Luka 14

Ɛnza ŋé yaangalotɔ lɔ lákɛɛnya lɔnwɛɛnlilo ó la í kwɔ́

Lɔnwɛɛnlilo nɔ la,

Ɛnza ŋé táa Falizɛn ŋólu yɛ kunndii ó lɔ yɛ lú ó mán kɛ́ lɔ́minkɛ.

Mɔɔn mínnu tɛ́ɛ yé,

ólu tɛ́ɛ a lakɔɔsila.

2 Cɛ lɔ́ tɛ́ɛ Ɛnza ɲánkɔɔ,

fúunnvuu yangalo lé tɛ́ɛ o lá.

3 Ɛnza ŋé kóman ó tá kɛ sɛliya kaamɔɔn ólu ní Falizɛn ŋólu mánɲaankɛ kó:

«A láanin ɲé kɛ yaangalotɔ ó lákɛɛnya lɔnwɛɛnlilo ŋó la á,

wáman a laanin ndɛ́?»

4 Wáa i mán a yawi.

O wáati ó lɔ,

Ɛnza í bhóo túu yaangalotɔ ó la kɛ a lákɛɛnya.

O kwɔ́,

cɛ mín ndɛ́manngɛnnɛn Ɛnza ŋé fɔ ó yɛ kó:

«Ii sé kɛ táa.»

5 O kwɔ́ Ɛnza ŋé fɔ i yɛ kó:

«Yɛ́ɛtii é a cɛ́man ní a dhyénjɛ,

wáman a yɛ nisi o kɛ́ i bé kɔlɔ ŋó kɔ́ɔnnɔn lɔnwɛɛnlilo ŋó la,

a táa i lateeya kɛ táa ó lábhɔ jónan?»

6 I man sé kɛ ó ɲaankɛli ó yawi.

Yɛ́ɛlɔbwoɲanbhaa ólu yáa i manyii

7 Ɛnza ŋé yé mínngɛ óo i wɛɛ mɔɔn mínnu kíi kɛ́nan lɔ́minkɛlaa ó lɔ,

ko óluu siilaabhɛɛ ólu lɔtɔnmɔn nan.

Áa saanan miin nvɔ́ i yɛ kó:

8 «Ní mɔɔn lɔ kɛ́ i kíi fúusiilaa lɔ lɔ́min o mán,

í kɛ́nan í síi siilaabhɛɛ ó lɔ.

Kɛ́dhyaa,

mɔɔn kíinin ŋólu cɛ́man,

i wɛ́ɛ mɔɔn gbɛ́ɛ kíi íi mín nvísayala íle lé.

9 Mɔɔn mín ŋé a fyáa ó bɛ́ kíi,

ní ó kɛ́nan fɔ i yɛ kó íi i wíi kɛ́ siilaa o dí ó tíi ó mán,

o lɔ,

íle yáa wíi ní maloya lé,

kɛ́ táa í síi bɛ́ kwɔ́man.

10 Wáa ní i kɛ́ i kíi,

táa i síi siilaa lɔ lɔ́ bɛ́ kwɔ́man,

mɔɔn mín ŋwɛ́ɛn i kíi ní ó kɛ́nan wáati mínnɔn,

o waa a fɔ i yɛ kó:

‹Ndwáanva,

nan i síi ɲɛ́n!›

O wáati ó lɔ,

i yáa kunnanwee nzɔ́ɔ i lɔ́minkɛ ɲɔ́ɔn ŋólu cɛ́man.

11 Tinɲan in né,

ní mɔɔn óo mɔɔn kɛ́ a yɛ́ɛ lɔ́bwoɲan,

ó tíi o yáa i mányii shɔɔ;

wáa ní mɔɔn óo mɔɔn kɛ́ a yɛ́ɛ mányii,

Ala yáa ó tíi ó bwóɲan.»

12 Cɛ mín ndɛ́ wɛ́ɛ Ɛnza ngíi lɔ́min ó mán,

áa fɔ o yɛ kó:

«Ní i kɛ́ sunmanmba lɔ́bhyɛ mɔɔn ólu yɛ,

i kɛ́nan i tɛ́ɛcɛ ólu,

wáman i bhádhye ŋólu,

wáman kabhyaa ŋólu,

wáman i síiɲɔɔn nanfootii ólu kíi.

Kɛ mansɔɔ íi sé kɛ́ i kíi lɔ́min mán kɛ i yɛ́ yúu ó saa.

13 Wáa,

ní i fɛ kɛ sunman dí mɔɔn ólu mán,

ii faannda ŋólu óni séngee ŋólu óni nanmaannin ŋólu óni fyóondɔ ólu kíi.

14 Ní i kɛ o kɛ́,

i yáa lwáau sɔ́ɔ,

kɛ mansɔɔ i táa sé kɛ i yɛ yúu ó saa,

Wáa Ala yáa í saa o dí síin mɔɔn téenin ŋólu kúunno ŋó lá.»

Saanan míin lá lɔ́min ó ka

Matiyu 22.1-10

15 Mɔɔn mínnu tɛ́ɛ ni ale lɔ́min kɛ́ o lá,

olu o kóman ó myɛ́n mínngɛ,

o kée ŋé Ɛnza mánɲaankɛ kó:

«Mɔɔn mínnu káa lɔ́minkɛ Ala yɛ́ mansaya ó lɔ,

nisɔdhyaa é ólu yɛ́!»

16 Ɛnza ŋé a yawi kó:

«Ló nɔ lá cɛ lɔ́ tɛ́wɛɛ sunmanmba lɔ́bhyɛ kɛ́ mɔɔn shɛ́ɛman ngíi.

17 Lɔ́minkɛ wáati óo sé mínngɛ,

aa a yɛ bháalakɛdhye ŋó bhyáashaa kɛ́ táa mɔɔn kíinin ŋólu kíi kó:

‹Aa nan sísan,

sunman ŋó bɛ́ wɛ́ɛ í lɔ́bhyɛ.›

18 Wáa lɔ́min kó óo fɔ́ mɔɔn mínnu yɛ ólu bɛ́ɛ yafaman dɛ́li kée ngée.

Mɔɔn jónan óo fɔ bháalakɛdhye ŋó yɛ kó:

‹Né wɛ́ɛ sɛɛn lɔ́ sá,

né kɛ́ɛ tɛ́ɛ o mánfɛɛ.

Ní i dɛ́lila,

táa fɔ a yɛ kó aa yafa né mán.›

19 Lɔ́gbɛɛ é fɔ a yɛ kó:

‹Né wɛ́ɛ sɛɛnkɛnisi tá nzá,

ní táala bháala kɛ́la ólu la kɛ í mánfɛɛ.

Ní i dɛ́lila,

táa fɔ a yɛ kó aa yafa né mán.›

20 Lɔ́gbɛɛ é fɔ a yɛ kó:

‹Né wɛ́ɛ muso fúu kɛ kwáalenin,

o lé kósɔn né táa sé kɛ́ táa.›

21 Bháalakɛdhye ŋó i kwɔ́sɛɛ kɛ táa o bɛ́ ɲánfɔ a kunndii ó yɛ.

A kunndii ó mwɛ́nnɛn kɛ fɔ a yɛ kó:

‹I lateeya kɛ táa só ó yaman ywáa ólu lɔ,

óni sháaba ólu la,

kɛ́ faannda ŋólu ní nanmaannin ŋólu ní fyóondɔ ólu ní sengee ŋólu kíi kɛ́nan ni íle yánun.›

22 Bháalakɛdhye ŋó fɔ a yɛ kó:

Mantii ó,

‹Íi mín nvɔ́ né wɛ́ɛ ó kɛ,

wáa bhó ŋó mán fá bhá.›

23 Bháalakɛdhye ŋó kunndii ó fɔ a yɛ kó:

‹Bhɔ́ kɛ́ táa sháafɛɛ ŋólu lá óni só ó láfɛ tóo ólu la,

i kɛ́ mɔɔn mínnu sɔ́ɔ yé,

ii kó bɛ́ kɛ ké ii nan,

sáan ɲɛ́n bhó ŋó yáa fá.

24 Ní fɔ́la a yɛ ngó mɔɔn mínnu tɛ́wɛɛ kíi jónan,

ó lɔ táa né yɛ́ lɔ́min ó lɔ lɔ́ɔ.› »

Ɛnza ɲɛ́n kaamɔɔndhye ŋó kákan kɛ kó mínnu kɛ

Matiyu 10.37-38

25 Yaman ó táatɔ ó ni Ɛnza né.

Ɛnza ŋé i ɲán yɛ́ɛman i lɔ,

tó kɛ fɔ i yɛ kó:

26 «Ní mɔɔn óo mɔɔn kɛ́nan né mán,

ní a lɔ́bhɛnin ndɛ́ kɛ i bá a fá lɔ,

óni a wóobhaa lɔ,

óni a muso,

óni a dhyé ŋólu,

óni a bhádhyemannjɛ ólu,

óni a bhádhyemusoman ŋólu,

óni a gbú ní o lɔ,

o tíi ó tɛ́ sé kɛ kɛ́ né yɛ kaamɔɔndhye né.

27 Ní mɔɔn mín mán a yɛ gbáanɲii ó tá kɛ bhyáa né kwɔ́,

o tíi ó tɛ́ sé kɛ kɛ́ né yɛ kaamɔɔndhye né.

28 A cɛ́man ní mɔɔn lɔ é fɛ kɛ sangaso já nɔ,

a yáa i sii ó tún kɛ a lɔsaa ó yacesii kɛ a mánfɛɛ ní a yɛ wɛ́ɛ ó yáa sé kɛ ó bháala ó lábha.

29 Ni ó tɛ́,

ní a kɛ ó sangaso ó zúsii,

ní a man sé kɛ́ a lábha,

mɔɔn mínnu káa ó yé,

ólu yáa yɛ́ɛ bhɔ́ a lɔ,

30 kɛ́ fɔ kó:

‹Cɛ míin ŋwɛ́ɛn bhó nɔ́ ó lámyaan,

wáa a man sé kɛ a lábha.›

31 Ni mansacɛ lɔ kɛ i wíi kó a kɛ́ɛ tɛ́ɛ kɛɛ bé mansacɛ gbɛ́ɛ ka,

aa í síila lé ótun kɛ́ í míli kɛ́ mánfɛɛ ni a yáa sé cɛ wáa mwaa (20.000) ŋó kɛlɛla ní a yɛ cɛ wáa tá (10.000) ŋó lé.

32 Ní a kɛ́ táa yé kó a tɛ́ sé,

aa yáa céla bhyáa kɛ́ táa ɲíin a fɛ kó ii kɛɛ o lábhyaa ké ii ywáaja nɔn.

33 O ɲán ó mán álee cɛ́man ní mɔɔn mín mán i bá a bhóofe ŋólu lɔ o tɛ́ sé kɛ́la né yɛ kaamɔɔndhye né.»

Ní Kɔɔ ó tínminya ó kɛ bhɔ́ a lá

Matiyu 5.13; Maki 9.50

34 «Kɔɔ ó fémɛɛ le lé,

wáa ni kɔɔ ó tínminya ó kɛ́ bhɔ́ a lá,

mínnɛɛn lée sé kɛ́ a tínminya bhée?

35 O sán ó lɔ,

a tɛ́ sé kɛ́la nɔ́ɔn le,

a tɛ́ fósi ɲán lúukolo ó mán.

Aa í láfii lá kɛ́ɛnman le.

Tóo é mín ngún kɛ́ myɛ́nninkɛ,

o á myɛ́nninkɛ.»