Pangnguki' jio rinding
5:1–12
5
Mpadenni pangmaroasan la'da' Raja Belsyazar natambai to tomajao pangka'na lan kaparentanna, sangsa'bu tau budanna, namangiso'-iso' anggoro' sola. 2 Ia tonna malangomo, napangparentanni Raja Belsyazar na mbawa ngasan isotan bulawan sola salaka to tau, to mangka narampa Raja Nebukadnezar ambe'na, lan mai Bola Puang Allataala jio Yerusalem, to la na pangngiso'i raja sola bainena sola to baine laenna sola tomajao pangka'na. 3 Ta'pa dibawa to isotan bulawan, naiso'ii raja sola bainena na baine laenna sola tomajao pangka'na. 4 Ia tonna nniso'mo anggoro' sola ngasan, mpakala'bihmi dewata dikabua' jio mai bulawan, salaka, tambaga, bassi, kaju sola batu.5 Ia bang unamo joo wattu, natimbajo to mesa' lima tau mangnguki' jio rinding istana sikandoppi' palita. Nakitai raja joo lima mukkun mangnguki', 6 arannai memmalaja' natibaliang lindona nambe'beh to ajena susi to tangkebuku. 7 Napematonggoi gamaranna na ditambai to tomangbaca-baca, tomacca mbattuananni apa jaji jao langi' sola topakita-kita anna disolan mangngolo lako raja. Nakua raja lako to tomacca, “Inda-inda to tau macca mbacai tee pangnguki' jio rinding, la napauanna' to battuananna, nadipapakei pakean kadatuan jio mai kaen makudara' sola rara' bulawan, nadiben kakuasan mangpentallun jio mai kakuasanku' lan tee kadatuanku'.” 8 Apa sininna to tomacca mangka mangngolo, te'da lalo macca mbacai sola mbattuanannii joo pangnguki'. 9 La'bi masussai penawanna raja natibaliang lindona, na ia to tomajao pangka'na lan kaparentanna te'damo naissen to apa la napugauk.
10 Ia tonna sa'dingngi indona Raja Belsyazar to nasipangkadai raja sola tomapangka'na, mentamami ngenan to nanii kumande raja sola toratunna, namangkada nakua, “Oo puang, malambeh sunga'ki', tapamatanai penawanta', danggi' na putibaliangngi lindota'. 11 Nasaba' lan tee kaparentanta' den mesa' tau to gaja nabarakka'i roh dewata. Ia tonna ba'tu piran, tonna mangparenta Raja Nebukadnezar ambe'ta', ia joo tau dibarakka'i pangpikkirisan melo sola kamaccan, na kapaissenanna susi kapaissenan dewata. Naangka'i Raja Nebukadnezar joo tau ngkapalai sininna topaissen-issen, tomangbaca-baca, tomacca mbattuananni apa jaji jao langi' sola topakita-kita. 12 Ia joo tau dibarakka'i pangpikkirisan melo, kapaissenan sola kamaccan. Iamo joo namacca mbattuananni tindo, sola macca mpamanassai to apa tangnaissenpa tau na melo pahangna ke denni passalan. Ia joo tau disanga Daniel, nasangai too Beltsazar ambe'ta'. Melo ke ia ditambai nabattuanannii joo pangnguki' jio rinding.”
Daniel mbattuananni pangnguki' jio rinding
5:13–30
13 Ta'pa dipupangngoloi Daniel lako raja, nakutanaii kumua, “Ikomoraka Daniel to dipali' jio mai Yehuda tonna mangparenta Raja Nebukadnezar ambe'ku'? 14 Kuissenmo kumua gaja nabarakka'iko dewata, arannai melo pangpikkirisanmu, kamaccanmu sola kapaissenanmu. 15 Mangka ngasanmo disolan sininna to tomacca na tomangbaca-baca mangngolo lako aku', apa te'da lalo nnissenni mbattuanannii joo pangnguki' jio rinding. 16 Mane' kuissenna kumua maccako mbattuanannii sola mapahangko ke denni passalan, iamo joo na ia ke maccako mbacai joo pangnguki' jio rinding sola mpauanna' battuananna, la dipapakeiko pakean kadatuan jio mai kaen makudara' sola rara' bulawan, na la kuben tooko kakuasan mangpentallun jio mai kakuasanku' lan tee kaparentanku'.” 17 Mebalii Daniel nakua, “Danggi'mo na aku' taben, tabenmi tau laen. Apa moi nasusi joo, nang la kubacanki' joo pangnguki', kupauan tooki' battuananna.”
18 Nakua toopa Daniel, “Iye', ia to Nebukadnezar ambe'ta', Allataala Tomala'bih mpupenjajii raja lompo Nabenni kakuasan, kamawatangan sola kamala'biran. 19 Matonggo kuasanna, iamo joo nakalaja'i sola nakasiri'i sininna bangsa, simesa'-mesa' rapu tau to mpake mangrupa-rupa basa. Ia ke madoangngi mpatei tau, Napatei bang unamira. Susi too ke madoangngi mpasalama' tau, Napasalama' too. Napamajaoi to to-Nakabudai, Napamajiongngi to totang-Nakabudai. 20 Apa ia tonna memmatampomo, membattuk na mpamajao penawanna, dialaimi to kamala'biranna sola kakuasanna menjaji raja. 21 Diula'ii jio mai tangngana tau na dipupangngakkalan olok-olok. Torroi sola keledai lampung nangkande reu susi sapin, namamma' jio tangnga rante, nabosokki ambun. Naarannai mangngaku kumua, ‘Allataala Tomala'bih ngkuasai kaparentanna tolino, mben kakuasan lako inda-inda to Nakabudai.’
22 Apa ia to kita' anakkana, cia'ki' mpamajiong kaleta' jio olo-Na Allataala, moi taissen ngasanmi joo. 23 La'bi tapamajao to kaleta' na ia to Puang Allataala jao suruga, barani tooki' massua nnalai to isotan, to narampa ambe'ta' lan mai Bola Puang Allataala ba'tu piran, tapake mangngiso' sola baineta' na baine laenta' sola to tomajao pangka'na. Tapakala'bih too dewata to te'da napakita ba'tu te'da napasa'ding sola te'da napaissen to dikabua' jio mai bulawan, salaka, tambaga, bassi, kaju na batu. Te'da tametaratte' lako Allataala to ntoe sunga' na lalan katuoanta'. 24 Iamo joo Nakiringngi to lima nnuki'i to pepasan-Na jio rinding.
25 Iamo tee pangnguki' nakua, ‘Direken, ditimbang, ditawa-tawa.’ 26 Na ia to battuananna: direken, ‘Ia to kamangparentanta' mangkami Nareken Allataala to wattunna na Naanggeimi.’ 27 Ditimbang battuananna, ‘Mangkamo Natimbang Allataala to panggaukanta' tangsusipa to Nakadoangngi.’ 28 Ditawa-tawa battuananna, ‘Ia to kadatuanta' ditawa-tawa nadiben to-Media sola to-Persia.’ ”