آخري زمونو
3
ياد راک، آخري زمونَي ۾ ڏُکيا ڏِن آشَي 2 ڪيونڪہ مِنک مطلبي، رُپيون را لالچي، بڏائو ڪرڻ آݪا، مگرُور، گِلا خور، ما ٻاپ را نافرمون، نا شُڪرا، ايشوَر را نافرمون، 3 پريم ݾون خالي، بي رحم، الزوم لگاوڻ آݪا، آپ تي ڪاٻُو نِي راکڻ آݪا، ظُلمي، نيڪِي را دُشمن، 4 دوکو ڏيوَڻ آݪا، لاپرواھ، آڪڙ ڪرڻ آݪا، ايشوَر رو پريم ڇوڙي عيش عِشرت ڪرڻ آݪا ھوشَي۔ 5 او آپنَي نيڪ بتاشَي پڻ ايشوَر رِي مرضِي تي بيوَڻ آݪا ڪونھي ھووَي۔ اھڙَي مِنکون ݾون اݪگو رئي۔ 6 اِيئون ۾ ڪئينڪہ مِنک ھَي جڪو لِڪي گھرون ۾ جاوَي ھَي۔ او اُوئون بي عقل لُگايون نَي ڦݾاوَي ھَي جڪو آپرَي پاپون رَي ڪري پريشون رَي ھَي ھانَ ھر نمُونَي رَي بُڇڙَي خواھشون ۾ ڦاٿوڙَي ھووَي ھَي۔ 7 او ھميشا نُوئَي نُوئَي باتون ݾيکڻ رِي ڪوشش تو ڪرَي ھَي، پڻ ݾاچ نَي ڪڏي ڀِي اوݪکي ڪونھي ݾگھتَي۔ 8 جھڙَي نمُونَي ٻيئون مِصري جادُوگرون ينيس ھانَ يمبريس مُوسيٰ رِي مُخالفت ڪِي ھتِي اُوئيج نمُونَي اَي مِنک ڀِي ݾاچ رِي مُخالفت ڪرَي ھَي۔ اِيئون مِنکون رِي عقل خراب ھوئِي رِي ھانَ اُوئون رو وِشواس قبُول ڪرڻ جھڙو ڪونھي۔ 9 پڻ اَي مِنک آگھي بڌي ڪونھي ݾگھَي ڪيونڪہ اُوئون رِي بي وقوفي ݾجَي مِنکون تي ظاھر ھوئي جاشَي جھڙَي نمُونَي اُوئون ٻيئون جادُوگرون رِي ھوئي ھتِي۔آخري ھدايت
10 ٿَي ݾيکڻ ۾، ڪِردار ۾، اِرادَي ۾، وفادارِي ۾، برداش ۾، پريم ۾، صبر ۾ ھانَ پڪو ريوَڻ ۾ مھارِي بات منِي ھَي۔ 11 اِيئي ݾون ٽاݪ ٿنَي خبر ھَي ڪہ انطاڪيا، اڪنيم ھانَ لُسترا شھرون ۾ مھنَي ڪھڙَي نمُونَي تنگ ڪيئو ھانَ مھَي ڪھڙا ڪھڙا ڏُک برداش ڪيئا۔ مھَي تموم گھڻا ڏُک برداش ڪيئا پڻ پرڀُو مھنَي اُوئون ݾجون ݾون ڇوڙايو۔ 12 حقيقت ۾ جڪو ڀِي مَسيح يسُوع رِي مرضِي تي نيڪ زندگِي گُذارڻ رِي خواھش راکَي ھَي، تو او ݾجائِي تنگ ڪيئا جاشَي، 13 جڏي ڪہ بُڇڙا ھانَ دوکو ڏيوَڻ آݪا ٻيجون نَي دوکو ڏي ھانَ دوکو کائي آپ خراب ھوتا جاشَي۔
14 پڻ تُو اُوئون باتون تي پڪو رَي جڪو ٿَي ݾيکئَي ھَي ھانَ جڪون رو ٿنَي ڀروسو ھَي ڪيونڪہ تُو اُوئون مِنکون نَي اوݪکَي ھَي جڪون ݾون ٿَي اَي باتون ݾيکئَي ھَي۔ 15 ٿنَي نِنئي ٿڪَي ݾون ايشوَر رَي شاستر رَي باتون رِي خبر ھَي جڪَي ݾون ٿنَي ݾمجھ ملَي ھَي ڪہ مُگتي تو مَسيح يسُوع تي وِشواس راکڻ ݾون ملَي ھَي۔ 16 پويتر شاستر رِي ھر ھيڪ بات ايشوَر رَي طرفون ھَي، او ݾيکاوڻ، ڇينڀي ݾمجھاوڻ، ݾُڌارڻ ھانَ نيڪ ڪومون رِي تربيت ڪرڻ ۾ فائدَي آݪَي ھَي، 17 ڪہ ايشوَر را مِنک ڪامل ھووَي ھانَ ھر ھيڪ نيڪ ڪوم رَي ݾارُو پُورَي نمُونَي تيار ھوئي جاوَي۔