دُنيا رَي ڌن رو نُقصون
5
اي ڌن آݪون، مھارِي بات ڌھيون ڏي ݾُڻو، اُوئون مُصيبتون رَي ݾارُو روئو ھانَ ماتم ڪرو جڪو ٿون تي آوڻ آݪَي ھَي۔ 2 ٿونرو ڌن ڪَي ڀِي ڪوم رو ڪونھي رَي ھانَ ٿونرا گاڀا ڪيڙا کائي جاشَي۔ 3 ٿونرَي ݾونَي ھانَ چوندِي نَي زنگ لاگي جاشَي ھانَ اَي زنگ ٿونرَي خلاف گواھِي ڏيشَي ھانَ باݾڏي آݪِي ڪار ٿونرو ݾَرير کائي جاشَي۔ ڪِي ٿونَي خبر ڪونھي ڪہ اَي جگت ختم ھوئڻ آݪو ھَي ھانَ ٿي اَڃون توڻي ڌن ڀيڙو ڪرڻ ۾ لاگوڙا ھو؟ 4 جوئو، جڪو مزُورِي ٿون آپرِي لالچ ۾ مزُور نَي ڪونھي ڏينِي اوج ٿونرَي خلاف گواھِي ڏَي پڙِي ھانَ مزُورون رِي دانھن پرميشوَر توڻي پُگِي ھَي۔ 5 ٿي جگت ۾ عيش ھانَ موج ݾون رھيا ھانَ آپنَي اِيئون تيار ڪيئو ڪہ جھڙو ڪَي جِنار نَي کݪائي پياڙي باڍڻ رَي ݾارُو تيار ڪيئو جاوَي ھَي۔ 6 ٿون اھڙَي نيڪ مِنکون نَي ڏوھاري ڪري مرايا جڪو ٿونرو مُقابلو ڪري ڪونھي ݾگھتا۔صبر ھانَ وِشواس ݾون پراٿنا
7 اي وِشواسيون، ٿي صبر ݾون پرڀُو يسُوع رَي آوڻ رو اِنتظار ڪرو جھڙَي نمُونَي ھيڪ ھاݪِي ݾِياݪَي ھانَ اُوناݪَي آݪِي پوک نَي پوکڻ رَي ݾارُو صبر ݾون مي رو اِنتظار ڪرَي ھَي ڪہ او ٽيم تي ݾُٺِي پوک باڍي ݾگھَي۔ 8 اِيئي نمُونَي ٿي ڀِي صبر ڪرو ھانَ حوصلو راکو ڪيونڪہ پرڀُو يسُوع رَي آوڻ رو ٽيم نيڙڪو ھَي۔
9 اي وِشواسيون، ھيڪَي ٻيجَي تي الزوم نِي لگائو ڪہ ٿي سزا ݾون بچي جائو۔ جوئو، اِنصاف ڪرڻ آݪو ڇيڪو آوڻ آݪو ھَي۔ 10 اي وِشواسيون، اُوئون نبيون آݪِي ڪار بو جڪون پرميشوَر رو پرچار ڪيئو ھانَ صبر ݾون ڏُک برداش ڪيئا۔ 11 جوئو، صبر ݾون ڏُک برداش ڪرڻ آݪون نَي آپي برڪت آݪا ڪونھ ھو۔ ٿون ايُوب رَي صبر رَي بارَي ۾ ݾُڻيو ھَي ھانَ اَي ڀِي خبر ھَي ڪہ ايشوَر اُوئي رَي ݾارُو ڪِي ڪونھي ڪيئو۔ اِيئي بات ݾون اَي خبر پڙَي ھَي ڪہ پرميشوَر دايالُو ھانَ رحم ڪرڻ آݪو ھَي۔
12 اي پيارَي وِشواسيون، خاص بات اَي ھَي ڪہ ݾونݾ نِي ليئو، نِي آڪاش رو، نِي ڌرتي رو ھانَ نِي ڪَي ٻيجِي شئي رو، پڻ ھاوي رِي جگھا ھاوي، نا رِي جگھا نا ڪيوَڻ کپَي ڪہ ٿي سزا ݾون بچي جائو۔
13 جي ٿون ۾ ڪو مُصيبت ۾ ھَي، تو او پراٿنا ڪرَي۔ جي ڪو خُوش ھَي، تو او ايشوَر رِي مھما را ڀجن گاوَي۔ 14 جي ٿون ۾ ڪو بيمار ھَي، تو او وِشواسي مَنڊلِي را اَگووڻ اَڻاوَي ڪہ او پرميشوَر رَي نون ݾون بيمار تي تيل مکي اُوئي رَي ݾارُو پراٿنا ڪرَي۔ 15 جڪو پراٿنا وِشواس ݾون ڪِي جاشَي، تو اُوئي ݾون بيمار بچي جاشَي ھانَ پرميشوَر اُوئي نَي ݾَڦا ݾاجو ڪرشَي ھانَ جي اُوئي ڪو پاپ ڪيئا ھوشَي، تو او ڀِي معاف ھوئي جاشَي۔ 16 اِيئي رَي ڪري ھيڪَي ٻيجَي رَي رُوبرو آپرَي پاپون رو اِقرار ڪرو ھانَ ھيڪَي ٻيجَي رَي ݾارُو پراٿنا ڪرو ڪہ ٿونَي شفا ملَي۔ نيڪ مِنک رِي پراٿنا ݾون گھڻو ڪئين ھوئي ݾگھَي ھَي۔ 17 ايلياھ نبِي ڀِي آپون جھڙو اِنسون ھتو۔ جڏي اُوئي وِشواس ݾون پراٿنا ڪِي ڪہ مي نِي برݾَي، تو ݾاڍِي تين ݾال ڌرتي تي مي ڪونھي برݾيو۔ 18 پَڇي اُوئي ڀڙي پراٿنا ڪِي ڪہ مي برݾَي، تو ايشوَر مي برݾايو ھانَ زمين تي پوک ھوئِي۔
ھميشا رِي موت ݾون بچاوڻ