صحيح ݾِکيا رَي بارَي ۾ ھدايت
2
تُو صحيح ݾيکيوڙَي باتون مِنکون نَي ݾيکا۔ 2 ڏوڪرون نَي ݾمجھا ڪہ او آپرو آپنَي ڪاٻُو راکَي، اُوئون رو ڪِردار اھڙو ھووَي ڪہ مِنک اُوئون رِي عِزت ڪرَي، او ݾمجھدار ھووَي، وِشواس راکڻ آݪا، پريم راکڻ آݪا ھانَ صبر ڪرڻ ۾ مضبُوط ھووَي۔3 اِيئي نمُونَي ڏوڪريون نَي ڀِي ݾمجھا ڪہ اُوئون رو ڪِردار ايشوَر رِي مرضِي تي ھووَي۔ او الزوم لگاوڻ آݪَي جون شرابِي نِي ھووَي پڻ ݾُٺَي باتون ݾيکاوڻ آݪَي ھووَي 4 ڪہ او نوجوان لُگايون نَي ݾمجھاوَي ڪہ آپرَي ڌڻِي ھانَ آپرَي ٻاݪون ݾون پريم ڪرَي۔ 5 او ݾمجھدار ھووَي، اُوئون رو ڪِردار ݾُٺو ھووَي، آپرو گھر ݾنڀالڻ آݪَي ھووَي، مھربون ھانَ آپرَي ڌڻِي رَي ڪيوَڻ ۾ رَي۔ جي او اھڙَي ھوشَي، تو ڪو ڀِي ايشوَر رَي شُٻڌ رَي خلاف بات ڪونھي ڪرَي۔
6 نوجوان آڏميون نَي ڀِي ݾمجھا ڪہ او ݾمجھداري ݾون بيتا رَي۔ 7 تُو آپ ݾجَي باتون ۾ نيڪِي ڪر ھانَ اُوئون رَي ݾارُو ݾُٺو نمُونو ھو۔ ٿارَي ݾيکاوڻ ݾون خبر پڙَي ڪہ تُو ݾاچو ھَي ھانَ مِنک ٿارِي عِزت ڪرَي۔ 8 اھڙَي صحيح باتون ݾُڻا ڪہ ڪو ڀِي اُوئون باتون نَي بيڪار نِي ڪَي ڪہ مُخالفت ڪرڻ آݪا آپون تي ڪو ڀِي الزوم نِي لگاوَي ھانَ او شرميدا ھووَي۔
9 غُلومون نَي ݾمجھا ڪہ او آپرَي مالڪ رَي ڪيوَڻ ۾ رَي ھانَ ݾجَي باتون ۾ اُوئون نَي خُوش راکَي ھانَ اُوئون رَي ڪَي ڀِي حُڪم رو اِنڪار نِي ڪرَي۔ 10 چورِي نِي ڪرَي پڻ ھر نمُونَي آپرو آپنَي ݾُٺا ھانَ وفادار ثابت ڪرَي ڪہ او آپڻَي مُگتي داتا ايشوَر رَي ݾيکايوڙَي باتون رِي عِزت بڌاوَي۔
11 ڪيونڪہ ايشوَر رِي او ڪِرپا ظاھر ھوئِي ھَي جڪَي ݾون ݾجون نَي مُگتي ملَي ھَي۔ 12 او ڪِرپا آپون نَي اَي ݾيکاوَي ھَي ڪہ ايشوَر رِي مرضِي تي بون ھانَ دُنياوِي خواھشون ڇوڙون ھانَ آپي اِيئي جگت ۾ ݾمجھداري، ݾچائي ھانَ نيڪِي ݾون رون۔ 13 اُوئي برڪت آݪِي اُميد يعني آپڻَي مھانَ ايشوَر ھانَ مُگتي داتا يسُوع مَسيح رو مونَ مرتبَي ݾون آوڻ رو اِنتظار ڪرون۔ 14 اُوئي آپڻَي ݾارُو آپرِي جان ڏي آپون نَي مُگتي ڏينِي ڪہ آپون نَي ھر نمُونَي رِي بُڇڙائي ݾون بچاوَي ھانَ آڇا اُوجݪا ڪري آپرَي ݾارُو ھيڪ خاص قوم ٺاوَي جڪو نيڪِي ڪرتا رَي۔ 15 اَي باتون پُورِي اِختياري ݾون ݾيکاوتو رَي۔ مِنکون نَي ھدايت ڪر ھانَ ڇينڀتو رَي۔ ڪو ڀِي ٿنَي گھٽ نِي ݾمجَھي۔