Izirayɛli nagoo pʼa se ta Majan shɛɛn na
31
Ayiwa, a Tɛhɛnɛ Baa Kilɛ di Musa pye: 2 «Majan nagoo pʼa kakuunɔ lemu pye Izirayɛli nagoo pu na ge, li foo tɔ pu mu. Lee kadugo na ma na shɛ binnɛ ni ma sefɛlɛɛ pu ni.»3 Ayiwa, a Musa di sipyiire ti pye: «Pii pu pu wo kashɛn yagboyo lɔ yi ni, pʼi shɛ Majan shɛɛn fɛni, pʼi shɛ do pu na, pʼi Tɛhɛnɛ Baa Kilɛ wo loyire li foo tɔ pu mu. 4 Yi sipyii kabɔfoŋɔɔ nigin nigin (1.000) lɔ Izirayɛli gbaweye yi bɛɛri ni, yʼi pee yaha shɛ kashɛn ki na.»
5 Wee tuun wu ni, a pʼi sipyii kabɔfoŋɔɔ nigin nigin (1.000) lɔ gbaweye yi ni Izirayɛli wo kashɛnŋmuu pu ni. A pu bɛɛri di bye kashɛnŋmuu kabɔfoŋɔɔ kɛ ni shuun (12.000). 6 A Musa di pu yaha kari kashɛn ki na ni saraya ɲaha shɔɔnrivɛɛ Eleyazari ja Finiyasi ni, gbawege ka bɛɛri kabɔfonɔ nigin (1.000). Wee keŋɛ ni Tɛhɛnɛ Baa Kilɛ wo fɛfɛɛrɛ yaŋmuyɔ yi bye na fara maga ki bɛ na, kemu pu ma wi kashɛn ki ni ge. 7 A pʼi gari Majan nagoo pu fɛni ma na jo ba Tɛhɛnɛ Baa Kilɛ ya yi jo Musa mu wɛ. A pʼi shɛ namaa pu bɛɛri gbo, 8 na fara Majan wo saannaa kaguro na. Pee ɲɛ Evi, ni Erekɛmu, ni Zuri, ni Xhuri, ni Ereba. A pʼi Bewɔri ja Balamu bɛ gbo ni ŋmɔpara ni. 9 A Izirayɛli nagoo pʼi Majan cèe pee ni pu nagoo pu bɛɛri co, na pu niiyɛ yi bɛɛri ni pu yatɔɔbya wu bɛɛri kɔri lɔ, na pu naafuu wu bɛɛri kuu. 10 A pʼi pu kulogoo ki bɛɛri ni pu buguro ti bɛɛri sòrogo. 11 Sipyii piimu bɛɛri pʼa co, na yapɔrɔyɔ yemu bɛɛri kɔri, na naafuu wemu bɛɛri kuu ge, a pʼi gari ni yee bɛɛri ni. 12 A pʼi gari ni pee kashɛn buloo pu ni, ni yapɔrɔyɔ ye, ni naafuu wu ni Musa ni saraya ɲaha shɔɔnrivɛɛ Eleyazari ni Izirayɛli nagoo pusamaa yíri buguro ti na, Mowabu fadaaŋa ki na, Zhurudɛn Gba wu kogii wu na, Zheriko ɲahatiimɛ pu ni.
13 A Musa ni saraya ɲaha shɔɔnrivɛɛ Eleyazari ni Izirayɛli nagoo pu wo ɲuŋɔfɛɛ pu bɛɛri di foro, na shɛ pu ɲuŋɔ círi buguro ti kadugo yíri. 14 Sɔrɔsii ɲuŋɔfɛɛ piimu pʼa bi kashɛn ki ɲaha co ge, kabɔfoŋɔɔ nigin nigin (1.000) wo ɲuŋɔfɛɛ pee ni xhuu nigin nigin (100) wo ɲuŋɔfɛɛ pee, ba pʼa nɔ na yìri kashɛn ki na wɛ, a Musa luu di yìri pu tàan. 15 A wu pu pye: «Ɲaha na yee dʼa pii cèe pii bɛɛri ɲìi wuu yaha wɛ? 16 Ta yee ya li cɛ na Majan cèe pʼa Balamu wo ɲɔjomɔ logo, na Izirayɛli namaa pu faanna le piinŋɛ ni Tɛhɛnɛ Baa Kilɛ ɲaha tàan, Pewɔri wo keree ki ni wɛ? Go lee lʼa pye kaɲuŋɔ na bɔɔngɔ nɔ Tɛhɛnɛ Baa Kilɛ wo sipyii pu na. 17 Lee na do, yi funaŋaa ki bɛɛri gbo, cee bɛɛri wʼa sinnɛ ɲa ná tàan ge, yʼi pee bɛ gbo. 18 Ga, doɲiŋɛ pushaa piimu yɛ pu ɲɛ ná cɛbaalaa ge, yʼi pee yɛ yaha yiyɛ mu.
19 Yee pi ge, yee di gori buguro ti kadugo yíri fo cabyaa gbarashuun. Yee piimu bɛɛri pʼa sipyii gbo, kelee na kpɔn xuu na ge, yee bɛɛri di yiyɛ pye fɛɛfɛɛ caŋa taanri wogo ke, ni caŋa gbarashuun wogo ki na, yi ni yi kashɛn buloo pu bɛɛri. 20 Yʼi yi fàya yi bɛ pye fɛɛfɛɛ. Yaaga bɛɛri kʼa yàa ni sɛɛgbogo ni ge, fàŋa bɛɛri kʼa yàa ni sika shiire ni ge, yaaga bɛɛri kʼa yàa ni tige ni ge, yʼi yee bɛɛri pye fɛɛfɛɛ.
21 Kashɛnŋmuu piimu pʼa bi kari kashɛn ki na ge, a saraya ɲaha shɔɔnrivɛɛ Eleyazari di pee pye: «Tɛhɛnɛ Baa Kilɛ ya saliya wemu kan Musa mu ge, wee wo kodoronɔ la li wa mɛ: 22 Yaŋmuyɔ yemu yi ɲɛ sanni, ni warifyɛn, ni daɲaa, ni tɔɔrɔ, ni lɛtɛn, ni tɔɔrɔ tatii bɛ ge, 23 ma na jo yaŋmuyɔ yemu yi ɲɛ yi ya já sogi-i ge, na kʼa yee pyi fɛɛfɛɛ, lee kadugo na, yi ma da fɛfɛɛrɛ lɔhɔ ki taga yi pye fɛɛfɛɛ. Yemu bɛɛri yi ɲɛ yi da já le na ni-i ge, yʼi yee bɛɛri le fɛfɛɛrɛ lɔhɔ ki ni. 24 Yʼi yi fàya yi jé caŋa gbarashuun wogo ki na, lee bu bye, yi na bye fɛɛfɛɛ, lee kadugo na yi ma jé buguro ti ni.»
Kashɛn wo yataya yi taagana
25 Ayiwa, a Tɛhɛnɛ Baa Kilɛ di Musa pye: 26 «Yaaga bɛɛri ni sipyiire tʼa pa na yìri kashɛn ki na ge, sipyii fara yapɔrɔyɔ yi na, yi yi bɛɛri tɔrɔ, ma ni saraya ɲaha shɔɔnrivɛɛ Eleyazari ni kpɔnhɔɔ fɛɛ pu ni. 27 Yʼi yi taa niŋɛ ni taaya shuun. Kashɛnŋmuu piimu pʼa yìri kashɛn ki na ge, taaga ka di gan pee mu. Taaga kisaŋa di gan sipyiire tisara mu. 28 Kashɛnŋmuu piimu pʼa yìri kashɛn ki na ge, mʼa wolo pee wo taa li ni ma kan Tɛhɛnɛ Baa Kilɛ mu: sipyii xhuu kaguro (500) bɛɛri, mʼa shɛn nigin wolo pee ni. Niiyɛ xhuu kaguro (500) bɛɛri, mʼa nigin wolo. Kafaya xhuu kaguro (500) bɛɛri, mʼa nigin wolo. Yatɔɔbya wu xhuu kaguro (500) bɛɛri mʼa nigin wolo. 29 Yʼi yee wolo kashɛnŋmuu pu wo taa li ni, mʼa yee kan saraya ɲaha shɔɔnrivɛɛ Eleyazari mu, yee di bye Tɛhɛnɛ Baa Kilɛ wo saraga. 30 Taaga kisaŋa ki da gan Izirayɛli nagoo pusamaa mu ge, sipyii kɛlɛɛ kaguro (50) bɛɛri, mʼa nigin wolo. Niiyɛ kɛlɛɛ kaguro (50) bɛɛri, mʼa nigin wolo. Kafaya kɛlɛɛ kaguro (50) bɛɛri, mʼa nigin wolo. Yapɔrɔbya wu kɛlɛɛ kaguro (50) bɛɛri, mʼa nigin wolo. Mʼa yee kan Levi wo tirige shɛɛn pu mu, pee piimu pu wa kapyeŋɛɛ pyi Tɛhɛnɛ Baa Kilɛ wo Ɲuŋɔ Tacirige Fàya Puga ki ni ge.» 31 Lemu Tɛhɛnɛ Baa Kilɛ ya jo Musa mu ge, a wu ni saraya ɲaha shɔɔnrivɛɛ Eleyazari di lee pye.
32 Ayiwa, kashɛnŋmuu pʼa pa ni yaŋmuyɔ yemu ni na yìri kashɛn ki na ge, yeesaya yʼa pye dubyaa ni sikaa kabɔfoŋɔɔ xhuu gbaara ni kɛlɛɛ gbarashuun ni kaguro (675.000), 33 ni niiyɛ kabɔfoŋɔɔ kɛlɛɛ gbarashuun ni shuun (72.000), 34 ni kafaya kabɔfoŋɔɔ kɛlɛɛ gbaara ni nigin (61.000), 35 ni doɲiŋɛ pushaa nacɛbaalaa kabɔfoŋɔɔ kɛlɛɛ taanri ni shuun (32.000). 36 Yee wo taaga kemu kʼa yaa na kan kashɛnŋmuu pu mu ge, kee ya pye dubyaa ni sikaa kabɔfoŋɔɔ xhuu taanri ni kɛlɛɛ taanri ni gbarashuun, di xhuu kaguro (337.500). 37 Yemu pʼa wolo yee ni Tɛhɛnɛ Baa Kilɛ mu ge, a yee di bye dubyaa ni sikaa xhuu gbaara di kɛlɛɛ gbarashuun ni kaguro (6075). 38 Niiyɛ kabɔfoŋɔɔ kɛlɛɛ taanri ni kabɔfoŋɔɔ gbaara (36.000). Yemu pʼa wolo yee ni Tɛhɛnɛ Baa Kilɛ mu ge, a yee di bye niiyɛ kɛlɛɛ gbarashuun ni shuun (72). 39 Kafaya kabɔfoŋɔɔ kɛlɛɛ taanri, di xhuu kaguro (30.500). Yemu pʼa wolo yee ni Tɛhɛnɛ Baa Kilɛ mu ge, a yee di bye kafaya kɛlɛɛ gbaara ni nigin (61). 40 Sipyii kabɔfoŋɔɔ kɛ ni gbaara (16.000). Piimu pʼa wolo pee ni Tɛhɛnɛ Baa Kilɛ mu ge, a pee di bye sipyii kɛlɛɛ taanri ni shuun (32). 41 A Musa di Tɛhɛnɛ Baa Kilɛ wo taa li kan saraya ɲaha shɔɔnrivɛɛ Eleyazari mu, ba Tɛhɛnɛ Baa Kilɛ ya yi jo wu mu wɛ. 42 Taaga kisaŋa ki ge, kee bye Izirayɛli nagoo pusamaa wogo, Musa bi kee yaha ki yɛ ni kashɛnŋmuu pu wogo ki ni. 43 A kee taaga kesaŋa di bɛ ni dubyaa ni sikaa kabɔfoŋɔɔ xhuu taanri ni kɛlɛɛ taanri ni gbarashuun, di xhuu kaguro (337.500) ni, 44 ni niiyɛ kabɔfoŋɔɔ kɛlɛɛ taanri ni kabɔfoŋɔɔ gbaara (36.000), 45 ni kafaya kabɔfoŋɔɔ kɛlɛɛ taanri, di xhuu kaguro (30.500), 46 ni sipyii kabɔfoŋɔɔ kɛ ni gbaara (16.000). 47 A Musa di nigin nigin lɔ pee sipyii pu bɛɛri wo kɛlɛɛ kaguro kaguro (50) wu ni, na nigin nigin lɔ, yaboboyo yi bɛ wo kɛlɛɛ kaguro kaguro (50) wu ni. Levi wo tirige shɛɛn piimu pʼa kapyeŋɛɛ pyi Tɛhɛnɛ Baa Kilɛ wo Ɲuŋɔ Tacirige Fàya Puga ki ni ge, a wu yi kan pee mu, ba Tɛhɛnɛ Baa Kilɛ ya yi jo wu mu wɛ.
Kashɛnŋmuu pʼa Kilɛ shaari ni pu keye yaŋmuyɔ ni
48 Ayiwa, lee kadugo na a kashɛnŋmuu ɲuŋɔfɛɛ pʼi ba na ba binnɛ Musa tàan, kashɛnŋmuu kabɔfoŋɔɔ nigin nigin (1.000) wo ɲuŋɔfɛɛ pee, ni xhuu nigin nigin (100) wo ɲuŋɔfɛɛ pee. 49 A pʼi wu pye: «Kashɛnŋmuu piimu ni ma buloo pʼa kari kashɛn ki na ge, wèe ya pu tɔrɔ, ali shɛn nigin bɛ ya fɔ pu ni wɛ. 50 Lee na do, wèe bɛɛri nigin nigin wʼa sanni yalere temu ta ge: sanni ɲɔhɔrɔ ni sanni keŋɛ yalere, ni sanni kaŋmegee, ni sanni kabeleŋɛɛ ni sanni nige yalere, ni sanni katige yalere. Wèe ya pa wù ba tee kan Tɛhɛnɛ Baa Kilɛ mu saraga, kɔnhɔ wù wo jurumu wu yaha wù mu Tɛhɛnɛ Baa Kilɛ ɲaha tàan.» 51 A Musa ni saraya ɲaha shɔɔnrivɛɛ Eleyazari di tee sanni yalere ti bɛɛri shɔ kashɛnŋmuu pu ɲuŋɔfɛɛ pu mu. 52 Pee kabɔfoŋɔɔ nigin nigin (1.000) ɲuŋɔfɛɛ ni xhuu nigin nigin (100) ɲuŋɔfɛɛ pʼa sanni yalere temu kan Tɛhɛnɛ Baa Kilɛ mu ge, a tee wo tidugumɔ pʼi bɛ ni sanni kiloo xhuu nigin ni kɛlɛɛ gbarataanri ni shishɛɛrɛ (184) ni. 53 Kashɛnŋmɔ wa bɛɛri ya yaaga kemu ta kashɛn ki ni ge, a pu bɛɛri di gori ni pu woyo yi ni. 54 A Musa ni saraya ɲaha shɔɔnrivɛɛ Eleyazari di wee sanni wu lɔ, kabɔfoŋɔɔ nigin nigin (1.000) ɲuŋɔfɛɛ ni xhuu nigin nigin (100) ɲuŋɔfɛɛ pʼa pa ni wemu ni ge, na shɛ wu yaha Tɛhɛnɛ Baa Kilɛ ɲaha tàan Ɲuŋɔ Tacirige Fàya Puga ki ni. A wu bye fundogo yaaga Izirayɛli nagoo pu mu.