وِشواس ݾون جگت نَي ھراوڻ
5
جڪَي رو اَي وِشواس ھَي ڪہ يسُوع ئِي مَسيح ھَي، تو او ايشوَر رو ٻاݪ ھويو ھَي۔ جڪو پِتا ݾون پريم راکَي ھَي، تو او اُوئي رَي اولاد ݾون ڀِي پريم راکَي ھَي۔ 2 اِيئي رَي ڪري جي آپي ايشوَر ݾون پريم راکون ھون ھانَ اُوئي رَي حُڪمون تي بون ھون، تو اِيئي ݾون خبر پڙَي ھَي ڪہ آپي ايشوَر رَي ٻاݪون ݾون ڀِي پريم راکون ھون۔ 3 ايشوَر ݾون پريم اَي ھَي ڪہ آپي اُوئي رَي حُڪمون تي بون ھانَ اُوئي را حُڪم ڏُکيا ڪونھي ھَي۔ 4 جڪو ڀِي ايشوَر رو ٻاݪ ھويو ھَي او جگت نَي ھراوَي ھَي ھانَ اَي آپي آپرَي وِشواس ݾون ڪرون ھون۔ 5 جگت نَي ھراوڻ آݪو ڪُڻ ھَي؟ اوج جڪَي رو اَي وِشواس ھَي ڪہ پرڀُو يسُوع ايشوَر رو ڏيڪرو ھَي۔پرڀُو يسُوع رَي بارَي ۾ گواھِي
6 او يسُوع مَسيح ھَي جڪو پويتر سِنون آݪَي پوڻي ھانَ ݾُولِي تي ٻَليدون رَي وسيلَي آيو ھتو۔ او نِي رُگو پوڻي پڻ لوئِي ھانَ پوڻي رَي وسيلَي آيو ھتو۔ آتما جڪو آپ ݾاچ ھَي او اَي گواھِي ڏَي ھَي۔ 7 گواھِي ڏيوَڻ آݪا تين ھَي، 8 آتما، پوڻي ھانَ لوئِي۔ اَي تينئي ھيڪِي بات تي خُوش ھَي۔ 9 جڏي آپي مِنکون رِي گواھِي قبُول ڪرون ھون، تو پَڇي ايشوَر رِي گواھِي اُوئي ݾون ڀِي وڌيڪ ھَي ھانَ ايشوَر آپرَي ڏيڪرَي رَي بارَي ۾ گواھِي ڏَي ھَي۔ 10 جڪو ايشوَر رَي ڏيڪرَي تي وِشواس راکَي ھَي او اَي گواھِي آپرَي من ۾ راکَي ھَي۔ جڪو ايشوَر تي وِشواس ڪونھي راکتو او اُوئي نَي ڪُوڙو ڪرَي ھَي ڪيونڪہ اُوئي مِنک اُوئي گواھِي تي وِشواس ڪونھي راکيو جڪو ايشوَر آپرَي ڏيڪرَي رَي بارَي ۾ ڏينِي ھتِي۔ 11 او گواھِي اَي ھَي ڪہ ايشوَر آپون نَي اَمر جيوَن ڏينو ھَي ھانَ اَي زندگِي اُوئي رَي ڏيڪرَي ۾ ھَي۔ 12 جڪَي ڪڍي ايشوَر رو ڏيڪرو ھَي اُوئي ڪڍي زندگِي ھَي ھانَ جڪَي ڪڍي ايشوَر رو ڏيڪرو ڪونھي اُوئي ڪڍي زندگِي ڀِي ڪونھي۔
اَمر جيوَن
13 ٿي جڪو ايشوَر رَي ڏيڪرَي رَي نون تي وِشواس راکو ھو، مھَي اَي باتون ٿونَي اِيئي رَي ڪري لِکئَي ھَي ڪہ ٿونَي خبر پڙَي ڪہ ٿونَي اَمر جيوَن مِليوڙو ھَي۔ 14 آپي ايشوَر ۾ پُورا دلير ھون، جي آپي اُوئي رِي مرضِي تي ڪئين مونگون ھون، تو او آپڻِي ݾُڻَي ھَي۔ 15 جڏي آپون نَي خبر ھَي ڪہ جڪو ڪئين آپي مونگون ھون، تو او آپڻِي ݾُڻَي ھَي ھانَ آپون نَي اَي ڀِي خبر ھَي ڪہ جڪو ڪئين آپون اُوئي ݾون مونگيو ھَي او آپون نَي مِليو ھَي۔
16 جي ڪُڻ آپرَي وِشواسي ڀائي نَي اھڙو پاپ ڪرتو ڏيکَي جڪَي رو نتيجو موت ڪونھي، تو اُوئي رَي ݾارُو پراٿنا ڪرَي۔ ايشوَر اُوئي رَي وسيلَي اُوئي نَي زندگِي ڏيشَي۔ اَي اُوئون رَي ݾارُو ھَي جڪون اھڙو پاپ ڪيئو ھَي جڪَي رو نتيجو موت نِي ھووَي۔ پڻ اھڙو پاپ ڀِي ھَي جڪَي رو نتيجو موت ھَي ھانَ ھُون ڪونھي ڪيتو ڪہ اُوئي رَي ݾارُو ڀِي پراٿنا ڪرڻ کپَي۔ 17 ھر نمُونَي رو بُڇڙو ڪوم پاپ ھَي پڻ ھر پاپ رو نتيجو موت ڪونھي۔
18 آپون نَي خبر ھَي ڪہ جڪو ڀِي ايشوَر رو ٻاݪ ھَي او پاپ ڪرتو ئِي ڪونھي ڪيونڪہ اُوئي رِي ݾنڀال ايشوَر رو ڏيڪرو ڪرَي ھَي ھانَ شيطون اُوئي نَي ھاٿ ڀِي لگائي ڪونھي ݾگھتو۔ 19 آپون نَي خبر ھَي ڪہ آپي ايشوَر را ھون ھانَ ݾجِي دُنيا شيطون رَي قبضَي ۾ ھَي۔
20 آپون نَي اَي ڀِي خبر ھَي ڪہ ايشوَر رو ڏيڪرو اِيئي جگت ۾ آيو رو ھانَ اُوئي آپون نَي ݾمجھ ڏينِي ھَي ڪہ آپي اُوئي نَي اوݪکون جڪو ݾاچو ايشوَر ھَي ھانَ آپي اُوئي رَي ڏيڪرَي يسُوع مَسيح رَي وسيلَي اُوئي ݾاچَي ايشوَر ۾ ھون جڪو اَمر جيوَن ڏيوَڻ آݪو ھَي۔
21 اي ٻاݪون، آپرو آپنَي ڪُوڙَي مُورتيون ݾون بچائي راکو۔