro gbovɔɔ wa bu shɛ wuyɛ kalifa kalifa kulo lemu na, yi ganha bu sɔɔ yi yaaga ka shishiin shɔ wu bɛ mu yʼi wu pye wu kuri wʼa se wu wo kulo li ni, na ta saraya ɲaha shɔɔnrivɛɛ wo ɲuŋɔfɔgbɔ wu sanha xhu wɛ. 33 Fiige kemu ni yi wa ge, yi ganha bu ki nɔrɔgɔ wɛ. Shishan wonɔ li wa fiige ki nɔrɔgɔ. Shishan bu wo fiige ki ni, pee shishan pe foo da já dɔ ni pu wovɔɔ wu wo shishan bɛ wɛ. 34 Yi na ba shɛ diin fiige kemu ni ge, kee kemu ni nɛ bɛ da ba shɛ diin ge, yi ganha bu kee fiige ki nɔrɔgɔ wɛ. Bani nɛ ɲɛ Tɛhɛnɛ Baa Kilɛ wee wemu wʼa tiin Izirayɛli nagoo pu niŋɛ ni ge.