آتما رو آزمُوتو
4
اي پيارون، ھر ھيڪ آتما رو ڀروسو نِي ڪرو پڻ اُوئي نَي آزمائو ڪہ او ايشوَر رَي طرفون ھَي جون نا، ڪيونڪہ تموم گھڻا ڪُوڙا اگڪٿَي ڪرڻ آݪا دُنيا ۾ آيا ھَي۔ 2 اُوئون رِي اَي اوݪکوڻ ھَي ڪہ جڪو مِنک ݾجون رَي رُوبرو منَي ڪہ يسُوع مَسيح اِنسونِي رُوپ ۾ آيو ھتو، تو اُوئي ۾ ايشوَر رِي آتما ھَي۔ 3 پڻ جڪو مِنک اَي بات ڪونھي منَي ڪہ او ايشوَر رَي طرفون ڪونھي، تو اُوئي ۾ مَسيح رَي مُخالف آݪِي آتما ھَي جڪَي رَي بارَي ۾ ٿون ݾُڻيو ھَي ڪہ او آوڻ آݪو ھَي پڻ ھڻون دُنيا ۾ آيو رو۔4 اي ٻاݪون، ٿي ايشوَر را ھو ھانَ ٿون اُوئون ڪُوڙَي اگڪٿَي ڪرڻ آݪون نَي ھرايا ھَي ڪيونڪہ ايشوَر رِي آتما جڪو ٿون ۾ ھَي او شيطون ݾون مھانَ ھَي جڪو دُنيا ۾ ھَي۔ 5 او دُنيا را ھَي اِيئي رَي ڪري او دُنياوِي باتون ڪرَي ھَي ھانَ دُنيا اُوئون رِي ݾُڻَي ھَي۔ 6 پڻ آپي ايشوَر را ھون۔ جڪو ايشوَر نَي اوݪکَي ھَي او آپڻِي ݾُڻَي ھَي پڻ جڪو ايشوَر ݾون ڪونھي او آپڻِي ڪونھي ݾُڻتو۔ اِيئي بات ݾون آپي ݾچائي رِي آتما ھانَ گُھمراھ ڪرڻ آݪِي آتما نَي اوݪکون ھون۔
ايشوَر پريم ھَي
7 اي پيارون، آئو آپي ھيڪَي ٻيجَي ݾون پريم راکون ڪيونڪہ پريم ايشوَر رَي طرفون ھَي ھانَ جڪو ڀِي پريم راکَي ھَي او ايشوَر رو ٻاݪ ھَي ھانَ او ايشوَر نَي اوݪکَي ھَي۔ 8 جڪو پريم ڪونھي راکتو، تو او ايشوَر نَي ڪونھي اوݪکتو ڪيونڪہ ايشوَر پريم ھَي۔ 9 ايشوَر آپرو پريم آپون نَي اِيئي نمُونَي بتايو ڪہ اُوئي آپرو ھيڪج ڏيڪرو جگت ۾ ميليو ڪہ آپون نَي اُوئي رَي وسيلَي زندگِي ملَي۔ 10 پريم اَي ڪونھي ڪہ آپون ايشوَر ݾون پريم ڪيئو پڻ اَي ھَي ڪہ ايشوَر آپون ݾون پريم ڪيئو ھانَ آپرو ڏيڪرو ميليو ڪہ او آپڻَي پاپون رِي معافي رَي ݾارُو ٻَليدون ھووَي۔ 11 اي پيارون، جڏي ايشوَر آپون ݾون اھڙو پريم ڪيئو ھَي، تو آپڻو ڀِي فرض ھَي ڪہ آپي ھيڪَي ٻيجَي ݾون پريم راکون۔ 12 ايشوَر نَي ڪڏي ڀِي ڪَي ڪونھي ڏيٺو پڻ جي آپي ھيڪَي ٻيجَي ݾون پريم راکون ھون، تو ايشوَر آپون ۾ رَي ھَي ھانَ اُوئي رو پريم آپون ۾ پُورو ھووَي ھَي۔
13 ايشوَر آپون نَي آپرِي آتما ڏينِي ھَي جڪَي ݾون آپون نَي خبر پڙَي ھَي ڪہ آپي اُوئي ۾ پڪا رون ھون ھانَ او آپون ۾ رَي ھَي۔ 14 آپون ڏيٺو ھانَ گواھِي ڏيئون ھون ڪہ ايشوَر پِتا آپرو ڏيڪرو ميليو ڪہ او جگت نَي مُگتي ڏَي۔ 15 اِيئي رَي ڪري جڪو ڀِي اِقرار ڪرَي ھَي ڪہ پرڀُو يسُوع ايشوَر رو ڏيڪرو ھَي، تو ايشوَر اُوئي ۾ رَي ھَي ھانَ او ايشوَر ۾۔ 16 جڪو پريم ايشوَر نَي آپون ݾون ھَي اُوئي نَي آپون اوݪکيو ھَي ھانَ آپون نَي اُوئي تي ڀروسو ھَي۔ ايشوَر پريم ھَي ھانَ جڪو پريم ۾ پڪو رَي ھَي اوج ايشوَر ۾ پڪو رَي ھَي ھانَ ايشوَر ڀِي اُوئي ۾ پڪو رَي ھَي۔ 17 اِيئي ݾون پريم آپون ۾ ڪامل ھويو رو ھانَ آپي عدالت آݪَي ڏِن پُورِي دليرِي ݾون اُڀشون ڪيونڪہ جھڙو پرڀُو يسُوع ھَي اھڙاج آپي ڀِي اِيئي دُنيا ۾ ھون۔ 18 پريم ۾ ڪو ڀِي ٻِي ڪونھي ھوتو پڻ ڪامل پريم ݾون ٻِي ناݾي جاوَي ھَي۔ ٻِي سزا رو ھووَي ھَي ھانَ جڪو ٻيئاجَي ھَي او اَڃون توڻي پريم ۾ ڪامل ڪونھي ھويو۔ 19 آپي اِيئي رَي ڪري پريم راکون ھون ڪيونڪہ پيل ايشوَر آپون ݾون پريم راکيو۔ 20 جي ڪُڻ ڪَي ڪہ ھُون ايشوَر ݾون پريم راکون ھون پڻ او آپرَي وِشواسي ڀائي ݾون دُشمنِي راکَي ھَي، تو او ڪُوڙو ھَي۔ جي او آپرَي ڀائي ݾون جڪَي نَي اُوئي ڏيٺو ھَي پريم ڪونھي راکتو، تو او ايشوَر ݾون پريم ڪيڪر ڪرشَي جڪَي نَي اُوئي ڏيٺو ڀِي ڪونھي؟ 21 آپون نَي پرڀُو يسُوع اَي حُڪم ڏينو ھَي ڪہ جڪو ڀِي ايشوَر ݾون پريم راکَي ھَي او آپرَي وِشواسي ڀائي ݾون ڀِي پريم راکَي۔