Matiyu 17

Kaamɔɔndhye nzawa wɛ́ɛ Ɛnza nɔ́lɔyaman ŋó yé

Tee wɔ́ɔlɔ tínminnin ngwɔ, Ɛnza ŋé Piyɛli ní Zaki ní Zaki bhádhyemannjɛ Yaya lú kíi kɛ táa ni ile i kéenan tíiba lɔ́ ka. 2 Ɛnza ngɛseɲan oo yɛ́ɛman i ɲanla, a ɲanlɔshaa ó mannan mannan ŋé bhɔ́ óyoo teemaan, tó a yɛ déeke olu gbɛ́nin ndɛ́ɛ óyoo kɛ́ɛnɲan. 3 Tó kaamɔɔndhye nzawa ólu céla Musa ní céla Eli yé ké ólu ní Ɛnza ŋé kómanla. 4 Piyɛli é fɔ Ɛnza ɲɛn kó: «Mantii o, án ngɛ yánun ŋó wɛ́ɛ físaya. Ni í kɛ́ sɔ́n, ɲáan tóo sáwa lɔ́ ya: Í tá kée, céla Musa tá kée, óni céla Eli tá kée.» 5 Aa tó kóman ó la tó káwa lɔ́ é nan i mantuun. O káwa o mannan mannan ndɛ́ɛ bhɔ́la. Saaninkan nɔ é bhɔ́ káwa ó cɛ́man kɛ fɔ kó: «Míin née nyénjɛ óle, mín ŋan dí ɲɛ́n koyoongɛ. Áa a kómankan ŋo lɔ́myɛn!» 6 Saaninkan mín ŋé wé, kaamɔɔndhye ŋolu o myɛ́n mínngɛ, i man é sháan fɔ́ íi í kɛ́la lúuman kɛ í cé gbáan lúu lɔ. 7 Ɛnza ŋé í mángbaa i la kɛ í bhóo túu i la tó kɛ fɔ kó: «A kɛ́nan sháan, áa í wíi.» 8 Ii í kún nánwii o lé lɔ, wáa kɛ bhɔ́ Ɛnza nɔn, i man mɔɔn gbɛ́ɛ yé. 9 I tɛɛ bhɔ́la tii ó ka mínngɛ, Ɛnza ŋé fɔ i yɛ kɛ a mangbɛya kó: «Áa kó mín ɲé nín, a kɛ́nan o lábhɔ mɔɔn sí ɲánla sánnin mɔɔn Dhyénjɛ ó kúunnzan o cɛ kɛ bhɔ́ su ólu cɛ́man.»

Kaamɔɔndhye ŋolu ɲaanli kɛla Eli ta fa ŋo fɛ́

10 Kaamɔɔndhye ŋolu Ɛnza manɲaankɛ kó: «Mínnɛɛn le kósɔn sɛliya kaamɔɔn olu fɔ́la kó fɔ́ céla Eli lé á nan ótun?» 11 Aa i yawi kó: «Aa céne, céla Eli le káa nan ŋótun kɛ́nan kó ŋólu bɛ́ lɔ́bhyɛ. 12 Wáa tó ní fɔ a yɛ́ ngó céla Eli wɛ́ɛ wɛɛ nan la, wáa mɔɔn ó léelu mán a mánlɔ. Kó mín ɲé dhyáa i yɛ, ii o lá a ka. Mɔɔn Dhyénjɛ, o gbú yɛ́ɛ káa tɔ́lɔya myáan i bhóo o ɲán kée ŋó lé mán.» 13 Kaamɔɔndhye ŋolu bhɔ́ a ɲan lé o lé lɔ óo a kan ndɛ́ɛ Yaya Bátizelikɛbhaa le man.

Ɛnza ŋé kaweenin benzhaayatɔ lɔ́ lákɛɛnyala

Maki 9.14-29; Luka 9.37-43a

14 Ɛnza ni a yɛ kaamɔɔndhye ŋolu sé yaman ó tɔ́ɔfɛ mínngɛ, cɛ lɔ́ é í mángbaa Ɛnza nan kɛ í kúnmɛɛn nɔkɛɛ a kɔɔ 15 tó kɛ fɔ a yɛ kó: «Mantii o, nyénjɛ ó manɲwaan mánfɛɛ. Benzhaaya lée a lá, óo a tɔ́lɔla kóyoongɛ. A kɛ wíi nín aa a labe tá lɔ wáman jí lɔ. 16 Ní nán a le í yɛ́ kaamɔɔndhye ŋolu fɛ́ wáa i man sé a lákɛɛnyala» 17 Ɛnza ŋé fɔ kó: «Ále wáati miin mɔɔn lánanbhɛɛ ólu! Ále mínnu tɛ́ Ala sháa o ka. Né káa tó a fɛ́ yánun kɛ táa sé fɔ́ɔ wáati mínnɛɛn lé mán? Né káa ále lɔ́myaan kɛ sé fɔ́ɔ wáati mínnɛɛn lé mán ósɔ? Áa nan dhyé ŋó lé ɲɛ́n ya.» 18 Ɛnza ŋé í táan fɔ́ lámansayoo ŋó yɛ, lámansa yóo ŋóo bhɔ́ dhyé ŋó fɛ́. Aa kɛ́ɛnya íkɔlɔ. 19 Kaamɔɔndhye ŋolu í mángbaa o lé lɔ́ Ɛnza nán í kéenan kɛ a manɲaankɛ kó: «Mínnɛɛn kósɔn án nee mán sé o lámansa yóo ŋó gbɛnan?» 20 Ɛnza ŋé i yawi kó: «A yɛ́ lánanya ó a lɔ́ɔ lé koyoongɛ. Tó ní fɔ a yɛ́ tinɲan in ne ngó, ní a tɛɛ kɛ́ óo a yɛ́ lánanya ó a lɔ́ɔ óyoo mútaalikoo, a tɛ́ɛnan sé fɔ́la tii míin ɲɛn kó aa bhɔ́ ya kɛ táa yeenɔn tó a tɛɛ o kɛ. A tɛ́ táa kwee kó óo kó mán. 21 [Wáa mɔɔn tɛ́ sháa lámansa yóo nzúu míin ngbɛnan ni mɔɔn mán í sɛ́ɛ óni kɛ súnno.]»

Ɛnza ŋé a sayako óni a kuunngo o fɔ́la íkwɔ

Maki 9.30-32; Luka 9.43-45

22 Ló nɔ́ la ké kaamɔɔndhye ŋo bɛ́ ládhyɛnin ɲé Galile, Ɛnza ŋé fɔ i yɛ kó: «Mɔɔn Dhyénjɛ, o yáa ló mɔɔn ólu bhóo 23 kó óo kó é kɛ olu a a fáa. Wáa a yɛ saya ó tée sáwaɲɔn lo ŋo kɛ́se, a yáa kúun kɛ bhɔ́ su ólu cɛ́man.» O kóman óo kaamɔɔndhye ŋolu nílafin ngbúnigbu kɛ.

Ala bhatobhomba ó bhóobhɔko

24 Ɛnza ni a yɛ kaamɔɔndhye ŋolu lo mínngɛ Kapɛnamu, mɔɔn mínnu tɛ́ɛ Ala bhatobhomba ó bhóobhɔ ó myáanla, olu í mángbaa Piyɛli la kɛ a manɲaankɛ kó: «A kaamɔɔncɛ tɛ́ Ala bhatobhomba ó bhóobhɔ ó lɔ a?» 25 Piyɛli kó: «Aa a bhɔ́la kɛɛ!» Piyɛli tɛ́ɛ lónan bhó ŋó lá wáati mínnɔn, Ɛnza ŋé kóman ó tá kɛ fɔ kó: «Simɔn, í tá ɲánla ó lɔ yɛ́ne kákan kɛ bhóobhɔ ólu ní nísɔɔn ólu sála dínɲan míin mansa ólu yɛ? I yɛ́ɛlamɔɔn ólu bháa mɔɔn gbɛ́ɛ olu?» 26 Piyɛli kó mɔɔn gbɛ́ɛ olu. Ɛnza ngó a yɛ o lé lɔ kó: «O ɲán o mán, mansa yɛ́ɛlamɔɔn ólu mánngan kɛ fé mɔ́. 27 Wáa án ngɛ́nan lo mɔɔn míinnu la. Oo lɔ mínngɛ, táa í yɛ́ lwée ó bhyáa kɔ́ɔji ó lɔ. Yɔ́ɔ jónan mín ngɛ í tá íi o lábhɔ kɛ a lá láka, í yáa wɛ́ɛgbannan nɔ yé a lálɔ. O yáa nan kɛ́ íle ní né tá bhóobhɔ óle. Í kɛ́nan, íi a lo i bhóo ndá bhóobhɔ le.»