Luka 16

Ɲɛ́nmɔɔn ó yɛ́ saanan ó

Ɛnza ŋé fɔ a yɛ ŋólu yɛ kó: «Nanfootii lɔ tɛ́ɛ yé. A tɛ wɛɛ mɔɔn lɔ tá kɛ́ bhyáa a yɛ nanfoo ó kunnan. Mɔɔn ólu nan fɔ a kunndii ó yɛ kó cɛ míin i yɛ nanfoo ó kunnan, aa a mán kɛ a cáan. 2 A kunndii óo a kíi kɛ́ fɔ a yɛ kó: ‹Ní mín myɛ́nnan í yɛ kó ó lɔ, o mán ndí. Ii bháala ó kɛ́la ɲán mín mán, nan o ɲánfɔ né yɛ, kɛ mansɔɔ í tɛ́ sé kɛ tó né yɛ nanfoo ó kunnan bhée.› 3 Nanfoo kunnansiibhaa óo fɔ́ ko: ‹Né káa mínnɛɛn lé kɛ, kɛ mansɔɔ né kunndii ó káa né bhɔ́ a yɛ nanfoo ó kunnan. Faan tɛ́ né lɔ kɛ́ sɛɛn kɛ. Kɛ dɛ́lili kɛ, ó yáa kɛ́ maloya le né bhóo. 4 Né káa mínngɛ ní o lɔ, ní a kɛ né gbɛ́ kɛ bhɔ́ bháala míin ngunnan, ké mɔɔn lɔ́lu a né labhyɛ i bhóo lúman.›

5 O lɔ, a kunndiicɛ o yɛ yúu tɛ́ɛ mɔɔn óo mɔɔn lá, aa ólu bɛ́ kíi kée ngée. Míin nan jónan, aa ó mánɲaankɛ kó: ‹Né kunndiicɛ ó yɛ́ yúu mín ŋé í la, yée lée o le?› 6 Óo fɔ kó: ‹Túu gbóngbo ngɛnmɛn.› Áa fɔ o yɛ kó: ‹I yɛ yúu ta sɛ́wɛ ó mánfɛɛ nín, i síi kɛ túu gbóngbo bíloolu sɛ́wɛ jónan.› 7 O kwɔ́, aa fɔ lɔ́gbɛɛ yɛ kó: ‹Ile wɛ́, yée lée ile tá o le?› Oo fɔ kó: ‹Béle bhɔɔ kɛnmɛn.› Aa fɔ o yɛ kó: ‹I yɛ yúu ta sɛ́wɛ ó mánfɛɛ nín, i síi kɛ bhɔɔ bísɛɲin nzɛ́wɛ.›

8 A kunndiicɛ óo o kóman ó myɛ́n aa nanfoo kunnansiibhaa kóyoongɛbhaa ó tando a yɛ gée ŋó kósɔn. Kɛ mansɔɔ dínɲan mɔɔn ólu á ɲɔɔn myaan séɲan ó lɔ kɛ tínmin Ala dhyé ŋólu ka mínnuu kɛ́ɛnɲan ó lɔ.»

Nanfoo ó myáanseɲan ó

9 Ɛnza ngo: «Ní fɔ́la a yɛ ngó aa a táamanɲɔɔn ólu ɲíinnan dínɲan nanfooyoo ŋó le cɛ́man kɛ mɔɔn ólu dhyɛman, kɛ twáanva ɲiin ó lé, ní a kɛ́wɛɛ wáati mínnɔn, ké ólu a sé kɛ a labhyɛ ɛliyanan ó lɔ́. 10 Mɔɔn mín ngɛ kɛ mɔɔn téenin né kófitiinin ŋó lɔ́, oo mɔɔn téenin né lé kóba ó lɔ́ ikwɔ. Wáa ní mɔɔn mín ngɛ kɛ mɔɔn téemɛɛ le kófitiinin ŋó lɔ́, oo mɔɔn téemɛɛ le lé kóba ó lɔ́ ikwɔ. 11 Ni álee mán kɛ́ mɔɔnbhɛɛ lé dínɲan nanfooyoo nɔ́ɔnnin ngó o lɔ, yɛ né káa lá álee la kɛ a yɛ nanfoobhɛɛ o kɛ́ɛfa álee mán? 12 Ni álee mán kɛ́ mɔɔn téenin né mɔɔn olu ta wɛ́ɛ ó tá sháafɛ, míin nan kɛ álee gbúlu tá o le yɛ́ɛtii káa ó di a mán?

13 Mɔɔn sí tɛ sé kɛ bháalakɛ kunndii fyáa yɛ, kɛ mansɔɔ kée ɲáan gbóya a yɛ a tɔ kée ŋó yáa dhyáa a yɛ, wáman a yáa í gbɛ́nnɛn kée ŋó mán kɛ í mán bhɔ́ a tɔ kée ŋó la. A tɛ́ sé kɛ bháalakɛ Ala yɛ, tó kɛ bháalakɛ nanfoo ó yɛ ikwɔ.»

Ɛnza ɲɛ́n ládhyeli lɔ́lu

Matiyu 11.12-13; 5.31-32; Maki 10.11-12

14  ŋólu ó kóman ólu myɛ́n mínngɛ, i tɛ́ɛ yɛ́ɛkɛla Ɛnza mán, kɛ mansɔɔ nanfoo ó ko tɛ́ɛ dí í yɛ. 15 Wáa Ɛnza ŋé fɔ i yɛ kó: «Áa a yɛ́ɛ kɛ́la mɔɔnteenin nu lé mɔɔn ólu ɲanla, wáa Ala á yósokun ŋó lɔ, kɛ mansɔɔ Adamandhye ŋólu fé mín yacela fémba lé, óo fé nɔ́ɔnnin né le Ala ɲánla.

16 Ɛnza ngó: Kɛ́ tá Musa yɛ sɛliya, óni céla ólu yɛ kitabu ó kóman ó man, fɔ́ kɛ́nan sé Yaya Bátizelikɛbhaa yɛ wáati ó mán. Kɛ tá o mán, sanmankanmɛɛ óo í lásela. Óni bɛ́ é fɛ kɛ́ i lɔ́ja kɛ ló o mansaya ó lɔ.

17 Sángboo óni lúukolo ó yáa tínmin, wáa sɛliya ó sɛwɛli kóo fítiinin ŋó kée ndáa bé.

18 Cɛ óo cɛ kɛ́ í bá a muso lɔ tó kɛ́ muso gbɛ́ɛ tá o tíi ó ɲɔnmɔɔnya le kɛ́la wé. Ní cɛ óo cɛ kɛ muso fúusanin ŋó fúu kɛ, o tíi ó ɲɔnmɔɔnya le kɛ́la wé.»

Nanfootii óni Lazali yɛ ko ó

19 «Nanfootii lɔ tɛ́ɛ yé, a tɛ́ɛ i féndiiya faani le lónan kɛ́ faanman nɔ́mi kɛ kɛ́ i ɲáanli ló ŋóo ló. 20 Faannda nɔ́ tɛ́ɛ yé a tɔ́ɔ kó Lazali. A fási ó ywáa bɛ́ tɛ́wɛɛ kɛ lá le. A tɛ́ɛ í la lá nanfootii ó yɛ bhónaa ó lé lá. 21 Lɔ́min múumuu mínnu tɛ́ɛ bénan nanfootii ó yɛ tabɛli ó kɔɔ, a tɛ́ɛfɛ kɛ́ ólu lɔɔ, wáa a tɛ tɛ́ ó sɔ́ɔla kɛ́ ó lɔɔ. Ó kwɔ́, wúu ólu tɛ́ɛ nánla kɛ a yɛ lá ólu mánnɔn.

22 Faannda ŋóo sayakɛ, malɛɛka ólu a tá kɛ táa siilaa di a mán Bulaaman tɔ́ɔfɛ. Nanfootii óo sayakɛ, íi a sú ló. 23 Nanfootii ó tɛ́ɛ tɔ́lɔya ó lɔ́ yaananman ó lɔ́, aa i ɲánla yɛ́ɛ kɛ Bulaaman yé ywáaja nɔn ké Lazali é a tɔ́ɔfɛ. 24 O wáati ó lɔ, nanfootii ó gbáa kɛ fɔ́ ko: ‹Nvá Bulaaman, hínnɛn né la. A fɔ Lazali yɛ kó aa táa a bhóokwɛɛnnin ŋó sú jí ó lɔ kɛ́nan né kan ŋó láɲiin, kɛ mansɔɔ né tɔ́lɔyanin ɲé kóyoongɛ tá ó kɔɔnnɔn.›

25 Wáa Bulaaman é fɔ a yɛ kó: ‹Nyé, i gbú á lɔ ŋóo i tɛ́ɛ dínɲan lɔ mínngɛ, fémɛɛ shɛ́ɛman ndɛ́ɛ i bhóo, ké Lazali é sɛɛ ó lɔ́. Sísan, Lazali é hɛ́lɛ o lɔ, ílee sɛɛ ó lɔ́. 26 Yáanin o tɛ́, jáanbelebeleba é án né ní álee cɛ. O lɔ, ni mɔɔn mín ŋé fɛ́ kɛ bhɔ́ yánun kɛ táa a fɛ́ yé, o kɛ́nan sé kɛ táa, óni ké mɔɔn lɔ́ kɛ́nan sé kɛ bhɔ́ álee fɛ́ yé kɛ́nan an née fɛ́ ya.› 27 Nanfootii óo fɔ kó: ‹O sán ó lɔ, nvá, ní i dɛ́lila, Lazali bhyáashaa kɛ táa né yɛ lúmanmɔɔn ólu fɛ́ yé, 28 kɛ mansɔɔ bhádhye nóo é né fɛ́ yé. A tó ké Lazali á táa ólu lasowi, ké ólu kɛ́nan nan ó tɔ́lɔya ywáa míin nɔn.›

29 Bulaaman é a yawi kó: ‹Musa yɛ sɛliya óni céla ólu yɛ sɛ́wɛ ólu é i bhóo, ii ólu kɔ́ɔnnɔn kóman ó lɔ́myɛn.› 30 Nanfootii ó kó: ‹Ɔn-ɔn, o táa bhyɛ nvá Bulaaman, wáa ní mɔɔn sayakɛnin nɔ́ kɛ kúun kɛ táa kóman i fɛ́, i yáa díminsa i yɛ́ kóyoo ŋólu la.› 31 Bulaaman é wɛ́ɛ kɛ fɔ a yɛ kó: ‹Ní i mán Musa yɛ sɛliya óni céla ólu yɛ sɛ́wɛ ólu kɔ́ɔnnɔn kóman o lɔ́myɛn, yáanin mɔɔn sayakɛnin nɔ́ kɛ kúun kɛ táa kóman i yɛ, i táa lá o la.› »