Raja Nebukadnezar mangtindo ngkita barana' matande
4:1–18
4
Iamo tee sura'na Raja Nebukadnezar to dikiring lako sininna bangsa, rapu tau na basa lan lino. Nauki' raja susi tee, “Salama' lako kamu', dennaa upa' miampa' buda barakka'. 2 Masannangna' la mpangpeissenan tanda mejangngaran to Napajaji Allataala Tomala'bih lako kaleku'. 3 Liwa' mala'bih to tanda mejangngaran Napugauk. Ia to kaparentan-Na, mangpapa'-papa' te'da anggena.4 Ia tee aku' Nebukadnezar, masannangmo' na melo katuoanku' torro lan istana. 5 Arannai den sangbongi tongkumamma' mangtindona', na gaja laja'na' joo tindoku'. Tangnapurapa' penawangku', sanga ia joo pengkita lan tindoku'. 6 Iamo joo kupasun parenta lako sininna tomacca lan tana Babel naratu mangngolo lako aku' dikua napauanna' battuananna joo tindoku'. 7 Ratu ngasanmi to topaissen-issen, tomangbaca-baca, tomacca mbattuananni apa jaji jao langi' sola topakita-kita kucuritanni lako joo tindoku', apa te'da tonnissenni battuananna.
8 Sanggenna mangngolo lako aku' to tonabarakka'i sininna dewata, iamo Daniel to mpusangai sanganna sala mesa'na dewatangku' disanga Beltsazar, namane' kucuritanni lako joo tindoku' kukua, 9 ‘Ee Beltsazar, ikomo to ngkapalai sininna topaissen jio tana Babel! Kuissen kumua gaja liwa'ko nabarakka'i dewata, arannai muissen ngasan iko to apa tangkaissenan lako tau. Pesa'dingngii tee tindoku' mubattuanannii. 10 Ia tongkuleppeng, mangtindona', na lan tindoku', kukitai to barana' gaja liwa' tande tuo lan tangngana lino. 11 Ia joo barana', memmatonggo na memmawatang, na ia to tandena ratu de' langi', wa'ding dikita la umbo-umbo dinii. 12 Gaja ballo to daunna, na liwa' buda buanna. Nawa'ding nakande sininna tau sola olok-olok to buanna joo barana'. Nanii too mentiongan olok-olok masia' na ia to tangkena nanii membuja manuk-manuk.
13 Kumane' ngkitai lan tindoku', den mesa' malaeka' pangjaga mellao jao mai langi'. 14 Napeandongngi gamaranna nakua, “Ta'bangngi joo barana' sola petangkei tooi. Rondo'i nasisamboran to daunna nasipolloran to buanna! Ake'mo namalai to olok-olok mentiongan jiong garonto'na joo barana' na simentiasan to manuk-manuk jio mai tangkena. 15 Apa ajanni lan litak to garonto' sola waka'na, la'ka'i rante bassi sola tambaga jio tangnga reu. Ake'mo nabosokkii ambun jao mai langi' nangkande reu sola olok-olok. 16 Na ake'mo na tibalik to penawa taunna na mangpenawa olok-olok. Susimo joo dipugauk lako kalena ratu lako pitung taun. 17 Ia tee pepasan ba'tu kara'tasan kupau situru' to napattantu malaeka'-Na Allataala, dikua naissen ngasanni tolino kumua ia to Allataala Tomala'bih ngkuasai kadatuanna tolino. Mpangbengan kadatuan lako tau to Nakabudai, moi na lako tobiccu'.”’
18 Ia tee aku' Raja Nebukadnezar mpatarruhna' kadangku' kukua, ‘Ee Beltsazar, susimi joo to tindoku'. La mupauanna' battuananna, saba' sininna tomacca lan kaparentanku' te'da nnissenni battuananna, apa ikomo to maka la mpauanna', sanga nabarakka'iko dewata.’
Daniel mbattuananni tindona raja
4:19–37
19 Takkajanna'i na malaja' Daniel to disanga too Beltsazar. Apa ia tee aku' raja mangkada omo' kukua, ‘Beltsazar, danggi' mupuselangngi joo tindo sola battuananna!’ Mebalii Beltsazar nakua, ‘Iye' kita' puang, ma'namo na ewalinta' la natula to apa jaji lan tindota', danggi'mo na kita'! 20 Nasaba' kita'mo dipasangrapang joo barana' takita, to memmatonggo na memmawatang arannai ratu de' langi' tandena, wa'ding dikita umbo-umbo dinii, 21 to gaja ballo daunna, na liwa' buda buanna, nakande sininna tau sola olok-olok to buanna joo barana', nakenden to olok-olok masia' jiong garonto'na sola messerang to manuk-manuk jao tangkena. 22 Oo puang, kita'mo dipasangrapang joo barana', to samatonggo-tonggona na mawatang ratu de' langi'. Susimi joo kamalabiranta' sakerangngan-rangnganna na kakuasanta' ratu lako lili'na lino. 23 Takita tooi to mesa' pangjaga, iamo malaeka'-Na Allataala, mellao jao mai langi', to mangkada nakua, “Ta'bangngi tee barana' na danggi'mo natuo, apa ajanni lan litak to garonto' sola waka'na, la'ka'i rante bassi sola tembaga jio tangnga reu. Ake'mo nabosokkii ambun jao mai langi' natuo sola olok-olok pitung taun masainna.”
24 Iye', iamo tee battuananna, susimo joo to Napattantumo Allataala Tomala'bih lako kaleta': 25 La diula'iki' jio mai tangngana tobuda, tamale tuo sola olok-olok masia'. Pitung taun masainta' la ngkande reu susi sapin, nabosokki bangki' ambun jao mai langi'. Mangkai joo too, mane'ri la taakui kumua ia to Allataala Tomala'bih ngkuasai kadatuanna tolino. Nampangbengan kuasa lako inda to nakadoangngi la mangparenta. 26 Na ia to parentana malaeka' kumua ajan bangmi lan litak to garonto' sola waka'na battuananna: La mangparenta pole'ki' ke mangkai taakui kumua nang Allataala jao suruga Tomakuasa. 27 Iye', dennaa upa' na ia tee pangpakainga'ku' tapesa'dingngi, danggi'mo tapugauk kasalan, apa mpugaukki' kameloan. Pemambelaii kaleta' jio mai dosa antakamaseii to tomaparri'. Ia ke susimiki' joo, kamasannanganta' la dipatarruh.’
28 Battuananna joo tindoku', jaji ngasanmo lako kaleku'. 29 Nasaba' ia tonna sangtaunmo, den wattu kulumingka-mingka jio bola raja Babel lata' jaona liu, 30 mangkadana' kukua, ‘Liwa' matonggo tee Babel to mangkamo kupupenjaji kota nanii torro raja, mpangpekitan kamawatangan, kamakuasan, kadianggasan sola kamala'biranku'.’ 31 Te'dapa kumangka mangkada, nadenmo gamara mangkada jao mai langi' nakua, ‘Ee Raja Nebukadnezar, pesa'dingngii tee kadang-Ku', to kumua ia to kakuasanmu mangparenta la dialaimoko. 32 La diula'iki' jio mai tangngana tau, tamale tuo sola olok-olok masia'. Na reu la mukande susi sapin. La susiko joo pitung taun masainna, arannai muakui kumua ia to Allataala Tomala'bih ngkuasai kadatuanna tolino. Nampangbengan kuasa lako inda to Nakadoangngi la mangparenta.’ 33 Ia joo wattu ta'pa jaji tongan lako kaleku' joo apa dipau. Diula'ina' jio mai tangngana tau, kukande reu susi sapin. Ia to batang kaleku' nabosokki ambun jao mai langi' arannai memmalando to beluakku' susi bulu langkan na susi kanuku manuk-manuk to kanukungku'.
34 Apa ia tonna ganna'mo pitung taun, ia tee aku' Nebukadnezar, mentingngarana' de' langi', na pole pole' to pangngingaranku'. Ta'pa kupujii, kupakala'bihhi kusompai Allataala Tomala'bih, to tuo te'da anggena. Kupakala'bihhi, nasaba' ia to kamakuasan-Na sola kaparentan-Na te'da anggena. 35 Sininna tolino te'da bua'na. Ia to malaeka' jao suruga sola tolino Nakuasai ngasan Allataala. Te'da tau ngkullei nnewai to pakkaeloran-Na ba'tu mekutana, ‘Apara Tapugauk?’ 36 Ia tonna pole pole'mo pangngingaranku', diben pole'mo' kamala'biran sola kamakuasanku' to la napumala'bih kadatuanku'. Natammui pole'mo' to tomangpakainga'ku' sola tomapangka' na kudipapole lako kamangparentanku', na ia joo kamangparentanku' la'bih makuasa na ia to ba'tu piran.
37 Iamo tee too, ia tee aku' Nebukadnezar, mpujimo', sola mpakala'bihmo' Raja Suruga. Ia to sininna panggaukan-Na tongan na ia to lalan-Na maruruh, na mangka too mpamajiong tomatampo.”