9
Ɛnza ŋé fɔ i yɛ o lé lɔ íkwɔtun kó:
«Tó ní fɔ a yɛ́ tinɲan in ne ngó:
Mɔɔn mín núu yánun nín,
o lɔ́lu yɛ́ɛ táa sayakɛ ní i mán Ala yɛ́ mansaya ó yé nánla ní sébhaayale.»
Maki 9.1-32
Ɛnza ngɛseɲan óo yɛ́ɛmanla
2 Tee wɔ́ɔlɔ tínminnin ngwɔ,
Ɛnza ŋé Piyɛli ní Zaki ní Yaya kíi kɛ táa ile i kéenan tíiba lɔ́ ka.
A kɛseɲan oo yɛ́ɛman i ɲanla,
3 a yɛ déeke óo gbɛ́ fɔ́ kɛ a mannan mannan bhɔ́.
A gbɛ́ kóyoo ŋó mán,
mɔɔn sí tɛ́ lúukolo ó ka yánun,
mín ŋé sé fáanin kwola cé kɛ gbɛ.
4 O kwɔ,
kaamɔɔndhye nzawa óo tɛɛ céla Eli ní céla Musa yéla kóman kɛ́la ni Ɛnza ne.
5 Piyɛli é fɔ Ɛnza ɲɛn kó:
«Kaamɔɔn,
án ngɛ o yánun ŋóo wɛ́ɛ físaya.
Án ní tóo sawa lɔ́ ya.
Í tá kée,
céla Musa tá kée óni céla Eli tá kée.»
6 Piyɛli kɔ́ɔnnɔn tɛ́wɛɛ múu,
kɛ mansɔɔ i bɛ́ man tɛ́wɛɛ sháan.
7 Káwa lɔ́ é nan i mantuun tó saaninkan nɔ é bhɔ́ káwa ó cɛ́man kɛ fɔ kó:
«Míin lée nyénjɛ óle mín ŋan dí ɲɛ́n koyoongɛ.
Áa a kómankan ŋo lɔ́myɛn!»
8 Kaamɔɔndhye ŋolu bɛ́ɛ í ɲánlakaa í tɔ́ɔfɛ téeman,
wáa i mán mɔɔn gbɛ́ɛ yé bhée fɔ́ Ɛnza ngée le tɛ́ɛ i fɛ́.
9 I tɛ́ɛ bhɔ́la tii ó ka mínngɛ,
Ɛnza ŋé fɔ i yɛ kɛ a mangbɛya kó:
«A wɛ́ɛ kó min yé nín,
a kɛ́nan o lábhɔ mɔɔn sí ɲánla sánnin mɔɔn Dhyénjɛ ó kúunnzan o cɛ kɛ bhɔ́ sú ólu cɛ́man.»
10 Ii o kóman ó lamala i kɔɔnnɔn,
wáa ii ɲɔ́ɔn mánɲaankɛ kó:
«Kɛ kúun kɛ bhɔ́ sú ólu cɛ́man o kɔ́ɔ o tɔ́ɔ díi?»
11 Kaamɔɔndhye ŋolu a mánɲaankɛ kó:
«Mínnɛɛn le kósɔn sɛliya kaamɔɔn olu fɔ́la kó fɔ́ céla Eli lé á nan ótun?»
12 Aa i yawi kó:
«Fɔ céla Eli lé a nan ótun kɛ́nan kó ó bɛ́ lɔ́bhyɛ.
Wáa mínnɛɛn lé kósɔn tó Ala bhóonɔn ólu fɔ́la kó mɔɔn Dhyénjɛ ó yáa tɔ́lɔya myáan koyoongɛ,
tó kɛ í bá a lɔ?
13 Wáa Í lé le wɛ́ɛ o fɔ́ wé céla Eli wɛ́ɛ nan wáa Kó min é dhyáa i yɛ,
ii o lá a ka,
óyoo a sɛwɛnin ngɔɔ tɛ́ɛ Ala bhóonɔn o lɔ se mín ne.»
Ɛnza ŋé dhyénin lámansayoondɔ lɔ lákɛɛnyala
14 Ɛnza ni a yɛ kaamɔɔndhye nzawa ólu sé kaamɔɔndhye ŋo tɔ́ ólu tɔ́ɔfɛ mínngɛ,
ii yamanba yé i lamiin ŋó lɔ.
Sɛliya kaamɔɔn olu ní kaamɔɔndhye ŋo tɔ́ ólu lámansɔsɔya la.
15 Yaman ó Ɛnza nantɔ o yé mínngɛ,
óo bháa i bɛ́ lɔ.
Ii bwée téeman kɛ́nan a labhyɛ tó kɛ a twáa.
16 Aa i mánɲaankɛ kó:
«Áa mínnɛɛn lé lámansɔsɔya kɛla ni ile?»
17 Cɛ lɔ́ é tó yaman o cɛ́man kɛ a yawi kó:
«Kaamɔɔn,
ŋwɛ́ɛn nan dhyénjɛ lé í sáala kɛ mansɔɔ lámansayoo ŋé a fɛ́,
o lée a kɛla bhóbho le.
18 Ni o lámansayoo ŋó kɛ́ wíi a fɛ́ ywáa óo ywáa lɔ,
aa a labe lúuman,
kɛ a láyigaan ŋo lábhɔ,
kɛ a ɲin ó lákomanɲɔ́ɔn man,
kɛ ale gbú lɔ́ɔya.
Ni í yɛ́ kaamɔɔndhye ŋolu mándhyaa ké ii lámansayoo ŋó gbɛ́,
i mán sé.»
19 Ɛnza ŋé fɔ i yɛ kó:
«Ále wáati miin mɔɔn ólu lánanbhɛɛ lé le!
Né káa tó a fɛ́ yánun kɛ táa sé fɔ́ɔ wáati mínnɛɛn lé mán?
Né káa Ále lɔ́myaan kɛ sé fɔ́ɔ wáati mínnɛɛn lé mán ósɔ?
Áa nan dhyé ŋó lé ɲɛ́n.»
20 Ii nan dhyé ŋó lé a yɛ.
Lámansayoo ŋóo Ɛnza yé mínngɛ,
aa dhyé ŋó lámaanmaan fáanba la,
kɛ a labe lúuman kɛ a laginniman fɔ́ kɛ a láyigaan ŋo bhɔ́.
21 Ɛnza ŋé a fa ó mánɲaankɛ kó:
«Míin ŋé i lamyaan a lá wáati mínnɛɛn lé lɔ?»
Tó fá óo yawi kó:
«Fɔ́ a yɛ dhyémuuya wáati o lɔ.
22 Wáati lɔ́lu lɔ lámansayoo ŋóo a lafii tá mán wáman jí lɔ,
ké aa a fáa.
Wáa án mánɲwaan mánfɛɛ ké íi án dhyɛman,
ní o sé kɛ́ kɛ́ í yɛ́.»
23 Ɛnza é a yawi kó:
«Mínnɛɛn lé kósɔn íi fɔ́la kó nín í kɛ́ sé?
Lánanbhaa o kwéeko tɛ.»
24 O ywáaninngee ŋo lɔ,
dhyé ŋó fá óo gbáa kɛ fɔ kó:
«Nanin ŋé a lá,
wáa ndhyɛman kɛ mansɔɔ ɲɛ́n lánanya ó láfanin ndɛ́.»
25 Ɛnza ŋé yaman o yé bwéela mínngɛ kɛ́nan a tɔ́ɔfɛ,
aa í táan fɔ́ lámansayoo ŋó yɛ kɛ fɔ a yɛ kó:
«Íle lámansayoo min é bhóbhoya óni toogbeeɲan kɛla mɔɔn la,
ngó í yɛ́ ngó íi bhɔ́ dhyé ŋó fɛ́,
í kɛ́nan a fɛ́ bhée fɛ́sɛfɛsɛ.»
26 Lámansayoo ŋóo gbáangbaa kɛ dhyé ŋó lámaanmaan bhɛ́ɛbhɛɛ le tó kɛ bhɔ́ a fɛ́.
Dhyé ŋó lánin ŋé tó óyoo mɔɔn wɛ́ɛ sayakɛ.
Mɔɔn shɛ́ɛman ndɛ́ɛ fɔ́la lé kó:
«A wɛɛ sayakɛ.»
27 Wáa Ɛnza ŋé a myaan a bhóo mán,
kɛ a láwii.
Dhyé ŋóo í wíi kɛ í lɔ́ í sénan.
28 Ɛnza ŋé lo bhónan mínngɛ,
a yɛ kaamɔɔndhye ŋolu a mánɲaankɛ í kéenan kó:
«Mínnɛɛn le kósɔn án née mán sé o lámansayoo ŋó gbɛnan?»
29 Aa i yawi kó:
«Mɔɔn sé lámansayoo nzúu míin gbɛnan fé mínnan,
o lée Ala dɛ́li óle.»
Ɛnza ŋé a yɛ sayako óni a kúunngo o fɔ́la íkwɔtun
Matiyu 17.22-23; Luka 9.43b-45
30 Ii bhɔ́ yénɔn kɛ tínmin Galile mála o lɔ.
Ɛnza ndɛ́ tɛ́ fɛ́ ké mɔɔn ólu á a ywáa lɔ.
31 Kɛ mansɔɔ a tɛɛ a yɛ kaamɔɔndhye ŋolu kalanan lé tó kɛ fɔ kó:
«Mɔɔn Dhyénjɛ o yáa ló mɔɔn ólu bhóo,
í yáa a fáa,
tee sáwa kwɔ,
a yáa kúun kɛ bhɔ́ sú ólu cɛ́man.»
32 Wáa kaamɔɔndhye ŋolu tɛ́ tɛ́ bhɔ́la o kóman ólu kɔ́ɔ o ɲánle,
i lo ndɛ́ɛ sháannan kɛ a mánɲaankɛ.
Yɛ́ɛtii kúnndii óle?
33 Ɛnza ni a yɛ kaamɔɔndhye ŋolu nan sé ó lé lɔ Kapɛnamu.
I tɛ́ɛ bhó ŋó kɔ́ɔnnɔn wáati mínnɔn,
Ɛnza ŋé i mánɲaankɛ kó:
«A tɛ́ɛ mínnɛɛn lé kiti lá sháa o la?»
Maki 9.33-50
34 Wáa i bɛ́ɛ í lúmandhye,
kɛ mansɔɔ i tɛ wɛ́ɛ wɛɛ ɲɔ́ɔn lamansɔsɔya la kó yɛ́ɛtii ŋé bɛ́ lɔ mɔɔnba óle.
35 Oo kɛ́ mínngɛ,
Ɛnza ŋé í síi kɛ kaamɔɔndhye ndá ni fyáa ólu kíi,
kɛ fɔ i yɛ kó:
«mɔɔn mín ŋé fɛ́ kɛ kɛ́ ɲɛ́nmɔɔn le,
fɔ́ ó tíi ó a tó bɛ́ kwɔ́ lé,
kɛ kɛ́ bɛ́ tá bháalakɛdhye ne.»
36 Ɛnza ŋé dhyémuu lɔ́ myáan a bhóo mán,
kɛ a lalɔ i cɛ́man,
kɛ a ta kɛ a lá í sísi la,
kɛ fɔ i yɛ kó:
37 «Mɔɔn mínngɛ í bhóo síi dhyémuu míin súu o kɔ́ɔ né kósɔn,
o tíi óo í bhóo síila né lé kɔ́ɔ wé.
Tó ni mɔɔn mínngɛ í bhóo síi ngɔ́ɔ,
o tɛ́ í bhóo síila né gbú kɔ́ɔ o le,
wáa o tíi o i bhóo síila njɛ́bhaa o le kɔ́ɔ.»
Mɔɔn min ndɛ́ án yúu le án ɲíin née wé
38 Yaya é fɔ Ɛnza ɲɛn kó:
«Kaamɔɔn,
án wɛɛ cɛ lɔ́ yé lámansayoo ŋólu gbɛnan í tɔ́ɔla.
Án ní fɔ a yɛ kó a kɛ́nan o lɔ́gbɛɛ kɛ́ bhée,
kɛ mansɔɔ a tɛ́ án ndá sɛ́ɛ ó lɔ.»
39 Wáa Ɛnza ŋé a yawi kó:
«A kɛ́nan a lása a man,
kɛ mansɔɔ mɔɔn lɔ́ tɛ́ sé káwananngo kɛ́la ndɔ́ɔ ó la,
tó kɛ́wɛɛ kɛ dhyaayoo ngɛ mán.
40 Kɛ mansɔɔ mɔɔn min ndɛ́ án yúu le,
oo án ɲíin ne le.
41 Ní mɔɔn mínngɛ jífyɛ ɲan kée ndí a mán kɛ mansɔɔ kó áa Kílisi tá le le,
ní tinɲan le fɔ́la a yɛ́ ngo,
o tíi táa bɔɔn a sáa o lɔ.»
Yúumu o tá gbɛ́ya ó
42 «Dhyémuu mínnu wɛ́ɛ lá né la ní mɔɔn mín ngɛ kɛ́ sɔ́ɔbu le kɛ o kée kúnnɔn cáan,
min ndɛ́ɛ físaa o tíi o mán o lée kɛ káwaguun belebeleba lɔ́ ngúun o tii o kannan,
kɛ a lafii kɔɔji o lɔ.
43 Ní í bhóo kée ŋó kɛ́ kɛ́ sɔ́ɔbu le kɛ́ í bhyáa yúumukɛ ó lɔ,
a tɛɛ i la,
kɛ mansɔɔ í ló ŋó Ɛliyanan o lɔ́ ni í bhóo kée ŋó le,
o ŋá físaa í mán ní í táa ó lé yaananmanta o lɔ́ ni í bhóo fyáa o le,
tá min ndɛ́ sala.
44 [Tunmuun min núu yénɔn olu tɛ́ faala,
tá ó ló ndɛ́ sala fɛ́sɛfɛsɛ.]
45 Ní í sé ŋo kɛ́ kɛ́ sɔ́ɔbu le kɛ́ í bhyáa yúumukɛ ó lɔ,
a tɛɛ i la,
kɛ mansɔɔ í ló ŋó Ɛliyanan o lɔ́ ni í sé ngée o le o a físaa í láfii ó lé yaananmanta ó lɔ́ ni í sé nváa óle.
46 [Tunmuun mínnuu yénɔn ólu tɛ́ faala,
tá ó ló ndɛ́ sala fɛ́sɛfɛsɛ.]
47 Tó ni í ɲandhye ŋó kɛ́ kɛ́ sɔ́ɔbu le kɛ í bhyáa yúumukɛ ó lɔ,
a bhɔ́ í lá,
kɛ mansɔɔ í ló ŋó Ala yɛ́ Mansaya o lɔ́ ni í ɲándhye ngée ŋo le,
o a físaa í mán í láfii ó lé yaananmanta o lɔ́ ni í ɲándhye nvyáa óle.
48 Tunmuun mínnuu yénɔn olu tɛ́ faala,
tá ŋo ló ndɛ́ sala fɛ́sɛfɛsɛ.
49 Kɛ mansɔɔ tá ó yáa kɔɔ kɛ bɛ́ la.
50 Kɔɔ óo femɛɛ lé le.
Wáa ní kɔɔ ó dhyáalaa ó kɛ́ bhɔ́ a lá,
mɔɔn ó kɛla ɲán mínnɛɛn lé mán tó aa dhyáa ko kwáa kɛ?
Áa kɔɔ kɛ́ a yɛ́ɛla.
Áa í yóso sɔ́ɔnya ɲɔ́ɔn nvɛ́.»