Pushaa piimu bu da cɛn wu ni, pee wo gbaya jegana
36
Ayiwa, caŋa ka Galadi wo gbawege ki wo tashɔhɔyɔ yi kpɔnhɔɔ fɛɛ pʼa pa shɛ Musa ni Izirayɛli nagoo pu wo kpɔnhɔɔ fɛɛ pu mu. Wee Galadi we bi bye Makiri wo ja, na ɲɛ Manase wo ɲabige na foro Yusufu wo tirege shɛɛn pu ni. 2 A pʼi jo: «Tɛhɛnɛ Baa Kilɛ ya yi jo wèe kafɔɔ Musa mu na wu fiige ki taa Izirayɛli nagoo pu na ni kagaan shaana ni. A Tɛhɛnɛ Baa Kilɛ di nugo wèe kafɔɔ wu pye sanha na wu wèe ceborona Selofadi wo taa cɛn wu kan wu poro pushaa pu mu. 3 Ayiwa, nimɛ, wee poro pushɔ wa ba shɛ gbaga je Izirayɛli wo gbawege katii shɛn ná wa mu, wee tuun wu ni, ɲiŋɛ kemu kʼa bi kan wee cee wu mu ge, kee na ba foro wèe wo gbawege ki wo ɲiŋɛ taa li ni, na ki fara wu poo wu wo gbawege ki wo ɲiŋɛ taa li na. Lee ma bye kaɲuŋɔ na wèe wo gbawege ki wo ɲiŋɛ taa li cɛrɛŋɛ. 4 Izirayɛli nagoo pu wo ɲuwuuro ti wo yee li ba maha nɔ tuun wemu ni, pushaa pʼa gbaya je gbaweye yemu mu ge, pu wo ɲiŋɛ tahaa ki na ba gɔn wolo wèe wo gbawege ki wo taa li ni, na ki kɔn ɲɛri pu namaa pu wo gbaweye yi wo tahaa ki ni.»5 Ayiwa, Tɛhɛnɛ Baa Kilɛ ya yemu jo Musa mu ge, a wu yee jo Izirayɛli nagoo pu mu. A wu jo: «Kaɲii wa Yusufu wo tirige shɛɛn pu mu.» 6 A wu nugo jo sanha na: «Yemu Tɛhɛnɛ Baa Kilɛ ya jo Selofadi wo pushaa pu keree na ge, yee yi wa mɛ: Ná bɛɛri wʼa pu taan ge, pu gbaga je wee mu, ga wʼi bye pu to wu wo gbawege ki wo ná wa. 7 Lee funŋɔ ni Izirayɛli gbawege ka wo ɲiŋɛ taa da ba gɔn ɲɛri gbawege ka mu wɛ. Ga Izirayɛli gbaweye yi bɛɛri wo ɲiŋɛ tahaa na ba gori yaha yi mu. 8 Li bu shɛ da nago Izirayɛli gbawege ka wo poro pushɔ ya wu wo taa ta na foro wu to wu wo ɲiŋɛ ki ni, wee poro pushɔ wʼa yaa na gbaga je kee gbawege ki wo ná wa mu, kɔnhɔ gbawege ka bɛɛri wo ɲiŋɛ taa di gori yaha ki mu. 9 Lee funŋɔ ni, gbawege ka wo ɲiŋɛ taa da ba gɔn ɲɛri gbawege katii mu wɛ, ga Izirayɛli gbaweye yi bɛɛri na ba nɔrɔ yaha yi wo ɲiŋɛ tahaa na.»
10 Ayiwa, Tɛhɛnɛ Baa Kilɛ ya yemu jo Musa mu ge, a Selofadi wo poro pushaa pʼi lee pye. 11 A Mala, ni Tirisa, ni Ogila, ni Milika, ni Nowa, pee piimu pu ɲɛ Selofadi wo poro pushaa pu ge, a pee di gbaya je pu to wu ceboronamaa wo jalaa mu. 12 A pʼi gbaya je Yusufu ja Manase wo tirige shɛɛn pii mu, lee funŋɔ ni, ɲiŋɛ kemu kʼa bi nɔ pu na pu to wu wo ɲiŋɛ taa li ni ge, a lee di gori yaha pu to wu wo gbawege ki mu.
13 Tɛhɛnɛ Baa Kilɛ ya kodorogoo ni saliya wemu kan Musa mu wu jo Izirayɛli nagoo pu mu, na pu yaha Mowabu fadaaŋa ki na, Zhurudɛn Gba wu ɲɔ na, Zheriko ɲahatii wu ni ge, kee kʼa pye kiiri.