Izirayɛli nagoo pu nigariwuu ya tɛɛn toro tɛyɛ yemu ni ge
33
Ayiwa, Izirayɛli nagoo pu na foro Misira fiige ki ni, pu bi taa taa kuruyo kuruyo. Musa ni Arɔn ya pu ɲaha co, a pʼi diin toro tɛyɛ yemu ni ge, yee yi wa mɛ. 2 Tɛhɛnɛ Baa Kilɛ ɲɔjomɔ na Musa ya pu tatɛɛnyɛ yi bɛɛri ka kacɛ na. Ayiwa, pu tatiinyɛ yi ye:3 Ayiwa, yee li yeŋɛ nizhiige ki cabyaa kɛ ni kaguro we, kee ya pye Ɲuwuuro Kalenɛ li ɲimuguro, kee caŋa ke Izirayɛli nagoo pʼa foro Aramusɛsi kulo li ni. Izirayɛli nagoo pu ɲuyirige wuu pʼa foro Misira fiige ki ni, na gaaŋi Misira shɛɛn pu bɛɛri ɲii na. 4 Lee bi Misira shɛɛn pu ta pu na pu jashiilee pu nixhuyo leni, pee piimu bɛɛri Tɛhɛnɛ Baa Kilɛ bi gbo ge. Bani Tɛhɛnɛ Baa Kilɛ bi wu kiiri wu shan pu yasunyɔ yi ɲuŋɔ ni.
5 A Izirayɛli nagoo pʼi yìri Aramusɛsi kulo li ni, na shɛ pu buguloo pu sin Sukɔti ni. 6 A pʼi yìri Sukɔti ni, na shɛ pu buguloo pu sin Etamu ni, siwaga ki ɲɔ ki na. 7 A pʼi yìri Etamu ni, na guri pa Piyarɔti ni, wee xuu wu ɲɛ Baali-Zɛfɔn ɲahatii wu ni, na ba pu buguloo pu sin na saha ni Migidoli kulo li ni. 8 A pʼi yìri Piyarɔti ni, na suumɔ lɔhɔ ki kɔn ɲɛri na kari siwaga ki ni. A pʼi cabyaa taanri ɲara pye Etamu siwaga ki ni, na shɛ pu buguloo pu sin Mara ni. 9 A pʼi yìri Mara ni, na gari Elimu ni. Lobulowegee kɛ ni shuun ni tamali tiye kɛlɛɛ gbarashuun (70) wu bye Elimu ni. A pʼi pu buguro ti sin wà. 10 A pʼi yìri Elimu ni, na shɛ pu buguro ti sin Suumɔ Loɲiga ki ɲɔ na. 11 A pʼi yìri Suumɔ Loɲiga ki ɲɔ na, na shɛ pu buguloo pu sin Sɛni siwaga ki ni. 12 A pʼi yìri Sɛni siwaga ki ni, na shɛ pu buguloo pu sin Dofika ni. 13 A pʼi yìri Dofika ni, na shɛ pu buguloo pu sin Alushi ni. 14 A pʼi yìri Alushi ni, na shɛ pu buguloo pu sin Ɛrɛfidimu ni. Sipyiire ti ya ta lɔhɔ ta wà di gba wɛ. 15 A pʼi yìri Ɛrɛfidimu ni, na shɛ pu buguloo pu sin Sinayi siwaga ki ni. 16 A pʼi yìri Sinayi siwaga ki ni, na shɛ pu buguloo pu sin Kibɔrɔti-Ataava ni 17 A pʼi yìri Kibɔrɔti-Ataava ni, na shɛ pu buguloo pu sin Azerɔti ni. 18 A pʼi yìri Azerɔti ni, na shɛ pu buguloo pu sin Iritima ni. 19 A pʼi yìri Iritima ni, na shɛ pu buguloo pu sin Irimɔ-Perɛzi ni. 20 A pʼi yìri Irimɔ-Perɛzi ni, na shɛ pu buguloo pu sin Libina ni. 21 A pʼi yìri Libina ni, na shɛ pu buguloo pu sin Irisa ni. 22 A pʼi yìri Irisa ni, na shɛ pu buguloo pu sin Kelata ni. 23 A pʼi yìri Kelata ni, na shɛ pu buguloo pu sin Shafɛri faaboboŋɔ ki fɛɛ ni. 24 A pʼi yìri Shafɛri faaboboŋɔ ki fɛɛ ni, na shɛ pu buguloo pu sin Arada ni. 25 A pʼi yìri Arada ni, na shɛ pu buguloo pu sin Makelɔti ni. 26 A pʼi yìri Makelɔti ni, na shɛ pu buguloo pu sin Taati ni. 27 A pʼi yìri Taati ni, na shɛ pu buguloo pu sin Teraki ni. 28 A pʼi yìri Teraki ni, na shɛ pu buguloo pu sin Mitika ni. 29 A pʼi yìri Mitika ni, na shɛ pu buguloo pu sin Ashimona ni. 30 A pʼi yìri Ashimona ni, na shɛ pu buguloo pu sin Mozeroti ni. 31 A pʼi yìri Mozeroti ni, na shɛ pu buguloo pu sin Benɛ-Yaakan ni. 32 A pʼi yìri Benɛ-Yaakan ni, na shɛ pu buguloo pu sin Ɔri-Gigadi ni. 33 A pʼi yìri Ɔri-Gigadi ni, na shɛ pu buguloo pu sin Yotibata ni. 34 A pʼi yìri Yotibata ni, na shɛ pu buguloo pu sin Aburona ni. 35 A pʼi yìri Aburona ni, na shɛ pu buguloo pu sin Ɛsiyɔn-Gebɛri ni. 36 A pʼi yìri Ɛsiyɔn-Gebɛri ni, na shɛ pu buguloo pu sin Zini siwaga ki ni. Wee xuu wu wu ɲɛ Kadɛsi. 37 A pʼi yìri Kadɛsi ni, na shɛ pu buguloo pu sin Xhɔri wo faaboboŋɔ ki fɛɛ ni, Edomu fiige ki tɛhɛnɛ li na.
38 A Tɛhɛnɛ Baa Kilɛ di jo na saraya ɲaha shɔɔnrivɛɛ Arɔn wu dugi Xhɔri faaboboŋɔ ki na, a wu dugi ki na, na xhu wà yee li yeŋɛ kaguro wogo ki wo cazhiige ki na. Lee yee lʼa pye Izirayɛli nagoo pu yee kɛlɛɛ shishɛɛrɛ (40) wuu, pu nivorogo na Misira fiige ki ni. 39 Arɔn ya xu Xhɔri Faaboboŋɔ ki na, na wu shi wu yaha yee xhuu nigin ni yee kɛlɛɛ shuun ni taanri (123). 40 Wee tuun we ni bɛ Kana shɛɛn wo saan wʼa Izirayɛli nagoo pu ba wu logo. Wu mɛgɛ ki bye na Aradi, wu dʼa tiin Kana fiige ki woroo kulo kacɛ ki na.
41 Ayiwa, a Izirayɛli nagoo pʼi yìri Xhɔri faaboboyo yi ni, na shɛ pu buguloo pu sin Salimona ni. 42 A pʼi yìri Salimona ni, na shɛ pu buguloo pu sin Punɔ ni. 43 A pʼi yìri Punɔ ni, na shɛ pu buguloo pu sin Obɔti ni. 44 A pʼi yìri Obɔti ni, na shɛ pu buguloo pu sin Iye-Abarimu ni, Mowabu fiige ki tɛhɛnɛ li na. 45 A pʼi yìri Iye-Abarimu ni, na shɛ pu buguloo pu sin Dibɔn-Gadi ni. 46 A pʼi yìri Dibɔn-Gadi ni, na shɛ pu buguloo pu sin Alimɔ-Dibilatayimu ni. 47 A pʼi yìri Alimɔ-Dibilatayimu ni, na shɛ pu buguloo pu sin Abarimu faaboboyo yi ni, Nebo faaboboŋɔ ki ɲahagbaa na. 48 A pʼi yìri Abarimu faaboboyo yi ni, na shɛ pu buguloo pu sin Mowabu fadaaŋa ki na, Zhurudɛn Gba wu ɲɔ na, Zheriko kulo li ɲahatiimɛ pu ni. 49 Pu buguro ti bi ɲɔ co Bɛti-Yesimɔti ni, gba wu ɲɔ ki na, fo na shɛ nɔ Abɛli-Sitimu ni Mowabu fadaaŋa ki na.
Kilɛ ya Kana fiige ki taagana jo
50 Ayiwa, na Izirayɛli nagoo pu yaha Mowabu fadaaŋa ki na, Zhurudɛn Gba wu ɲɔ na, Zheriko ɲahatii wu ni, a Tɛhɛnɛ Baa Kilɛ di yi jo Musa mu na: 51 «Yi jo Izirayɛli nagoo pu mu na: ‹Yi ba Zhurudɛn Gba wu kɔn ɲɛri na jé Kana fiige ki ni tuun wemu ni, 52 yʼi kee fiige ki shɛɛn pu bɛɛri kɔri laha yiyɛ ɲaha na. Pʼa kagereye yemu bɛɛri pye yapɛrɛɛ na bɛlɛ, na tɔɔrɔ ɲa taga jaalaa piimu bɛɛri yàa na bɛlɛ ge, yʼi yee bɛɛri ja. Pʼa gan pyi xuu wemu bɛɛri ni ge, yʼi yee bɛɛri ja ja. 53 Yi na ba kee fiige ki co, yʼi diin ki ni, bani nɛ ki kan yi mu na pye yi wogo. 54 Yi na ba kagaanshaana pye, na kee fiige ki taa taa tashɔhɔyɔ yi na. Tashɔhɔŋɔ kemu bu bɛlɛ, yʼi kee wo taa li pɛlɛ, tashɔhɔŋɔ kemu bu jɛrɛ, yʼi kee wo taa li cɛrɛŋɛ. Taa lemu bu nɔ tashɔhɔŋɔ kemu na kagaanshaan li funŋɔ ni, kee di sɔɔ lee na. Yi na ba fiige ki taa taa yi sefɛlɛɛ pu wo gbaweye yi na. 55 Ga yi bu bye yi ya ke fiige ke shɛɛn kɔri laha yiyɛ ɲaha na wɛ, yi bu pii yaha wà kɔri baa, pee na ba bye yi ɲìi ni ba xhuuro ɲɛ wɛ, na bye ba xhuyo ɲɛ wɛ, yemu yʼa sara yi gbodiye yi ni ge. Pu na ba yi kana ke fiige ke yɛpyaa ni, kee kemu ni yi da ba diin ge. 56 Lee di bu bye, nɛ bi kawagaa kiimu gbegele di ba bye pu na ge, nɛ na ba kee pye yi na.›»