Luka 15

Saanan míin la saa túunnin ŋó ka

Matiyu 18.12-14

Nísɔɔnmyaanbhaa ólu ní kóyoongɛbhaa ólu bɛ́ tɛ́ɛ i mangbaala Ɛnza nan kɛ a yɛ kóman ó lɔ́myɛn.

2 Falizɛn ŋólu ní Sɛliya kaamɔɔn ólu tɛ́ɛ i mánkomankomanla.

I tɛ́ɛ fɔ́la kó:

«Cɛ míin ŋé yuumukɛbhaa ólu myaanla cɛ́ɛne kɛ lɔ́minkɛ ní íle.»

3 Wáa Ɛnza ŋé saanan lɔ lá i yɛ́ kó:

4 «Mɔɔn mínnɛɛn lée á sɛ́ɛ lɔ,

tó saa kɛnmɛn é a bhóo,

ni o kée ngɛ́ túun,

a táa a tɔ bíkɔɔnndɔ ni kɔɔnndɔ ŋólu bhyáanin ndó la dhyɛ́ ó ka kɛ́ táa kée ŋó ɲíinnaa lɔ fɔ kɛ́ a yé a?

5 Ni a kɛ a yé wáati mínnɔn,

aa a tá kɛ a lá i kanman ni nisɔdhyaa lé.

6 Ni a kɛ í kwɔ́sɛɛ kɛ sé lúman wáati mínnɔn,

aa a tɛ́ɛcɛ ólu ní a siiɲɔɔn ólu kíi kɛ fɔ i yɛ kó:

‹Án ni án nisɔdhyaa ɲɔ́ɔn nvɛ́,

kɛ mansɔɔ ŋwɛ́ɛn ɲɛ́n saa túunnin ŋó yé.›

7 O ɲán ó mán ní fɔ́la a yɛ ngó ní yuumutɔ ó kée ngɛ́ díminsa kɛ fála a yɛ kóyoo ŋólu la kɛ a yóo ó yɛ́ɛman,

nisɔdhyaa yáa kɛ́ sángboo ó lɔ o tíi ó kósɔn,

kɛ tínmin mɔɔnteenin bíkɔɔnndɔ ni kɔɔnndɔ mínnu mánko tɛ́ díminsali ó lá.»

Saanan míin lá wɛ́ɛgbɛ túunnin ŋó ka

8 «Wáman ní wɛ́ɛgbɛ dhyé ndá ngɛ́ kɛ muso lɔ́ bhóo,

ní ó kée ngɛ́ túun,

a tɛ́ laman ŋó lamaan kɛ bhó ŋó máncɛ kɛ ɲíin cɛ́ɛne fɔ kɛ a yé a?

9 Ní a kɛ yé wáati mínnɔn,

a yáa a táamanɲɔɔn ólu ní a siiɲɔɔn ólu kíi kɛ fɔ i yɛ kó:

‹Án ni án nisɔdhyaa ɲɔ́ɔn nvɛ́,

kɛ mansɔɔ né yɛ wɛ́ɛgbɛ dhyé ngée mín ndɛ́ wɛ́ɛ túun,

né wɛ́ɛ ó yé.›

10 O ɲán ó mán,

ní fɔ́la a yɛ ngó ní yuumutɔ kée ngɛ́ díminsa kɛ́ fála a yɛ kóyoo ŋólu la kɛ a yóo ó yɛ́ɛman,

o ɲán ó mán nisɔdhyaa ó yáa kɛ́ Ala yɛ malɛɛka ólu cɛ́man o tíi ó kósɔn.»

Saanan míin lá dhyé ndúunnin ŋó ka tó a wɛɛ yé

11 Ɛnza ŋé fɔ íkwɔ kó:

«Dhyénjɛ fyáa tɛ́ɛ cɛ lɔ bhóo.

12 Lɔ́ɔcɛ man ŋóo fɔ a fácɛ yɛ kó:

‹Nvá,

né káa wɛ́ɛ mín nzɔ́ɔ í cɛ́n ó lɔ,

o dí né mán.›

Oo kɛ́ mínngɛ a fá é a yɛ nanfoo ó lɔ́taa i cɛ.

13 Tée dáman tínminnin ŋó kwɔ́,

lɔ́ɔcɛ man ŋóo fé mínnu sɔ́ɔ cɛ́n ó lɔ,

aa ólu fele kɛ táa ní ó wɛ́ɛ ó lé yamaan já nɔ lɔ,

kɛ o bɛ́ lɔ cáan kakaaya ó lɔ.

14 A yɛ wɛ́ɛ óo wɛɛ wáati mínnɔn,

kɔ́ɔnba é ló o yamaan ó lɔ,

a yɛ lɔ́min ŋóo dɛ́sɛ.

15 A táa kɛ́ ó yamaan ó lúudhye ŋó lɔ́ yɛ́ bháalakɛ dhyé né,

óo a tá kɛ a yɛ́ gbóyoonin ŋólu kúnnansii.

16 A tɛ́ɛfɛ kɛ gbóyoonin ŋólu yɛ lɔ́min ó lɔ lɔ́ɔ kɔ́ɔn ó bhóo,

wáa mɔɔn sí tɛ tɛ́ ó dila a mán.

17 Aa i míli o wáati ó lɔ́ kɛ́ fɔ i kɔɔnnɔn kó:

‹Bháalakɛdhye nzhɛ́ɛman ŋé né fá bhóo,

óluu lɔ́minkɛla fɔ kɛ́ a tɔ́ tó,

né káa fáa kɔ́ɔn lá ya.›

18 Né káa ŋwíi kɛ táa nvá fɛ yé kɛ fɔ a yɛ ngó:

‹Nvá,

né wɛ́ɛ Ala yáacɛ tá,

kɛ íle yáacɛ tá.

19 Né mánngan kɛ kíi bhée kó í dhyé.

Ii né myaan óyoo í yɛ bháalakɛdhye.›

20 Aa i wíi kɛ́ sháa ó tá kɛ́ táa a fácɛ saala.

Kɛ a tó ywáaja nɔn,

a fácɛ é a yé,

a hínnɛn é ló a lɔ.

Aa bwée kɛ́ táa í fínin a dhyénjɛ mán.

21 Aa fɔ a fácɛ yɛ kó:

‹Nva,

né wɛ́ɛ Ala yáacɛ tá kɛ íle yáacɛ tá.

Né mánngan kɛ kíi bhée kó i dhyénjɛ.›

22 Wáa a fá é fɔ a yɛ bháalakɛdhye ŋólu yɛ kó:

‹Aa í lateeya kɛ́nan ni deeke ó bɛ́ lɔ cɛ́ɛ ŋó le,

kɛ́ a bhyaa a kannan.

Aa bhóolanɛɛ bhyáa a bhóo ó la kɛ sawaa ló a sénan.

23 Aa nan ní nisidhye nvánin yɛ́ɛla óle kɛ́ a fáa.

Án ní lɔ́ɔ kɛ án ɲáanli,

24 kɛ mansɔɔ né dhyé míin mánfɛɛ nín,

a tɛ́ wɛ́ɛ sayakɛ,

a wɛ́ɛ kúun.

A tɛ́wɛɛ túun,

ŋwɛ́ɛn a yé.›

Ii i ɲáanli kɛ i nisɔdhyaa.

25 O wáati o lɔ,

dhyénjɛ jónan ó tɛ́ɛ sɛɛn mán.

A kwɔ́sɛɛtɔ ó,

aa sunɲan lú ó lá mínngɛ,

aa lɔnakan ŋó myɛ́n,

óni lɔngɛkan ŋó.

26 Aa bháalakɛdhye ŋólu kée ngíi kɛ́ o mánɲaankɛ kó mínnɛɛn lée wɛ́ɛ kɛ́ lúman.

27 Bháalakɛdhye ŋó a yawi kó:

‹I lɔ́ɔcɛ wɛ́ɛ í kwɔ́sɛɛ kɛ́ nán,

i fá wɛ́ɛ nisidhye nvánin yɛ́ɛla o kée nváa,

kɛ mansɔɔ a wɛ́ɛ í kwɔ́sɛɛ kɛ́ɛnya lɔ.›

28 Oo kɛ́ mínngɛ dhyénjɛ jónan óo mwɛ́nnɛn,

a tɛ́ tɛfɛ kɛ́ ló lú ó mán.

A fá é bhɔ́ kɛ táa a dɛ́li kó aa ló.

29 Wáa áa fɔ a fá yɛ kó:

‹A mánfɛɛ,

né sánɲin shɛ́ɛman née nín,

née bháala kɛ́la i yɛ.

Né mán mbá i yɛ kóman o kée mán bha.

Yáanin i mán bhamuso kée ndí né mán bhá,

ké né ni ndwáanva ólu a án ɲáanli ɲɔ́ɔn nvɛ́.

30 Wáa í dhyé míin mánfɛɛ nín,

a wɛ́ɛ táa i yɛ nanfoo ó bɛ́ cáan ní sínngbiiba ólu le.

Ale kósɔn íi nisidhye nvánin yɛ́ɛla ó fáa a yɛ.›

31 Wáa a fá é fɔ a yɛ kó:

‹Nyé ŋó,

íi né tɔ́ɔfɛ wáati bɛ́,

fé mínnuu né bhóo,

ó bɛ́ é í tá lé le.

32 Wáa án ngákan kɛ án nisɔdhyaa kɛ́ án ɲáanli,

kɛ mansɔɔ í lɔ́ɔcɛ mín ŋé nín,

a tɛ wɛ́ɛ túun,

wáa a wɛɛ yé,

a wɛɛ kɛ óyoo a wɛɛ sayakɛ kɛ kúun.› »