Sɔtaannan é Ɛnza nɔ́swaannan kɛ́ kwee
4
Ɛnza nvánin ndɛ́ɛ Ní Sɛnnɛnyanin ŋó lá.
Aa bhɔ́ Zuludɛn bháji lá ó lá kɛ́ táa dhyɛ́ o lɔ́.
Ní Sɛnnɛnyanin ŋóo táa a lé.
2 Sɔtaannan é a lɔ́swaan tée bínaannin kɔ́ɔnnɔn.
A mán lɔ́min sí kɛ́ ó tée bínaannin ó kɔ́ɔnnɔn.
O ló ŋólu tínminnin ngwɔ́,
kɔ́ɔn é a myaan.
3 O wáati ó lɔ,
Sɔtaannan é fɔ a yɛ́ kó:
«Ní i Ala dhyénjɛ lé,
a fɔ kó káwaguun míin ŋan yɛ́ɛman kɛ o kɛ́ búlu lé.»
4 Ɛnza ŋé a yawi kó:
«A sɛ́wɛnin ɲé Ala yɛ kitabu o lɔ kó:
Mɔɔn tɛ́ bhálola lɔ́minfe ngbɛ́ɛgbɛɛ la.»
5 O kwɔ́,
Sɔtaannan é táa nín ale tii já nɔ́ ka kɛ́ lúukolo ó mansaya o bɛ́ yáa a lá ywáaninngee nɔn,
6 kɛ́ fɔ a yɛ́ kó:
«Né yáa míin bɛ́ kunndiiya óni a nanfootiiya ó di i mán.
Ni née fɛ́ kɛ́ a di mɔɔn mín mán,
née dila o tíi o le mán,
kɛ mansɔɔ a bɛ́ é né tá lé lé.
7 O lɔ,
ní ile kwɛ́nnin ngɛ i kúnmɛɛn nɔ́kɛɛ né kɔ́ɔ kɛ́ né bháto,
a bɛ́ yáa kɛ́ i tá lé.»
8 Ɛnza ŋé a yawi kó:
«A sɛwɛnin ŋe Ala yɛ́ Kitabu o lɔ kó:
I mányii i yɛ́ Mantii o i yɛ́ Ala ó kée né yɛ́,
kɛ́ ale kéengboto le bháto.»
9 Alabha ŋó,
Sɔtaannan é táa ni a le Yeluzalɛmu,
kɛ alalɔ Ala bhatobhomba ó kúnnɔn,
kɛ́ fɔ a yɛ́ kó:
«Ni í Ala dhyénjɛ lé,
í gbán kɛ́ í bhyáa lúuman,
10 kɛ mansɔɔ a fɔnin ɲé Ala saaninkan ŋó lɔ kó:
A yáa cé dí a yɛ́ malɛɛka ólu mán i kósɔn,
kó íi i yáakiito i lɔ.
11 Aa fɔ yé kó:
I yáa i tá i bhóo ó lɔ́,
ké i se ngɛ́nan gbasi káwaguun nɔ́ la.»
12 Ɛnza ŋé a yawi kó:
«A fɔnin ɲé Ala yɛ́ Kitabu ó lɔ́ kó:
‹Í kɛ́nan Mantii o,
í yɛ́ Ala o lɔ́swaan.› »
13 Sɔtaannan é a lɔ́swaan ɲán ó bɛ́ mán kɛ́ kwée wáati mín nɔ́n,
aa táa kɛ́ a tó yé ŋótun.
Ɛnza ŋé a yɛ́ bháala o lámyaanla Galile
14 Ɛnza nvánin ŋó Ní Sɛnnɛnyanin ŋó yɛ́ sébhaaya ó lá áa í kwɔ́sɛɛ kɛ́ táa Galile mala ó lɔ́.
A tɔ́ɔ é bhɔ́ o mala o ywáa ó bɛ́ lɔ́.
15 A tɛ́ɛ mɔɔn ólu kalanan ólu yɛ́ sɛ́ɛbho ólu kɔ́ɔnnɔn,
mɔɔn ólu bɛ́ tɛ́ɛ a tɔ́ɔɲwaan fɔ́la.
Ɛnza ɲɛ́n sómɔɔn ólu mán lá a lá
16 Ɛnza ŋé táa Nazalɛti aa i lámwɔn só mín nán.
Lɔnwɛɛnlilo ó lá,
aa lo sɛ́ɛbho ó lá óyoo a tɛ́ɛ a kɛ́la ɲán mín mán.
Aa i wíi kɛ́ kitabu ó kála.
17 Céla Ezayi é kitabu mín nzɛ́wɛ,
oo dí a mán.
Aa a lalaka kɛ́ a ywáa lɔ́ fɔ.
A sɛ́wɛnin ŋe yé kó:
18 «Mantii ó yɛ́ Ní ó né fɛ́,
kɛ mansɔɔ a wɛ́ɛ né múun kɛ sanmankanmɛɛ ó fɔ faannda ŋólu yɛ.
Aa né cé kó ní a fɔ yɔ ŋólu yɛ́ kó i yáa hɔ́lɔɲan,
kó ní a fɔ fyóondɔ ólu yɛ́ kó i ɲán ó yáa i láka,
kó ní mɔɔntɔlɔnin ŋólu bhɔ́ i yúu ólu bhóo kɛ́ i bhyáa.
19 Mantii ó káa a yɛ́ kóɲwaan ó kɛ́ sán mín nán,
kó ní ó fɔ mɔɔn ólu yɛ́.»
20 O kwɔ́,
Ɛnza ŋé kitabu ó látuun kɛ́ a di sɛ́ɛbho ŋó kunnansiibhaa ó mán kɛ́ i síi.
Mɔɔn mínnu tɛ́ɛ yé,
ólu bɛ́ é í ɲán gbáan a lɔ́.
21 O sán ó lɔ́,
aa kóman ó tá kɛ́ fɔ i yɛ́ kó:
«A wɛ́ɛ Kitabu míin ngɔ́ɔnnɔnkoman mínnu myɛ́n nín,
o kó ólu wɛ́ɛ í lafa bí.»
22 I bɛ́ tɛ́ɛ a tɔ́ɔɲwaan fɔ́la.
Ɛnza ɲɛn kómanbhɛɛ o i bɛ́ káwakoya,
fɔ i tɛ́ɛ fɔ́la kó:
«Bháa míin ndɛ́ Yusufu dhyénjɛ o lé a?»
23 Ɛnza ŋé fɔ i yɛ́ kó:
«Síka tɛ́ lɔ́,
a yáa saanan míin ná né yɛ́ kó:
‹Bhwɛ́ɛkɛbhaa,
i yɛ́ɛ kɛ́ɛnya.›
A yáa fɔ né yɛ́ kó:
‹I wɛ́ɛ kó mínnu kɛ Kapɛnamu,
án ŋwɛ́ɛn ó myɛ́n,
ii ó ɲɔ́ɔnnzilu kɛ́ yánun i gbú yɛ́ só ó la.› »
24 «Tinɲan in ne ní fɔ́la a yɛ́ ngó,
céla sí tɛ́ myaanla cɛ́ɛne a gbú yɛ́ só ó la.»
25 O kwɔ́,
aa fɔ i yɛ́ kó:
«Tinɲan in ne,
ní fɔ́la a yɛ́ ngó,
céla Eli yɛ́ tée ó lɔ́,
sánɲin ó í bá kɛ́nan sá nzawa ni tɔ́ kɔɔnnɔn,
kɔ́ɔnba é lo yamaan ó ywáa ó bɛ́ lɔ́.
Finɲanmuso shɛ́ɛman ndɛ́ɛ Izalayɛli yamaan ó lɔ́.
26 Waa Ala mán céla Eli cé i sí mán.
Aa a cé finɲanmuso lɔ́ lé mán Salɛputa,
Sidɔn mala ó lɔ́.
27 Céla Elize tá tée ó lɔ́ kwáantɔ shɛ́ɛman ndɛ́ɛ Izalayɛli,
waa i si mán kɛ́ɛnya,
fɔ Naman kɛ́ bhɔ́ Sili yamaan ó lɔ́.»
28 Sɛ́ɛbho ŋó kɔɔnnɔn mɔɔn ólu ó kóman ólu myɛ́n mínngɛ,
íi mwɛ́nnɛn koyoongɛ.
29 Ii i wíi kɛ́ Ɛnza myaan kɛ́ bhɔ́ ní ále só ó kɔɔnnɔn ni fáan lé.
I yɛ́ só ó síininndɛ́ɛ tii mín ndɔ́ɔfɛ,
íi táa ní ále o kúnnɔn.
I tɛ́ɛ fɛ́ kɛ́ í síi á man kɛ́ a lá bé lúuman.
30 Waa Ɛnza ŋé tínmin i cɛ́man kɛ́ táa.
Ɛnza ŋé Lámansatɔ lɔ́ kɛ́nnɛnyala
31 Ɛnza ŋé táa Galile mála ó só lɔ́ lá,
mín ndɔ́ɔ kó Kapɛnamu.
A tɛ́ɛ mɔɔn ólu kalanan lɔnwɛɛnlilo ó lá yé.
32 Ii káwakoya a yɛ́ mɔɔn kalanzeɲan ó lá,
kɛ mansɔɔ a tɛ́ɛ kóman lá óyoo sébhaaya é mɔɔn mín móo.
33 Cɛ nɔ́ɔnnin nɔ tɛ́ɛ ni ile sɛ́ɛbho ŋó kɔ́ɔnnɔn Lámansayoo ndɛ́ɛ o fɛ́.
O cɛ ó gbáa koyoongɛ kó:
34 «Ée!
Ɛnza Nazalɛtika,
mínnɛɛn lée né ní i lé cɛ?
I wɛ́ɛ nan kɛ́ án hálaki a?
Ii mɔɔn mín né,
ní ó lɔ.
Ile lée Ala yɛ́ céladhye nzɛ́nnɛnyanin ŋó lé.»
35 Ɛnza ŋé yaman a kunnan kɛ́ fɔ a yɛ kó:
«A jalɔ!
Bhɔ́ cɛ míin nvɛ́.»
Lámansa oo cɛ ó tá kɛ́ a bé lúuman i cɛ́man kɛ́ bhɔ́ a fɛ́.
Waa fósi mán kɛ́ cɛ ó lá.
36 Mɔɔn bɛ́ é káwakoya fɔ í tɛ́ɛ ɲɔ́ɔn mánɲaankɛla kó:
«Ɛ́ɛ,
kóman súu mínnɛɛn lée nin?
Aa kóman lámansayoo ŋólu fɛ́ ní fáan ní sébhaaya lé.
Ii bhɔ́la mɔɔn ólu fɛ́.»
37 O sɔ́ɔbu ó fɛ́,
Ɛnza ndɔ́ɔ é búubɛɛ ó mala o ywáa ó bɛ́ lɔ.
Ɛnza ŋé yaangalotɔ shɛ́ɛman ngɛ́nnɛnyala
38 Ɛnza ŋé bhɔ́ sɛ́ɛbho ó kɔ́ɔnnɔn kɛ́ táa Simɔn yɛ́ bhó ŋó la.
Simɔn bhyáamuso tɔ́lɔnin ndɛ́ɛ fásigban ó bhóo koyoongɛ.
Ii Ɛnza ndɛ́li kó aa a kɛ́ɛnya.
39 Ɛnza ŋé táa i bíin a kunnan kɛ fɔ kó fásigban o bhɔ́.
Fásigban óo wɛɛ.
Aa i wíi ó ywáanin ngée ŋó lɔ kɛ bháalakɛ i yɛ.
40 Teekun ŋó bénin ngwɔ́,
mɔɔn ólu táa Ɛnza nzaala ní yaangalotɔ bɛ́suu lé.
Aa í bhóola i bɛ́ kée ngéenan ka kɛ́ i lákɛɛnya.
41 Lámansa ólu tɛ́ɛ bhɔ́la mɔɔn shɛ́ɛman nvɛ́.
I bhɔ́tɔ ó,
i tɛ́ɛ gbáanan kó:
«Ii Ala dhyénjɛ le lé.»
Wáa Ɛnza ŋé í táan fɔ́ i yɛ.
A tɛ́ tɛ́ sɔ́nnan ko ii kóman,
kɛ mansɔɔ ólu tɛ́ɛ lɔ ŋóo Ala yɛ́ Kílisi lɔtɔnmɔnnin ŋó lée wé.
Ɛnza nankun ŋó
42 Kɛ́ɛn óo bhɔ́ mínngɛ,
Ɛnza ŋé bhɔ́ kɛ́ táa ywáamanfanin nɔ́ lɔ́.
Yaman óo lámyaan kɛ́ a ywáa ɲíin.
Ii táa a yé mínngɛ,
ii a dɛ́li kó aa tó i tɔ́ɔfɛ,
kó a kɛ́nan táa ywáayanɔn.
43 Wáa aa fɔ i yɛ kó:
«Né kákan né kɛ́ Ala yɛ́ mansaya ó sanmankanmɛɛ ó fɔ só tɔ ólu la,
kɛ mansɔɔ njé kún ŋó lée wé.»
44 O lɔ,
a tɛ́ɛ lakawanin o kɛ́la sɛ́ɛbho ólu kɔ́ɔnnɔn Zude mala ó lɔ́.