Ɛnza ŋé sunman díla mɔɔn wáa náannin mán
8
O tée ó mán,
yaman bá tɛ́ɛ Ɛnza ndɔ́ɔfɛ sunman ndɛ́ tɛ i bhóo bhée.
Ɛnza ŋé a yɛ kaamɔɔndhye ŋolu kíi kɛ́ fɔ i yɛ kó:
Maki 8.1-21
2 «Yaman míin mánɲwaan é nɔ́n,
kɛ mansɔɔ i tée sáwa lée ngwɔ́ka nín,
sunman ndɛ́ i bhóo.
3 Ni ngɛ́ i kɔ́ɔntɔ ó lábhyaa ké ii táa i fɛ́ yé,
i yáa dɛ́sɛ sháala,
kɛ mansɔɔ i lɔ́lu bhɔ́laa a já.»
4 Ɛnza ɲɛn kaamɔɔndhye ŋólu a yawi kó:
«Í káa bhɔ́ míin nú láfa búlu o lé mín ne dhyɛ́ míin nɔn?»
5 Ɛnza ŋé i mánɲaankɛ kó:
«Búlu yée lée a bhóo?»
Ii fɔ kó:
«Wóonvyaa.»
6 Aa fɔ yaman o yɛ kó ii í síi lúu mán.
O kwɔ,
aa búlu wóonvyaa ó tála,
kɛ Ala bálika bhɔ́ Ala yɛ,
aa i kúunndɛɛtɛɛ kɛ di a yɛ kaamɔɔndhye ŋolu mán ké ii a lɔtaa yaman ó la.
7 Yɔ́ɔdhye mɛ́nsɛn dáman tɛ́ɛ i bhóo.
Ɛnza ŋé yɔ́ɔ ólu tá kɛ Ala bálika bhɔ́ íkwɔtun kɛ a di a yɛ kaamɔɔndhye ŋolu mán íkwɔtun kó ii a lɔ́taandaa yaman o la.
8 Mɔɔn olu bɛ́ɛ lɔ́minkɛ kɛ fá.
Tó ii nán see wóonvyaa lé sunman ndɔto o lɔ.
9 Yaman o tɛ́ɛ mɔɔn wáa náannin lú síya bhɔ́la.
O lé kwɔ,
to aa i lábhyaa.
10 O ywáaninngee ŋo lɔ,
Ɛnza ni a yɛ kaamɔɔndhye ŋolu í bhyáa kúun ŋó lɔ tó kɛ táa Dalimanuta mala ó lɔ.
Falizɛn ŋolu fɔ́la kó Ɛnza ŋan káwananngo lɔ́ kɛ́
11 Falizɛn ŋolu nan,
ii lágban bhyáa Ɛnza nan a lɔswaan ndɔ́ɔ lɔ́:
Tó íi fɔ a yɛ kó aa káwako kée ngɛ́ i ɲánla,
kɛ́ bhɔ́ sángboo o lɔ.
12 Aa í ɲáankiiba láyii tó kɛ fɔ kó:
«Mínnɛɛn lé kósɔn tó án ɲɛ́n wáati miin mɔɔn min núu káwako ɲíinnan?
Ní fɔ́la a yɛ́ tinɲan in ne ngó,
káwako gbɛ́ɛ táa kɛ́ a lé wáati miin mɔɔn ólu yɛ́!»
13 O kwɔ,
aa í kwɔ́sɛɛ ni a yɛ kaamɔɔndhye ŋolu le kúun ŋó lɔ kɛ táa bhá ó ɲán dɔ́min ŋo mán.
Falizɛn ŋólu ní Elɔdi yɛ́ mɔɔn ólu yɛ́ kaangoo o
14 Kaamɔɔndhye ŋolu ɲan kɛ́ búlu lú tá.
Búlu kée ngbóto lé tɛ́ɛ i bhóo kúun ŋó lɔ.
15 Ɛnza ŋé i sɛ́ɛmansɔɔ í yɛ́ kɛ fɔ kó:
«Áa a yáakii tó a yɛ́ɛ lɔ́ Falizɛn ŋólu ní Elɔdi yɛ́ lévu o mán.»
16 Kaamɔɔndhye ŋolu tɛ́ɛ kómanla ɲɔ́ɔnɲɛn kɛ mansɔɔ búlu tɛ́ tɛ i bhóo.
17 A tɛɛ i kɔɔnnɔnkan ŋo lɔ́ mínngɛ,
aa i mánɲaankɛ kó:
«Áa fɔ́la ɲɔ́ɔnɲɛn kun mínnɛɛn lé la kó búlu tɛ́ a bhóo?
A mán hákii sɔ́ɔ bhá ŋan?
A mán bhɔ́ a ɲan lé bhá ŋan?
Bháa a yáakii o gbénenin née a?
18 Ɲán é a kún mán,
a tɛ́ yéli kɛla a?
Tóo é a kún mán a tɛ́ myɛ́nnin kɛla a?
Kó tɛ́ tóla a kɔ́ɔnnɔn a?
19 Ní búlu lóo ó lɔ́tɛɛtɛɛ cɛ wáa lóo ó lá mínngɛ,
áa see ɲée lé láfa búluguun ŋó tɔ́ ólu la?»
Ii a yawi kó:
«Tá ni fyáa.»
20 «Tó ní búlu wóonvyaa ó lɔ́tɛɛtɛɛ mínngɛ mɔɔn wáa náannin ó la,
áa nan see náfanin ɲée lé lé a tɔ́ ólu lɔ?»
Ii a yawi kó:
«Wóonvyaa.»
21 Ɛnza ŋé fɔ i yɛ kó:
«Yáanin sán,
a mán bhɔ́ o ɲán lé bhá ŋan?»
Ɛnza ŋé fyóonjɛ lɔ lákɛɛnyala Bɛtisayida
22 Oo wɛɛ mínngɛ,
Ɛnza ni a yɛ kaamɔɔndhye ŋolu táa Bɛtisayida só o la.
Yénɔn,
mɔɔn ólu nan fyóonjɛ lɔ lé a yɛ,
kɛ a dɛ́li kó aa í bhóo túu o lá,
kɛ a lákɛɛnya.
Maki 8.22-38
23 Ɛnza ŋé fyóonjɛ o myáan a bhóo o mán,
kɛ táa ale só o kwɔ́ka.
Tó aa a láyi o bhyáa a ɲanman,
kɛ í bhóo lá a ka,
kɛ a mánɲaankɛ kó:
«Íi fé nɔ́ yéla a?»
24 Fyóonjɛ óo í ɲánlaka ó lé lɔ tó kɛ fɔ kó:
«Ní mɔɔn ólu yéla táaman kɛ́la wáa i bhɔ́nin ɲé yíi lée lú la.»
25 Aa í bhóo lá a ɲan ó ka ko kwáa kɛ.
Óo kɛ́ mínngɛ,
cɛ óo í ɲánlaka,
aa kɛ́ɛnya kɛ ywáa yé cɛ́ɛne.
26 Ɛnza ŋé fɔ a yɛ kó aa táa a bhóo lúman wáa kó a kɛ́nan lo só ó kɔ́ɔnnɔn.
Piyɛli é mín nvɔla Ɛnza man
27 Ɛnza ni a yɛ kaamɔɔndhye ŋolu tɛ́ɛ táala Filipu,
Sezale lámiin nzó nɔ́lu lá.
I tɛ́ɛ sháakun ŋo lɔ́ mínngɛ,
aa a yɛ kaamɔɔndhye ŋolu mánɲaankɛ kó:
«Mɔɔn ólu tá fɔli o lɔ,
née yɛ́ɛtii lé?»
28 Ii a yawi kó:
«Lɔ́lu kó íi Yaya Bátizelikɛbhaa lé le,
lɔ́gbɛɛ lu kó íi Eli lé le,
tó lógbɛɛ lu yɛ́ɛ kó íi céla ólu lɔ́ lé le.»
29 Aa a yɛ kaamɔɔndhye ŋolu mánɲaankɛ kó:
«Tó Ále ɲánla,
ní yɛ́ɛtii lé?»
Piyɛli é a yawi kó:
«Íle lée Kílisi o le.»
30 Ɛnza ŋé fɔ i yɛ kɛ a mangbɛya kó i kɛ́nan á yɛ kó ó fɔ́ mɔɔn sí yɛ.
Ɛnza ŋé a yɛ sayako óni a yɛ kúunniko o fɔ́la
31 Óo wɛɛ mínngɛ,
Ɛnza ŋé a yɛ kaamɔɔndhye ŋolu kála ŋó lámyaan kɛ fɔ i yɛ kó:
«Mɔɔn Dhyénjɛ ó kákan né kɛ́ tɔ́lɔya lé myáan koyoongɛ.
Cɛba ólu ní faanlɛɛɲansebhaa olu kúnndii ólu ní sɛliya kaamɔɔn ólu yáa í bá a lɔ́.
I yáa a fáa,
a tee sawa a saya kɛ́nin ŋo kwɔ,
a yáa kúun kɛ bhɔ́ saya o lɔ.»
32 Aa tɛ́ɛ o fɔ́la i bɛ́ le yɛ.
O lɔ,
Piyɛli é Ɛnza ngíi í kéenan,
kɛ kóman a yɛ kɛ a mangbɛya.
33 Ɛnza ŋé í ɲán yɛ́ɛman kɛ a yɛ kaamɔɔndhye ŋolu mánfɛɛ tó kɛ kóman Piyɛli yɛ kɛ mangbɛya kó:
«Táa kɛ bhɔ́ ngwɔ́ Sɔtaannan!
Kɛ mansɔɔ í tɛ́ i mílila óyoo Ala,
wáa óyoo mɔɔn ólu.»
Kɛ bhyáa Ɛnza ngwɔ oo kɛ́la díi?
34 Oo kɛ́ mínngɛ,
Ɛnza ŋé yaman o kíi óni a yɛ kaamɔɔndhye ŋolu kɛ fɔ i yɛ kó:
«Ní mɔɔn mín ŋé fɛ́ kɛ́ í bhyáa né kwɔ́,
fɔ́ o tíi ó a í bá a yɛ́ɛ lɔ lé,
kɛ a yɛ́ɛ gbáanɲii o tá kɛ́ bhyáa né kwɔ́.
35 Kɛ mansɔɔ mɔɔn óo mɔɔn é fɛ́ kɛ a ní o kísi,
o tíi ó yáa bɔɔn a ni o lɔ.
Wáa mɔɔn óo mɔɔn kɛ bɔɔn a ni o lɔ́ né ni sanmankanmɛɛ o kósɔn,
o tíi ó yáa kísi.
36 Óo mínnɛɛn lé ɲánla mɔɔn mán kɛ́ dínɲanmanfe ŋó bɛ́ sɔ́ɔ tó kɛ táa bɔɔn a ní o lɔ́?
37 Mɔɔn ó sé kɛ́ fé mínnɛɛn lé dí a ní o kunmanka lé?
38 Ni mɔɔn mín ngɛ maloya né lá,
óni kɛ maloya ngómankan ŋolu lá bímɔɔn Ala kanmyaanbhɛɛ olu ní yuumutɔ ólu cɛ́man,
mɔɔn Dhyénjɛ o yáa maloya o tíi ó lá ni a kɛ́nan tée mín man a Fá yɛ nɔ́lɔya ó lɔ́ ni malɛɛka sɛ́nnɛnyanin ŋólu le.»