MAKI
é sanmankanmɛɛ mín nzɛ́wɛ
Ɛnza Ngílisi kó ó lɔ́
Yaya Bátizelikɛbhaa yɛ lakawaninkan ŋo
1
Sanmankanmɛɛ mín ŋé Ɛnza Ngílisi kofɔla,
Ala dhyénjɛ o,
oo í lámyaanla tá ne.
Maki 1.1-13
«Né Ala yáa ɲɛ́n céladhye ŋó cé í ɲɛn,
Kɛ i yɛ́ sháa ó lɔ́bhyɛ.
3 Mɔɔn lɔ́ é gbáanan dhyɛ́ ó lɔ kó:
‹Áa Mantii ó yɛ́ sháa ó lálaa,
áa a tínminnaa ólu látee.› »
4 Yaya Bátizelikɛbhaa é a yɛ́ɛ yáa dhyɛ́ o lɔ o bhóo ó lé mán.
A tɛɛ a lásela mɔɔn ólu mán kó íi díminsa kɛ́ fala í yɛ́ kóyoo ŋólu la kɛ́ bátize ké í yɛ́ yúumu ólu a yafa i mán.
5 Zude mála o mɔɔn olu bɛ́,
óni Yeluzalɛmuka ólu tɛ́ɛ nánla a saala.
I tɛɛ í lálabhɔ la í yɛ́ yúumu olu mán bɛ́ ɲankɔɔ lé,
tó Yaya tɛ́ɛ i bátize bhá ó lɔ,
mín ndɔ́ɔ kó Zuludɛn.
6 Deeke mín ndɛ́ɛ Yaya kannan,
o lálaanin ndɛ́ɛ ɲɔ́ɔnmɛɛnshe le la,
a yɛ cɛ́siiyaa o tɛ́ɛ gboo lé le.
A tɛɛ a yɛ́ɛ bhálola gɔ́tiba ó léelu la,
óni wówoninnduu o.
7 A tɛɛ a lásela yaman o mán kó:
«Mín ngáa nan né kwɔ,
ó yɛ́ sébhaaya o á bwó né tá ó lé.
Né mánngan kɛ́ manyii kɛ́ a yɛ́ sawaa o yúu ó fwée.
8 Née a bátize jí lé lɔ,
wáa ale káa a bátize Ala Ní Sɛnnɛnyanin ŋó lé la.»
Ɛnza ɲɛn bátizeliko óni a yɛ lɔswaannin o
9 O wáati o lɔ,
Ɛnza ŋé nan kɛ bhɔ́ Galile só lɔ la,
mín ndɔ́ɔ kó Nazalɛti.
Tó Yaya é a bátize Zuludɛn o lɔ.
10 A tɛ́ɛ bhɔ́la jí ó lɔ́ wáati o mínnɔn,
aa sángboo o yé í lákala,
tó kɛ Ala Ní Sɛnnɛnyanin ŋó yé yíila a ka ŋóyoo biininngbɛ.
11 Kómankan nɔ é bhɔ́ sá ŋó lɔ kɛ fɔ kó:
«Íle lée nyenjɛ óle,
mín ŋan dí ɲɛn koyoongɛ.
Íle lée né tá nisɔdhyaa o le.»
12 Oo kɛ́ tɛ́nmɛn,
Ala Ní Sɛnnɛnyanin ŋóo a látaa dhyɛ́ o ka.
13 Aa tee bínaannin le kɛ́ dhyɛ́ o ka,
ké Sɔtaannan é a lɔ́swaannan.
A tɛ́ɛ a yɛ dínɲanlɔtɛɛ ó kɛ́la bínnɔnsoo ó léelu cɛ́man.
Malɛɛka olu tɛ́ɛ gbáamyaanla a lá.
Ɛnza ɲɛn kaamɔɔndhye njónan ólu
14 Yaya bhyáanin ŋó kwɔ́ kasola,
Ɛnza ŋé táa Ala yɛ sanmankanmɛɛ ó láse Galile mála o lɔ.
Maki 1.14-45
15 A tɛɛ fɔ́la kó:
«Wáati mín ŋé sii,
o wáati o wɛ́ɛ sé.
Ala yɛ́ Mansaya ó wɛ́ɛ í mángbaa án nan.
Áa a yóo ólu yɛ́ɛman,
áa sɔ́n sanmankanmɛɛ ó mán.»
16 A tínminndɔ o lé Galile bhá lá o la,
aa yɔfiibhaa fyáa yé,
Simɔn ní a lɔɔcɛ Andele.
I tɛ́ɛ yɔ́ɔ myáan bhá ó lɔ.
17 Ɛnza é fɔ i yɛ kó:
«Áa bhyáa ngwɔ́,
ɲáan a kɛ́ mɔɔn ɲíinmaa lu le ké áa i lanan né mán.»
18 O ywáaninngee ŋo lɔ ii í kwɔ́ kɛ́ i yɛ yɔ ólu lá téeman kɛ bhyáa Ɛnza ngwɔ.
19 Ɛnza ŋé í cɛ́bhɔ o ywáa ó lá mínngɛ dɔ́ɔnin,
aa Zebede dhyénjɛ fyáa ó yé,
Zaki óni a lɔɔcɛ Yaya.
I tɛɛ i yɛ yɔ ólu lɔ́bhyɛnan kúun ŋó kɔ́ɔnnɔn.
20 O lée kɛ i kíi ó lé Ɛnza ngwɔ,
o ywáaninngee ŋó lɔ.
Ii í kwɔ́ kɛ́ i facɛ Zebede óni bháalakɛdhye ŋolu lá kúun ŋó kɔ́ɔnnɔn,
tó kɛ í bhyáa Ɛnza ngwɔ́ka.
Ɛnza ŋé lámansayoo ngbɛnan cɛ lɔ́ fɛ́
21 Ɛnza ni a yɛ kaamɔɔndhye ŋólu táa só lɔ́la mín ndɔ́ɔ kó Kapɛnamu.
Lɔnwɛɛnlilo ŋo la,
aa lo sɛ́ɛbho ŋo kɔ́ɔnnɔn,
tó kɛ lakawanin kɛ.
22 Ii káwakoya a yɛ́ mɔɔn kalanzeɲan ó kósɔn,
kɛ mansɔɔ a tɛ́ɛ lakawanin kɛla óyoo fáan é mɔɔn mín móo,
wáa a tɛ tɛ́ a kɛ́la óyoo sɛliya kaamɔɔn olu.
23 Aa tó mɔɔn ólu kalanan í yɛ́ sɛ́ɛbho ŋo kɔ́ɔnnɔn,
tó cɛ lámansayoondɔ lɔ́ é í wíi kɛ gbáa,
tó kɛ fɔ kó:
24 «Ee!
Ɛnza Nazalɛtika,
Mínnɛɛn lée né ní i lé cɛ?
I wɛ́ɛ nan kɛ́ án hálaki a?
Ii mɔɔn mín né,
ní ó lɔ.
Ile lée Ala yɛ́ céladhye nzɛ́nnɛnyanin ŋó lé.»
25 Ɛnza ŋé jáman a kunnan kɛ́ fɔ a yɛ kó:
«I lúmandhye!
Bhɔ́ cɛ míin nɔ́n!»
26 Lámansayoo ŋóo cɛ o lámaanmaan o le lɔ,
tó kɛ bhɔ́ a fɛ́ ni gbáa ne.
27 O lée mɔɔn bɛ́ kɔɔnnɔnfii,
fɔ́ ii ɲɔ́ɔn mánɲaankɛla kó:
«Ɛ́ɛ,
aa fɔ́la míin mán díi?
Kaangwaa lée nín nɛ́,
aa a kɛ́la ni sébhaaya le lé!
Aa nɔn lála lámansayoo nú bɛ́ ka,
a kɛ mín nvɔ i yɛ,
ii o kɛ.»
28 O ywáaninngee ŋo lɔ,
Ɛnza ndɔ́ɔ óo búubhɛɛ Galile mála o kɔ́ɔnnɔn ywáa ó bɛ́ lɔ.
Ɛnza ŋé yangalotɔ shɛ́ɛman nakɛɛnyala
29 Ɛnza ni Zaki óni Yaya lúu bhɔ́ sɛ́ɛbho ŋo lá tɛ́nmɛn,
ii táa Simɔn ní Andele bhóo lúman.
30 Simɔn bhyáamuso o lánin ndɛ́ɛ fásigban lɔ́ gbála ŋo ka.
Ɛnza nuu nan tɛ́nmɛn,
ii muso o kofɔ a yɛ.
31 Aa í mángbaa yangalotɔ o la,
kɛ a myaan a bhóo ó mán,
tó kɛ a láwii.
O lée kɛ́ fásigban o bhɔ́ o lé muso o fási o lɔ.
Muso óo gbáamyaan í lá.
32 Ywáa oo sé mínngɛ,
teekun ŋóo bénin ngwɔ́,
mɔɔn olu nan yangalotɔ olu ní lámansayoondɔ ólu lé a saala.
33 Só mɔɔn olu bɛ́ ládhyɛnin ndɛ́ɛ bhó ŋo lákɔɔ.
34 Ɛnza ŋé yangalotɔ shɛ́ɛman nákɛɛnya,
óni aa lámansayoo ngbɛ́ mɔɔn shɛ́ɛman nvɛ́.
A tɛ́ tɛ́ lámansayoo ŋólu tóla yénɔn ké ii kóman,
kɛ mansɔɔ olu tɛ́ɛ a lɔ.
Ɛnza ŋé Galile yamaanlɔ mɔɔn olu lákawaninla
35 Fáyidiwi ó mán,
Ɛnza ŋé bhɔ́ kɛ́ táa ywáamanfanin nɔ́ lɔ́,
kɛ í sɛ́ɛ.
36 Simɔn ní a táamanɲɔɔn ólu táa a ɲíin.
37 Ii a yé mínngɛ,
ii fɔ a yɛ kó:
«Mɔɔn olu bɛ́ɛ í ɲíinan.»
38 Aa i yawi kó:
«Án ndáa ywáa gbɛ́ɛ lɔ án namiinnzo olu la ké ndáa sanmankanmɛɛ ó láse yénɔn,
kɛ mansɔɔ né nankun ŋó lée wé.»
39 O lée kɛ́ a táa ó lé Galile yamaan o ywáa bɛ́ lɔ.
A tɛɛ lakawanin kɛla í yɛ́ sɛ́ɛbho ŋólu kɔ́ɔnnɔn,
óni kɛ lámansayoo ŋólu gbɛ́.
Ɛnza ŋé kwáantɔ lɔ́ lákɛɛnyala
40 Tee lɔ́ mán,
kwáantɔ lɔ́ é nan í kúnmɛɛn nɔkɛɛ Ɛnza ngɛɛnnan kɛ a dɛ́li,
kɛ fɔ a yɛ kó:
«Ni i kɛ́ sɔ́n,
ii sé kɛ́ né kɛ́ɛnya.»
41 A mánɲwaan lo ngóyoo ŋó mán Ɛnza nɔn,
aa í bhóo láwii kɛ í bhóo túu a lá,
tó kɛ fɔ a yɛ kó:
«Ŋwɛ́ɛn sɔ́n,
kɛ́ɛnya!»
42 Í kɔ́lɔ téeman,
kwáan óo bhɔ́ cɛ ó fási o lɔ́,
aa sɛ́nnɛnya.
43 Aa fɔ cɛ o yɛ kɛ́ a mangbɛya,
tó kɛ a lakwɔsɛɛ í kɔ́lɔ kó:
44 «Í kɛ́nan fɔ mɔɔn sí yɛ́ kó né lée í lakɛ́ɛnya lɛ.
Waa táa i yɛ́ɛ yáa faanlɛɛɲansebhaa ó lá.
Musa é faanlɛɛ mín ngófɔ sɛ́nnɛnyali ó ta fa nvɛ́,
ii ó bhɔ́ kɛ́ a yáa mɔɔn ólu lá kó i wɛ́ɛ kɛ́ɛnya.»
45 Ó cɛ o mán sé í lúmandhyela o kó ó mán.
Aa táa o kó ó búubhɛɛ ywáa bɛ́ lɔ.
O lé yɛ́ɛ kósɔn,
Ɛnza ndɛ́ tɛ́ sháa lónan só lɔ́ látee lɔ́ bhée.
A tɛ́ɛ tóla só ólu kwɔ́ka né,
waa mɔɔn ólu tɛ́ɛ bhɔ́la lé fán ŋo bɛ́ kɛ́nan a saala.