Maki 10

Ɛnza ŋé kaa ngɛla fúusako o ka

Matiyu 19.1-12; Luka 16.18

Ɛnza ŋé bhɔ́ o ywáa ó lɔ kɛ táa mála o lɔ, óni bha ó ɲán dɔ́ o mán. Yaman ó nan í mínnin a lá íkwɔtun tó aa í kála ŋó lámyaan óyoo a tɛɛ a kɛla tɛ́nmɛn ne kɔ́ɔ.

Maki 10.1-31

2  nɔ́luu í mángbaa a lá, tó kɛ a mánɲaankɛ lɔswaanni bhóoman kó: «A láanin ɲé ké cɛ o á a muso o fúu o sá a?» 3 Aa i yawi kó: «Céla Musa é tɔ́ mínnɛɛn lé dí a man?» 4 Ii fɔ kó: «Céla Musa é fɔ kó ní í kɛ́ fúusa sɛ́wɛ o dí muso ó mán, kó íi sé kɛ í bá a lɔ.» 5  ŋé fɔ i yɛ kó: «A yɛ́ tóolagbɛya lé kósɔn tó Céla Musa é o fúusasɛwɛ o kɛ a yɛ́. 6 Wáa dinɲan lamyaan ó lɔ, Ala é cɛ ní muso lé la. 7 O lé kósɔn, cɛ óo bhɔ́la a wóobhaa ni a fa lú ka kɛ í gbɛ́nnɛn a muso mán, 8 tó i fyáa ó kɛ́ fasisoo kéene. O ɲán o mán, i tɛ́ mɔɔn fyáa lé bhée fɔ́ fasisoo kéembe. 9 O lé kósɔn Ala wɛ́ɛ fé mín ngɛ kéene mɔɔn sí mánngan kɛ olu fála.»

10 Ɛnza ni a yɛ ŋolu lo bhó nán mínngɛ, a yɛ kaamɔɔndhye ŋolu a manɲaankɛ ko kwáa kɛ́ o kó kée ŋó mán. 11 Aa fɔ i yɛ kó: «Ní cɛ óo cɛ kɛ í bá a muso lɔ, kɛ muso gbɛ́ɛ ta, ké o tíi o wɛ́ɛ ɲɔnmɔɔnya lé kɛ wé, ké a wɛɛ yáacɛ sɔ́ɔ a muso jónan ó la. 12 Ó bhóo kée ŋó mán, ní muso mínngɛ í bá a cɛ ó lɔ kɛ sii cɛ gbɛ́ɛ kúnman, ké o wɛ́ɛ ɲɔnmɔɔnya lé kɛ wé.»

Ɛnza ŋé lwáau kɛ́la dhyémuu ólu yɛ

Matiyu 19.13-15; Luka 18.15-17

13 Mɔɔn ólu nan dhyémuu léelu lé Ɛnza ɲɛn ké aa í bhóo túu i la. Wáa a yɛ ŋólu yámanngɛ mɔɔn ólu mán kɛ i sɛ́ɛmansɔɔ i yɛ. 14  ŋé o yé mínngɛ, o mán dhyáa a yɛ. Aa fɔ a yɛ kaamɔɔndhye ŋolu yɛ kó: «Áa dhyémuu ólu tó yé ké ii nan né mán, a kɛ́nan í síi i ɲan lɔ. Kɛ mansɔɔ mɔɔn mínnuu óyoo dhyémuu míinnu ó ólu ta le. 15 Tó ní fɔ a yɛ́ tinɲan in né ngó, ní mɔɔn mín mán í bhóo síi Ala yɛ́ mansaya ó kɔɔ óyoo dhyémuu ólu, o tíi o táa lo tún.» 16 Óo wɛɛ mínngɛ, aa dhyémuu ólu tá kée ngée kɛ í bhóo lá i kúnnɔn, kɛ lwáau bhyáa i fɛ́.

Nanfootiicɛ o

Matiyu 19.16-30; Luka 18.18-30

17 Ɛnza ndáatɔ óle, cɛ lɔ́ é bwée kɛ́nan í kúnmɛɛn nɔkɛɛ a kɔɔ tó kɛ a mánɲaankɛ kó: «Kaamɔɔnbhɛɛ o, ngákan kɛ mínnɛɛn lé kɛ kɛ ɲáanmanɲan wɛ́ɛbhɛɛ ó sɔ́ɔ?» 18  ŋé fɔ a yɛ kó: «Mínnɛɛn lé kósɔn tó íi ngíila kó kaamɔɔnbhɛɛ? Mɔɔn sí tɛ́ mɔɔnbhɛɛ le fɔ́ Ala kéembe. 19 Íi Ala yɛ tɔ́ ŋolu lɔ: Í mánngan kɛ mɔɔn fáa, í mánngan kɛ ɲɔnmɔɔnya kɛ, í mánngan kɛ soɲan kɛ, í mánngan kɛ fwɔnɲan la í mɔ́ɔnninnvinɲɔɔn ó la, í mánngan kɛ tɔnɲɔɔnli kɛ, í fá ní í wóobhaa bwóɲan.» 20 Cɛ óo Ɛnza ɲawi kó: «Kaamɔɔn kɛ myaan nyémuuya tɔ́ɔ o mán, ŋwɛ́ɛn o tɔ́ ŋo bɛ́ bɛ́ sháa lataaman.» 21 Ɛnza ŋé cɛ ó mánfɛɛ ni dhyáaɲan le tó kɛ fɔ a yɛ kó: «Fé ngée ne kó wɛ́ɛ tó í mán. Táa í bhóofe ŋo bɛ́ fele kɛ o wɛ́ɛ o dí fáannda ŋólu mán. O kɛ́ kɛ́, í yáa nanfooba sɔ́ɔ sá ŋó lɔ. Í kɛ́wɛɛ o la, íi i bhyáa ngwɔ́.» 22 O kóman ó lée cɛ ó nílafin. Aa bhɔ́ yénɔn a ɲanlasiinin ŋó le, kɛ mansɔɔ nanfooba lé tɛ́ɛ a bhóo.

23 Ɛnza ŋé í ɲán gbáan a lamiin ŋo lɔ, kɛ fɔ a yɛ ŋolu yɛ kó: «Nanfootii ó lo ŋo ó lɔ ó ló ŋan gbɛ́ɛ ósɔ.» 24 O kóman ó lée kaamɔɔndhye ŋolu bɛ́ kɔɔnnɔnfii. Ɛnza ŋé fɔ i yɛ íkwɔtun kó: «Nyé ŋólu, ló ŋó Ala yɛ́ Mansaya ó lɔ o ló a gbɛ́ɛ ósɔ! 25 Ɲɔ́ɔnmɛɛn ó lo ŋo nɔɔnyanin ɲé kɛ́ɛla ŋó jáan ó fɛ́ kɛ tínmin nanfootii ó lo ŋó ka Ala yɛ́ Mansaya ó lɔ.» 26 Ó lée kaamɔɔndhye ŋolu tɔ́ kɔɔnnɔnfii fɔ́ i tɛɛ ɲɔ́ɔn mánɲaankɛla kó: «O lɔ, yɛ́ɛtii é sé kɛ́ kísi?» 27 Ɛnza ŋé i mánfɛɛ, kɛ fɔ kó: «Kísili o sé tɛ́ Adamandhye ŋó yɛ, wáa Ala é sé, kɛ mansɔɔ Ala kweeko tɛ.»

28 Piyɛli é fɔ a yɛ kó: «Án nee wɛɛ án ngwɔ kɛ fé ŋó bɛ́ la tó kɛ bhyáa í kwɔ́ka.» 29 Ɛnza ŋé a yawi kó: «Tó ní fɔ a yɛ́ tinɲan in né ngo, mɔɔn min ngɛ í kwɔ́kɛ a yɛ bhó ŋó la, a bhádhyenjɛman ŋólu la, a bhádhyemuso ŋolu la, a wóobhaa la, a fa la, a dhyé ŋólu ní sɛ́ɛn ólu lá, né ní sanmankanmɛɛ ó kósɔn, 30 o tíi ó yáa o sí kɛnmɛn sɔɔ wáati míin nɔn. A yáa bhó nú sɔ́ɔ, kɛ bhádhyenjɛman nú sɔ́ɔ, kɛ́ bhádhyemuso lú sɔ́ɔ, kɛ wóobhaa lu sɔɔ, kɛ dhyé nú sɔɔ, kɛ sɛ́ɛn lú sɔ́ɔ, wáa o tíi ó yáa tɔ́lɔya myáan íkwɔtun. O kwɔ, o tíi ó yáa ɲáanmanɲan wɛ́ɛbhɛɛ ó sɔ́ɔ síin, la ndɛ́ mínnan. 31 Mɔɔn mínnu é ɲɛ́n bí nín, o shɛ́ɛman ɲáan tó kwɔ́, tó mín núu kwɔ́, olu shɛ́ɛman ɲáan bhyáa ɲɛ́n.»

Ɛnza ŋé a yɛ sayako óni a kúunngo o fɔ́la kosawaɲɔɔn o kɛ

Matiyu 20.17-19; Luka 18.31-34

32  ni a yɛ kaamɔɔndhye ŋolu tɛɛ táala mínngɛ, a tɛ́ɛ táaman kɛ́la i ɲɛ́nnzhaafɛ. Ólu hánminnin ndɛ́ɛ. Mɔɔn mínnu tɛ́ɛ i kwɔka, ólu tɛ́ɛ sháannan. Aa a yɛ kaamɔɔndhye ndá ni fyáa ólu kíi íkwɔtun, kɛ í cɛ́bhɔ yaman o la, tó kó mín ngáa kɛ́ a lá, kɛ o fɔ́ i yɛ.

Maki 10.32-52

33 Aa fɔ i yɛ kó: «Áa í tóomanlɔ. Án ni táala Yeluzalɛmu lé wé; o káa ló olu kúnndii ólu ní ólu bhóo yénɔn lé ké olu á kíti bé a ka kó kɛ a fáa. O kwɔ, i yáa a lábhyaa káafii olu la. 34 Ólu yáa yɛ́ɛ bhɔ́ a lɔ, kɛ í láyi bwɔ́ a ka, kɛ a gbasi gbɛnɲɛn la, kɛ a fáa. Wáa tee sáwa kɛ́ tínmin, a yáa kúun kɛ bhɔ́ sú ólu cɛ́man.»

Zaki ní Yaya yɛ́ ɲaanli o

Matiyu 20.20-28

35 Oo wɛɛ mínngɛ, Zebede dhyénjɛ fyáa ó Zaki ní Yaya ólu í mángbaa Ɛnza nan kɛ fɔ a yɛ kó: «Kaamɔɔn, án ni í dɛ́lila kó mínnan, án ní fɛ́ ké íi o lɔ́ko ó kɛ́ án ɲɛn.» 36 Aa fɔ i yɛ kó: «Áa fɛ́ ké ní mínnɛɛn lé kɛ́ a yɛ́?» 37 Ii a yawi kó: «Ní í kɛ́ kɛ í yɛ́ mansaya ó nɔ́lɔya ó lɔ́ wáati mínnɔn, dyɛn ké íi án nansii í tɔ́ɔfɛ. Mɔɔn kée ŋan í síi í bhóobhɛɛkɔɔ, ké a kée ŋan í síi í bhóonwaan ngɔɔ.» 38  ŋé i yawi kó: «Áa fé mín ɲiinnan, a mán o lɔ. Né káa tɔ́lɔya súu mín myaan, Ále yáa sé o lɔ́kunnan an? Bháanin né káa fáa ɲɛ́n o lɔ́ sé mín ne, a yáa sé o sí kɛla a?» 39 Ii a yawi kó: «Án ɲáan sé.» Ɛnza é fɔ i yɛ kó: «Tɔ́lɔya mín ngɛ lánga, o sí yáa lá a ka, né káa saya kɛ́ bátizeli o lɔ́ se mín ne, a tá o yáa kɛ́ cé. 40 Wáa a síi ó né bhóobhɛɛkɔɔ wáman móonwan ngɔɔ, o látɛɛbhaa o tɛ́ né le. Ala é o síilaa ólu lɔ́bhyɛ mɔɔn mínnu yɛ, a káa a dí o léelu mán.»

41 Kaamɔɔndhye ndá ŋo tɔ ólu o myɛ́n mínngɛ, ii mwɛ́nnɛn Yaya ní Zaki mán. 42 Ɛnza ŋé i bɛ́ kíi tó kɛ fɔ i yɛ kó: «Áa lɔ ŋóo síya gbɛ́ɛ mɔɔn olu tá kúnndii ólu kúnndiiyafaan lála olu ka. Mɔɔn mín núu i yɛ yamaan o lɔ, ii nɔn lála olu ka. 43 Wáa a tɛ́ kɛ́la cé Álee lú cɛ́man. Ní mɔɔn mín ŋé fɛ́ kɛ kɛ́ mɔɔnba lé a cɛ́man, fɔ́ o tíi ó a kɛ́ bɛ́ tá bháalakɛdhye ne. 44 Tó ní mɔɔn óo mɔɔn é fɛ́ kɛ bhyáa bɛ́ ɲɛn, o tíi o kákan né kɛ kɛ́ a bɛ́ ta yɔ né le. 45 Kɛ mansɔɔ o mán nan ké lɔ́ a kɛ́ a yɛ bháalakɛdhye ne, wáa aa nan lé kɛ bháalakɛ mɔɔn olu yɛ́, óni kɛ a yɛ́ɛ ní o dí mɔɔn shɛ́ɛman ngunmanka le.»

Ɛnza ŋé fyóonjɛ lɔ lákɛɛnyala

Matiyu 20.29-34; Luka 18.35-43

46 Ii sé . Ɛnza ni a yɛ ŋolu ní yamanba tɛ́ɛ bhɔ́la Zeliko só ó kɔ́ɔnnɔn mínngɛ, fyóondɔ lɔ síininndɛ́ɛ lɛ́ɛli kɛ́ sháa o gboo nvɛ́. Time dhyénjɛ le kó Batime. 47 Aa myɛ́n mínngɛ kó lée tínminnan wé, aa gbáa kɛ fɔ kó: «Ɛnza, Bhɔ́nzɔ ŋo, manɲwaan nán.» 48 Mɔɔn ólu yáman ngɛ a man kó aa í lúmandhye, wáa a tɛ́ɛ gbáanan í fáan lá o bɛ́ kwɔ kɛ fɔ kó: «Laula Bhɔ́nzɔ ŋo, manɲwaan nán.» 49 Ɛnza ŋé í lɔ́ kɛ fɔ kó: «Áa a kíi.» Mɔɔn ólu fyóondɔ o kíi kɛ táa fɔ lé a yɛ kó: «Í yóso sɔ́ɔnya, i lɔ́ja, í wíi, aa í kíila.» 50 O ywáaninngee ŋo lɔ, aa a yɛ deekeba o láfii téeman kɛ í gbán kɛ í lɔ́, kɛ́nan Ɛnza nzaala. 51 Ɛnza ŋé a mánɲaankɛ kó: «Ii fɛ́ ké ní mínnɛɛn lé kɛ́ í yɛ́?» Fyóondɔ óo yawi kó: «Kaamɔɔn, ní fɛ́ kɛ yéli kɛ́ ko kwáa kɛ.» 52 Ɛnza ŋé fɔ a yɛ kó: «Táa, í yɛ́ lánanya ó wɛ́ɛ í lákɛɛnya.» O ywáaninngee ŋó lɔ, a ɲán oo í láka, aa yéli kɛ, kɛ í bhyáa Ɛnza ngwɔ sháa o ka.