دُنيا ݾون دوستي
4
ٿون ۾ جھيڙا جھگڙا ڪيٿ ݾون آيا؟ ڪِي اُوئون بُڇڙَي خواھشون رَي ڪري ڪونھي جڪو ٿونرو ݾَرير آپرَي ڪاٻُو ۾ راکڻ رَي ݾارُو ٿون ݾون بِڙھتَي رَي ھَي۔ 2 ٿي ڪَي شئي رِي خواھش ڪرو ھو ھانَ جڏي او ٿونَي ڪونھي ملتِي، تو ٿي ݾاݪ ھانَ خُون ڪرو ھو پڻ تو ڀِي ٿونَي ڪئين ڪونھي مِلتو۔ٿونَي اِيئي رَي ڪري ڪونھي مِلتو ڪيونڪہ ٿي مونگتا ڪونھي پڻ ٿي جھيڙا جھگڙا ڪرو ھو۔ 3 ٿي مونگو ھو پڻ ٿونَي مِلتو ڪونھي ڪيونڪہ ٿي خراب نيت ݾون مونگو ھو ڪہ ٿي اِيئي ݾون عياشِي ڪري ݾگھو۔
4 جڪو ڀُونڏا ڪوم ڪرَي ھَي ڪِي اُوئون نَي خبر ڪونھي ڪہ دُنيا ݾون دوستي راکڻ ايشوَر ݾون دُشمنِي راکڻ ھَي؟ جڪو ڀِي دُنيا رو دوست ھوئڻ رو ݾوچَي ھَي، تو او آپنَي ايشوَر رو دُشمن ٺاوَي ھَي۔ 5 ٿي ڪِي ݾمجھو ھو ڪہ شاستر ۾ جڪو ڀِي لِکيوڙو ھَي اُوئي رو ڪو ڀِي فائدو ڪونھي؟ جڪو آتما ايشوَر آپون نَي ڏينِي ھَي ڪِي او اھڙِي خواھش ڪرَي ھَي جڪَي رَي ڪري ݾاݪ پيدا ھووَي؟ 6 پڻ ايشوَر آپون تي تموم گھڻِي ڪِرپا ڪرَي ھَي۔ اِيئي رَي ڪري شاستر ۾ لِکيوڙو ھَي ڪہ،
”ايشوَر مگرُور رَي خلاف ھَي پڻ نِموڻون تي ڪِرپا ڪرَي ھَي۔“
7 ٿي ايشوَر رَي ڪيوَڻ ۾ رو ھانَ شيطون رو مُقابلو ڪرو، تو او ٿون ݾون ناݾي جاشَي۔ 8 ايشوَر ڪڍي آئو، تو او ٿون ڪڍي آشَي۔ اي پاپيون، ٿي ڀُونڏا ڪوم ڦِٽا ڪرو ھانَ ݾُٺا ڪوم ڪرو۔ ٿي جڪو ٻي ٻيڙيون را ݾَوار ھو، آپرا من صاف راکو۔ 9 آپرَي پاپون تي ڏُک ڪرو، ھَݾڻ ھانَ خُوش ھوئڻ ڇوڙو پڻ ماتم ڪرو ھانَ روئو۔ 10 پرميشوَر آگھي نِوڙت ݾون زندگِي گُذارو، تو او ٿونَي عِزت ڏيشَي۔
ھيڪَي ٻيجَي رَي خلاف باتون نِي ڪرو
11 اي وِشواسيون، ٿي ھيڪَي ٻيجَي رَي خلاف باتون نِي ڪرو۔ جڪو آپرَي ڀائي رَي خلاف بات ڪرَي ھَي جون اُوئي تي الزوم لگاوَي ھَي، تو او شريعت رَي خلاف ٻولَي ھَي ھانَ اُوئي تي الزوم لگاوَي ھَي ھانَ جڪو شريعت رَي خلاف ھَي جون اُوئي تي الزوم لگاوَي ھَي، تو او شريعت تي ڪونھي بيتو پڻ اُوئي رو اِنصاف ڪرڻ آݪو ھوئي جاوَي ھَي۔ 12 شريعت ڏيوَڻ آݪو ھانَ فيصلو ڪرڻ آݪو رُگو ايشوَر ھَي۔ اوج آپون نَي بچائي ݾگھَي ھَي ھانَ موت ڀِي ڏي ݾگھَي ھَي۔ اِيئي رَي ڪري آپرَي پاڙَي آݪَي تي الزوم ھڻڻ آݪا ٿي ڪُڻ ھو؟
موٽَي باتون ڪرڻ آݪا
13 مھارِي بات ڌھيون ڏي ݾُڻو، ٿي جڪو اَي ڪو ھو ڪہ، ”آج جون ݾووارَي مھي ڪَي ٻيجَي شھر ۾ جائي ھيڪ ݾال ريشون ھانَ ڪاروبار ڪري پَشا ڪماشون۔“ 14 جوئو، ٿونَي تو اَي ڀِي خبر ڪونھي ڪہ ݾووارَي ڪِي ھوشَي۔ ڪيونڪہ ٿونرِي زندگِي ٻاڦ آݪِي ڪار ھَي جڪو ڏيکتَي ڏيکتَي مِٽي جاوَي ھَي۔ 15 اِيئي رَي بدلَي آپون نَي اَي ڪيوَڻ کپَي ڪہ، ”جي پرميشوَر رِي مرضِي ھوئِي، تو اَي جون او ڪوم ڪرشون۔“ 16 جي ٿي بڏائو ڪرو ھو، تو ٿي مگرُورِي آݪَي باتون ڪرو ھو۔ اھڙَي باتون ڪرڻ صحيح ڪونھي۔
17 جڪَي نَي ڀلائي ڪرڻ رِي خبر ھَي پڻ جي ڪونھي ڪرتو، تو او پاپ ڪرَي ھَي۔