سنت يُوحنا رو پيلڪو خط
زندگِي رو شُٻڌ
1
مھي ٿونَي زندگِي ڏيوَڻ آݪَي شُٻڌ رَي بارَي ۾ لِکون پڙيا جڪو شرُوع ݾون ھتو۔ مھون اُوئي نَي ݾُڻيو ھانَ آپرَي اونکيون ݾون ڏيٺو، ھاوي، مھون اُوئي نَي ڌھيون ݾون ڏيٺو پڻ اُوئي نَي ھاٿ ڀِي لگايو۔ 2 او زندگِي ظاھر ھوئِي ھانَ مھون اُوئي نَي ڏيٺو۔ ھمَي مھي آپ گواھِي ڏي اُوئي اَمر جيوَن رَي بارَي ۾ پرچار ڪرون پڙيا جڪو ايشوَر پِتا ڀيڙو ھتو ھانَ مھون تي ظاھر ھويو۔ 3 مھون جڪو ڀِي ڏيٺو ھانَ ݾُڻيو، او ٿونَي ڀِي ݾُڻائُون ھون ڪہ ٿي ڀِي مھون ݾون ميل جول راکو ھانَ آپڻو ميل جول ايشوَر پِتا ھانَ اُوئي رَي ڏيڪرَي يسُوع مَسيح ݾون ھَي۔ 4 مھي اَي باتون اِيئي رَي ڪري لِکون پڙيا ڪہ آپڻِي خُوشِي پُورِي ھووَي۔اُجاݪَي ۾ بيوَڻ
5 جڪو نياپو مھون پرڀُو يسُوع ݾون ݾُڻيو، اوج نياپو ٿونَي ڀِي ݾُڻائُون ھون ڪہ ايشوَر اُجاݪو ھَي ھانَ اُوئي ۾ ݾَڦا انڌارو ھائِي ڪونھي۔ 6 جي آپي ڪونھ ڪہ آپي اُوئي ݾون ميل جول راکون ھون پڻ انڌارَي ۾ بون پڙيا، تو آپي ڪُوڙا ھون ھانَ آپي ݾچائي تي ڪونھي بيتا۔ 7 جي آپي اُجاݪَي ۾ بون جھڙَي نمُونَي او اُجاݪَي ۾ ھَي، تو آپڻو ھيڪَي ٻيجَي ݾون ميل جول ھَي ھانَ اُوئي رَي ڏيڪرَي پرڀُو يسُوع رو لوئِي آپون نَي ݾجَي پاپون ݾون آڇا اُوجݪا ڪرَي ھَي۔
8 جي آپي ڪونھ ڪہ آپي پاپي ڪونھي، تو آپرو آپنَي ٺَگون ھون ھانَ آپون ۾ ݾچائي ھائِي ڪونھي 9 پڻ جي آپي آپڻا پاپ منون، تو ايشوَر آپڻا پاپ معاف ڪرشَي ھانَ آپون نَي ھر بُڇڙائي ݾون آڇا اُوجݪا ڪرشَي ڪيونڪہ او ݾاچو ھانَ وفادار ھَي۔ 10 جي آپي ڪونھ ڪہ آپون پاپ ڪونھي ڪيئو، تو آپي ايشوَر نَي ڪُوڙو ڪونھ ھون ھانَ اُوئي رَي باتون آپون ۾ ھائِي ڪونھي۔