Raja Nebukadnezar mpasun parenta na ia to patung bulawan nasompa tobuda
3:1–7
3
Den wattu napangparentanni Raja Nebukadnezar anna dikabua' to patung bulawan, duangpulo pitu metere' tandena, na ci'di'mora na tallu metere' sangkahna. Napake'dehhi jio padang lappah Dura jio propinsi Babel. 2 Natambai ngasanmi Raja Nebukadnezar to sininna wakkele'na, gubernur, bupati, menteri, tonnissenni doi', tomangra'tah kara-kara, tonnissenni atoran na ia ngasan to kapala lan kampong, anna ratu lako jio pangmaroasan kadipake'deranna joo patung bulawan. 3-4 Ia tonna ke'deh ngasanmo to tau jio olona joo patung bulawan, metambami to pangtakinna raja nakua, “Ee, tomala'bihku' jio mai sininna bangsa, rapu na basa! Pesa'dingngii tee parentana raja! 5 Ia ke nnonimi to tarompe' na peundii oni suling, cu'bekan, rebab, gambus, serdam na ia to parewa mossi' laenna, nang la suju' ngasan kamu' ssompai joo patung bulawan to napake'deh Raja Nebukadnezar. 6 Inda-inda to te'da naturu'i tee parenta nang la ta'pa dipembuangan tama api to gaja liwa' lussu.” 7 Ia tonna nnonimo to parewa mossi', suju' ngasanmi to tau jio mai sininna bangsa, rapu na basa ssompai joo patung bulawan.Tallu kallolona to-Yahudi cia' nturu' parenta raja
3:8–18
8 Wattu ia bang unamo joo na den ba'tu pira-pira to-Babel mangngolo lako raja, la mparapa'i joo to-Yahudi. 9 Mangkadami lako Raja Nebukadnezar, nakua, “Iye' puang, malambeh sunga'ki'! 10 Mangkamiki' mpasun parenta kumua, ‘Ia ke nnonimi to parewa mossi', nang la ssuju' to sininna tau ssompai joo patung bulawan. 11 Na inda-inda to te'da naturu'i tee parenta nang la dipembuangan tama api to gaja liwa' lussu.’ 12 Apa den to-Yahudi to mangka tapabarakkanni mparenta propinsi Babel, te'da naturu'i joo parenta. Iamo to Sadrakh, Mesakh na Abednego. Ia tee tau cia'i mpakala'bihhi to dewata tasompa na cia' tooi ssompai to patung bulawan tapake'deh.”
13 Gaja birihmi raja, nata'pa mpangparentanni nadisolan to Sadrakh, Mesakh na Abednego mangngolo lako kalena. Ia tonna ratumo sola tallu, 14 mangkadami raja lako nakua, “Ee Sadrakh, Mesakh na Abednego, tongannaraka cia' kamu' mpakala'bihhi to dewata kusompa sola cia' too kamu' ssompai to patung bulawan mangka kupake'deh. 15 Ia tee too ke nnonimi to parewa mossi', sadiarakamu'ka la mpakala'bihhi sola ssompai joo patung bulawan? Ia ke cia' kamu' la ta'pa dipembuangan kamu' tama api to gaja liwa' lussu. Na te'da dewata to la ngkullei mpasalama' kamu' jio mai pangsessaku'.” 16 Mebalii Sadrakh, Mesakh na Abednego lako Raja Nebukadnezar nakua “Iye' puang, te'da bua'na kipebalii tuu pekutananta'. 17 Ia to Allataala kisompa ngkullei la mpasalama'kan jio mai joo api to gaja liwa' lussu. Nang la Nala'parankan jio mai kuasanta'. 18 Apa ia ke susinna te'da Nala'parankan, nang la cia'kan la mpakala'bihhi to dewata tasompa na cia' tookan la ssompai to patung bulawan tapake'deh.”
Sadrakh, Mesakh na Abednego dipembuangan tama api
3:19–25
19 Liwa' mala'da' birihna Raja Nebukadnezar lako Sadrakh, Mesakh na Abednego arannai malussu lindona, nabalik malea natumang birihna. Jaji napangparentanni na dipupanglokkon pempitu lussunna joo api. 20 Nasuai to ba'tu pira-pira surudadu to liwa' mawatang anna pumpungngi to Sadrakh, Mesakh na Abednego napembuanganni tama api to gaja liwa' lussu. 21 Napasipumpung bangngi joo kallolo tallu, namane' mpembuanganni tama api to gaja liwa' lussu. Sukku' pakeanna joo tau sola tallu, mebaju lando, baju kameja na mangsongko'. 22 Liwa' maparrang pangparentana joo raja, iamo joo anna dipupanglokkon pembuda to lussunna joo api, arannai ia to apinna ngkandei to surudadu namate, tonna angka'i to Sadrakh, Mesakh na Abednego napembuanganni tama api to gaja liwa' lussu. 23 Na ia tee Sadrakh, Mesakh na Abednego to mandi' dipumpung membassan tama api to gaja liwa' lussu.
24 Sabakanmi Raja Nebukadnezar nata'pa ke'deh metamba lako sininna pangjamana nakua, “Pirara tau kupangpepumpungan nena' namane' dipembuangan tama api? Kusanga talluri.” Mebalii to tau nakua, “Iye', tallura tau!” 25 Mebalimi raja nakua, “Na ciapai na den appa' tau kukita lumingka-mingka lan tangnga-tangngana joo api, na te'damo natipumpung, na te'da lalo too naciapa. Na ia joo tau laen mesa' susi ia anak dewata.”
Raja Nebukadnezar lla'paran Sadrakh, Mesakh na Abednego nadipakuasa jio propinsi Babel.
3:26–30
26 Malemi Raja Nebukadnezar ngkandoppi'i joo api nametamba nakua, “Sadrakh, Mesakh na Abednego, kaunan-Na Allataala Tomala'bih, messun kamu' lan mai tuu api ammimale mai.” Na messun Sadrakh, Mesakh na Abednego lan mai api. 27 Ratu ngasanmi to sininna wakkele' raja, gubernur, bupati, sola sininna pangjama laenna, ngguririkkii joo tau tallu, nakitai kumua te'da lalo narumbui api, te'da nama'bong to beluakkana sola pakeanna, moi bau rambu te'da too le'ke' jio kalena.
28 Mangkadami raja nakua “Mala'bih Allataala to nasompa Sadrakh, Mesakh na Abednego, to mangka ssua malaeka'-Na lla'paranni to tallu kaunan-Na to ngkatappa'i, to te'da naturu'i to parentaku', na la'bih nakabudai ke matei, na ia ke ssompai apa laen saliwanna Allataala to nasompa. 29 Iamo joo kupangparentanni kumua, ia to simesa'-mesa' tau jio mai bangsa, rapu na basa, to mpau kada tangnnangga' Allataala to nasompa Sadrakh, Mesakh na Abednego, la dita'tak-ta'tak na ia to bolana la diro'pokan naditombon menjaji burauk, nasaba' te'da ia dewata la ngkullei mangpasalama' susi to mangka Napugauk Allataala to nasompa.”
30 Mangkai joo too napaendekki raja to pangka'na Sadrakh, Mesakh na Abednego, arannai menjaji tomajao pangka'na lan propinsi Babel.