4
ھُون ايشوَر ھانَ مَسيح يسُوع نَي گواھ ٺائي، جڪو ڀڙي آشَي ھانَ بادشاھ ھوئي جيتون ھانَ مُوئوڙون رو اِنصاف ڪرشَي، ٿنَي ھدايت ڪرون ھون 2 ڪہ تُو مَسيح رِي خُوشِي رِي خبر رو پرچار ڪرتو رَي۔ ھر ٽيم تيار رَي، ھر نمُونَي رَي صبر ݾون ݾيکاوتو ھانَ ݾمجھاوتو رَي ھانَ سختِي ݾون ھدايت ڪرڻ ڀيڙو اُوئون نَي ھِمت ڀِي ڏيتو رَي۔ 3 ڪيونڪہ اھڙو ٽيم آشَي جڏي مِنک صحيح ݾيکايوڙَي باتون برداش ڪونھي ڪرَي پڻ آپرَي بُڇڙَي خواھشون پُورَي ڪرڻ رَي ݾارُو اھڙا اُستاد ڀيڙا ڪرشَي ڪہ او اُوئون نَي اھڙَي باتون ݾيکاوَي جھڙِي اُوئون رِي مرضِي ھَي ڪہ ݾُڻَي۔ 4 او ݾاچ ݾُڻڻ ڇوڙي ڪُوڙَي باتون تي ڌھيون لگاشَي۔ 5 اِيئي رَي ڪري تُو ݾجَي باتون ۾ ھوشيار رَي، ڏُک برداش ڪر، خُوشِي رِي خبر رو پرچار ڪرتو رَي ھانَ آپرو شيوا رو ڪوم ذميوارِي ݾون پُورو ڪر۔6 باقي رئِي مھارِي بات، تو ھمَي ھُون ٻَليدون ھوئڻ رَي ݾارُو تيار ھون ھانَ مھارو اَي جگت ڇوڙڻ رو ٽيم آيو رو۔ 7 ھُون ڀلِي مَلھ بِڙھيو رو، مھارو ناݾڻ پُورو ھويو ھانَ ھُون ايشوَر ݾون وفادار رھيو۔ 8 ھمَي مھارَي ݾارُو ݾچائي رو تاج راکيوڙو ھَي۔ پرڀُو يسُوع جڪو اِنصاف ݾون فيصلو ڪرَي ھَي، او آپرَي آوڻ آݪَي ڏِن مھنَي او تاج ڏيشَي۔ نِي رُگو مھنَي پڻ اُوئون ݾجون نَي ڀِي جڪو اُوئي رَي پاڇَي آوڻ رِي ݾِڪ ۾ ھَي۔
9 مھَي ڪڍي ڇيڪو آوڻ رِي ڪوشش ڪر، 10 ڪيونڪہ ديماس اِيئي دُنياوِي خواھشون ۾ ڦاݾي مھنَي ڇوڙي گيو ھَي ھانَ او ٿيسلينڪي شھر ڏيݾا گيو ھَي۔ اِيئي ݾون ٽاݪ ڪريسڪينس گِلتيا صُوبَي ڏيݾا گيو ھَي ھانَ طيطُس دلمتيا علائقَي ڏيݾا گيو ھَي۔ 11 رُگو لُوقا مھَي ڪڍي ھَي۔ مرقس نَي آپ ڀيڙو لي آئي ڪيونڪہ ايشوَر رِي شيوا رَي ڪوم ۾ او مھارو ݾُٺو مددگار ھَي۔ 12 تُخِڪُس نَي مھَي اِفسِس شھر ڏيݾا ميليو ھَي۔ 13 جڏي تُو آوَي، تو مھارو جُبو لي آئي جڪو مھَي تروآس شھر ۾ ڪرپُس ڪڍي ڇوڙيو ھتو ھانَ مھارا ڪِتاب ڀِي خاص ڪري چوٻڙَي تي لِکيوڙا طُومار ڀِي لي آئي۔
14 پيتل را ٺيڪر ٺاوڻ آݪَي سڪندر مھَي ݾون تموم گھڻو بُرو ڪيئو۔ پرڀُو اُوئي ݾون ڪومون رو حِساب ليشَي۔ 15 تُو ڀِي اُوئي ݾون ھوشيار رئي ڪيونڪہ اُوئي آپڻَي پرچار رِي تموم گھڻِي مُخالفت ڪِي ھَي۔
16 مھارِي پيلڪِي ݾُنوائِي تي ڪَي ڀِي مھارو ݾاٿ ڪونھي ڏينو پڻ ݾجون مھَي ۾ ھاٿ ڪاڍيا۔ ايشوَر ڪرَي اُوئون ݾون ايشوَر ڪو ڀِي حِساب نِي لَي۔ 17 پڻ پرڀُو مھَي ڀيڙو ھتو ھانَ اُوئي مھنَي طاقت ڏينِي ڪہ مھارَي وسيلَي اُوئي رِي خُوشِي رِي خبر رو پرچار پُورو ھووَي ھانَ ݾجائِي ٻيجِي قوم آݪا اُوئي رِي ݾُڻَي۔ اِيئي نمُونَي ايشوَر مھنَي شينھن رَي موڏَي ݾون ڇوڙايو۔ 18 پرڀُو مھنَي ھر ڀُونڏَي ڪوم ݾون بچاشَي ھانَ آپرِي آڪاشِي بادشاھي ۾ صحيح سلامت پُگاشَي اُوئي رِي بکوڻ ھميشا ھوتِي رَي۔ آمين۔
آخري جَئي پرڀُو رِي ھانَ پراٿنا
19 پرسڪلا ھانَ اَڪولا ھانَ اُنيسفرُس رَي خاندان نَي جَئي پرڀُو رِي ڪھيا۔ 20 اراستُس ڪِرنٿس شھر ۾ رھيو ھانَ تُرفمُس بيمار ھتو اِيئي رَي ڪري مھَي اُوئي نَي ميليتُس شھر ۾ ڇوڙيو۔ 21 تُو ݾِي ݾون پيل مھَي ڪڍي آوڻ رِي ڪوشش ڪر۔ يوبُولس، پودينُس، لينُس، ڪلوديا ھانَ ݾجائِي وِشواسي ٿنَي جَئي پرڀُو رِي ڪَي ھَي۔ 22 پرڀُو ٿارِي آتما ڀيڙو رَي ھانَ ٿون ݾجون ماٿَي ايشوَر رِي ڪِرپا ھوتِي رَي۔