ايشوَر را ڏيڪرا
3
جوئو، ايشوَر پِتا آپون ݾون ڪِترو پريم ڪيئو ڪہ آپي اُوئي را ڏيڪرا ڪھيجا، حقيقت ۾ آپي ھون ڀِي۔ پڻ جگت آݪا آپون نَي اِيئي رَي ڪري ڪونھي اوݪکتا ڪيونڪہ اُوئون ايشوَر نَي ڀِي ڪونھي اوݪکيو۔ 2 اي پيارون، ھمَي آپي ايشوَر را ٻاݪ ھون پڻ اَڃون توڻي اَي بات ظاھر ڪونھي ھوئِي ڪہ جڏي پرڀُو يسُوع آشَي، تو اُوئي ٽيم آپي ڪھڙا ھوشون۔ آپون نَي اَي خبر ھَي ڪہ آپي اُوئي جھڙا ھوئي جاشون ڪيونڪہ اُوئي نَي اھڙوج ڏيکشون جھڙو او اَصل ݾون ھَي۔ 3 جڪو ڀِي پرڀُو يسُوع ݾون اَي اُميد راکَي ھَي، او آپرو آپنَي اھڙو پويتر ڪرَي جھڙو او پويتر ھَي۔4 جڪو پاپ ڪرَي ھَي او ايشوَر را حُڪم توڙَي ھَي ڪيونڪہ پاپ رو مطلب ھَي ايشوَر را حُڪم توڙڻ۔ 5 ٿونَي خبر ھَي ڪہ پرڀُو يسُوع اِيئي رَي ڪري آيو ڪہ او پاپ مِٽاوَي، پڻ اُوئي ۾ ڪو ڀِي پاپ ڪونھي۔ 6 اِيئي رَي ڪري جڪو ڀِي اُوئي ۾ پڪو رَي ھَي او پاپ ڪونھي ڪرتو پڻ جڪو پاپ ڪرتو رَي ھَي اُوئي نَڪو اُوئي نَي ڏيٺو ھانَ نَڪو اُوئي نَي اوݪکيو ھَي۔
7 اي ٻاݪون، ٿي ڪيرَي دوکَي ۾ نِي آئو۔ جڪو نيڪِي ڪرَي ھَي اوج پرڀُو يسُوع آݪِي ڪار نيڪ ھَي۔ 8 جڪو پاپ ڪرَي ھَي او شيطون ݾون ھَي ڪيونڪہ شيطون شرُوع ݾون ڏوھ ڪرتو رَي ھَي۔ ايشوَر رو ڏيڪرو اِيئي رَي ڪري آيو ڪہ او شيطون را ڪوم مِٽاوَي۔ 9 جڪو ايشوَر رو ٻاݪ ھَي او پاپ ڪونھي ڪرتو ڪيونڪہ ايشوَر رَي خُوبَي اُوئي ۾ رَي ھَي۔ او پاپ ڪري ڀِي ڪونھي ݾگھتو ڪيونڪہ ايشوَر اُوئي نَي آپرو ٻاݪ ٺاھيو ھَي۔ 10 اِيئي ݾون آپون نَي خبر پڙَي ھَي ڪہ ڪُڻ ايشوَر را ٻاݪ ھَي ھانَ ڪُڻ شيطون را۔ جڪو نيڪِي ڪونھي ڪرتو او آپرَي وِشواسي ڀايون ݾون پريم ڪونھي راکتو ھانَ او ايشوَر رو ڀِي ڪونھي۔
آپت ۾ پريم راکڻ
11 جڪو نياپو ٿون شرُوع ݾون ݾُڻيو ھَي او اَي ھَي ڪہ آپي ھيڪَي ٻيجَي ݾون پريم راکون۔ 12 قائن آݪِي ڪار نِي ھوئون جڪو شيطون رو ھتو ھانَ جڪَي آپرَي ڀائي نَي ماريو۔ اُوئي آپرو ڀائي ڪيئون ماريو؟ ڪيونڪہ قائن را ڪوم بُڇڙا ھتا ھانَ اُوئي رَي ڀائي را ڪوم نيڪ ھتا۔ 13 اي وِشواسيون، جي جگت را مِنک ٿون ݾون دُشمنِي راکَي ھَي، تو حيرون نِي ھوئو۔ 14 آپون نَي خبر ھَي ڪہ آپي موت ݾون نڪري اَمر جيوَن ۾ آيا ھون ڪيونڪہ آپي آپرَي وِشواسي ڀايون ݾون پريم راکون ھون۔ جڪو پريم ڪونھي راکتو او موت رِي حالت ۾ رَي ھَي۔ 15 جڪو آپرَي ڀائي ݾون دُشمنِي راکَي ھَي او خُونِي ھَي ھانَ ٿونَي خبر ھَي ڪہ ڪَي ڀِي خُونِي نَي اَمر جيوَن ڪونھي ملَي۔ 16 آپون نَي پريم رَي بارَي ۾ اِيئي ݾون خبر پڙِي ڪہ پرڀُو يسُوع آپڻَي ݾارُو آپرِي جان ڏينِي ھانَ ھمَي آپڻو فرض ھَي ڪہ آپي آپڻَي وِشواسي ڀايون رَي ݾارُو آپرِي جان ڏيوَڻ رَي ݾارُو تيار رون۔ 17 جڪَي ڪڍي دُنيا را مال ملڪيت ھَي ھانَ او آپرَي وِشواسي ڀائي نَي مُحتاج ڏيکي اُوئي رِي مدد ڪونھي ڪرتو، تو اُوئي ۾ ايشوَر رو پريم ڪيڪر رئي ݾگھَي ھَي؟ 18 اي ٻاݪون، آپي رُگو باتون ھانَ زِبون ݾون پريم نِي بتائُون پڻ اھڙا ڪوم ڪرون جڪَي ݾون خبر پڙَي ڪہ آپڻو پريم ݾاچو ھَي۔ 19 اِيئي ݾون آپون نَي خبر پڙشَي ڪہ آپي ݾچائي را ھون ھانَ ايشوَر آگھي اُوئي ٽيم آپون نَي پُورِي تسلِي ھووَي ھَي۔ 20 جڏي آپڻو من آپون نَي ڏوھي ڪرَي ھَي ڪيونڪہ ايشوَر آپڻَي من ݾون موٽو ھَي ھانَ ݾجو ڪئين جوڻَي ھَي۔ 21 اي پيارون، جڏي آپڻو من آپون نَي ڏوھي ڪونھي ڪرتو، تو آپي پُورِي دليرِي ݾون ايشوَر آگھي حاضر ھوئي ݾگھون ھون۔ 22 جڪو ڪئين آپي ايشوَر ݾون مونگون ھون او آپون نَي ملَي ھَي ڪيونڪہ آپي اُوئي رَي حُڪمون تي بون ھون ھانَ اوج ڪرون ھون جڪو اُوئي نَي پسند ھَي۔ 23 ايشوَر را حُڪم اَي ھَي ڪہ آپي اُوئي رَي ڏيڪرَي يسُوع مَسيح رَي نون تي وِشواس راکون ھانَ جون پرڀُو يسُوع آپون نَي حُڪم ڏينو ھَي اُوئيج نمُونَي ھيڪَي ٻيجَي ݾون پريم راکون۔ 24 جڪو ڀِي اُوئي رَي حُڪمون تي بَي ھَي، تو او ايشوَر ۾ پڪو رَي ھَي ھانَ ايشوَر اُوئي ۾ رَي ھَي۔ آپون نَي اُوئي رَي ڏينوڙَي پويتر آتما رَي وسيلَي خبر ھَي ڪہ او آپون ۾ رَي ھَي۔