30
Ayiwa, Tɛhɛnɛ Baa Kilɛ ya tuduro temu bɛɛri jo Musa mu ge, a wu ti bɛɛri jo Izirayɛli nagoo pu mu.Ɲɔfaaga wo kodorogoo
2 Ayiwa, a Musa di Izirayɛli gbaweye yi wo ɲuŋɔfɛɛ pu pye: «Tuduro temu Tɛhɛnɛ Baa Kilɛ ya jo ge, tee ti wa mɛ: 3 Ná wa bu ɲɔfaaga faa Tɛhɛnɛ Baa Kilɛ mu, kelee wu shiin ya kàa la wo ɲɔ foo lɔ Tɛhɛnɛ Baa Kilɛ mu, na gàa taha li na, wufɔɔ ya yaa na ɲuŋɔ mɔɔri wolo wu jomɔ pu tàan wɛ, ga ye wʼa jo ge, wʼa yaa na yee bɛɛri ɲɔ fa.
4 Na fucɛɛrɛ yaha li to puga, li bu ɲɔ faa Tɛhɛnɛ Baa Kilɛ mu na foo le liyɛ katige ni, 5 tofɔɔ wu ba yi logo, na bye wu ya yaaga jo wɛ, wee tuun wu ni, fucɛɛrɛ li wo ɲɔfaaga ki na bye li na, li ɲɔ foo li na gori yaha li katige ni. 6 Ga tofɔɔ wu ba yi logo caŋa kemu, na li she wu mu, wu ɲɔfaaga ki foo da bye nige wu na wɛ. Tɛhɛnɛ Baa Kilɛ na yafa wu mu, bani wu ɲɔfaaga ki keree ya ta tàan wu to wu mu wɛ.
7 Li bu shɛ da nago fucɛɛrɛ la ya ɲɔfaaga faa, na ɲɔ foo lɔ Tɛhɛnɛ Baa Kilɛ mu, lee kadugo na, na shɛ gbaga je. 8 Wu poo wu ba ɲɔfaaga ki kaa logo caŋa kemu, na bye wu ya yaaga jo ki keree ni kee caŋa wɛ, wu ɲɔfaaga ki na bye wu na, wu ɲɔ foo li na gori yaha wu na. 9 Ga wu poo wʼa ɲɔfaaga ki kàa logo caŋa kemu ge, wu bu li she kee caŋa, na ɲɔfaaga ki yirige, wu pɔɔrɔ jomɔ pemu pʼa foro wu ɲɔ ki ni ge, pee na gyɛɛgi, Tɛhɛnɛ Baa Kilɛ na yafa wu mu.
10 Ga cee wemu poo bu xhu, kelee wu gbaga na xɔ, wee wa bu ɲɔfaaga faa, na ɲɔ foo lɔ Tɛhɛnɛ Baa Kilɛ mu, lee foo le na bye wu katige ni.
11 Cee wemu wu ɲɛ gbaga ni wu poo mu ge, wee bu ɲɔfaaga faa, kelee na ɲɔ foo lɔ Tɛhɛnɛ Baa Kilɛ mu, na gàa taha li na. 12 Wu poo wu ba yi logo caŋa kemu, na bye wu ya pari li na wu mu wɛ. Wu bye wu ya yaaga jo wɛ, wu ɲɔfaaga ke ni wu ɲɔ foo li na bye wu na, wu ɲɔ foo li na gori yaha wu katige ni. 13 Ga caŋa kemu wu poo wʼa yi logo ge, wu bu li she, na ɲɔfaaga ki yirige kee caŋa, ɲɔfaaga ki foo da bye nige cee wu na wɛ. Tɛhɛnɛ Baa Kilɛ na yafa wu mu, bani wu poo wʼa wu ɲɔfaaga ki yirige. 14 Lee funŋɔ ni, cee bu ɲɔfaaga tuugo bɛɛri faa, kelee wu na kàa, na ɲɔ foo tuugo bɛɛri lɔ na wuyɛ kana. Wu poo wu na já li koo kan, kelee ma li koo pari. 15 Wu poo wʼa yi logo caŋa kemu ge, wu bye wu ya yaaga jo wɛ, na cari wuyɛ na fo na shɛ kee caŋa ki torogo, wee tuun wu ni cee wu ɲɔ foo li na gori wu katige ni. Bani caŋa kemu wu poo wʼa yi logo ge, na fɛhɛ wuyɛ na. Kee fɛhɛŋɛ kʼa li shɛɛ na wʼa li koo kan. 16 Ga wu poo wʼa yi logo caŋa kemu ge, kee caŋa ki bu doro, a ná wu na pa yìri kadugo yíri, na li yereŋɛ fo na ɲɔfaaga ki koo pari, wee tuun wu ni ná wuyɛ pyaa ɲuŋɔ ni cee wu wo ɲɔfaaga ki fabaa wu wo jaagi wʼa da do.
17 Ayiwa, kii kʼa pye Tɛhɛnɛ Baa Kilɛ wo saliya ɲɔmɛhɛɛ kee, wʼa kiimu jo Musa mu ɲɔfaaya shizhaa na, ná ni wu shɔ tɛ ni ge, kelee to ni wu poro fucɛɛrɛ tɛ ni lemu sanha shɛ gbaga ni-i, na ɲɛ to puga ge.