سنت پطرس رو ٻيجو خط
جَئي پرڀُو رِي ھانَ پراٿنا
1
اَي خط مھَي شمعُون پطرس رَي طرفون ھَي جڪو يسُوع مَسيح رو سنت ھانَ اُوئي رو ٻونھو ھون۔ ھُون اَي خط اُوئون نَي لِکون پڙيو جڪو آپڻَي ايشوَر ھانَ مُگتي داتا يسُوع مَسيح رِي نيڪِي ۾ آپون آݪِي ڪار اُوئي تي وِشواس راکَي ھَي۔ 2 ايشوَر ھانَ آپڻَي پرڀُو يسُوع نَي اوݪکڻ رَي وسيلَي ٿون تي تموم گھڻِي ڪِرپا ھانَ دايا ھوتِي رَي۔ايشوَر رو ھيلو ھانَ چُونڊڻ
3 ايشوَر رِي قُدرت ݾون او ݾجو ڪئين جڪو زندگِي رَي ݾارُو ھانَ اُوئي رِي مرضِي پُورِي ڪرڻ رَي ݾارُو ضرُوري ھَي، اَي آپون نَي اُوئي نَي اوݪکڻ رَي ڪري مِليو ھَي، ڪيونڪہ اُوئي آپون نَي آپرِي مھما ھانَ نيڪِي ݾون ھيلو ڪيئو ھَي۔ 4 اِيئي نمُونَي ايشوَر آپون ݾون تموم گھڻا قيمتي واعدا ڪيئا ڪہ آپي اُوئون رَي وسيلَي اُوئي بربادي ݾون بچون جڪو اِيئي جگت رَي بُڇڙَي خواھشون رَي ڪري ھَي ھانَ آپي اُوئي رَي خُوبيون ۾ شامل ھوئي جائُون۔ 5 اَي ݾجو ڪئين ياد راکي پُورِي ڪوشش ڪرو ڪہ ٿي وِشواس ݾون نيڪِي، نيڪِي ݾون ݾمجھ، 6 ݾمجھ ݾون پرھيزگارِي، پرھيزگارِي ݾون صبر ھانَ صبر ݾون ايشوَر رِي مرضِي پُورِي ڪرو۔ 7 ايشوَر رِي مرضِي ݾون آپت ۾ پريم راکو ھانَ ݾجون ۾ پريم ۾ بڌتا جائو۔ 8 ڪيونڪہ ٿي جِترا ڀِي اِيئون خُوبيون ۾ بڌتا جاشو، اِتراج آپڻَي پرڀُو يسُوع مَسيح رِي اوݪکوڻ ۾ فائدَي آݪا ھانَ ڦل آݪا ھوشو۔ 9 پڻ جڪَي ۾ اَي خُوبَي ڪونھي، تو او اونڌَي آݪِي ڪار اونڌو ھَي۔ او اَي بات پونتريو رو ڪہ اُوئي را پِروڻا پاپ ڌوئيجي صاف ھويا ھَي۔
10 اي وِشواسيون، اَي بات ثابت ڪرڻ رِي وڌيڪ ڪوشش ڪرتا رو ڪہ ايشوَر ٿونَي ھيلو ڪيئو ھانَ چُونڊيا ھَي۔ اِيئي رَي ڪري جي ٿي اِيئون ڪرشو، تو ڪڏي ڀِي دوکو ڪونھي کائو، 11 پڻ اِيئي ݾون ٿي آپڻَي پرڀُو ھانَ مُگتي داتا يسُوع مَسيح رِي ھميشا رِي بادشاھي ۾ تموم گھڻِي عِزت ݾون شامل ڪيئا جاشو۔ 12 اِيئي رَي ڪري ھُون ٿونَي اَي باتون ھميشا ياد ڪراوتو رئين، پڻ ٿونَي اِيئون باتون رِي خبر ھَي ھانَ اُوئي مِلڻ آݪِي ݾچائي تي پڪا ھو۔ 13 ھُون اَي آپرو فرض ݾمجھون ھون ڪہ جترِي توڻي جيتو ھون اُترِي توڻي ٿونَي يادگيرِي ڪراوڻ رَي ݾارُو ݾُجاگ ڪرتو رئين۔ 14 مھنَي خبر ھَي ڪہ مھارَي مرڻ رو ٽيم نيڙو ھَي ڪيونڪہ آپڻَي پرڀُو يسُوع مَسيح مھنَي اَي بات ݾُڻائِي رِي۔ 15 اِيئي رَي ڪري ھُون پُورِي ڪوشش ڪرتو رئين ڪہ مھارَي مرڻ ݾون پَڇي ڀِي ٿونَي اَي باتون ھر ٽيم ياد رَي۔
مَسيح رِي مھما را گواھ
16 جڏي مھون ٿونَي آپڻَي پرڀُو يسُوع مَسيح رِي قُدرت ھانَ آوڻ رِي خبر ڏينِي، تو ٺَگِي ڪري ڪُوڙَي باتون ڪونھي ݾُڻائَي پڻ مھون اُوئي رِي گواھِي ڏينِي جڪَي رِي مھما مھون آپ آپرَي اونکيون ݾون ڏيٺِي ھتِي۔ 17 مھي اوٿج ھتا جڏي ايشوَر پِتا اُوئي نَي مونَ مرتبو ڏينو ھانَ ڪھيو ڪہ،
”اَي مھارو پيارو ڏيڪرو ھَي،
ھُون اِيئي ݾون خُوش ھون۔“
18 جڏي مھي پويتر جبل تي اُوئي ڀيڙا ھتا، تو مھون آپ آڪاش ݾون اَي آواز ݾُڻيو ھتو۔
19 اِيئي نمُونَي مھورو وِشواس نبيون رَي ڪھيوڙَي باتون تي اَڃون ڀِي وڌيڪ پڪو ھويو۔ اَي ٿونرَي ݾارُو ڀِي ݾُٺو ھوشَي ڪہ ٿي ڀِي اُوئي ݾون من لگائو ڪيونڪہ او ھيڪَي ڏِيئي آݪِي ڪار ھَي جڪو انڌارَي ۾ اُجاݪو ڪرَي ھَي ھانَ او اُوئي ٽيم توڻي اُجاݪو ڪرتو ريشَي جترِي توڻي انڌارو مِٽَي نِي ھانَ ݾاڪݪي رو تارو يعني پرڀُو يسُوع ٿونرَي من ۾ اُجاݪو نِي ڪرَي۔