طيطُس 1

طيطُس رَي نون خط

جَئي پرڀُو رِي ھانَ پراٿنا

اَي خط مھَي پولُوس رَي طرفون ھَي جڪو ايشوَر رو شيواداري ھانَ يسُوع مَسيح رو سنت ھون۔ ايشوَر مھنَي اِيئي رَي ڪري چُونڊيو ھَي ڪہ ھُون ايشوَر رَي چُونڊيوڙَي مِنکون رو وِشواس بڌائُون ھانَ اُوئون نَي ݾاچ رو پُورو گيونَ ݾُڻائُون ڪہ او ايشوَر رِي مرضِي تي بيتا رَي۔ ‏2 اُوئون نَي اَمر جيوَن مِلڻ رو پڪو ڀروسو ھووَي۔ ايشوَر جڪو ڪڏي ڀِي ڪُوڙ ڪونھي ٻولتو، اُوئي جگت ٺاوڻ ݾون پيل اَمر جيوَن ڏيوَڻ رو واعدو ڪيئو ھتو۔ ‏3 ايشوَر آپرو نياپو صحيح ٽيم تي مِنکون تي ظاھر ڪيئو ھانَ ھمَي اُوئي نياپَي رو پرچار ڪرڻ رو ڪوم آپڻَي مُگتي داتا ايشوَر رَي حُڪم تي مھارَي حوالي ڪيئوڙو ھَي۔

‏4 اَي خط طيطُس رَي نون ھَي جڪو وِشواس راکڻ رَي ڪري مھارَي ݾگَي ڏيڪرَي آݪِي ڪار ھَي۔ ايشوَر پِتا ھانَ آپڻَي مُگتي داتا مَسيح يسُوع رِي ڪِرپا ھانَ ݾُک ٿَي تي ھوتو رَي۔

ڪريتَي ٻيٽ ۾ طيطُس رو پرچار

‏5 مھَي ٿنَي ڪريتَي ٻيٽ ۾ اِيئي رَي ڪري ڇوڙيو ھتو ڪہ جڪو باتون رئَي ھَي تُو او باتون صحيح ڪرَي ھانَ ھر شھر ۾ وِشواسي مَنڊلِي رَي ݾارُو اَگووڻ راکَي جھڙَي نمُونَي مھَي ٿنَي ڪھيو ھتو۔

‏6 اَگووڻ تي ڪو ڀِي الزوم نِي ھووَي ھانَ او آپرِي لُگائِي ݾون وفادار ھووَي۔ اُوئي را ٻاݪ وِشواسي ھووَي ھانَ اُوئون تي عياشِي جون نافرمونِي رو الزوم نِي ھووَي۔ ‏7 ايشوَر رِي وِشواسي مَنڊلِي رِي ݾنڀال ڪرڻ آݪَي تي ڪو ڀِي الزوم نِي ھووَي، نِي او مگرُور ھووَي، نِي ريݾ آݪو، نِي نشو ڪرَي، نِي مارا ڪُوٽو ڪرڻ آݪو ھانَ نِي لالچي ھووَي۔ ‏8 پڻ او مھمان نواز، نيڪِي ݾون پريم ڪرڻ آݪو، آپ تي ڪاٻُو راکڻ آݪو، ݾاچو، نيڪ ھانَ اصُول آݪو ھووَي۔ ‏9 او وِشواس رَي بارَي ۾ ݾيکايوڙَي باتون تي پڪو رَي ڪہ صحيح نمُونَي ݾيکاوَي ھانَ ھدايت ڀِي ڪري ݾگھَي ھانَ مُخالفت ڪرڻ آݪون نَي ݾمجھائي ڀِي ݾگھَي۔

‏10 تموم گھڻا مِنک نافرمون ھَي جڪو بيڪار باتون ڪري مِنکون نَي دوکو ڏَي ھَي خاص ڪري او جڪو يھُوديون ۾ ھَي ھانَ کَتنو ڪراوڻ رَي ݾارُو ڪَي ھَي۔ ‏11 اُوئون رو مونڏو بند ڪرڻ کپَي ڪيونڪہ اھڙا مِنک آپرَي فائدَي رَي ݾارُو اھڙَي غلط باتون ݾيکاوَي ھَي جڪَي ݾون گھرون را گھر برباد ھوئي جاوَي ھَي۔ ‏12 ڪريتَي ٻيٽ ۾ اُوئون رَي ھيڪَي خاص نبِي ڪھيو ھَي ڪہ،

”ڪريتَي را مِنک ھميشا ڪُوڙا،

جھنگلِي جِنار، سُست ھانَ کائُو ھَي۔“

‏13 اَي گواھِي ݾاچِي ھَي اِيئي رَي ڪري تُو اُوئون نَي سختِي ݾون ݾمجھاوتو رَي ڪہ او صحيح وِشواس راکَي۔ ‏14 او يھُوديون رَي ڪُوڙَي باتون جون اُوئون رَي حُڪمون تي ڌھيون نِي لگاوَي جڪو ݾاچ ݾون ڦِري گيا ھَي۔ ‏15 جڪون را من آڇا اُوجݪا ھَي اُوئون رَي ݾارُو ݾجَي شيون پويتر ھَي پڻ جڪون را من پليت ھَي ھانَ وِشواس ڪونھي راکتا، تو اُوئون رَي ݾارُو ڪو ڀِي شئي پويتر ڪونھي ھَي۔ حقيقت ۾ اُوئون را من ھانَ دِماگ ٻيئي پليت ھوئي گيا ھَي۔ ‏16 او آپ ڪَي ھَي ڪہ، ”مھي ايشوَر نَي اوݪکون ھون۔“ پڻ اُوئون رَي ڪومون ݾون خبر پڙَي ھَي ڪہ اُوئون نَي ڪو ڀِي خبر ڪونھي ڪيونڪہ او نفرت رَي لائق، نافرمون ھانَ ڪَي ڀِي نيڪِي ڪرڻ جھڙا ڪونھي ھَي۔