Kana fiige ki tɛhɛŋɛɛ
34
Ayiwa, a Tɛhɛnɛ Baa Kilɛ di Musa pye, 2 na wu te tuduro te jo Izirayɛli nagoo pu mu na: «Yi ba jé Kana fiige ki ni tuun wemu ni, fiige ki tɛyɛ yemu yi da ba gan yi mu na pye yi woyo ge, yee wo tɛhɛŋɛɛ nʼa da zhɛɛ yi na. 3 Yi fiige ki tɛhɛnɛ na ba bye woroo kulo kacɛ ki na Zini wo siwaga ke, ni Edomu wo fiige ke. Na ɲɔ co Suumɔ Loxugo ki wo woroo kulo kacɛ ki na, na se Kilɛ-nɔhɔ ki na. 4 Na maha toro Akirabimu boboŋɔ ki woroo kulo kacɛ ki na, na doro Zini ni na kari Kadɛsi-Barineya wo woroo kulo kacɛ ki na, na doro Azari-Adari ni na kari Azimɔn ni, 5 na yìri wà, na maha ɲɛri na kari shɛ gbɔn Misira dugo ki na, na da yìri wà na shɛ diiŋɛ Suumɔ Logbɔhɔ ki na. 6 Caŋatomɔ kacɛ ki na, yi fiige ki tɛhɛnɛ li na ba bye Suumɔ Logbɔhɔ ke, kee na ba bye yi fiige ki caŋatomɔ kacɛ ki tɛhɛnɛ le. 7 Suumɔ kulo kacɛ ki na, yi fiige ki tɛhɛnɛ li na ba lɔ Suumɔ Logbɔhɔ ki na na kari Xhɔri wo faaboboŋɔ ki na, 8 na yìri wà, na doro Lebo-Amati ni na nɔ Sedadi ni, 9 na yìri wà, na doro Zifirɔn ni na kari Azari-Ena ni. Lee ɲɛ suumɔ kulo kacɛ ki wo tɛhɛnɛ le. 10 Kilɛ-nɔhɔ kacɛ ki na, yi fiige ki tɛhɛnɛ li na ba lɔ Azari-Ena na na nɔ Sefamu ni, 11 na yìri wà na digi kari Iribila ni, Ayini Kilɛ-nɔhɔ ki na, na yìri wà na digi kari Kinerɛti gba wu Kilɛ-nɔhɔ ki na, 12 na digi kari Zhurudɛn Gba wu ɲɔ ki na, na shɛ da Suumɔ Loxugo ki na.Ayiwa, ke ki da ba bye yi wo fiige ke, ki ni ki tɛhɛŋɛɛ.»
13 A Musa di Izirayɛli nagoo pu pye: «Ke fiige ke yʼa da ba daa daa ni kagaanshaana ni. Kee kaa Tɛhɛnɛ Baa Kilɛ ya jo na pu ki kan Izirayɛli gbaweye gbarashɛɛrɛ ni taaga ki mu. 14 Bani Urubɛn wo gbawege ke ni Gadi wo gbawege ke, pee ya pu wo tahaa ta na xɔ, na saha ni pu kpɔnhɔɔ ki ni, na fara Manase wu gbawege ki bɛ wo taaga ki na. 15 Yee gbaweye shuun ni taaga kʼa pu wo ɲiŋɛ taa ta na xɔ Zhurudɛn Gba wu kogii wu na, Zheriko ɲahatiimɛ pu ni Kilɛ-nɔhɔ ki na.
Sipyii piimu pu da ba fiige ki taa taa ge
16 Ayiwa, a Tɛhɛnɛ Baa Kilɛ di Musa pye: 17 «Sipyii piimu pu wa da ba fiige ki taa taa ge, pee mɛyɛ yi wa mɛ: Saraya ɲaha shɔɔnrivɛɛ Eleyazari, ni Nuni ja Zhozuwe. 18 Yʼi ɲuŋɔfɛɛ nigin nigin wolo gbaweye yi bɛ ni yi fara pu na, pee di fiige ki taa taa. 19 Pee sipyii pu wo mɛyɛ yi wa ye: Zhefunɛ ja Kalɛbu, na foro Zhuda wo gbawege ki ni. 20 Amiyudi ja Samuwɛli, na foro Simiɲɔ wo gbawege ki ni. 21 Kisilɔn ja Elidadi, na foro Bɛnzhamɛ wo gbawege ki ni. 22 Yogili ja Buki, wee ɲɛ ɲuŋɔfɔɔ wa na foro Dan wo gbawege ki ni. 23 Efodi ja Aniyɛli, wee ɲɛ ɲuŋɔfɔɔ wa na foro Yusufu ja Manase wo gbawege ki ni. 24 Sifitan ja Kɛmuwɛli, wee ɲɛ ɲuŋɔfɔɔ wa na foro Yusufu ja Efirayimu wo gbawege ki ni. 25 Parinaki ja Elizafan, wee ɲɛ ɲuŋɔfɔɔ wa na foro Zabulɔn wo gbawege ki ni. 26 Azan ja Palitiyɛli, wee ɲɛ ɲuŋɔfɔɔ wa na foro Isakari wo gbawege ki ni. 27 Selomi ja Ayudi, wee ɲɛ ɲuŋɔfɔɔ wa na foro Azɛri wo gbawege ki ni. 28 Amiyudi ja Padayɛli, wee ɲɛ ɲuŋɔfɔɔ wa na foro Nɛfitali wo gbawege ki ni.» 29 Pii sipyii piiri Tɛhɛnɛ Baa Kilɛ ya shɛ na pee pu Kana fiige ki taa taa Izirayɛli nagoo pu na.