Gbaweye yemu yʼa tiin Zhurudɛn Gba wu Kilɛ nɔhɔ ki na ge
(Dutɛrɛnɔmɛ 3:12-22)
32
Ayiwa, yapɔrɔyɔ niɲɛhɛyɛ yi bye Gadi jalaa pee, ni Urubɛn jalaa pu mu. A pʼi Yazɛri wo koomɔ pe, ni Galadi wo fiige ki sɛɛri, na kee ɲiŋɛ ki ta yapɔrɔyɔ tamarazaaŋa. 2 Wee tuun wu ni a Gadi jalaa pee, ni Urubɛn jalaa pʼi shɛ Musa ni saraya ɲaha shɔɔnrivɛɛ Eleyazari ni Izirayɛli ɲuŋɔfɛɛ pu mu, na shɛ pu pye: 3 «Kii kulogoo kiiri: Atarɔti, ni Dibɔn, ni Yazɛri, ni Nimira, ni Ɛshibɔn, ni Eleyali, ni Sebamu, ni Nebo, ni Beyɔn, 4 kee kulogoo ki wo fiige kemu na Izirayɛli nagoo pʼa se ta Tɛhɛnɛ Baa Kilɛ fanha ni ge, wèe ya kee wo ɲiŋɛ ki sɛɛri, na ki ta ki na ɲɛ yapɔrɔyɔ tamaraga nizaaŋa, wèe bɛ wo yapɔrɔyɔ yi dʼa ɲɛhɛ.» 5 A pʼi jo sanha na: «Nago ba ma da gbara wɛ, wèe funŋɔ ki wa mʼa ke fiige ke wo kafɛɛrɛ kan wù mu. Ma ganha bu wù pye wù Zhurudɛn Gba wu kɔn ɲɛri ni yi ni wɛ.»6 A Musa di pu pye: «Yee ma diin naha, na ta yee cebooloo pʼi gaaŋi kashɛn na ya? 7 Tɛhɛnɛ Baa Kilɛ ya fiige kemu kan Izirayɛli nagoo pu mu ge, ɲaha na yʼi wa zhaa di pu yatɛnyɛ gbo kee jé na wɛ? 8 Na wèe yaha Kadɛsi-Barineya ni, tuun wemu ni nɛ yee tii pu tun pu shɛ fiige ki saala ge, go lee gbogana li na pʼa sipyiire ti yatɛnyɛ gbo. 9 Pʼa kari fo Ɛsikɔli fadaaŋa ki na, na shɛ fiige ki saala. Ba pʼa kuri pa wɛ, na ba Izirayɛli nagoo pu yatɛnyɛ gbo kee fiige ki jé na, Tɛhɛnɛ Baa Kilɛ bi kemu kan pu mu ge. 10 A Tɛhɛnɛ Baa Kilɛ luu di yìri kee caŋa, a wu gàa na: 11 ‹Nɛ kaa na fiige kemu wo ɲɔmɛɛ lɔ Ibirayima, ni Ishaaga, ni Yakuba mu ge, pii sipyii pii pʼa foro Misira fiige ki ni ge, na co yee kɛlɛɛ shuun (20) na na duri, we wa shishiin da ba ɲii taha kee fiige ki na bada wɛ. Bani pu ya ta nɛ wo koo li ɲaari na li ɲɔ fa wɛ, 12 fo Zhefunɛ ja Kalɛbu na foro Kenazi wo tirige shɛɛn pu ni, ni Nuni ja Zhozuwe, bani pee ya Tɛhɛnɛ Baa Kilɛ wo koo li ɲaari, na li ɲɔ fa.› 13 A Tɛhɛnɛ Baa Kilɛ luu di yìri Izirayɛli nagoo pu tàan, a wu pu pye pu na ɲaari siwaga ki ni fo yee kɛlɛɛ shishɛɛrɛ (40), fo na shɛ pee sipyii pu bɛɛri pye pʼa xu xɔ, pee piimu bɛɛri pʼa nahana wu mu ge. 14 Yee bɛ, yee jurumupyii piiri, go yi tii pu wo kɔrɔgɔ ki ni yʼa giin di zhɛ, yʼi Tɛhɛnɛ Baa Kilɛ wo loyire lisana tanha wá Izirayɛli nagoo pu na! 15 Bani yee gbaweye shuun wu bu ɲuŋɔ nari Tɛhɛnɛ Baa Kilɛ na, wu na ba Izirayɛli nagoo pu pye pʼa kori yaha siwaga ki ni, yi ma bye kaɲuŋɔ na te sipyiire te bɛɛri ɲuŋɔ tugo.»
16 A pʼi fulo Musa na, na wu pye: «Wèe funŋɔ ki wa wù kashɔyɔ kuuri wù yapɔrɔyɔ yi mu, wù kulogoo yereŋɛ wù cèe ni wù nagoo pu mu. 17 Wèeyɛ pyaa ki ki ge, wèe na wù kashɛn yagboyo yi lɔ tɔvuyo na, na doro Izirayɛli nagoo pusamaa ɲahagbaa na, fo na shɛ pu pye pʼa nɔ pu tatɛɛnyɛ ni. Na wù yaha lee na, wù cèe ni wù nagoo pu na ba diin kii kulogoo kii ni, kasɔrɔgɔ ya taga kiimu maha ge, kɔnhɔ pʼi shɔ fiige ki shɛɛn pu na. 18 Wèe kunni wa da guri ba puga, na ta Izirayɛli nagoo pu bɛɛri nigin nigin wu ya pu taa ɲiŋɛ ta wɛ. 19 Wù wa da ba ɲiŋɛ taa bɛ sha Zhurudɛn Gba wu kogii wu ni wɛ, bani wèe ya wù wo ɲiŋɛ taa ta naha na xɔ, gba wu Kilɛ-nɔhɔ kogii wu na.»
20 A Musa di pu pye: «Ayiwa, yi bu lee pye, yi bu yi kashɛn yagboyo yi lɔ, na shɛ kashɛn ki ŋmɔ Tɛhɛnɛ Baa Kilɛ ɲaha tàan, 21 yi wo kashɛnŋmuu pu bɛɛri bu Zhurudɛn Gba wu kɔn ɲɛri Tɛhɛnɛ Baa Kilɛ ɲaha tàan, fo na shɛ wu pye wʼa wu pɛɛn pu bɛɛri kɔri laha wuyɛ ɲaha tàan, 22 yi bye yʼi ya kuri wɛ, fo na shɛ kee fiige ki pye kʼa kuu Tɛhɛnɛ Baa Kilɛ mu, wee tuun wu ni jaagi da ba bye yi na Tɛhɛnɛ Baa Kilɛ ni Izirayɛli nagoo pusamaa ɲaha tàan wɛ, Zhurudɛn Gba wu Kilɛ-nɔhɔ fiige ke na ba bye yi wo taa Tɛhɛnɛ Baa Kilɛ ɲaha tàan. 23 Ga yi bye yʼi ya lee pye wɛ, jurumu yʼa pye Tɛhɛnɛ Baa Kilɛ na. Yʼi li cɛ na yi jurumu wu jaagi kanhama na ba do yi ɲuŋɔ ni. 24 Yi kulogoo ki yereŋɛ yi cèe ni yi nagoo pu mu, yʼi kashɔyɔ yi kuuri yi yapɔrɔyɔ yi mu. Yʼa ɲɔmɛɛ lemu lɔ ge, yʼi lee ɲɔ fa.»
25 Ayiwa, a Gadi jalaa pee ni Urubɛn jalaa pʼi Musa pye: «Yemu mʼa jo ma kapyebyii pu mu ge, pu na ba lee pye kafɔɔ. 26 Wù nagoo pee, ni wù cèe pee, ni wù yapɔrɔyɔ yi bɛɛri na ba gori naha Galadi kulogoo ki ni. 27 Wù bɛɛri ma wù kashɛn yagboyo yi lɔ, na gari kashɛn ki na, Tɛhɛnɛ Baa Kilɛ ɲaha tàan, ma na jo ba mʼa yi jo wɛ wù kafɔɔ.»
28 Ayiwa, a Musa di fiin jo saraya ɲaha shɔɔnrivɛɛ Eleyazari, ni Nuni ja Zhozuwe, ni Izirayɛli gbaweye yi ɲuŋɔfɛɛ pu mu Gadi jalaa pee, ni Urubɛn jalaa pu shizhaa na. 29 A wu pu pye: «Gadi jalaa pee, ni Urubɛn jalaa pu namaa pu bɛɛri bu pu kashɛn yagboyo yi lɔ, na Zhurudɛn Gba wu kɔn ɲɛri ni yi ni, na gari kashɛn ki na Tɛhɛnɛ Baa Kilɛ ɲaha tàan, na yi tɛgɛ a yʼi fiige ki kuu, yi na ba Galadi wo fiige ki kan pu mu na pye pu wo taa ɲiŋɛ. 30 Ga pu bye pʼi ya pu kashɛn yagboyo lɔ, na binnɛ kari ni yi ni wɛ, wee tuun wu ni yʼi pu taa ɲiŋɛ kan pu mu ni yiyɛ ni shiizhan Kana fiige ki ni.»
31 A Gadi jalaa pee, ni Urubɛn jalaa pʼi jo: «Lemu Tɛhɛnɛ Baa Kilɛ ya jo ma kapyebyii pu mu ge, wù na ba lee pye. 32 Wù na ba wù kashɛn yagboyo yi lɔ, na gba wu kɔn, na gari kashɛn ki na Kana fiige ki ni Tɛhɛnɛ Baa Kilɛ ɲaha tàan, kɔnhɔ wù ba wù wo ɲiŋɛ taa ta naha Zhurudɛn Gba wu Kilɛ-nɔhɔ ki na.»
33 Ayiwa, saannaa Sixhɔn wo koomɔ pe, Amɔri shi wu wo saan we, ni saannaa Ɔgi wo koomɔ pe, Bashan wo saan we, pee saannaa pu wo koomɔ pe ni pu fanha kulogoo ki bɛɛri, a Musa di kee bɛɛri kan Gadi wo gbawege ke, ni Urubɛn wo gbawege ke, ni Yusufu ja Manase wo gbawege taaga ki mu. 34 Gadi wo gbawege kʼa kuri kulogoo kiimu fɛni, na ki yaavonɔ yaa ge, kee ya pye Dibɔn, ni Atarɔti, ni Aroyɛri, 35 ni Atoroti-Shofa, ni Yazɛri, ni Yogbeya, 36 ni Bɛti-Nimira, ni Bɛti-Aran. A pʼi kee kulogoo ki yaavonɔ yaa, na kasɔrɔyɔ taga ki kuuri, na kashɔyɔ bɛ yàa pu yapɔrɔyɔ yi mu. 37 Urubɛn wo gbawege kʼa kulogoo kiimu yaavonɔ yàa ge, kee ɲɛ Ɛshibɔn, ni Eleyale, ni Kiriyatayimu, 38 na fara Nebo ni Baali-Meyɔn na. A pʼi kee wo mɛyɛ yi ɲɛri. A pʼi Sibima bɛ yaavonɔ yaa. Pʼa kulogoo kiimu bɛɛri yaavonɔ yàa ge, a pʼi mɛyɛ yatii le ki bɛɛri na. 39 A Manase ja Makiri wo tirige shɛɛn pʼi gari Galadi fiige ki fɛni na shɛ ki co. Amɔri shi shɛɛn piimu pu bye wà ge, a pʼi pee kɔri. 40 A Musa di Galadi fiige ki kan pu mu, a pʼi diin wà. 41 Manase wo tirige shɛn wa bɛ na Yayiri, a wee bɛ di shɛ do kulogoo niɲɛhɛŋɛɛ kii na, na ki co, na ki mɛgɛ le na Yayiri wo kulogoo. 42 A Noba di shɛ do Kena na, na wu mahama kulogoo ki bɛɛri co, na wuyɛ pyaa mɛgɛ le pee koomɔ pu na.