Ɛnza ŋé kuugba lɔ́ lákɛɛnyala
2
Tee láman tínminnin ŋó kwɔ,
Ɛnza ŋé í kwɔ́sɛɛ Kapɛnamu.
Mɔɔn ólu myɛ́n mínngɛ kó aa bhónan,
Maki 2.1-12
2 yaman óo nan í fá bhó ŋó kɔ́ɔnnɔn,
óni bhó ŋo lákɔɔ,
yáanin tínminnaa tɛ́ tɛ́ bhée.
A tɛ́ɛ Ala saaninkan ŋo fɔ́la í yɛ.
3 O lée tó í lɔ́,
mɔɔn lɔ́luu í kún nanbhɔ ni kuugbacɛ kéene.
O tɛ́ɛcɛ náannin bhóokɔɔ.
4 Yaman o kósɔn lá o kɔɔ,
i man sháa sɔɔ kɛ táa a yáa Ɛnza nan.
Ii í yɛ́ɛ bhó ŋó kúnnɔn,
kɛ jáan bhɔ́ sánzaa ŋo lá Ɛnza nziilaa o lɔ,
tó kɛ kuugba óni a yɛ láfe ŋo láyii bhó ŋó kɔ́ɔnnɔn Ɛnza ngɛ́ɛnnan.
5 Ɛnza ŋé a yé kó ó mɔɔn ólu wɛɛ lá ale la mínngɛ,
aa fɔ kuugba ó yɛ kó:
«Nyenjɛ,
i yɛ́ yúumu ólu wɛ́ɛ yafa i man!»
6 Sɛliya kaamɔɔn lɔ́lu síininndɛ́ɛ yénɔn,
olu yacesii lú kɛ́ í kɔ́ɔnnɔn kó:
7 «Mínnɛɛn lée cɛ míin lónan kóman súu míin nvɔ́ ó lɔ?
A wɛɛ Ala tɔ́ɔ o cáan.
Yɛ́ɛtii sé kɛ́ mɔɔn ó yɛ́ yúumu ólu yafa á mán ni Ala kée ndɛ́?»
8 Ɛnza ŋé lɔ́gbɛ a yɛ́ɛ fɛ í kɔ́lɔ óyoo o míliya súu oo mɔɔn olu la mínngɛ,
aa fɔ i yɛ kó:
«Mínnɛɛn la aa í milila tá?
9 Kɛ́ a fɔ kuugba ó yɛ́ kó:
‹I yɛ́ yúumu ólu wɛ́ɛ yafa i man,›
wáman kɛ́ fɔ a yɛ́ kó:
‹I wíi kɛ́ i yɛ gbasa ó ta kɛ́ táamankɛ,›
o kóman fyáa ó lɔ́,
a mínnɛɛn lé fɔ a dí?
10 Waa ní í fɛ́ ké aa lɔ kó sé é mɔɔn Dhyénjɛ ó yɛ́ kɛ́ mɔɔn o yɛ́ yúumu ó yafa kɛ́ tó dínɲan lɔ́.»
O lɔ,
aa fɔ kuugba ó yɛ́ kó:
«Ní fɔ́la i yɛ́,
í wíi kɛ́ í yɛ́ gbasa ó tá kɛ́ táa lúman:
11 Íle,
í wíi,
í yɛ́ gbasa ó tá,
íi táa i bhóo lúman!»
12 Bɛ́ ɲánkɔɔ téeman,
cɛ óo í wíi tó kɛ a yɛ́ gbasa ó tá kɛ bhɔ́ kɛ́ɛnman.
Óo i bɛ́ kɔɔnnɔnfii,
i bɛ́ bɛ́ é Ala tando:
«Kɛ fɔ́ko án ndɛ́ mán míin ɲɔ́ɔnɲe bhá.»
Ɛnza ŋé Levi kíila
13 O kó ólu wɛ́ɛnin ŋó kwɔ,
Ɛnza ŋé í kwɔ́sɛɛ Galile bhá lá o la.
Yaman o tɛ́ɛ nánla a saala,
tó a tɛɛ i lákawanan.
Maki 2.13-28
14 Óo bhɔ́ í lá mínngɛ,
a tínminndɔ óo táa nísɔɔnmyaanbhaa lɔ síinin ɲé nísɔɔnmyaanbhaa ólu yɛ́ bháalakɛlaa ó lɔ́.
A tɔ́ɔ kó Levi,
a fa ó tɔ́ɔ kó Alife.
Aa fɔ o yɛ kó:
«Bhyáa ngwɔ́!»
O lɔ Levi é i wíi kɛ í bhyáa a kwɔ.
15 O kwɔ,
Ɛnza ndɛ́ɛ lɔ́min kɛ́ Lévi yɛ́ bhó ŋó lá;
nísɔɔnmyaanbhaa shɛ́ɛman óni yuumutɔ shɛ́ɛman ngbɛɛ lúu nan í síi ni ale ní a yɛ kaamɔɔndhye ŋolu fɛ́;
o mɔɔn súu o léelu tɛ́ɛ sháa a kwɔ́ka.
16 Sɛliya kaamɔɔn mínnu tɛ́ɛ Falizɛn ŋólu tá sɛ́ɛ ó lɔ,
ólu Ɛnza yé lɔ́min kɛla ni o mɔɔn súu ólu lé mínngɛ,
ii fɔ a yɛ kaamɔɔndhye ŋolu yɛ kó:
«Mínnɛɛn lé kósɔn a yɛ kaamɔɔncɛ óni nísɔɔnmyaanbhaa olu ní yuumutɔ olu lɔ́min kɛla kéene?»
17 Ɛnza ŋé o dhyáa ŋó myɛ́n mínngɛ,
aa fɔ i yɛ kó:
«Mɔɔn mínnu kɛ́ɛnyanin ɲé,
ólu manko tɛ́ lɔɔtɔlɔ lá,
yangalotɔ o lé manko é a lá.
Né mán nán mɔɔn téenin ŋólu kíi,
ni nán yúumu tɔ ó lée lú kíi.»
Kaamɔɔndhye ŋolu yɛ́ sunnongo ó
18 Tee kéeman,
Yaya Bátizelikɛbhaa yɛ́ kaamɔɔndhye ŋólu ní Falizɛn ŋólu tɛ́ɛ sún nɔ́n.
Lɔ́luu nan Ɛnza mánɲaankɛ kó:
«Mínnɛɛn lé kósɔn Yaya Bátizelikɛbhaa yɛ́ kaamɔɔndhye ŋolu ní Falizɛn ŋólu yɛ kaamɔɔndhye ŋólu sún nonan tó í tá kaamɔɔndhye ŋolu tɛ́ sún nonan?»
19 Ɛnza é i yawi kó:
«Kwɛ́ɛnkwaa o cɛ ó tɛ́ɛcɛ ólu sé kɛ súnno kɛ́ íle ní kwɛ́ɛnkwaa o cɛ ó tó ɲɔ́ɔn nvɛ́ kwɛ́ɛnbho ŋo la a?
Kwɛ́ɛnkwaa o cɛ ó kɛ́ kɛ́ i bhóoka sán o mínnɔn,
i tɛ́ sé í bánan sunman ŋo lɔ.
20 Waa ló nɔ́ yáa sé,
kwɛ́ɛnkwaa o cɛ ó yáa bwási i lá,
í yáa súnno o ló ŋó la.
21 Mɔɔn sí tɛ́ sé faani kɔɔ ó lábɛɛnan faaninguun ngwáa o la;
kɛ mansɔɔ o faaninguun ŋó yáa fáanin kɔɔ ó ywáa lɔ́ fála tó jáan ó tɔ́ é bwóɲan.
22 Mɔɔn sí tɛ́ lɛ́zɛnnji kwáa ó kɛ́la bhwée kɔɔ ó kɔ́ɔnnɔn.
Ni ó kɛ́ kɛ,
lɛ́zɛnnji ó yáa bhwée ó cé,
tó bɔɔn é kɛ́ lɛ́zɛnnji kwáa óni bhwée ó lɔ́ kéene.
Wáa mɔɔn lɛ́zɛnnji kwáa o kɛ́la bhwée kwáa le kɔɔnnɔn.»
Ɛnza ni lɔnwɛɛnlilo ŋo
23 Lɔnwɛɛnlilo nɔ́ la,
Ɛnza ní a yɛ́ kaamɔɔndhye ŋólu tɛ́ɛ tínminnan bélefyɛ ólu kɔɔnnɔn.
Kɛ́ í tó táalaa a yɛ́ kaamɔɔndhye ŋólu béle tínnza ŋo lɔ́lu bhɔ́.
24 Falizɛn ŋólu a mánɲaankɛ kó:
«A mánfɛɛ nín,
kó mín mánngan kɛ kɛ́ lɔnwɛɛnlilo ŋó lá,
mínnɛɛn le lá i yɛ́ kaamɔɔndhye ŋólu o kɛ́la?»
25 Ɛnza ŋé í yawi kó:
«Laula é kó mín ngɛ a mán o ywáa ó kála má ŋan?
Kɔ́ɔn ó ale ní a táamanɲɔɔn ólu myáan mínngɛ ké súnman nzí tɛ́ í bhóo.
26 Abiyata tɛ́ɛ faanlɛɛɲansebhaa olu kúnndiiba lé wáati mínnɔn,
aa lo ɲán min mán Ala yɛ́ bhó ŋo kɔɔnnɔn,
faanlɛɛbulu mínnu síininndɛ́ɛ yénɔn kɛ ólu lɔɔ tó kɛ́ a lɔ dí a táamanɲɔɔn ólu mán.
Kɛ́ɛke mɔɔn gbɛ́ɛ tɛ́ mánngan kɛ́ o búlu ólu lɔɔ fɔ́ faanlɛɛɲansebhaa ólu.»