Matiyu 11

Ɛnza ŋé wɛɛ í saanan mínngɛ a yɛ kaamɔɔndhye ŋolu lá cé, aa bhɔ́ yénɔn kɛ táa Galile lánga ŋo só ólu lámɔɔn ólu kála, óni kɛ Ala yɛ sanmankanmɛɛ ó láse.

Ɛnza ŋé Yaya kwɔ́kɔɔdhyɛla

Luka 7.18-35

2 Yaya Bátizelikɛbhaa é tó kaso o la kɛ Kílisi o kɛ́wɛɛ ólu kolamyɛn. Oo kɛ́ mínngɛ aa a yɛ kaamɔɔndhye ŋo lɔ́lu bhyáashaa 3 kɛ táa Ɛnza manɲaankɛ kó: «Mɔɔn mín ngákan kɛ́nan, íle lée ó lé a? Wáman án ngákan kɛ́ mɔɔn gbɛ́ɛ lé mankɔɔn?» 4 Ɛnza ŋé i yawi kó: «Álee mín myɛ́nnan, óni álee mín ɲéla, aa táa o lákɛɛ Yaya Bátizelikɛbhaa yɛ́ kó: 5 Fyóondɔ ólu yéli kɛ́la, kuugba ólu táaman kɛ́la, kwáantɔ ólu bɛ́ wɛ́ɛ sɛ́nnɛnya, tóogbee ŋólu myɛnnin kɛ́la, su ólu kúunnan, tó sanmankanmɛɛ ó í lásela faannda ŋólu mán. 6 Mɔɔn mín man í bá ne a lánanya ó lɔ́, o tíi ó yeemanfanin ɲé.»

7 Í táanin ŋó kwɔ́, Ɛnza ŋé lámyaan kɛ́ kóman yaman ó yɛ́ Yaya kó lɔ́ kó: «Ale tɛ́ wɛ́ɛ táa mínnɛɛn lé mánfɛɛ dhyɛ́ ó kɔɔnnɔn? Fwɛ́ɛn ó támuu mín námaanmaan ŋan? 8 Áa táa mínnɛɛn lé yé tɔ́ɔ lɔ wɛ́? Cɛ mánsiinin féndiiya fáanin lɔ́ lá a? Waa mín núu féndiiya fáanin ólu lónan, olu kɛ́la mansabho ŋo léelu lá! 9 Áa táa mínnɛɛn lé yé tɔ́ɔ lɔ wɛ́? Céla a? Tinɲan o lée wé, a yɛ́ɛ a bwó céla le. 10 Yaya lée céla ó lé mín ngó é fɔ Kitabu ó lɔ. Ala é fɔ kó: A mánfɛɛ, né yáa ɲɛ́n céladhye ŋó cé í ɲɛn, a yáa i yɛ́ sháa ó lɔ́bhyɛ 11 Tinɲan in ne ní fɔ́la a yɛ́ ngó, mɔɔn sí mán wóo dínɲan lɔ míin kɛ́ mɔɔnba lé kɛ́ tínmin Yaya Bátizelikɛbhaa ka. Waa sángboo ó Mansaya ó lɔ, mɔɔn mín ŋan lɔ́ɔ í bɛ́ lé, o tíi ó á bwó Yaya lé. 12 Kɛ ta Yaya Bátizelikɛbhaa ta wáati o mán kɛ́nan sé bí mán, sángboo ó Mansaya kó o wɛ́ɛ kɛ́ fáan ko lé le, mɔɔn oo mɔɔn kɛ́ í lɔ́ja, o léelu káa a sɔɔ. 13 Kɛ ta o sán o man kɛ́nan sii Yaya Bátizelikɛbhaa ta wáati o la, Musa yɛ́ sɛ́liya óni céla tɔ́ ó bɛ́ é Ala yɛ́ Mansayako o láse. 14 Ni áa fɛ́ kɛ lá o kó ó la, fɔ́ é kɛ́ kó Eli mín ngáa nan, o lée Yaya le. 15 Tóo kɛ́ kɛ mín ngúnman, ó á myɛnnin kɛ.

16 Ní sé kɛ bímɔɔn ólu lá yɛ́ɛtii mán? I bhɔ́nin ɲé dhyémuu o léelu la ké olu síinin ɲé bháa lɔ kɛ táa fɔ lé ɲɔ́ɔnɲɛn kó: 17 ‹Án ŋwɛ́ɛn búu fɔ́ a yɛ́, wáa a mán a lɔ ngɛ. Án ní í saan kasi kɛ́, wáa a mán kásikɛ!› 18 Kɛ mansɔɔ, Yaya Bátizelikɛbhaa é nan, a tɛ́ tɛ́ lɔ́min kɛ́la, a tɛ́ tɛ́ lɛ́zɛnnji mínnan. I lo ŋé fɔ a man kó: ‹Lámansa yóo ŋé a fɛ́!› 19 Mɔɔn Dhyénjɛ o nan, aa lɔ́min kɛ́la kɛ́ mínnin kɛ́. Ii fɔ́la a man kó: ‹Cɛ miin ŋé lɔ́minkɛbhaa ni dɔlɔtɔ le lé. Nísɔɔnmyaanbhaa ólu ni yuumukɛbhaa ólu táamanɲɔɔn lé lé!› Wáa hákiitiiya ó lɔ́nan a yɛ́ kɛ́wɛɛ ó léelu fɛ́.»

Só mín núu í bá lánanya ó mán

Luka 10.13-15

20 Ɛnza ndɛ́wɛɛ káwananngo shɛ́ɛman ngɛ́ só mínnu la, aa olu yáayii kɛ mansɔɔ o só ólu lábhaa olu mán i yóo ó yɛ́ɛman. Aa fɔ o só ólu mán tá ne kó: 21 «Kunnangboya é íle Sholazɛn ɲɛn! Kunnangboya é íle Bɛtisayida yɛ! Kɛ mansɔɔ káwananngo mínnu é kɛ́ ále fɛ yé, ni o súu tɛ́ɛ kɛ́ Tili óni Sidɔn, o sólabhaa ólu tɛ́ɛnan díminsa, kɛ bhɔɔ ó bhyáa i kannan kɛ́ i síi búulu o lɔ kɛ í yóso ólu yɛ́ɛman kɔ́ɔkɔɔ. 22 O lé kósɔn, tó ní fɔ a yɛ́ ngó kítitɛɛ ló ŋo la, bhóo yáa gban ále la kɛ tínmin Tili ní Sidɔn^a lú ka. 23 Ale Kapɛnamuka ólu, aa kɛ́la á kɔ́ɔnnɔn kó á yɛ só o káa i kɔ́ɔ tá lé kɛ́ sé fɔ sángboo o lɔ a? Fɛ́sɛ fɛ́sɛ o! A káa yíi lé fɔ́ɔ yaananman lɔ, kɛ mansɔɔ káwananngo mínnu wɛ́ɛ kɛ́ a fɛ́ yénɔn, ni o síya tɛ́ɛ kɛ́ Sodɔmu^b, bí tɛ́ɛnan Sodɔmu sɔ́ɔ a siilaa ó lɔ. 24 O lé kósɔn, tó ní fɔ a yɛ́ tinɲan in ne, kítitɛɛ ló ŋo la, bhóo yáa gban í lé lá kɛ tínmin Sodɔmu yamaan ólu ka.»

Laanvyaa o sɔ́ɔɲan o

Luka 10.21-22

25 O wáati o lɔ, Ɛnza ŋé fɔ kó: «ní bálika bhɔ́la i yɛ́ Nvá, sángboo óni lúukolo ó tíi ó, kɛ mansɔɔ, í wɛ́ɛ kó mínnu lóonaankɛ lɔnikɛbhaa ólu ní hákiiman ŋólu mán, í wɛ́ɛ ólu lá gbɛ́ lá dhyémuu ólu yɛ. 26 Nvá í wɛ́ɛ kɛ́ cé kɛ mansɔɔ a wɛ́ɛ dhyáa í yɛ tinɲan in né.

27 Nvá wɛ́ɛ fé ŋó bɛ́ lo móo. Mɔɔn sí mán Dhyénjɛ ó lɔ, fɔ́ Fa ó, mɔɔn sí lo mán Fa ó lɔ fɔ́ Dhyénjɛ ó. Óni Dhyénjɛ ó kɛ́ dyɛn kɛ yáa mínnan.

28 Álee mɔɔn sɛ́ɛbhaatɔ ólu ní mínnu kúnmanlwee ŋan gbii, áa nan né saala ké ní laanvyaa o dí a mán. 29 Áa í kúnnzii né tá fɛ́ɛn ŋo^c kɔɔ ké ní a kála, kɛ mansɔɔ ɲóso swáanyanin ɲe, nó sáwɛɛnin ɲe. A yáa laanvyaa o sɔ́ɔ a yɛ́ɛ yɛ. 30 Né tá fɛ́ɛn ŋo táko o nɔɔnyanin ɲe, ɲɛ́n lwée ŋó ló mán ngbíi.»